Meken 103

Iesu a Traqa Hmaca Kowe La Ēnē

HNAAKÖNINE jidri Iesu petre hi memine la itretre drei nyidrë e Bethania, thupene lo traqa angatre e Ieriko. Ame hë enehila, thupene hmi 10 Nisan, fetra pë hë la jö nge angatre hë a nyiqaane xötrëne la gojenyi ne tro Ierusalema. Mecijiine hë Iesu. Matre, ame la nyidrëti a öhne la aqane cia hlöeë la ketre hmejieng, nyidrëti a tro meköti pi troa wang, maine jë troa hetre wene ne ej.

Kola canga cia hlöeë la itre dröne la sinöe cili, ngo thaa ijine wa wene petre kö la itre hmejieng; nyiqaane jë hi e treu juun, nge pune treu maaci petre hi. Nge Iesu a mekune ka hape, maine jë troa canga wa wene lai sinöe, ke, canga hetre dröne hi ej. Ngo thaa madrine kö nyidrë, ke, ngacama mingöminge la itre drön, ngo ka gufa la isinöe, pine laka, pëkö wene ne ej. Celë hi matre, Iesu a ahnëjinëne ju lai hmejieng; öni nyidrëti ka hape: “Tha tro hmaca kö eö a wa epine palua!” Kola atre elanyi pe, la pune kowe lai hmejieng, me aliene la hnaieji cili.

Iesu a sisedrëne memine la itretre drei nyidrë, la gojenyi ne tro Ierusalema, nge traqa angatre e cili, nyidrëti a tro kowe la ēnē, lo hnei nyidrëti hna pane xödrane eidri e hnaipajö. Ngo ame hë enehila, nyidrëti a tune hmaca lo köni macatre ka ase hë, ngöne lo macatre 30, ijine nyidrëti a traqa troa atrune la pui ne xeni ne Paseka. Nyidrëti a helëne la itre ka itö, me saleme hnine la ēnē, me qene ipiëne la itre laulau i angetre itö mani, me ita ne lapa i angetre salemë piny. Nge thaa nue kö hnei nyidrëti la ketre atr troa cili thenge fë hnine la ēnē, la ketre inege.

Nyidrëti a haji angatre ka hape: “Hape u, tha hna cinyihane laka, Tro ha qaja la umange uma ne thithi thatraqane la nöjei nöje asë? Ngo nyipunie a celohmën’ eje nyine ngöne menyi ne la ite ate kë ’nö.” Itre ka atrekënö angatr, pine laka, angatre a atrune menune pala ha la thupene la itre öni nyine troa hujën; nge angatre hmekuje hi la ka salemëne la itre öni cili. Qa ngöne lai, kösë ame koi Iesu ke, itre aqane huliwa ne ka thepe mo maine ka atrekënö.

Nge drengë hë hnene la itre tane i angetre huj, me angetre cinyihan, me itre atr ka tru ne la nöj, la hna kuca hnei Iesu, ame hnei angatre hna thele jëne hmaca troa humuthi nyidrë. Kola amamane hnyawa laka, itre ka catre he, thatreine kö troa ujëne la thiina. Ngo thatre kö angatre la aqane troa humuthi Iesu, pine laka, thaa nue Iesu pi kö hnene la nöjei atr.

Ketre, thaa angetre Iudra hmekuje kö, ngo hetrenyi fe la itretre ethen ka traqa kowe la pui ne xeni ne la Paseka. Itre ka ce hmi me angatr, ngöne laka, hna hane uti thenge la hmi angetre Iudra. Hanawange hë enehila la itre xaa ka ce hmi me angetre Iudra, maine jë angetre Heleni; angatre a tro koi Filipo, me sipone troa wai Iesu. Filipo a tro pi koi Anederea, me hnyingën, maine jë loi e troa tro sai angatre koi Iesu. Maine jë Iesu pala kö e hnine la ēnē, nge öhnyi nyidrëti hi hnene la itretre Heleni.

Atre hi Iesu laka, itre hnepe drai ne tro pe hi nyidrëti a mel; haawe, nyidrëti a xome jë la ketre ceitune ka mingöming, nyine troa qeje pengöne hnyawa la ewekë ka troa traqa koi nyidrë: “Traqa ha la ijine atrune la Nekö i ate. Nyipici, nyipici, ini a qaja koi nyipunie, Maine mala e kuhu hnadro la kete wene qit, nge tha meci kö, ej’ a meköle cas; ngo maine ej’ a meci, ame hna wa nyimute.”

Thaa ka tru alamekene kö la caa wene qitr. Ngo hapeue e mala ju hune la hnadro, nge “meci pi hi,” ene laka, thaa itine feja hmaca kö? Eje hi laka, eje a nyiqaane troa cia, me pici, ene pe hamëne ju hi la nyimu wene qitr. Ceitune hi lai me Iesu, laka, nyidrëti hmekuje hi la atr ka pexeje e celë fen. Ngo maine tro nyidrëti a mele nyipici koi Akötresie uti hë la mec, haawe, atreine hi tro nyidrëti a fe la jëne tro kowe la mele ka thaa ase palua kö, kowe la itre atr ka mele nyipici ka hane hujëne la mele i angatre tui nyidrë. Celë hi matre Iesu a qaja ka hape: “Ame la ate hnime la mele i angeic, tro ha pate lai; nge ame la ate methinëne la mele i angeice e celë fen, tro angeic’ a thupën’ eje uti hë la mele ka tha ase palua kö.”

Kola mama hnyawa laka, thaa Iesu kö a meku nyidrëti hmekuj, ke, nyidrëti fe a qeje pengöne ka hape: “Maine kete ate a troa nyi hlueng, xöte thenge ni jë hnei angeic; nge ame la hnenge hna hne ngön, te, hnene fe hi la hlueng; nge maine kete ate a nyi hlueng, tro ha atrunyi angeice hnei Tetetro.” Drei la ahnahna ka sisitria hna troa kapa, qa ngöne la hna xötre thenge Iesu, me nyihlue i nyidrë! Troa kapa qaathei Tretretro la ketre iatrunyi ka tru, ene la troa ce musi me Keriso ngöne la Baselaia.

Iesu a mekune la itre akötre ka tru, memine la engazone la meci ka troa traqa koi nyidrë; öni nyidrëti hmaca ka hape: “Hlohlo hë la hninge enehila; nge tro ni a qeje nemen? Angakaka da amele ni qa ngöne la ijine celë; ngo ngöne pe lai laka, traqa ha ni kowe la ijine celë.” Iesu a xötre thenge hnyawa la itre hna amekötine koi nyidrë hnei Akötresie, a tune mina fe la mele i nyidrë hna hujëne thatraqai së. Mataio 21:12, 13, 18, 19; Mareko 11:12-18; Luka 19:45-48; Ioane 12:20-27.

▪ Pine nemene matre, Iesu a mekune ka hape hetre wene ne la hmejieng, nge thaa ijine pe?

▪ Pine nemene matre, Iesu a hëne la itre ka saleme hnine la ēnē, ka hape, itre “atekënö”?

▪ Nemene la aliene la ceitun, kola qeje Iesu kösë ketre wene qitr ka mec?

▪ Nemene la aliene la hni Iesu, ngöne la nyidrëti a mekune la itre akötr, memine la meci ka troa traqa koi nyidrë?