Meken 95
Ini Göne La Sei Hna Cil Me Göi Aqane Hnimi Itre Kuku
IESU me itretre drei nyidrë a tro Ierusalema eë göi troa sine la Penetekos ne la macatre 33. Angatre a sasaithe la hneopegejë ne Ioridano, me xötrëne la gojenyi ka sasaithe la distrik ne Pere. Iesu hi ngöne la götrane cili a itre wiike ka ase hë, uti hë la kola sipo nyidrë troa tro Iudra pine laka kola wezipo hnene la enehmu i nyidrë, ene Lazaro. Ngo, ngöne la ijine cili, nyidrëti a ithahnata memine la itre faresaio ne Pere göi sei hna cil, nge angatre hmaca a ithahnatane la mekune cili enehila.
Ame thene la itre faresaio, ke, nyimutre la itre uma ne ini ka isa pengöne la aqane ini göi sei hna cil. Hnei Mose hna qaja ka hape maine ketre trahmanyi a öhne “thene la föe i angeic la ketre ngazon,” ijije tro angeice a sei hna cil me nyën; itre xane a mekune ka hape, eje hi e thaa nyipi jajinyi kö nyën. Itre xane a mekune ka hape ame la “ketre ngazon” cili, ke, kola qaja la itre ngazo ka co hna kuca. Celë hi matre itre faresaio a tupathi Iesu, angatre a hnyinge koi nyidrëti ka hape: “Hape u, ijije kowe la ate troa tije la fö’ i angeice pine la nöjei ewekë asë?” Ka xecie e kuhu hni angatre laka, troa jole koi Iesu troa sa la hnying, pine laka, isapengöne kö la mekune i itre xan.
Kola haine la aqane sa i Iesu la hnying, thaa ketre mekune i atr kö, ngo nyidrëti a qaja la qaane me aliene la faipoipo. Nyidrëti a hnyinge ka hape: “Hape u, tha hna e kö hnei nyipunie laka, ame lo ate xupe ngöne la qan, te, hnei anganyidëti hna xupi nyido trahmanyi me fö, me ulatin, ka hape, Qa ngöne lai tro la trahmanyi a nue la keme me thine i angeic, me fede kowe la fö’ i angeic; nge tro nyidoti a ca ngönetei? Celë hi mate tha ala lue hmaca kö, ngo ca ngönetei hë. Qa ngöne lai, ame la hnei Akötesie hna isilekeun, the tro kö a shenge hnei ate.”
Iesu a qeje pengöne ka hape, ame la trepene mekune i Akötresie, ke, ene laka tro la lue trefëne a caas, ngo thaa ene kö la troa itrij. Önine jë hi la itre faresaio ka hape maine nyipici lai, ke, “Qa ngöne nemene la hnei Mose hna ahnithe troa hamëne la tusi ne tiji fö, ame hna tijepi?”
Iesu a sa koi angatre ka hape: “Ngöne la cate la ite hni nyipunie hnei Mose hna nue nyipunie troa tije la ite fö’ i nyipunie; ngo tha hna tune kö ngöne la qan.” Eje hi laka, ngöne la Akötresie a acile la tulu ne faipoipo ngöne la hlapa ne Edena, thaa aja i Nyidrëti kö troa itrij.
Iesu pala hi a ithahnata kowe la itre faresaio, me sisedrëne ka hape: “Ini a qaja koi nyipunie, ka hape, Ame la ate tije la fö’ i angeic, nge tha ka kuci ngazo kö [qene heleni: pornéïa], me xomi kete, te, kola nyi xetë lai.” Nyidrëti a amamane laka ame la pornéïa, ke, ketre hnepe hnëewekë lai ka qaja la ketre ngazo ka sis hna kuca, celë hi kepine ka caas ka aijijëne troa itrije xajawa i Akötresie.
Itretre drenge a trotrohnine laka troa caas uti hë la mec la faipoipo, nge caasi hi la kepine troa itrij, haawe, kola upi angatre troa qaja ka hape: “Maine tune lai la pengöne la ate göi fö, te, tha ijije kö troa afaipoipon.” Nyipici laka, ame la atr ka ajane troa faipoipo, ke, nyipi ewekë tro angeice a mekune hnyawa e kuhu hni angeice laka ka huti la caasi ne la lue trefën.
Thupene lai, Iesu a qeje pengöne la eunuka. Nyidrëti a qaja ka hape ame itre xaa nekö trahmany, ke, eunuka kö angatre qaane la kola hnahon: thatreine kö troa faipoipo pine laka thaa kökötre loi kö la itre götrane ka hmitrötre i angatr. Ame itre xan, ke, hna eunuka angatre hnei itre atr, ke, hna xome trije la itre götrane cili thei angatr. Haawe, ame pë hë itre xan, ke, angatre a xome hnöthe la aja i angatre troa ikötresai me ce meköle trefëne matre troa pexeje la traeme i angatre kowe la itre huliwa ne Baselaia i Akötresie. Iesu a nyipune ka hape: “Ame la ateine troa kapa lai, kapaju.”
Kola traqa fë enehila koi nyidrë la itre nekönatr. Ngo, angetre drenge a sewe nyudren, me thele troa helë nyuden, maine jë angatre a mekune ka hape wanga kucakuca jë Iesu. Ngo öni Iesu koi angatre ka hape: “Nuepi la nöjei nekönate, nge the shewe nyudeni kö e tro koi ni, ke ite ka tune lai la baselaia i Akötesie. Nyipici ini a qaja koi nyipunie, ame la ate tha kapa kö la baselaia i Akötesie tune la nekönate, te tha tro kö angeic’ a lö kowe lai.”
Drei lai itre ini ka lolo hnei Iesu hna hamëne e celë! Maine easë ajane troa kapa la Baselaia i Akötresie, ke, nyipi ewekë troa ipië tune la itre nekönatr, me hetre hni ka ajane troa kapa la itre ini. Ngo kolo fe a amamane hnene la tulu i Iesu laka, nyipi ewekë catre kowe la itre keme me thine troa hetre ijine i angatre thatraqane la itre nekö i angatr. Thupene lai, Iesu a amamane la ihnimi nyidrë kowe la itre nekönatre ngöne laka, nyidrëti a xepi nyudren, me amanathithi nyudren. Mataio 19:1-15; Deuteronomi 24:1; Luka 16:18; Mareko 10:1-16; Luka 18:15-17.
▪ Nemene la itre mekune ka isa pengöne thene la itre faresaio göi sei hna cil, nge qa ngöne lai, tune kaa la aqane tupathi Iesu hnei angatr?
▪ Tune kaa la aqane sa i Iesu kowe la itre faresaio ka thele troa tupathi nyidrë, nge nemene la kepine ka caas ne itrij hnei nyidrë hna hamën?
▪ Pine nemene matre itretre drei Iesu a qaja ka hape thaa nyipi ewekë kö troa ikötresai, nge nemene la ithuecatre hnei Iesu hna qaja?
▪ Jëne la aqane ujë i nyidrë kowe la itre nekönatr, nemene la itre ini hnei nyidrë hna hamë së?