Meken 101

E Bethania Thei Simona

IESU a nue Ieriko, me tro Bethania eë. Caa drai ka pexeje ne tro nyidrë, pine laka, gaa sasala la gojeny, nge 19 kilomet la enanyine qaa Ieriko a tro Bethania. Eje hi laka, gaa hna thupe la traone e Ieriko, 250 met la eipiëne qa ngöne la hune ihnagejë la eipiën, kösë draië catre kö e Bethania matre 760 met e hune la hnagejë. Tune lo hne së hna ce wange hë, laka, kola lapa hnei Lazaro memine la itre xa i angeice e Bethania. Hetre 3 kilomet la enanyine qa ngöne la lapa ka co cili, a tro Ierusalema, nge eje ngöne la götrane öline la wetr elaio götrane kohië.

Ala nyimu catre hë la itre atr ka traqa kowe la Paseka e Ierusalema. Angatre a canga traqa qëmekene la Paseka, matre troa apuiloinyi angatr, thenge lo itre hna majemin. Maine jë hnei angatre hna ketr la ketre atr maine ketre öni ka meci hë, maine hna kuca pena la ketre ewekë ka apuingazonyi angatr. Haawe, angatre lai a xötrethenge la itre hna amekötine göi troa pui loi, qëmekene troa atrune la Paseka, thenge la itre wathebo ne ej. Canga traqa petre kö la itre atr cili me cacaxenyi ngöne la ēnē, nge kola isa hnyinge hnene la ka ala nyim, maine jë tro fe Iesu a hane traqa kowe la Paseka.

Ame e Ierusalema, kola qeje gele i Iesu. Mama hnyawa ha kowe la itre atr laka, kola ajane hnene la itre hene ne hmi troa xöleuthi Iesu matre troa humuthi nyidrë. Hnei angatre mina fe hna upe me ahnithe kowe la itre atr ka hape, maine hetre atre öhnyi Iesu, ke, qa ne la atr cili troa thuemacanyi angatr. Ame ngöne lo itre treu ka ase hë, akönia thele hnene la itre hene ne hmi cili troa humuthi Iesu, ngöne la pui ne xeni ne uma ne heta, me ngöne pui ne xeni hmekune la alöatr, me thupene la hna amele Lazaro hmaca qa hna mec. Celë hi la kepine lai matre kola isa hnyinge hnene la itre atr, maine tro Iesu a hane iamamanyi ngöne la ijine cili? Angatre a ihnyingënekeune ka hape, “Nemene la mekune i nyipunie?”

Nge ngöne la ijine cili, sikisi lao drai qëmekene la Paseka, laka 14 Nisan thenge la idrai ne la itretre Iudra, kola traqa hnei Iesu e Bethania. Nyidrëti a traqa e Bethania ngöne la heji ne drai ka tru, ngöne la kola nyiqaane la 8 Nisan. Haawe, thatreine kö tro nyidrëti a xome la gojenyi ngöne lo lai mecixen, pine laka, kola wathebone hnene la trenge wathebo i angetre Iudra, troa tro kowe la ketre lapa ngöne la drai sabath, qaane la kola lö la jö e drai ka tru, uti hë mecixeni e hej thupene kola paatre la jö. Tune lo traqa nyidrëti hnapan, maine jë hnei nyidrëti hna meköle thei Lazaro ngöne la jidri ne drai ka tru.

Ame ngöne la jidri ne mecixen, kola tro hnene la ketre atr ne Bethania troa könë Iesu me itretre drei nyidrë troa xeni hej. Ame la ëjene la atr cili, ke, Simona; ka lepera angeice e cili lo, ngo maine jë hnei Iesu fe hna hane apaatrene la meci cili qaathei angeic. Hna tune pala hi hnei Maretha, troa hnehengazone la itre atr hna könën. Ame Maria, thenge la hnei angeice hna majemin, kolo pe kö a drei Iesu, ene pe traqa ju la ketre hnepe jol.

Ame hnei Maria hna xome la litara trenge muro “nyipi narado” hnine la ge alabasa. Ka tru alamekene catr, pine laka, kösë kola ihmeku la thupene ej, memine la etrune manie hna kapa ngöne la caa macatre ne huliwa! Ame ngöne la Maria a siëne la he i Iesu, me köle la lue ca i nyidrë hnene la ihnaihe i nyidro, tiqa ju hi la uma hnene la punepune ne la muro.

Ame hnene la itretre drenge hna tro koi Iesu me hnyinge ka hape: “Nyine ue la troa angazone tune lai?” Nge öni Iudra ka hape: “Ue laka tha itöne kö la muro celë thupene la ite denari ka köni haded, matre troa hamë ange pë ewekë?” Ngo thaa Iudra kö a qaja lai pine laka, angeice a hnime la ange pë ewekë, ngo pine laka, angeice pala hi a atrekënö hnine la trengene manie ne la itretre dreng.

Haawe, Iesu a cilëgöli Maria me hape, “The qeje nyidoti kö; nemene lae nyipunieti laka ajojezine la fö? Nga loi la hnei nyidoti hna kuca koi ni. Qa ngöne laka, celë pala kö thei nyipunie la ange pë ewekë; ngo tha tro kö ni a lapa pala e celë thei nyipunie. Ke ame la hna nenge hnei nyido la muro celë kowe la iteing, te, hna kuca nyine iping’e troa kelemi ni. Nyipici ini a qaja koi nyipunie, ame e cailo fene la hna troa cainöjëne la maca ka loi celë ngön, te, tro fe a amamane la hna kuca hnei nyidoti la nyine mekune koi nyido.”

Kolo ha troa 24 lao hawa nge hetre munën, qaane lo Iesu e Bethania, nge atre asë hë la itre atrene la traone laka, traqa ha nyidrë. Qa ngöne lai, nyimutre la itre atr ka traqa kowe la hnalapa i Simona matre troa wai Iesu, nge angatre fe a ajane troa hane wai Lazaro, ke angeice fe e cili. Ene pe thele ju hi hnene la itre tane i angetre huj, troa humuthi Iesu, me Lazaro fe. Eje hi laka, nyimutre la itre atr ka lapaune koi Iesu, pine laka, angatre a öhne hnyawa lo atr hnei nyidrëti hna amelene hmaca qa hna mec! Drei la aqane iakötrë ne la itre hene ne hmi! Ioane 11:55–12:11; Mataio 26:6-13; Mareko 14:3-9; Ite Huliwa 1:12.

▪ Nemene la ewekë hna ithahnatane ngöne la ēnē e Ierusalema, nge pine nemen?

▪ Nemene la ka aijijëne troa qaja ka hape, traqa ha Iesu e Bethania lo drai ka tru, ngo thaa mecixeni kö?

▪ Ekaa la hnei Iesu hna lapa ngöne la sabath, ngöne lo nyidrëti a traqa e Bethania?

▪ Nemene la hna kuca hnei Maria hna iwenemejelë pin, nge nemene la hna qaja hnei Iesu matre troa cilëgöli nyidro?

▪ Nemene la ewekë ka amamane laka, ka iakötrë catre la itre tane i angetre huj?