Atre Fe Hi Epun?
Kola anyipicine tune kaa la hna qaja hnei Tusi Hmitrötr, hnene la itre birik hna öhne ngöne lo itre uma ka lapa pe e Babulona?
HNENE la itre ka ithel hna öhne ngöne lo itre uma ka lapa pe e Babulona, la itre milio lao birik hna kuca hnei dro. Öni Robert Koldewey, ketre ka ithel ka hape, hna kuca la itre birik cili e hnine la itre hnaope eë hna amë “e tröne la traon. Ke cili hi, la gaa hetre dro ka fedr me sinöe . . . nyine athi eë.”
Itre atresi ne Babulona a huliwane la itre hnaope eë cili, matre kuca la itre huliwa ka ngazo catr. Öni Paul-Alain Beaulieu, ketre porofesör ne assyriologie ngöne la université ne Toronto, ka hape: “Nyimutre la itre itusi angetre Babulona ka qaja, ka hape . . . hna dreuthe amelene la itre atr ka icilekeu me Joxu, nge ka tha metrötrëne la itre ewekë ka hmitrötr.” Ame ngöne la ketre itus ka hekö ngöne lo hneijine i Nebukaneza Joxu, kola mama la itre hnaewekë celë: “Apatrene triji angatre pi, dreuthe triji angatre pi, nge atronyi angatre pi, . . . ngöne la hnaope hnë kuci xen . . . Epi tro la so ne eë i angatr a elë, nge troa dreuthi angatr utihë la angatr a hnatresij.”
Kola amekunë së lo hna qaja ngöne Daniela mekene 3. Thenge la hna qaja hnei Tusi Hmitrötr, hnei Nebukaneza Joxu hna acilëne la ketre hnasaatr gool tröne la traon e Babulona, ngöne la hnapapa e Dura. Hnene la köni nekötrahmanyi ne Heberu, ene Saderaka, me Mesaka, me Abedenego hna xel ma thil kowe la hnasaatre cili. Matre elëhni catre Nebukaneza. Hnei nyidrëti hna kuië angatr e “hnine la hnaope ka mele hnei eë,” nge troa “a [7] la o aideuthine la hnaope hune la hna majemi deuth’ ej.” Ngo hna amele angatr hnene la ketre angela.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Hane hi la ketre birik hna cinyanyine la ëje i Nebukaneza
Kolo fe a anyipicine la hna qaja hnei Tusi Hmitrötr, hnene la itre birik. Hna cinyanyine ngöne la itre birik cili, la itre trengewekë nyine atrunyi joxu. Hane hi la hna cinyanyine ngöne la ketre birik: “Nebukaneza, Joxu ne Babulona . . . Hnenge hna xupe la umang, nyine atrune la lolong . . . Epi troa cile hut la musing.” Itre trengewekë la, ka amekunë së lo hna qaja hnei Nebukaneza ngöne Daniela 4:30. Öni nyidrë: “Tha Babulona ka tru la lo hnenge hna xupe nyine uma ne la baselaia hnene la menenge ka cat, nyine atrune la lolong?”