Iesu La Atre Huuj Ka Sisitria Ka Iutipi

1-2. (a) Pine nemen matre hnei Iehova hna upi Iesu a tro celë fen? (b) Nemene la hne së hna troa ce wang ngöne la tane mekune celë? (Heberu 5:7-9)

TRAQA ha koi 2 000 lao macatre enehila, hnei Iehova hna upe la Nekö hnimina i Nyidrë e celë fen. Pine nemen? Matre troa thapa la itre atr qa ngöne la ngazo me mec, me nyinyine la itre jol hna axulun hnei Satana. (Ioa. 3:16; 1 Ioa. 3:8) Ketre, atre hi Iehova laka, tro Iesu a inine troa trotrohnine hnyawa la itre atr, matre troa ketre Atre Huuj Ka Sisitria ka iutipi. Hnei Iesu hna xome la hnëqa cili lo 29 M.K., thupene lo nyidrëti a bapataisoa.

² Ame ngöne la tane mekune celë, tro sa ce wange laka, hnei Iesu hna huliwan hnyawane la utipin me itrotrohni thene la itre atr e celë fen, nge celë hi ka xatua nyidrë troa xome hnyawane la hnëqa ne Atre Huuj Ka Sisitria. Maine tro sa trotrohnine hnyawa lai, tro lai a xatua së troa thith me easenyi Iehova la easa dekurag pine la itre tria së.—E jë la Heberu 5:7-9.

NEKÖ HNIMINA I AKÖTRESIE A TRAQA E CELË FEN

3-4. Nemene la itre ewekë ka saze ngöne la mele i Iesu lo nyidrëti e celë fen?

³ Hapeu, hnei eö kö hna hane nue la fami me itre sinee i eö me traon hnei eö hna mele ngön, matre fek kowe la ketre götran? Alanyimu the së la ka melëne lai. Tha ka hmaloi kö la kola saze la mele së. Nge pane mekune jë la hnei Iesu hna kuca. Nyidrëti la pane Nekö i Iehova, nge ka sisitria nyidrëti e koho hnengödrai. Ketre, nyidrëti la hna hnime catrëne hnei Iehova, nge ka madrine pala hi nyidrë, ke nyidrëti “ngöne la götrane maca” i Iehova. (Sal. 16:11; It. Ed. 8:30) Ngo, Filipi 2:7 a hape, hnei Iesu hna “aipië nyidrëti kö,” me nue la göhnë i nyidrë ka sisitria e hnengödrai, matre troa ce mel memine la itre atr ka tha pexeje kö e celë fen.

⁴ Nge pane mekune jë fe lo itre pane macatre i Iesu, e celë fen. Hna hnaho nyidrë ngöne la ketre fami ka pë mo. Easa atre tune kaa? Hnene la huuj hna tro fë hnene la kem me thine i nyidrë, thupene la kola hnaho nyidrë. (Lev. 12:8; Luka 2:24) Ketre, ame lo Herodra joxu a dreng ka hape, mala ha Iesu, hnei angeic hna thele troa humuthi nyën. Celë hi matre, hnene la fami Iesu hna kötr a tro Aigupito me lapa trenyiwa e cili göi hnepe ijine hi. (Mat. 2:13, 15) Isapengöne catr la mele i Iesu lo nyidrëti e hnengödrai memine la nyidrëti e celë fen!

5. Nemene la hnei Iesu hna öhn lo nyidrëti e celë fen, nge hna hnëkë nyidrë tune kaa troa xome la hnëqa ne Atre Huuj Ka Sisitria? (Wange ju fe la foto.)

⁵ Ame lo Iesu e celë fen, hnei nyidrë hna öhne la itre atr a akötr. Hna hane mecitriji nyidrëti fe hnene la itre sinee i nyidrë, tui Iosefa keme i nyidrë. Nge ame lo nyidrëti a cainöj trootro, hnei nyidrëti hna ixelë memine la itre atr ka lepera, me itre ka timek, me itre ka genyi ca, me itre kem me thin hna mecitrij. Tru catr la hnei nyidrë hna utipi angatr. (Mat. 9:2, 6; 15:30; 20:34; Mar. 1:40, 41; Luka 7:13) Eje hi, hnei nyidrë hna öhne qa hnengödrai la itre atr a akötr. Ngo ame hë la nyidrëti e celë fen, drenge hi nyidrë la akötr ka ej thene la itre atr. (Isa. 53:4) Celë hi ka xatua nyidrë troa atre hnyawa la aliene hni ne la itre atr, me itre akötre i angatr. Nge, hnei Iesu fe hna hane seseu, me kucakuca, me xou, tune la itre atr.

IESU A AKÖTRE LA ITRE ATR A AKÖTR

6. Nemene la ini hne së hna xom qa ngöne la itre ceitune i Isaia perofeta göne la utipine i Iesu? (Isaia 42:3)

⁶ Ame lo Iesu a cainöj trootro, hnei nyidrëti hna utipine la itre ka kucakuca me itre ka pë mo. Nyidrëti e cili a eatrëne la itre hna perofetan. Ame ngöne la Itre Hna Cinyihan qene Heberu, kola aceitunëne la itre atr ka catre lapaun koi Iehova memine la ketre djardë hna fii hnyawan, me itre sinöe ka tru. (Sal. 92:12; Isa. 61:3; Iere. 31:12) Ngo hna aceitunëne pe la itre ka pë mo me itre hna qanangazon, memine la ketre hainy ka pej, me wik ka so nge ka ae trootro. (E jë la Isaia 42:3; Mat. 12:20) Jëne la ua i Iehova, Isaia perofeta a xome la itre ceitune cili, matre qajaqaja la ihnim me utipine hnei Iesu hna troa amamane kowe la itre atr ne la nöj, itre hna wangacon.

7-8. Tune kaa la aqane eatrëne Iesu la hna perofetan hnei Isaia?

⁷ Hnei Mataio hna amexeje la hna qaja hnei Isaia, me qeje Iesu ka hape: “Tha tro kö angeic a hutra la hainy ka pej, nge tha tro kö angeic a apine la wik ka so nge ka ae trootro.” Hnei Iesu hna kuca la itre iamamanyikeu thatraqane la itre hna qanangazon me itre ka hleuhleu, kösë itre ka pej tune la hainy, me ae trootro tune la wik ka so. Hnei nyidrë hna aloine la ketre trahmany ka si lepera. Pane mekune jë la pengöi angeic. Ame koi angeic, aqane lapa i angeic pë lai, nge tha tro hmaca kö angeic a ce mele memine la fami me itre sinee i angeic. (Luka 5:12, 13) Ketre, hnei Iesu hna aloine la ketre simi hnangenyë ka thatreine ithanata hnyawa. Pane mekune jë la aliene hni angeic, la kola porotrik hnene la itre atr, nge tha ijiji angeic kö troa hane sine la porotrike i angatr. (Mar. 7:32, 33) Ngo tha eje hmekuje kö lai.

⁸ Ame ekö, alanyim la angetre Iudra ka mekun ka hape, ka wezipo maine adikape la ketre atr, ke hetre ngazo hnei angeic hna kuca maine qaathei kem me thin. (Ioa. 9:2). Celë hi matre, angatr a mekun ka hape, pëkö eloine i angatr. Ngo ame Iesu, hnei nyidrëti hna aloine la meci ne la itre ka akötr, me aciane hmaca e kuhu hni angatr la mejiun koi Akötreisie. Nyidrëti hi lai a a eatrëne lo hna perofetan hnei Isaia. Nemene la ini koi së?

9. Thenge la Heberu 4:15, 16, nemene la ka amaman laka, Iesu lo Atre Huuj Ka Sisitria a utipine la itre atr ka ngazo?

⁹ E jë la Heberu 4:15, 16. Xecie koi së laka, tro pala hi Iesu a utipi së. Ame la atr ka iutipi, ke angeic a akötr la kola öhn la itre jol ka traqa koi itre xan, memine la angatr a akötr. Ame la hnëewekë qene Geres hna hape, ‘trotrohnine la itre tria së’ ke kola hape, easa ce thawa la hleuhleu me akötre i itre xan. (Wange ju la Heberu 10:34, casi hi la hnëewekë qene Geres hna huliwan hnei Paulo) Kola mama jëne la itre iamamanyikeu i Iesu ka hape, akötre catre nyidrë la itre xan a akötr. Tha nyidrëti hmekuje kö a aloine la itre mec, ke hnëqa i nyidrë. Ngo nyidrëti fe a kuca, ke nyidrë a meku angatr, nge aja i nyidrë troa xatua angatr. Pane mekune jë së lo nyidrëti a aloine la trahmanyi ka si lepera. Maine ju, tro hi nyidrëti a aloinyi angeic qa gaa nany, ngo aja i nyidrëti kö troa ketri angeic. Nge ije macatre hë, nge pëkö ka hane ketri angeic! Nge ame lo atr ka simi hnangenyë, hnei Iesu hna xom aconyi angeic, matre aloinyi angeic ngöne la ketre götran gaa pë mej. Pane mekune jë fe lo föe ka ietra ka köle la lue ca i Iesu hnene la itre trenge timidra i eahlo, me ipene he i eahlo. Hnei Iesu hna isigöli eahlo qëmeken la ketre Faresaio ka methinë eahlo. (Mat. 8:3; Mar. 7:33; Luka 7:44) Tha hnei nyidrëti kö hna xele ma wange la itre ka adikape, maine itre atr ka kuca la itre ngazo ka tru. Ngo hnei nyidrëti pe hna hë angatr, me utipi angatr, me akeukawanyi angatr. Matre xecie koi së laka, tro fe nyidrëti a hane utipi së.

NYITIPUNE JË LA ATRE HUUJ KA SISITRIA

10. Easa xatuane tune kaa la itre ka simi hnyangenyië me itre ka timek enehila? (Goeëne ju fe la itre foto.)

¹⁰ Ame easë itretre drei Iesu, easë a thel troa nyitipu nyidrë: easa hnim la itre atr me utipi angatr, me thele troa trotrohnine la itre akötre i angatr. (1 Pet. 2:21; 3:8) Thatreine kö sa aloine la itre ka simi hnyangenyië me itre timek, ngo ijiji së hi troa xatua angatr troa atre Iehova me easenyi Nyidrë. Ame enehila, hna ujëne la itre itusi së ngöne la 100 lao qene hum. Nge ame kowe la itre ka tha öhne hnyawa kö me itre ka timek, ke hna kuca la itre itusi së ngöne la qene braille ngöne la 60 lao qene hlapa. Ketre, ame ngöne la 100 lao qene hlapa, hetrenyi la itre video laka, hetre ka qejepengöne la hne së hna öhn. Celë hi ka aijijëne la itre ka simi hnyangenyië, me itre ka timek enehila troa easenyi Iehova me Iesu.

11. Kola amamane tune kaa hnene la organizasio i Iehova laka, ej a hnime la nöjei atr tui Iesu? (Itre Huliwa 2:5-7, 33) (Goeëne ju fe la itre foto.)

¹¹ Organizasio i Iehova a ajane troa xatuane la nöjei atr. Thupen la kola amele Iesu hmaca, hnei nyidrë hna nunuëne la uati hmitrötr, matre tro la itre ka traqa e Ierusalema troa sine la Penetekos, a dreng la maca ka loi ngöne la “qene hlapa i angatr.” (E jë la Itre Huliwa 2:5-7, 33.) Nge fene la musi Iesu, organizasio i Iehova a ujëne la itre itusi së ngöne la 1 000 nge hetre munëne lao qene hlapa. Ame la itre xaa qene hlapa, ke ala xalaithe hi la ka ithanatan. Ka tune la itre xaa qene hlapa amérindiennes laka, hna ithanatane hi hnene la ala xalaith e Amérique du Nord me Amérique du Sud. Ngo hna ujëne la itre xaa itusi së ngöne la 160 lao qene hlapa amérindiennes, matre tro asë hi la itre atr ka ithanatane la itre qene hlapa cili, a drenge la maca ka loi. Nyimutre fe la itre itusi së hna ujën ngöne 20 lao qene romani. Alanyimu catr la itre atr ka ithanatane la itre qene hlapa cili ka kapa la nyipici.

12. Nemen la itre xaa hna kuca hnene la organizasio i Iehova kowe la itre atr enehila?

¹² Ketre, tha organizasio i Iehova hmekuje kö a isine troa thawa la maca ka loi, ngo ej fe a xatuane la itre hna ketr hnei hulö. Alanyim la itre trejin ka saen troa xatuane la itre xaa trejin hna ketr hnei hulö. Organizasio fe a isine tro la itre hlue i Iehova a hetre hnë icasikeu, matre tro angatr me itre ka pi atre la nyipici a atrepengöne hnyawa la ihnimi Iehova koi angatr.

TRO LA ATRE HUUJ KA SISITRIA A XATUA SË

13. Tune kaa la aqane xatua së hnei Iesu?

¹³ Iesu atre thup ka lolo, a thupën matre tro pala hi sa hetrenyi la ka nyipiewekë göi troa easenyi Iehova. (Ioa. 10:14; Efe. 4:7) Ame itre xaa ijin, easa dekurag, ke hna tithi së hnei mec, maine hne së hna tria, maine tha eatrëne kö së la ketre mekun, maine hetre iwesitrë së me ketre trejin. Matre e cili, ceitu easë memine la wik ka so me hainy ka pej. Maine jë, thatreine kö së elë hune la akötre së, me mekune la mejiune së. Ngo, the thëthëhmine kö laka, öhne hi Iesu la hnei eö hna melën, nge trotrohnine hi nyidrë la ka ej e kuhu hni eö. Tro la utipine i nyidrë a uku nyidrë troa xatua eö. Jëne la uati hmitrötr, tro nyidrëti a akeukawanyi eö la eö a kucakuca. (Ioa. 16:7; Tito 3:6) Tro fe nyidrëti a upe la itre qatre thup, me itre trejin matre troa ithuecatr me xatua eö.—Efe. 4:8.

14. Nemene la nyine tro sa kuca la easa dekurag?

¹⁴ Maine eö a kucakuca me dekurag, lapa mekune ju la hnëqa i Iesu, lo Atre Huuj Ka Sisitria. The thëthëhmine kö laka, hnei Iehova hna upi Iesu a tro celë fen, matre nyithupene mel. Ngo tha eje hmekuje kö lai, hnei Nyidrëti fe hna upi Iesu matre tro nyidrëti a atreine trotrohnine la itre jol hna melën hnene la itre atr e celë fen. Matre, tru la aja i Iesu troa xatua së. Nge ame la easa dekurag pine la itre ngazo me itre tria së, nyidrëti a xatua së ngöne la “nyipi ijin.”—Heb. 4:15, 16.

15. Nemene la ixatua hna kapa hnei Stefano matre nyi atrene hmaca la ekalesia?

¹⁵ Ketre, Iesu a xatuane la itre hlue i Iehova troa thel me abëekëne la itre ka iananyi me Iehova. (Mat. 18:12, 13) Tro sa ce wange la hna mëlen hnei Stefano.b Hnei angeic hna mekun troa sine hmaca la itre icasikeu, thupen la 12 lao macatre ne upi angeic qa ngöne la ekalesia. Öni angeic, “Eni a hmahma, ngo tru la ajang troa sine hmaca la fami Iehova ka ihnim. Hnene la itre qatre thup ka wai ni hna kepe ni hnyawa. Ame itre xaa ijin, eni a mekun ka hape, tha ka nyipiewekë hmaca kö ni, matre eni a pi nuetriji Iehova. Ngo, hnei angatr hna amekunë ni laka, aja i Iehova me Iesu tro ni a catr. Matre ame la eni a nyi atrene hmaca la ekalesia, ke hnene la itre trejin hna kepe ni hnyawa. Ketre, hnene la föeng hna ini Tus e thupen, nge ame enehila, nyio ha ce nyihlue i Iehova.” Drei jë kö la madrin ne la Atre Huuj Ka Sisitria, la easa xatuane la itre ka ietra troa bëek kowe la ekalesia!

16. Nemene la mekuna i eö, la eö a atre ka hape, ka utipin la Atre Huuj Ka Sisitria?

¹⁶ Ame lo Iesu e celë fen, hnei nyidrëti hna xatuane la itre atr ka alanyim ngöne la nyipi ijin. Matre xecie koi së laka, tro kö nyidrëti a xatua së, la easa aja ixatua. Nge ame ngöne la fen ka hnyipixe, laka easenyi catre hë, tro nyidrëti a eatrongëne la itre atr ka idrengethenge kowe la mel ka pexej, me apatrene la itre thangane la ngazo. Easë a olene koi Iehova la ihnim me utipine i Nyidrë, ke hnei Nyidrëti hna hamëne la Nekö i Nyidrë matre Atre Huuj Ka Sisitria!