Ini Göi Sei Hna Cil Me Hnimi Nekönatr

Iesu me itretre dreng a tro qa Galilaia me thupa la Hneopegejë Ioridrano, me trongëne la nöje Perea a tro kolojë. Ame lo pane tronge Iesu e Perea, hnei nyidrë hna qejepengön koi itre Faresaio la mekuna i Akötresie göi sei hna cil. (Luka 16:18) Enehila, angatre hmaca a ithanatane lai göi troa tupathi Iesu.

Hnei Mose hna cinyihane ka hape, ijije troa triji föe e ‘hna öhne thei angeic la kete ngazo.’ (Deuteronomi 24:1) Matre hetre isa aqane trotrohnine la hna cinyihan celë. Hetre itre ka mekun ka hape, kolo fe a qaja la itre tria ka co. Matre öni itre Faresaio: “Hapeu, meköti kö tro la trahmanyi a sei hna cil me föe hmunë pine la nöjei kepin asë?”—Mataio 19:3.

Eloine hi, tha Iesu kö a nyipiewekëne la mekuna i atr, ngo mekuna i Akötresieti pe, atrekë ewekëne la faipoipo. Öni Iesu: “Tha hane kö nyipunieti e ka hape, ame ngöne lo qaan, hnene la atre xup hna isa xupi nyidro, trahmanyi me föe me hape: ‘Celë hi matre, tro la trahmanyi a nue la keme me thine i angeic, me fedre kowe la föi angeic, nge tro nyidroti a ca ngönetrei’? Matre tha ala lue hmaca kö, ngo ca ngönetrei hë nyidro. Haawe, ame la hnei Akötresieti hna isilekeun, tha tro kö a senge hnei ketre.” (Mataio 19:4-6) Ame lo Akötresie a acile la faipoipo i Adramu me Eva, tha hnei nyidrëti kö hna mekune troa seng la faipoipo.

Ngo itre Faresaio a nyiqaane isi ithanata me Iesu me hape: “Nga hnauëne kö laka, hnei Mose lo hna aijijëne troa hetre tusi ne triji föe?” (Mataio 19:7) Sa jë hi Iesu ka hape: “Ke hnene laka catre la itre hni nyipunie, matre hnei Mose hna aijijë nyipunie troa triji föe, ngo tha ewekë kö lai hna amekötin ngöne la qaan.” (Mataio 19:8) Ame la “qaan” hna qaja e celë, tre tha hneijine Mose, ngo ijine acil Akötresie la faipoipo.

Thupene lai, Iesu a qaja jë la ketre nyipici ka tru, öni nyidrë: “Eni hi la a qaja hnyawa koi nyipunie laka, ame la atre sei hna cil me föe hmunë, ngo tha hna kuci ngazo kö [Qene Geres, por·neiʹa], me xome hmaca la ketre föe, angeice hi lai a nyixetë.” (Mataio 19:9) Thenge la hna qaja hnei Tusi Hmitrötr, kuci ngazo hmekuje hi la ka aijijëne la lue trefën troa sei hna cil.

Matre önine jë hi la itretre dreng: “Maine pengöne hi la lue trefëne lai, nyine ue la troa faipoipo?” (Mataio 19:10) Haawe, loi e tro la itre ka pi ikötresai a atre laka, isisinyikeu ka hut la faipoipo!

Thupene lai, Iesu a qaja jë la itre ka pë föen. Hetre itre hna hnahon a eunuka, laka, thatreine kö angatr ce meköl me ketre. Nge hetre itre hna eunukan, laka, hna xöje la ka hmitrötr i angatr. Nge hetre itre xan fe ka pë föen me ka xomehnöth la itre aja ne ce meköl. Angatr a kuca tun, matre troa tro pa la huliwa ne Baselaia. Haawe, öni Iesu jë hi ka hape: “Matre ame la ka atreine kapa lai, kapa ju.”—Mataio 19:12.

Enehila, itre atr a nyiqaane tro fë la itre nekönatr koi Iesu. Ngo itretre dreng a wesitrëne jë la itre keme me thin, ke xele kö angatr troa kucahmë Iesu. Ame hnei Iesu hna wesitrë angatre me hape: “Nue nyudreni pi, the sewe nyudreni kö troa tro koi ni, ke thatraqane la itre ka tui nyudreni la Baselaia i Akötresie. Nyipici, eni a qaja hnyawa koi nyipunie, ame la atre tha kapa la Baselaia i Akötresie tune la ketre nekönatr, tha tro jë kö angeice lai a hane lö kow.”—Mareko 10:14, 15; Luka 18:15.

Drei la ketre ini ka lolo! Maine aja së troa kapa la Baselaia i Akötresie, loi e tro sa ipië me hetre aja troa ini, tune la itre nekönatr. Enehila, Iesu a amamane la ihnimi nyidrë koi itre nekönatr. Nyidrëti a haluthi nyudren me amanathithi nyudren. Nge nyidrëti fe a hnime la nöjei atr ka “kapa la Baselaia i Akötresie tune la ketre nekönatr.”—Luka 18:17.