Meken 75

Qeqe Ne Manathith

TUNE lo aqane huliwa nyidrë ngöne la götrane e Galilaia, Iesu fe a hane kuca la itre iamamanyikeu e Iudra. Haawe, nyidrëti a helëne pi la ketre demoni ka ahumune la ketre atr. Ame hna hai la ka ala nyim, ngo itre xane pe kö a qaja angazo Iesu, tui angetre Galilaia. Öni angatre ka hape: “Nyën’ a helëne la nöjei demoni hnei Belezebuba, tixe ne la nöjei demoni.” Ame itre xane ke, angatre a ajane tro Iesu a hamëne la ketre hatrene nyine anyipicine la qaane i nyidrë, nge angatre fe a tupathi nyidrë, me thele thei nyidrëti la ketre hatrene qaa hnengödrai.

Pine laka, atre hi Iesu la mekune ne la angetre icilekeu me nyidrë, haawe, nyidrëti a sa koi angetre Iudra tune lo aqane sa nyidrë koi angetre Galilaia. Nyidrëti a amamane hnyawa koi angatre ka hape, thatreine kö troa cile huti la baselaia ka ketre göi ishi. Nyidrëti a hnyingëne ju ka hape: “Maine kete göi ishi Satana, troa cile huti tune ka la baselaia i nyën?” Nyidrëti a amamane jë la pune elanyi kowe la itretre icilekeu me nyidrë, me qaja ka hape: “Ngo maine ini a helëne la nöjei demoni hnene la wanakoime i Akötesie, hawe, traqa ha la baselaia i Akötesie koi nyipunie.”

Loi e haine hnene la itre atr celë, angetre öhne la itre iamamanyikeu hna kuca hnei Iesu, tune lo aqane qaja hnene la itre atr ekö, ngöne la angatre a öhne la iamamanyikeu hna kuca hnei Mose. Öni angatre ka hape: “Wanakoime i Akötesie!” Ketre, “wanakoime i Akötresieti” fe lo ka cinyihane lo treene lao wathebo hune la itre etë ka ishaisha. Nge “Wanakoime i Akötesie,” ene lo uati hmitrötre i Nyidrë, maine mene i Nyidrë la ka aijijë Iesu troa helëne la itre dremoni me aloine la itre trene mec. Haawe, traqa ha la Baselaia i Akötesie kowe la itretre icilekeu me Iesu, pine laka, kola cile e nyipi angatre lo atr hna iëne troa joxu ngöne la Baselaia.

Iesu a hamëne ju la ketre ceitune matre troa qeje pengöne ka hape, pine laka, atreine hi nyidrë troa helëne la itre dremoni, haawe, catre kö nyidrë hui Satana. Tro la ate catre a ngaane la ketre atr ngacama trene jiane isi nyën, nge thupene lai, angeice a lapaane la uma i nyën. Iesu fe a qaja hmaca lo ceitune ngöne la ua ka ngazo, hnei nyidrëti hna hamëne e Galilaia. Kola lö pi la ua cili qa ngöne la atr, ngo maine thaa hna nyihnane kö lai, hnene la itre ewekë ka lolo, haawe, troa bëeke hmaca hnene lo lai ua me sevene lao sine tronge i angeic, me löthe lai atr, matre ame hë la pun, ke ngazo catre hune lo hnapan.

Nge drengë hë hnene la ketre föe la itre ewekë cili, ene pe ewekë catre jë nyidroti me qaja ka hape: “Manathithi la hni hna hnaho cilieti qa ngön, me lue thi hnei cilieti hna ij!” Kola trotrohnine hnyawa la föe, pine laka, ame la ajane la nöjei föe ne Iudra, te, troa hnahone la ketre perofeta, nge sisitria catre hë, e Mesia. Maine jë nyidroti a mekune ka hape, atraqatre catre kö la madrine i Maria, hnene laka, hnei nyidro hna hnaho Iesu.

Ngo Iesu a canga wenë la mekune ne la föe, ngöne lai qeqene manathith. Nyidrëti a sa ka hape: “Sisitria pe la manathithi ne la angete denge la wesi ula i Akötesie, me trongën’ ej!” Thaa hane fe kö Iesu mekune ka hape, troa atrunyi Maria hnyawa, thine i nyidrë. Nyidrëti pe a amamane ka hape, ame la jëne nyipi manathith, ke, ene la troa nyihlue i Akötresie cememine la nyipici, ngo thaa hnene kö laka, sine la madra, maine hnene la hna kuca pena la itre huliwa hna haine hnei atr.

Tune la hnei Iesu hna kuca e Galilaia, nyidrëti fe a hane hajine e Iudra la itre atr ka ajane la ketre hatrene qaa hnengödrai. Öni nyidrëti koi angatre ka hape, thaa tro kö a hamëne la iamamanyikeu, ngo loi la iamamanyikeu, ene Iona perofeta. Iona la ketre iamamanyikeu, ngöne laka hnei angeice hna lapa, köni drai hnine la ie, nge hnene fe la aqane catre cainöje angeic; celë hi matre ietra jë angetre Nineve. Iesu a qaja ka hape: “Nge hana wang, dei pe la ka sisitia hui Iona.” Ketre tune mina fe, hna haine la inamacane i Solomona, hnene la joxu föe ne kolojë. Nge kola qaja hmaca hnei Iesu ka hape: “Nge hana wang, dei pe la ka sisitia hui Solomona.”

Iesu a qeje pengöne ka hape, ame la kola jinathe la lamepa, thaa kolo kö a amë ngöne la gaa sihngödre maine fene la kumete pena, loi pe hune la tan, matre troa öhne la ehudrumene hnene la itre atr. Maine jë, nyidrëti a mekune ka hape, ame la troa ini me kuca la itre iamamanyikeu qëmekene la itre xaa atr ka drei nyidrëti e ithahnata nge ka icilekeu, ke, kösë kolo hi lai a juetrëne la ehudrumene la lamepa. Thaa maca kö la lue meke ne la itre atr celë, kösë lo hajihaji koi angatr, celë hi kepine matre thaa ketri angatre kö hnene la itre iamamanyikeu.

Kola ase helëne hnei Iesu la dremoni, me aloine la ka hum. Celë hi ewekë la ka troa upe la itre atr ka maca maine ka loi lue mek, troa atrune la itre huliwa cili, me cainöjëne la maca ka loi! Ngo thaa ewekë kö lai ka eje thene la itretre icilekeu me Iesu. Celë hi matre, nyidrëti a nyipune me qaja ka hape: “Qa ngöne lai, wange kö, wanga jidi la lai e kuhu hni ’ö. Nge maine cengöne lai la ngönetei ’ö, pëkö hnepe ga jid, ame hna cengöne lai, tune la lamepa kola hudume cat, me alainyi ’ö.” Luka 11:14-36; Esodo 8:18, 19; 31:18; Mataio 12:22, 28.

▪ Nemene la aqane ujë ne la itre atr ngöne la angatre a öhnyi Iesu e aloine la atr?

▪ Nemene la “Wanakoime i Akötesie,” nge tune kaa la aqane traqa ne la Baselaia kowe la itre ka drei Iesu?

▪ Nemene la qeqe ne nyipi manathith?

▪ Nemene la aliene la hna hape, loi e maca la lue mek?