Meken 55

Nyimutre La Itretre Drenge Ka Xele Ma Xötrethenge Iesu

HNINE la sunago e Kaperenauma, Iesu a qeje pengöne la hnëqa i nyidrë, laka, hna aceitunë nyidrë me areto ne hnengödrai. Maine jë kola sisedrëne hnene la cainöje i nyidrë, la ewekë hna ce ithahnatane hë memine la itre atr ka öhnyi nyidrë ngöne la angatre a bëeke qa ngöne la götrane ahië ne la hneopegejë ne Galilaia; e cili hi lo hna ithuai angatre falawa me öni ie.

Iesu a sisedrëne la itre mekune hna fe hë, me qaja ka hape: “Ame la areto hnenge hna troa hamëne, celë hi ngöneteing, nyine mele ne la fene hnengödrai.” Lue macatre hë la, qaane lo macatre 30 M.K. ngöne hneijine menuë koko, hnei Iesu hna qaja koi Nikodemo ka hape, hnene laka, tru la ihnimi Akötresie kowe la fen, matre nyidrëti a nue pi la hupuna i Nyidrë nyine iamele kowe la itre atr asë. Tune la mekune nyine trotrohnine jëne la aqane wai ewekë ngöne la götrane la ua hnei nyidrëti hna troa qaja enehila, ame asë hi la itre atr ka troa xeni me öni la ngönetrei nyidrë, ene la troa lapaune kowe la mele hnei nyidrëti hna troa hujën, haawe, atreine hi tro angatre a hetrenyi la mele ka thaa ase palua kö.

E cili kola iwatratra la itre atr, matre angatre a hnyinge ka hape: “Ateine tune ka la ate celë troa hamë shë la ngönetei i angeice nyine xen?” Iesu a ajane tro angatre a trotrohnine laka, ngöne la aqane trotrohni ewekë ngöne la götrane la ua la tro angatre a troa xeni me öni la ngönetrei nyidrë. Celë hi matre, nyidrëti a acatrene hnyawa lai mekun, me qaja la ketre ewekë hnei angatre hna sisine catrën, e troa trotrohnine tune la aqane trotrohnine i atr.

Öni Iesu koi angatre ka hape: “Maine tha xeni kö nyipunie la ngönetei ne la Nekö i ate, me iji la madra i angeic, tha hetenyi kö la mele e kuhu ite hni nyipunie. Ame la ate xeni la ngöneteing, me iji la madrang, hetenyi hë angeice la mele ka tha ase palua kö; nge tro ni a acilë angeice jë ngöne la drai hnapin; ke nyipi xeni la ngöneteing, nge nyipi mele la madrang. Ame la ate xeni la ngöneteinge me iji la madrang, angeic’ a lapa ekuhu hning, nge ini pena e kuhu hni angeic.”

Eje hi laka, maine Iesu ju a iupi troa öni atr, ke atreine troa qaja ka hape, hetre hni ne pi tru ngöne la itre trenge ewekë i nyidrë. Ngo, eje hi laka, thaa Iesu kö a upe la itre ka drei nyidrë troa öni atr, maine iji madra pena. Nyidrëti pe lai a amamane hnyawa, laka, loi e tro asë hi la itre atr ka ajane troa hetrenyi la mele ka thaa ase palua kö, a lapaune kowe la mele hnei nyidrëti hna troa hujën, ene la ngönetrei ne atr ka pë ethan, memine fe la madra hna troa anenin. Ngo, nyimutre mina fe thene la itretre dreng, la itre ka thaa thele kö troa trotrohnine la ini hna hamëne hnei nyidrë, matre angatre a isi ithahnata me hape: “Hace la tenge ewekë cili; nge dei la ate ateine troa deng?”

Atre hë nyidrëti laka, ala nyimu la itretre drei nyidrë ka nyiulil, ame hnei nyidrëti hna qaja ka hape: “Hape u nune zö i nyipunie la ewekë cili? Maine hape u, e tro nyipunie a goeëne la Nekö i ate kola elë kowe la göhnë i angeice ekö? . . . Ame la nöjei tenge ewekë hnenge hna qaja koi nyipunie, celë hi [“ua,” MN ] me mel. Ngo tha lapaune kö ite xan’ e nyipunie.”

Öni Iesu fe ka hape: “Celë hi mate qajajë ni koi nyipunie, ka hape, pëkö ate ateine troa tro koi ni, maine tha hna hamë angeice hnei Angakaka.” Nyimutre catre la itretre dreng ka xele ma xötrethenge nyidrë, ngöne la angatre a drenge lai. Haawe, Iesu a ujë kowe lo ala 12 lao aposetolo i nyidrë, me hnyingë angatre ka hape: “Aja i nyipunieti fe troa hmaca?”

Öni Peteru e sa koi nyidrëti ka hape: “Joxu, [“tro huni koi drei? Ka iamele epine palua la itre trenge ewekë i cilie,” MN ]; Nyihunieti a lapaun, me wangate hmekune laka cilieti la Keriso la Hupuna i Akötesie ka shewengönie.” Drei la hatrene la aqane mele nyipici Peteru memine la itre xaa aposetolo, laka, ngacama thaa trotrohnine hnyawa kö angatre la ini hna hamëne hnei Iesu ngöne la mekune celë, ngo angatre pala hi a fedre koi nyidrë!

Ngacama madrine catre Iesu la aqane sa i Peteru la hnyinge i nyidrë, ngo öni nyidrëti kö koi angatre ka hape: “Hape u tha hnenge hna ië nyipunie ala luako? Nge diabolo la kete e nyipunie.” Nyidrëti la a qeje Iudra Isakariota. Maine jë ngöne la ijine celë, öhne hë nyidrë thei Iudra, la “qane,” maine kola nyiqaane hnahone la ketre thiina ka ngazo.

Kola wesitramenyi la itre atr, qa ngöne la hnei Iesu hna xele ma kapa la aja i angatr, ene la troa acilë nyidrë troa joxu; maine jë angatre a mekune ka hape, ‘Troa Mesia tune kaa la atr celë, nge xele pe angeice ma xome la hnëqa hna athipe thatraqane la Mesia?’ Ketre mekune lai ka mama cile hnyawa thene la itre atr, thatreine kö tro angatre a thëthëhmine ej. Ioane 6:51-71; 3:16.

▪ Iesu a hamëne koi drei la ngönetrei nyidrë, nge nemene la aliene la hna qaja kola hape, ‘xeni jë la ngönetreing’?

▪ Nemene la itre xaa trenge ewekë i Iesu ka athixötrëne la itre atr, ngo nemene la hna amamane hnyawa hnene itre ej?

▪ Ame la kola xele hnene la ka ala nyimu troa xötrethenge Iesu, nemene pe kö la hna qaja hnei Peteru?