Meken 9

Iesu a Nekönatr

HNEI Iesu hna tru e Nazareta, ketre traone ka co catr, nge ka thaa hlemu petre kö ngöne la ijine cili. Eje ngöne la itre hnehlapa gaa draië ne Galilaia, thaa nanyi catre kö qa ngöne la hnapapa ka mingöminge ne Iezerela.

Ame la Iesu a ce traqa me Iosefa me Maria qaa Aigupito, ma lue macatre i nyidrëti petre hi, ke, nyidrëti hmekuje hi la pane nekö i Maria. Ngo thaa hmitre kö matre, mala pi fe Iakobo, me Iosefa, me Simona, me Iuda, memine fe la itre xaa nekö jajiny. Sikisi lao trejine me Iesu, trahmanyi me jajiny.

Nge hetrenyi kö la itre xaa sinee i Iesu. Atre Ioane hë së ketre trejine me nyidrë nekö i lue föe, ka nango tru ju hi Ioane hui Iesu, nge ka mele angeice e Iuda, ketre götrane gaa nanyi qaa Nazareta. Easenyi pena ha koi Salome e Galilaia, trejine nyidro me Maria. Ka faipoipo Salome me Zebedaio; lue nekö i nyidro trahmany, Iakobo me Ioane, itre nekö i föe nyidro me Iesu. Thatre kö së maine jë hnei Iesu hna lapaa hane ce elo memine la lue trejine me nyidrëti cili, ngöne lo kola co, ngo eje hi laka, ame hë la angatre a isa tru, ke angatre pë hë a ce huliwa catr.

Pine laka, kolo pala hi a kökötre la hnepe lapa, nyipi ewekë troa catre huliwa matre troa ithuane la hnepe lapa i nyidrë. Ka tratrau sinöe nyidrë. Iosefa a hetru Iesu kösë sipu nekö i nyidrë, haawe, matre hë nyidrëti ju pë hë ka hape, “neköne la ate tratrau.” Kola ini Iesu hnei Iosefa troa hane tratrau, nge kökötre pi hë nyidrë ngöne la ini hna kapa. Celë hi kepine matre, kolo pë hë a qeje Iesu hnene la itre atr, me hape, “kolo ate tratrau la.”

Hna eköthe la mele ne la hnepe lapa i Iosefa, e hune la hmi Iehova Akötresie. Ngöne laka, nyidroti a melëne la Trenge Wathebo i Akötresie, haawe, Iosefa me Maria a hamëne la xeni ne la ua, ene la ini qaathei Akötresie, kowe la itre nekö i nyidro ‘ngöne la angatre e hnine la uma, me ngöne la kola tro e kuhu gojeny, me ngöne la kola meköle me mejë hmaca.’ Hetre sunago e Nazareta, eje hi laka, hnei Iosefa pala hi hna tro fë la hnepe lapa i nyidrë troa hmi e cili. Ngo ka tru catre pala kö la madrine i angatr, e troa tro kowe la ēnē i Iehova e Ierusalema. Mataio 13:55, 56; 27:56; Mareko 15:40; 6:3; Deuteronomi 6:6-9.

▪ Ije trejine me Iesu trahmanyi me jajiny, ka co hui nyidrë, nge atre fe kö epuni la ëjene la itre xane e angatr?

▪ Drei la köni xaa trejine me Iesu hna atre hnyawa, lo itre neköne la itre trejine me thine i nyidrë?

▪ Nemene la huliwa hnei Iesu hna xom, nge pine nemen?

▪ Nemene la ini ka nyipi ewekë catr, hnei Iosefa hna hamëne kowe la fami nyidrë?