Meken 62

Tulu Ne Ipië

THUPENE la hnei Iesu hna aloine la nekönatre hna löthe hnei dremoni, ngöne la götrane nöje Kaisaria Filipi, nyidrëti hë a ajane troa Kaperenauma eë nöje i nyidrë. Ngo nyidrëti a thele troa ce tro caasi memine la itretre drei nyidrë, matre troa hnëkë angatre hnyawa kowe la drai ne meci nyidrë, me kowe fe la itre hnëqa hnei angatre hna troa xome thupen. Nyidrëti a qaja koi angatre ka hape: “Kolo ha troa wanaxoeëne la Nekö i ate kowe la ite iwanakoime i ate; nge tro ha angat’ a humuthi angeic, nge tro angeic’ a mele hmaca ngöne la drai hnaakönin.”

Ase hë Iesu ithahnatane la ewekë cili, nge köni aposetolo ka öhne la nyidrëti a ketre pengön, nge ijine cili hi lo kola porotrikëne la “elelengë” i nyidrë; ngo thaa trotrohnine hnyawa pala hi itretre drei nyidrë. Nge ngacama pëkö ketre e angatr, ka xelene troa kapa tui Peteru, laka, troa humuthi Iesu, angatre a xou troa hnyingë pengöne koi nyidrë la ewekë cili.

Traqa ha angatre e Kaperenauma, ketre traone hna wangatrune hnei Iesu kösë ketre uma ka sisitria ngöne ijine cainöje nyidrë. Nge itre ka xulu qaa lai lae Peteru me itre xaa aposetolo. Ame hna tro pi koi Peteru hnene la itre atr hna acile troa hleme trongëne la hna hotre thatraqane la ēnē, maine jë angatre a troa thele gele i Iesu ngöne la itre hna majemin, matre angatre a hnyinge ka hape: “Tha hane kö la ate ini nyipunie nyi hafe sekel [thatraqane la ēnēti hmitrötr]?”

Öni Peteru e sa ka hape, “Nyipici” (MN ).

Ame la Iesu a lö hnine la uma, nyidrëti a atrehmekune laka, hetre jole ka traqa. Celë hi matre, Peteru petre ju hi a troa ithahnata, nge Iesu a canga hnyingëne koi angeice ka hape: “Simona, nemene la mekune i ’ö? Hna xome qa thei dei la hote me huje hnene la nöjei joxu e celë fen? Hape u qa thene la ite nekö i angat, maine qa thene la ite tehnyiwa?”

Kola sa hnei Peteru ka hape: “Qa thene la ite tehnyiwa.”

Öni Iesu koi angeice ka hape, “Hawe, gufa pe kö ite nekön.” Pine laka, Tretretro i Iesu la Joxu ne hnengödrai me fen, Nyidrëti la hna thili kow ngöne la ēnē, haawe, thaa hna othi Iesu fe kö hnene la hna amekötine göi troa nyi thupene la hotre ne la ēnē. Öni Iesu ka hape: “Ngo wanga angazone pi së la ite hni angat, tro jë eö kowe la hnagejë, me kuiënepi la ge, me eajë la ite ie ka pane nyenyape kow; nge e ase jë fe la qe i nyën, tro eö a öhne la kete mani [foa lao hafe sekel]; Xome jë lai, me hamë angate nyine ina i nyisho.”

Ame la kola bëeke qaa Kaperenauma hnene la itretre drei Iesu, haawe, angatre a icasikeu ju ngöne la hnalapa i Peteru, nge angatre a hnyinge ka hape: “Dei la ka tru ngöne la baselaia ne hnengödrai?” Atre hnyawa hi Iesu la ewekë hna ajane hnei angatr, pine laka, drenge hi nyidrë la porotrike i angatre ngöne la angatre a bëeke me xötrethenge nyidrë qaa Kaisaria Filipi. Haawe, nyidrëti a hnyingë angatre ju ka hape: “Nemene la hnei nyipunieti hna ikelikelë e kuhu gojeny?” Kola lapa thaupe la itretre dreng, angatre a hmahma, pine laka, hnei angatre hna ikelikelëpine la troa amamane la ka tru e angatr.

Hapeu, meköti kö laka, troa iwesitrë la itretre dreng, angatr, itre hna inine hnei Iesu, köni macatre hë enehila? Nyine tro hi lai a amamane la ecatrene thene la atr la ngazo memine la itre huliwa ne la hmi hnei angeice hna xome ekö. Hna hiane la itretre drenge hnine la hmi i angetre Iudra, hmi ka amë panëne la götrane qa, me itre lapa ngöne la qene nöj, me nöjei aqane troa ce mel. Maine jë Peteru a pi nyi ka tru, qaane lo kola thingehnaeane hnei Iesu koi angeice laka, tro nyidrëti a hamëne koi angeice la itre “kii” ne Baselaia. Maine jë fe, caasi hi la mekune i angeice me Ioane me Iakobo, pine laka, hna mama fe hnei Iesu koi nyidro, ngöne lo nyidrëti a ketre pengön.

Ngacama tune ju hë lai, ngo Iesu a pane hamëne ju la ketre ceitun, matre troa ea mekötine la itre aqane mekune i angatr. Nyidrëti a hëne jë la ketre nekönatr, me alapa nyëne e nyipi angatr, me qaja ka hape: “Nyipici, maine tha ujë kö nyipunieti, mate tune la nekönate, te, tha tro kö nyipunieti a lö kowe la baselaia ne hnengödrai. Qa ngöne lai ame la ate aconyi angeice kö tune la nekönate celë, te, tro angeic’ a tru ngöne la baselaia ne hnengödrai. Nge ame la ate kapa la nekönate ka tune la ngöne la ëjeng, te, angeic’ a kepe ni fe.”

Drei la aqane hajine nyidrë cememine la menyik, la itretre drei nyidrë! Thaa Iesu kö a elëhni koi angatr, me jele ume ka pitru, me sasaithi tulu menu pala ha la aja, maine ka thele ielene troa hun. Ohe, nyidrëti hi a hamëne la ketre ini jëne la ceitune ne la itre nekönatr, laka, pëkö ka pi draië e angatr, me pi hun, nge thaa ka pi thele göhnë ka draië kö angatr. Qa ngöne lai, Iesu a amamane kowe la itretre drei nyidrë laka, nyipi ewekë tro angatre a eëne la itre thiina ka eje thene la itre nekönatre ka ipië. Öni nyidrëti e nyipune jëne la itre trenge ewekë celë: “Ke ame la ka co hi e nyipunie asëjëihë, celë hi ka tru.” Mataio 17:22-27; 18:1-5; Mareko 9:30-37; Luka 9:43-48.

▪ Ame ngöne la Iesu a bëeke qaa Kaperenauma, nemene la hna amekunëne hmaca hnei Iesu, nge nemene la thangane la itre trenge ewekë i Iesu?

▪ Pine nemene matre thaa qa i Iesu fe kö troa hamëne la hotre thatraqane la ēnē, ngo pine nemene matre hamëne kö nyidrë?

▪ Nemene la ka kuca matre ihmöhnyinyi jë la itretre dreng, nge tune kaa la aqane thele hnei Iesu troa ea ameköti angatr?