Meken 44
Iesu a Aupune La Ketre Janacasi Ka Tru
DRAI ka pexeje ne inine Iesu la itre atr ngöne la hnangöni, nge thupene lai nyidrëti a qeje pengöne hmekuje lo itre ceitune kowe la itretre drei nyidrë. Nge hejiheji hë, öni nyidrëti koi angatre ka hape: “Tro sha ea kowe la kete götrane la hneopegejë.”
Nango nanyi qa ngöne la hneopegejë ne Galilaia, ngöne la götrane ahië, e cili la ketre götrane hna hape Dekapoli, ëjene ka xulu qa ngöne la qene heleni, deʹka, kola hape “treen,” nge poʹlis, “traon.” Ngacama hna jilapane la itre traone ne la Dekapoli hnei angetre Iudra, ngo musi kö la aqane mele qene heleni ngöne la itre traone cili. Ngo eje hi laka, hna sa ijine pe hi la huliwa ne cainöje i Iesu ngöne la götrane cili. Tune la hne së hna troa wang, tro ha sewe Iesu troa lapa aqeanyi ngöne la nyidrëti a troa iwai ngöne la götrane cili.
Ame la Iesu a amexeje la mekune i nyidrë kowe la itretre dreng, ene la troa tro kowe la ketre götrane la hneopegejë, haawe, angatre a ati nyidrëti jë hune la he. Ngo thaa sihngödri kö koi nöjei atr la tronge i angatr. Celë hi matre, itre xaa atr a canga autine la itre he i angatre me hane ixötrethenge. Thaa nanyi menu ju kö la gojenyi pine laka, ame la hnagejë ne Galilaia, ke thaa ketre hneopegejë ka tru kö, a 20 kilomet hi la eqean, nge 12 kilomet la eisaisane ej.
Trotrohnine hi së laka, kucakuca ha Iesu. Celë hi matre, thaa nanyi pala kö angatre qa ngöne la hnangöni, nge Iesu a saa ju ngöne la ipune la he, me amë la he i nyidrë hune la itane he, me hmulizië. Ala nyimu thene la itre aposetolo lo itre ka majemine huliwa hune la itre he, me nyi ie ngöne la hnagejë ne Galilaia. Haawe, angatre a xomiujine ju la he.
Ngo thaa tro kö a lolo la tronge i angatr. Pine laka, nango idreuthi pi hë la timi hune la hneopegejë, uti hë 200 met fene la hnagejë, ngo ame pe enyi ne itre wetr, ke lepanyi hnin. Qa ngöne lai, ame ngöne la itre xaa ijin, kola hnahna la itre enyi ka tru, matre canga amejëne ju fe hi la itre janacasi ngöne la hneopegejë. Celë hi ewekë lai ka traqa koi angatr. Kolo ha troa lö la he, pine laka kola kaca trane eje hnei gejë nge kolo fe ha lötimine ej. Nge Iesu pala hi a meköl!
Pine laka, itre ka majemine xomi he la itretre dreng, haawe, angatre a kuca asë la hnei angatre hna atreine troa cilëne la he. Ma hna traqa tune fe hë koi angatre la ewekë celë. Ngo ame enehila ke, thatreine hë angatre troa cilëne la he. Haawe, angatre a kötre mel, me ahlë Iesu. Öni angatre ka hape, ‘Atre ini fe, thaa seseu fe kö nyipë? Kolo ha troa lö la he së. Amele së, ke easë hë la a troa nunucili!’
Hlë hë Iesu, ame hnei nyidrëti hna qaja kowe la enyi memine la hnagejë, ka hape: “The ilu kö, humu ju!” Ame hna paatre ju la eny, ene pe haodrai pi hi. Nyidrëti a ujë jë kowe la itretre drei nyidrë me hnyingë angatre ka hape: ‘Ue lae nyipunieti a xou? Hna tune ka laka, pë pala kö lapaune i nyipunie?’
Qëmekene la ewekë celë, kola xou atraqatre la itretre dreng; thaa ceitune kö memine lo itre xaa ijin. Angatre a ithahnatakeu me hape, ‘Drei la atre celë? Nyidrëti a ithahnata kowe la enyi me hnagejë, nge lueje a drei nyidrë.’
Atraqatre la mene i Iesu! Drei la eloine troa atre laka, kola musi fe hnene la joxu së hune la itre ewekë ngöne la fene hna thatreine troa cile kow hnene la itre atr, tune la janacas maine ketre sa ka tru; ketre ame ngöne la nyidrëti a troa ujë kowe la itre atr e celë fen, ngöne lo ijine nyidrëti a troa joxu, tro hë la itre atr a lapa tingeting, thaa tro hmaca kö angatre a xouene la itre ewekë ka traqa kowe la fen, tune lo itre di me itre wene, me itre sa!
Ame hë la kola haodrai hnyawa la hnagejë, Iesu me itretre drei nyidrëti a xepe ngöne la götrane ahië ne la hneopegejë, pëju kö eatre i angatr. Ketre, ma nyimutre jë fe la itre he ka mele ju kö ngacama catrehnine la aqane ufe enyin, nge ma isa bëeke hnyawa ju kö angatre kowe la hna xepe hnei he. Mareko 4:35–5:1; Mataio 8:18, 23-27; Luka 8:22-26.
▪ Nemene la Dekapoli, nge ekaa la götrane cili?
▪ Nemene kepine matre kola traqa la itre janacasi hune la hneopegejë ne Galilaia?
▪ Ngacama itre ka majemine xomi he la itretre drei Iesu, nemene la hnei angatre hna kuca, ngöne la angatre a öhne laka, thatreine hë angatre xomiujine la he?