1921 Caa Hadredre Lao Macatre Enehila

“NEMENE la huliwa ka sisitria nyine tro sa kuca ngöne la macatre ka calemi?” Celë hi lai hnying hna qaja kowe la Itretre Ini Tusi Hmitrötr ngöne la Ita Ne Thup ne 1 Januare 1921. Thupene lai, hna xome la Isaia 61:1, 2 matre troa sa lai hnying, me amekunë angatr la hnëqa i angatr troa cainöj. Kola hape: “Hnei Iehova hna sië ni troa cainöjëne la maca ka loi kowe la ite ka aköt . . . , troa amamane la macate ne madi Iehova, memine la drai ne nyi thupene hnene la Akötesi shë.”

TROA CATRE CAINÖJ

Loi e tro la Itretre Ini Tusi Hmitrötr a catr matre troa cainöj. Tha angatre hmekuje kö a “cainöjëne la maca ka loi kowe la ite ka aköt,” ngo angatre fe a qaja kowe la itre atr ka ngazo “la drai ne nyi thupene” Akötresie.

Hnei trejin John Hoskin, hna catre cainöj e Canada, ngacama kola icilekeu. Thupene lo 1921, hnei nyidrëti hna iöhnyi memine la ketre hnamiatr me hape: “Loi e tro sa ce ithanatane la itre mekun qa hnine la Tusi Hmitrötr. Maine ka isazikeu la itre mekun hnei nyiso hna ce thawa, tha tro kö nyiso a iwesitrë. Ngo tro pe sa isa ijei.” Öni trejin Hoskin: “Tha qea ju kö la porotrike i nyio, nge kolo ha hna la qëhnelö, kösë kola troa tranyi ni hnene lai qëhnelö.”

Önine lai hnamiatr: “Tro jë epuni a troa wang la itre ka thatre Akötresie!” Pëkö hna qaja hnei trejin Hoskin, ngo aja i nyidrë troa sa ka hape: ‘Celë hi la hnenge hna kuca!’

Ame la drai thupen, hnene lo hnamiatr hna cile fë cainöj ngöne la uma hmitrötr, ngo elëhni palakö nyidrë. Öni trejin Hoskin: “Hnei nyidrëti hna hmekëne la itre atr ka hape, eni la ketre atr ka huliwa atrekënö ngöne la traon. Nge loi e troa humuthi ni.” Ngo tha hnei trejin Hoskin kö hna xou. Hnei nyidrëti pe hna catre cainöj nge hetre thangane la huliwa i nyidrë. Öni nyidrë: “Thatreine kö ni qaja la madrineng ngöne la hna cainöj. Öni itre xan: ‘Xecie koi hun laka, nyipëti hi la hna upe hnei Akötresie!’ Nge hnei angatre fe hna thupë ni.”

INI TUSI CAAS ME HMI NE LA FAMI

Hnene la Itretre Ini Tusi Hmitrötr hna hnëkëne la lue porogarame ne Ini Tusi Hmitrötr, matre xatuane la itre atr ka ajan. Hna fejane la lue porogaram cili ngöne la zonal hna hën enehila ka hape, Hmeke jë! Jëne la porogaram hna hape, “Ini Tusi Thatraqane La Itre Thöth!,” itre kem me thin a ce ithanatane memine la itre nekö i angatr la itre mekun qa hnine la Tusi Hmitrötr. Angatr a pane “hnying kowe la itre nekönatr nge thupene lai, angatr a xatua nyudreni troa ithel e hnine la Tusi Hmitrötr.” Ka hmaloi hi troa sa la itre hnying, tune la hna hape, “Ije itusi e hnine la Tusi Hmitrötr?” Ame la itre xaa hnying, kola hnëkëne la itre thöth matre tha tro kö nyudreni a xou troa cainöj, tune la hna hape, “Hapeu, tro kö a icilekeu me qanangazone la itre nyipi Keresiano?”

Ame la hnaaluene porogaram ke, “Étude approfondie du Divin plan des Âges.” Hna hnëkëne la porogaram cili thatraqane la itre Keresiano ka atre hnyawa ha la Tusi Hmitrötr. Hna xome la itre hnying me itre xaa mekun qa ngöne lo pane tusi Études des Écritures. Eje hi, alanyimu la ka kepe eloine qa ngöne la lue porogaram cili. Ngazo pe, hna qaja ngöne la zonal (hna hën enehila), Hmeke jë! ne 21 Diseba 1921 ka hape, tha tro hmaca kö a fejane la lue porogaram cili. Pine nemen?

ITUSI KA HNYIPIXE!

Itus hna hape, *La Harpe de Dieu*

Ketre sine pepa hna cinyanyine la itre xötr nyine troa e

Itre sine pepa hna sija la itre hnying

Hnene la itre trejin ka elemekene la huliwa ne la Itretre Ini Tusi Hmitrötr hna öhn laka, nyipiewekë troa ini tusi kowe la itre atr. Celë hi matre, ame lo Nofeba 1921, hnei angatr hna fejane (ngöne qene Papale) la itus, “La Harpe de Dieu.” Ame la itre atr a kapa la itus, angatre fe ha nyiqane ini Tusi Hmitrötr. Hna kuca la itusi cili matre xatua angatr troa ini tusi caas, me öhne “la hna troa kuca hnei Akötresie, matre hamën la mel ka pë pun kowe la itre atr.” Tune kaa la aqane trongene la ini tusi cili?

Ame la kola hamëne la itus kowe la atr, kolo hmaca hamëne koi angeic la ketre pepa ka qaja la itre mekene tus nyine tro angeic a e. Thupene la caa wiik, kolo hmaca a hamë angeic la ketre sine pepa hna sija la itre hnying, göne la itre mekene tusi hna e. Nge hna sija fe la itre xaa mekene tusi nyine troa e ngöne la ketre wiik.

Ame ngöne la 12 lao wiik, itre trejin ne la ekalesia a iupi fë la itre sine pepa kowe la ka ini tus. Itre trejin ka qatre hë la ka iupi fë la itre pepa cili jëne poste ke, thatreine kö angatr cainöj ngöne la itre hnalapa trootro. Öni Anna Gardner, ketre trejin qa Etazini: “Ame lo kola fejane la itus, “La Harpe de Dieu” ke, hna upi Thayle, sipu trejin me eni ka sinatr, troa iupi fë kowe la itre atr la itre sine pepa ka hetre hnying.” Thupene la hna sa asë la itre hnying hnene lai atr, eahuni a wai angeic matre sipone troa ini Tusi Hmitrötr.

THA HNA UMUTHE PALAKÖ LA HULIWA

Ame hë la pune la macatre, hnei Joseph Rutherford hna iupi fë la ketre tusi kowe la nöjei ekalesia, me hape: “Ame la macatre celë, tru catre la huliwa hna kuca ngöne la hna cainöj nge hetre thangane catr.” Öni nyidrëti fe: “Ngo hetre huliwa së palakö. Ithuecatre jë kowe la itre atr troa hane sine la huliwa cili ne iamele nge ka sisitria catr.” Hnene la Itretre Ini Tusi Hmitrötr hna trongëne la hna qaja hnei nyidrë. Ame la macatre 1922, hnei angatr hna catre cainöjëne la maca ka loi ne la Baselaia.

Itre Sinee Ka Mele Nyipici Me Catr

Itretre Ini Tusi Hmitrötr a amamane la ihnimi angatr me xatua itre xan. Tune la hne së hna troa ce wang, itre sinee ka mele nyipici me catr angatr, nge itre ‘trejin ngöne la itre ijine akötr.’—Ite edomë 17:17.

Ame lo Draiangedic 31 Mei 1921, hna isi e Tulsa (Etazini), lo hna hën e thupen ka hape, “le massacre de Tulsa.” Hna othe la ketre trahmany ka wetrewetr ke, hna upezö angeic ka hape, hnei angeic hna qanangazone la ketre föe kamadra. E cili, hna sasaithe la 1 000 lao kamadra ka isi memine la itre ka wetrewetr, ngacama ala xalaithe hi angatr. Hnei angatr hna isi uti hë e Greenwood, ketre götrane hna lapa hnei itre ka wetrewetr. Ame e cili, 1 400 lao hnalapa me setroa hna thë me atrekënö me li manith. Öni angatr ka hape, 36 lao atr ka mec. Ngo hna sasaithe la itre hadredre lao ka meci ngöne la drai cili.

Öni Richard Hill, ketre trejin ka wetrewetr ka lapa e Greenwood: “Ame lo jidri cili, hne huni hna icasikeu tune lo hne huni hna majemin. Ame hë la eahuni a nyipun, eahuni a drenge la kola keciqa. Ketre tune lo eahuni a isa meköl.” Ame lo hmakanyi ne Draihnacian 1 Juun ke, kolo palahi a ngazo catre la isi. Öni trejin Hill: “Hnei itre xan hna upi huni troa kötr me zae e hnine la ketre uma ka tru i mus.” E cili, hnei trejin Hill me föe i nyidrë memine la 5 lao nekö i nyidro hna kötr kowe la uma cili. Traqa koi 3 000 lao atr ka wetrewetr ka zae e cili, nge hna upe la itre sooc troa thupë angatr me acilëne la isi.

Ame fe la ijine cili, hnei Arthur Claus, ketre trejin kamadra, hna catr. Öni nyidrë: “Ame la eni a atre laka, kola isi e Greenwood, nge kola thë me li manith la itre uma, hnenge hna canga tro troa wai Richard.”

Trejin Arthur Claus a inine la 14 lao nekönatr jëne la itus, La Harpe de Dieu

Ame la trejin Claus a traqa ngöne la hnalapa i trejine Hill, nyidrëti a öhne la ketre trahmanyi kamadra ka lapa ezi trejin Hill, nge angeic a cile fë kuqa. Angeic a mekun laka, ketre atr ka isi trejin Claus. E cili, hnei angeic hna sue ka hape: “Nyipëti a ue cili?”

Öni trejin Claus: “Maine tha sa hnyawa ju kö ni, tro hë nyidrëti a kuqanyi ni. Öning koi angeic ka hape, eni la ketre sinee i trejin Hill, nge hnenge hna lapa traqa ngöne la hnalapa i nyidrë.” E cili, hnei trejin Claus memine lai trahmanyi hna thupëne la hnalapa i trejin Hill.

Thupene lai, hnei trejin Claus hna dreng laka, trejin Hill me hnepe lapa i nyidrë a zae ngöne la uma ka tru i mus. Ngo tha ijije kö troa lö qa cili hnene la itre ka wetrewetr e tha hna pane sija la pepa hnei Barrett, ketre tane isi ka elemekene la itre sooce i mus. Öni trejin Claus: “Tha ka hmaloi kö troa wange la tane isi. Ngo ame la eni a qaja koi nyidrë la mekunang, öni nyidrë: ‘Tro kö nyipëti a thupëne hnyawa Richard Hill me hnepe lapa i nyidrë?’ Hnenge hna kapa madrin la sipo i nyidrë.”

Hnei trejin Claus hna traqa fë lai pepa me amamane kowe la sooc ka thup. Önine lai sooc: “Nyipici, hna sija hnene la tane isi? Atre hi nyipë, nyipëti hi la ka pane alöne la ketre atr qa celë?” Hnei Arthur hna iöhnyi me Richard me hnepe lapa i nyidrë, me bëeke sai angatr hmaca kowe la hnalapa i angatr.

Hnei trejin Arthur Claus hna thupëne hnyawa la mele i trejin Hill me hnepe lapa i nyidrë. Hetre thangane catre la hna kuca hnei trejin Arthur. Alanyimu la ka haine la aqane catr me hnime Arthur la hnepe lapa i Richard Hill. Öni Arthur: “Ame lo trahmanyi ka xatua ni troa thupëne la hnalapa i Richard ke, hnei nyidrëti hna kapa la nyipici. Alanyimu fe la ka hnying göne la Baselaia ke, angatr a öhne laka, tha hnene kö la hane ngönetrei hna sewe huni troa ihnim. Ame ngöne la nöje i Akötresie, pëkö ka sisitria hui itre xan.”