Iesu a Apëne La Wene Ngöne La Hnagejë

Ase petre hi Iesu huliwa, nge kucakuca catre nyidrë. Matre e hej, öni nyidrë koi itretre drenge: “Tro së kowe la ketre ngönegejë,” ene la götran ka qëmeke koi Kaperenauma.—Mareko 4:35.

Ngöne la götrane kohië ne la Hnagejë Ne Galilaia, hetre ketre traon hna hëne ka hape, Gadara, traon ne la nöje Dekapoli. Ngacama ala nyimu la itretre Iudra ka mel e cili, ngo ketre götrane lai hna jilapane hnene la qenenöj i angetre Geres.

Mama hi la Iesu a tro qa Kaperenauma, matre hnei itre xa he hna ixötrethenge. (Mareko 4:36) Nge tha nyidrëti kö a tro gaa nany, ke ame la Hnagejë Ne Galilaia, tre ka tune la ketre hne tim laka, 21 km hi la eqean, nge 12 km la eisaisan. Ngo ame pe, ka jui catr la hnagejë cili.

Maine nyipici ka hape, atre ka pexeje Iesu, ngo kucakuca catr nyidrë, ke tru catr hnei huliwa. Celë hi matre, ame ju hi la kola nyinyape la he, hnei nyidrëti hna pane saaju, me meköle ngöne la pune he.

Ngacama ka atreine iuji he la itre xa atre drei Iesu, ngo jol catre koi angatr la ijine cili. Eje hi, hetre itre wetr xötreith la Hnagejë Ne Galilaia, matre ka nango pi idreuth la hune tim. Nge e itronyi mina la enyi ka lepanyi qa hune la itre wetr, memine la idreuthine la tim, canga mejë jë hi la itre janacas. Nge celë hi ka traqa. Itre hoke ne gejë a kaca trane la he. Matre “tiqa ju hi la he hnei tim, ene pe, kola ha nyiqaane lö la he.” (Luka 8:23) Ngo ka meköle pala hi Iesu!

Itretre dreng ka majem koi hnagejë a kuca la hnei angatr hna atrein, me isine troa xomiujine la he. Ngo jol pala ha la ijine cili. Nge xoue i angatr hë troa mec, matre angatr a ahlë Iesu jë me hape: “Joxu, wai hun, ka tro hë së la a mec!” (Mataio 8:25) Angatr a xou troa nunucil!

Ame ju hi la Iesu a hlë, öni nyidrë kowe la itretre dreng: “Hnauëne la nyipunieti a xou, itretre lapaun acon?” (Mataio 8:26) Thupene lai, nyidrëti a catrëne jë la enyi me hnagejë, me hape: “Humu ju! The ilu kö!” (Mareko 4:39) Ame hna upu ju la eny, nge haodrai pi. (Hnei Mareko me Luka hna qaja la ijine cili, me qaja atrune la aqane apëne Iesu la wene, nge hna qaja fe e thupen, la aqane lapaun acon la itretre dreng.)

Pane mekune jë la itretre dreng ngöne la ijine cili! Hnei angatr hna öhne la kola aca tro saze la hnagejë, a ka enienij lo, nge haodrai hë. Ame hnei angatre hna xou atraqatr. Matre angatr a ihnyingënekeune jë me hape: “A drei nyidrëti la matre kola drei nyidrë hnene la hnagejë me eny?” Ame hnei angatr hna xep kowe la ketre götran, nge pëkö ca eatre i angatr. (Mareko 4:41–5:1) Nge ame pena itre xa he, ma hnei angatre jë hna bëeke kowe la götrane kuë.

Iakeukawa ka tru la troa atre ka hape, Nekö i Akötresie a musinëne la wene me hnagejë! Nge elany, e musi hë nyidrë kowe la ihnadro, tro hë la nöjei atr a mele tingeting, ke pë hmaca kö hulö!