Mekene 10
Ka Sheminge La Fene Ka Hnyipixe Hna Troa Acile Hnei Akötresie
1, 2. Nemene hë la ewekë ka troa traqa, thupene la hna nyihnyawane la ihnadro hnene la isi e Amagedo?
NEMENE ju hë la ka troa traqa thupene la hna awiëne la ihnadro hnene la isi e Amagedo? Haawe, tro ha lö kowe la ketre hneijine ka hnyipixe, nge ka lolo. Tro ha alöne hnine la fene ka hnyipixe, la itre thelene qa ngöne la isi e Amagedo, angatre lai itre ka mele nyipici kowe la mus i Akötresie. Drei la elolone elanyi la hnedrai ka hnyipixe cili, ngöne laka, Akötresie a troa amanathithine hmaca la lapa ka caa hae!
2 Fene la musi ne la Baselaia i Akötresie, tro hë la itre thelene a nyiqaane nyihnyawane la paradraiso. Tro angatre a nue gufane la trenge catre i angatr, troa kuca la itre huliwa ka lolo nyine loi kowe asë hi la nöjei ka mele pe. Haawe, tro hë la ihnadro a saze, a kösë ketre göhnë ka mingöming, me tingeting, nge hna pi troa mele ngön hnene la itre atr.
Tro La Meköt a Nyihnane La Ngazo
3. Nemene la ewekë ka loi hne së hna troa kapa ju fe kö thupene Amagedo?
3 Atreine hi troa eatre asë la itre ewekë cili elany, pine laka, troa paatre la fene i Satana. Ketre tro fe ha paatre lo itre jëne gomegom, ene lo itre hmi thoi, me itre aqane wai emekötine la mele hnei atr, me itre baselaia ne fen. Thaa tro hmaca kö a athixötrëne la itre atr hnene la itre mekune i Satana; nge ame asë hi la itre organizasio ka ahlemune itre ej, tro asë hi angatre a ce paatre memine la fene i Satana. Pane mekune ju së: tro ha paatre palua la enyi hna apoizinëne hnei Satana! Drei la ketre madrine ka tru koi së!
4. Qeje pengöne jë la itre ewekë ka saze ngöne la ini hna troa kapa.
4 Tro ha nyihnane la itre mekune ka ngazo ne la itre musi ne fen, hnene la ini ka lolo qaathei Akötresie. “Nge tro ha inine la ite nekö i nyipo asë hnei Iehova.” (Isaia 54:13) Jëne la ini celë ka hmitrötre hna troa hamëne e nöjei macatre, “troa tiqa la fene hnengödrai hnene la ate hmekunyi Iehova, tune la hnagejë a hetëne la tepen’ej.” (Isaia 11:9) Thaa tro hmaca kö la itre atr a inine la ngazo, ngo “tro itete lapane la fen’a inine la thina ka meköt.” (Isaia 26:9) Troa cia hlöeë ngöne la ijine cili, la itre mekune me itre huliwa ka hetre thangane ka loi.—Ite Huliwa 17:31; Filipi 4:8.
5. Nemene la pune kowe la iakötrë, me kowe lo itre atr ka iqanangazo?
5 Haawe, pë hmaca kö troa ihumuth, me iakötrë, me ixolouth, me atrekënö, me itre xaa huliwa hna mecine ju kö. Pë hmaca kö troa akötr, pine la thiina ka ngazo hna kuca hnene la itre xaa atr. Önine la tusi Ite Edomë 10:30 ka hape: “Tha tro kö a kötekötëne la ate ka meköt’epine palua; ngo tha tro kö la ite ka ngazo a lapane la [“fene hnengödrai,” MN].”
Tro Hmaca a Hamëne La Mele Ka Pexej
6, 7. (a) Nemene la itre ewekë hna melëne enehila, a hna troa apaatrene hnene la Baselaia? (b) Nemene la aqane amamane Iesu lai, ngöne lo nyidrëti e celë fen?
6 Ame ngöne la fene ka hnyipixe, tro ha köle trije asë la nöjei ethane lo hna icilekeu ekö. Ame la ketre ceitun, ke, tro la Baselaia a apaatrene la itre meci memine la troa qatr. Ame enehila, maine egöcatre ju hë epun, ngo ame hë la epuni a qatre trootro, ene pe hajihaji ju hi la lue meke i epun, kolo fe a xuje nyimenyimëne la itre inyö, sime hë la lue hnangenyë, kola fitre fitre la ikupein, nge kola uti ipië trootro la mele i epuni uti hë la meci epun.
7 Ngo easenyi hë matre paatre palua pi lo lai itre akötr, hne së hna kapa qathene la lue pane keme me thine së. Mekune hi epuni lo Iesu ekö e celë fen, ngöne lo nyidrëti a kuca matre hetrenyi jë la mele ka loi? Öni Tusi Hmitrötre ka hape: “Ame hna traqapi koi nyidëti la nöje ka ala nyimu, ce me angate fe la nöjei geny, me nöjei timek, me nöjei hum, me nöjei hna sathepën, me ite xa ate ka kösau, me ami angate ngöne la lue fenie i nyidë nge nyidëti a amele angat; ame hna haine hnene la ka ala nyimu ngöne laka öhnë hë angate la ite humu a ewekë, me ite hna sathepën a loi hë, me ite genyi a tro hë, me ite timek’a goeë hë.”—Mataio 15:30, 31.
8, 9. Qeje pengöne jë la manathithi ka troa eje ngöne la fene ka hnyipixe, elanyi e hamëne hmaca jë la egocatrene la mel.
8 Drei la ketre manathithi ka tru elanyi ngöne la fene ka hnyipixe, thupene la hna apaatrene la nöjei akötre së asë! Pë hë akötre hnei itre mec, pine laka, thaa tro hmaca kö a tithi së hnei mec. “Nge tha tro kö a qaja hnene la ate lapan’eje, ka hape, Ini a mec.” “Ame hna troa ahlëne la ite lue meke ne la ite timek, me fepi la lue hnangenyë ne la ite ka sim; Ame hna troa sheshë draië la ite ka genyi ca tune la aila, nge troa nyima la sesepeneqe ne la humu.”—Isaia 33:24; 35:5, 6.
9 Hapeu thaa ewekë ka loi kö la troa hlë ngöne la nöjei hmakany, nge epuni a drenge laka ka egöcatre pala hi la mele i epun? Hapeu, thaa ewekë nyine madrine kö kowe la itre ka qatre hë, ngöne la angatre a öhne laka, egöcatre trootro hmaca ha angatre tune ekö lo kola thöth, nge angatre fe a troa kapa la mel ka pexeje tui Adamu me Eva ekö? Hnei Tusi Hmitrötre hna thingehnaeane ka hape: “Tro ha pepeija la ngönetei angeice hune la nekönat; tro hmaca angeic’a thupëtesij.” (Iobu 33:25) Drei la madrine atraqatre elany, ke, tro ha trije la lue thulu, me itre aparei nyine drenge hnei itre simi hnangenyë, me itre tö, me itre ikatr göi itre ka genyi ca, me itre drosinöe! Thaa nyipi ewekë hmaca kö la itre pital, me itre droketre, me itre ka feke nyö.
10. Nemene elanyi la pune kowe la mec?
10 Qa ngöne laka, lolo la mel, thaa tro hmaca kö a pi meci la itre atr. Nge thaa tro hë angatre a mec, pine laka, pë hmaca kö atr ka troa akötre hnene la ngazo me mec. “Ke ijiji nyidëti [Keriso] troa musi uti hë e ase hë amë fene la lue ca i nyidë la nöjei ithupëjia asëjëihë. Meci la ithupëjia hnapine hna troa apaten.” “Ame la ahnahna i Akötresie, te, mele ka tha ase palua kö.”—1 Korinito 15:25, 26; Roma 6:23; ange wange mina ju fe la tusi Isaia 25:8.
11. Nemene la aqane qaja hnene la tusi Hna Amaman, la itre manathithi hna troa kapa ngöne la fene ka hnyipixe?
11 Hnene la tusi ka nyipune la Tusi Hmitrötre hna qeje pengöne la itre manathithi hna troa hamëne kowe la itre atr ngöne la paradraiso hnene la Akötresie ka ihnimi ipitö, nge eje a qaja ka hape: “Nge tro nyidëti a köle tije la nöjei tenge timida asëjëihë qa ngöne la ite lue meke i angat; nge pa hmaca kö mec, me hace hni, me teij, me aköt; Ke pate hë la ite ewekë hnapan.”—Hna Amamane 21:3, 4.
Kola Bëeke Hmaca Kowe La Mel Hnene La Itre Ka Mec
12. Hnei Iesu hna amamane tune kaa lo mene hnei Akötresie hna nue koi nyidrë, matre troa amelene hmaca la atr ka meci hë?
12 Thaa hnei Iesu hmekuje kö hna aloine la itre ka wezipo me itre ka peje ca. Hnei nyidrëti mina fe hna hëne la itre ka meci qa hnine la itre hua. Nyidrëti hi lai a amamane la men ka sisitria ka aijijë nyidrë troa amelene hmaca la itre atr, ene lo men hnei Akötresieti hna hamëne koi nyidrë. Ma mekune hi epuni lo ijine Iesu a tro kowe la hnalapa ne la ketre atr ka meci neköne jajiny? Öni Iesu kowe la jajinyi ka meci hë: “Jajinyi fe, ini a qaja koi’ö, cilejë!” Hapeu, nemene la ewekë ka traqa? “Ame hna canga cilejë la jajinyi, me tro.” Ame ngöne la kola öhne lai hnene la itre atr, “ame hnei angate hna canga haine atraqat.” Thatreine kö angatre troa xome hnöthe la madrine i angatr!—Mareko 5:41, 42; ange wange ju fe la Luka 7:11-16; Ioane 11:1-45.
13. Drei la itre atr hna troa amelene hmaca?
13 Ame ngöne la fene ka hnyipixe, “tro ha mele hmaca la nöjei ka meköt, me ka tha meköti kö.” (Ite Huliwa 24:15) Ngöne la ijine cili tro hë Iesu a huliwane la mene hnei Akötresieti hna hamë nyidrë, matre atreine troa amelene hmaca la itre ka meci hë, troa tro thenge lo trenge ewekë i nyidrë, hna hape: “Ini hi la mele hmaca, memine fe la mel; ame la ate lapaune koi ni, ngacama meci hë, te, tro angeice a mel.” (Ioane 11:25) Hnei nyidrëti mina fe hna qaja ka hape: “Tro la nöjei ate ngöne la hua [hna thaa thëthëhmine kö hnei Akötresie] a drenge la aqane ewekë i [Iesu] me tro pi.”—Ioane 5:28, 29.
14. Pine laka tro hë a paatre la mec, nemene mina fe la itre xaa ewekë ka troa hane paatr?
14 Drei la troa madrine atraqatre elanyi ngöne la fene hnengödrai, ngöne la kola mele xötrë hmaca la itre ka meci hë me iöhnyi hmaca memine lo itre hnei angatre hna hnim! Thaa tro hmaca kö a ahleuhleune la mele së, hnene la itre ithuemacanyi ne qeje wezipo ngöne la drai. Ngo itre ithuemacanyi ne qeje loi pena ha: laka troa e hmaca pena ha la ëjene la itre atr hna amelen, a nyine madrine ka tru kowe la itre ka hnimi angatr. Celë hi matre, pë hmaca kö troa kele wezipo, me troa dreuthe la itre ka mec, me kuci hnë troa dreu atr ka mec, me xupi hua!
Troa Tingetinge Hnyawa La Fen
15. Nemene la aqane troa eatre hnyawa la ewekë hna perofetane hnei Mika?
15 Tro ha hetrenyi la nyipi tingetinge ngöne la nöjei götrane ne la mel. Thaa tro hmaca kö a isi, nge tro ha paatre la itre ka aciane itre ej, me itre hnë kuci jia ne isi. Pine nemen? Pine laka, tro ha paatre la itre jëne gomegom, ene la isi pi nöj, me isi pi tribu me isa wangatrehmekunyi atr. Haawe tro ha nyipici lo hna qaja ka hape, “tha tro hmaca kö la kete nöj’a xejë la taua kowe la kete nöj, nge tha tro hmaca kö angat’a ini ishi.”—Mika 4:3.
16. Nemene la aqane tro Akötresieti a thupëne matre pë hnyawa pi isi?
16 Ma troa jole e troa kapa la hna thingehnaeane celë, pine laka, hna neni pala hi la madra ngöne la mele ne la atr, hnene la itre isi ka nyimutre. Ngo tro kö a traqa tune lai, pine laka, hna musinëne la atr hnene la itre xaa atr me itre dremoni fe. Hane hi la ewekë ka troa traqa, ngöne la fene ka hnyipixe hna troa musinëne hnene la Baselaia: “Trohemi ma wange la ite hna longëtine hnei Iehova . . . Kola nyipune la ite ishi uti hë la cane la fene hnengödrai; tro Nyidëti a hutra la tane pehna, me axeciëne la jo, me deuthe tije la ite ikariota [nyine isi] hnei eë.”—Salamo 46:8, 9.
17, 18. Nemene la aqane troa imelekeu hnene la itre atr memine la itre öni, ngöne la fene ka hnyipixe?
17 Tro mina fe a hetrenyi la tingetinge ngöne la aqane ce mele ne la itre atr me itre öni, tune ekö e Edena. (Genese 1:28; 2:19) Öni Akötresieti ka hape: “Nge ngöne la ijine cili tro ni a isisinyikeu me ite öni ka tro göi angat, me ite öni ka sheshë e caha, me ite öni ka wewëne la hnadro; nge . . . Tro ni a ameköle xetietë angat.”—Hosea 2:18.
18 Nemene hë la etrune la tingetinge cili? “Nge tro la luko a ce lapa me nekö i mamoe, nge tro la lepad a ce meköle memine la neköi got, nge tro la neköi kau me neköi liona a ce memine la öni ka pipixenyë, nge tro la nekönate ka co a e nyiuden.” Thaa tro hmaca kö a ithupëjia la ketre öni me ketre öni, nge itre atr me itre öni. Ke, tro mina fe “la liona a xeni ene qite tune lo bolok”!—Isaia 11:6-9; 65:25.
Fene Hnengödrai Hna Nyidrawane Matre Troa Paradraiso
19. Nemene la ewekë hna ajan, ngöne la kola nyihnyawane la fen?
19 Tro ha nyidrawane asë la ihnadro, matre ketre paradraiso hna troa mele ngön hnene la itre atr. Celë hi kepine matre, hnei Iesu hna thingehnaeane kowe la ketre atr ka mejiune koi nyidrë, ka hape: “Tro eö a ce me ini ngöne la paradaiso.” Hna qaja fe hnei Tusi Hmitrötre ka hape: “Tro la hnapapa memine la ga qaqacil’a madin’it’ej, nge tro la hnit’a aciacin, me enge tune la peledë. . . . Ke xulu hë la timi ngöne la hnapapa me ite hneopegejë ngöne la ga cepunikë.”—Luka 23:43; Isaia 35:1, 6.
20. Pine nemene matre, thaa tro hmaca kö a akötrëne la itre atr hnei jiinë xen?
20 Thaa tro hmaca kö la itre atr, itre milio la etrun, a akötre hnei jinë xen, fene la musi ne la Baselaia. “Loi eje la qite ka nyimute ngöne la [“fene hnengödrai,” MN], hune la hene la ite wete tro ha nangenange la ite wen’ej.” “Nge tro la ite sinöe ne la hlapa a wa, nge tro la hnadro a hamëne la xenin’ej, nge tro angatr’a lapa xetietë ngöne la ite zi angat.”—Salamo 72:16; Ezekiela 34:27.
21. Tune kaa fe elanyi göi ejolene troa hetre uma, me itre kaban, me itre ngazo hnine la itre xötre hnalapa?
21 Thaa tro hmaca kö a hetre puafala, me itre atr ka pë hnalapa, pë hmaca kö kaban, maine itre xötre hnalapa hna jilapane hnene la ihumuth. “Nge tro angate’a xupi ite uma me lapan’it’ej, nge tro angat’a eënyi vin me iji wen’it’ej. Tha tro kö angat’a xupi uma, nge kete ate a lapan; tha tro kö angatr’a eënyi vin, nge tro kete ate a ij.” “Ngo tro angat’a isa lapa fene la ite vine i angate me fene la ite hmejienge i angat; nge pëkö ate troa aqounyi angat.”—Isaia 65:21, 22; Mika 4:4.
22. Nemene la aqane qeje pengöne i Tusi Hmitrötre la itre manathithi hna troa kapa qathene la mus i Akötresie?
22 Ame la itre ewekë cili me itre xaa manathithi ju kö, ke, celë hi itre manathithi lai hna troa kapa hnene la itre atr ngöne la paradraiso. Öni Davita ngöne Salamo 145:16 ka hape: “Cilieti [Akötresie] a shathe la iwanakoime i cilie, me amejine la ite ewekë ka mele asëjëihë.” Celë hi matre thaa sesëkötre kö së la hna perofetane hnei Tusi Hmitrötre ka hape: “Nge tro la ange ka menyike a hetenyi la [“fene hnengödrai,” MN], nge tro angat’a madine la tingetinge atraqat. . . . Tro hë la ange ka meköti a hetrenyi la [“fene hnengödrai,” MN], me lapa palua kö ngön’ej.”—Salamo 37:11, 29.
Paatre Hë Lo Itre Ewekë Ka Hekö
23. Tune kaa la aqane tro la Baselaia i Akötresie a apaatrene la nöjei akötre ne la atr?
23 Tro la musi ne la Baselaia i Akötresie a apaatrene la itre akötre hna kuca kowe la atr, ngöne lo sikisi thauzane lao macatre ka ase hë. Tro la itre madrine la ijine cili, a thahe lo itre aqane akötrëne la atr ngöne la mele i angeic. Thaa tro jë kö a ajolëne la mel, hnene la itre mekune ka ngazo ne lo itre akötre hnapan. Tro ha köle trije trongëne la itre akötre hnapan, hnene la itre mekune memine la itre huliwa ka lolo hna troa kuca ngöne la nöjei drai.
24, 25. (a) Nemene la hna thingehnaeane hnei Isaia ekö? (b) Pine nemene matre, xecie koi së laka, tro ha thëthëhmine trootro lo itre akötre hne së hna melëne ekö?
24 Hnene la Akötresie ka hnimi së hna qaja ka hape: “Ini a xupe la hnengödrai ka hnyipixe [ketre musi ka qaa hnengödrai nge ka hnyipixe hna acile e koho hune la atr] me fene hnengödrai ka hnyipixe [itre lapa ne la itre atr ka meköt]; nge tha tro hmaca kö a mekune la hnapan, me xulu e kuhu hni at. Ngo madinejë me aciacine pala jë la ewekë ini a xup.” “Mano asë hë la fene hnengödrai me upu, nge angat’a canga nyima.”—Isaia 14:7; 65:17, 18.
25 Haawe, jëne la Baselaia i Nyidrë, tro pena ha Akötresieti a ujëne lo aqane mele ka ngazo, ke qea pala ha la hna lapane la fen. Ngöne la mele ka epine palua, tro hë Nyidrëti a amamane la etrune la ihnimi Nyidrë koi së, ngöne laka, troa hamëne la itre manathithi ka troa nyihnane lo itre akötre hna xomi hnine ekö. Tro pë hë a hajihaji ngöne la itre mekune së la itre jole hna cile kow ekö, ene kö e mekune hmaca së.
26. Pine nemene matre, Akötresieti a troa nyihnane koi së lo itre akötre së ekö?
26 Celë hi aqane tro Akötresieti lai a nyi june koi së, la itre akötre hne së hna xomi hnine ngöne la fene celë. Atre hi Nyidrëti laka, thaa zö së kö la easë a mala nge itre ka ngazo hë së, ngo edrö së lai qathene lo pane keme me thine së. Ketre thaa zö së pena kö la easë a traqa kowe la fene hna musinëne hnei Satana, ke maine hnei Adamu ju me Eva hna catre mele nyipici koi Iehova, haawe tro ha hnaho së ngöne la paradraiso. Celë hi matre, troa sisitria catre la itre ewekë hnei Akötresie hna troa kuca nyine nyihnane lo itre akötre ne la atr ekö, pine laka tru la utipine i Nyidrëti koi së.
27. Nemene la itre hna perofetane ka mingöming, ka troa eatre elanyi ngöne la fene ka hnyipixe?
27 Ame ngöne la fene ka hnyipixe, ke, tro hë la itre atr a hetrenyi la mele hna nuegufan, hna thingehnaeane hë ngöne Roma 8:21, 22 hna hape: “Me kola mejiune la tro ha nue la ite ewekë hna xupe qa ngöne la hna othe hnene la ka hnyeqet, kowe la hna nue gufane ka hadehadeu ne la ite neköi Akötesie. Ke ate hë shë laka, kola awe, me thë la ite ewekë hna xup’asë uti hë enehila.” Tro hë la itre atr a öhne la aqane eatre hnyawa lo ewekë hna thithi fë, kola hape: “Jiniati e hlepëti pi la baselaia i enëtilai. Longëtinejë la hanengë i enëtilai e celë fewatine axajanëti e kohoti hnengödrai.” (Mataio 6:10) Tro hë la itre aqane mele ngöne la ihnadro hna aparadraison, a ahnuene la mele e koho hnengödrai.
[Iatr ne la götran 23]
Ngöne la fene ka hnyipixe, tro la itre qatre a hetrenyi hmaca la egöcatre tune la thöth
[Iatr ne la götran 24]
Tro ha apaatrene la itre meci asë, memine fe la itre eatr ne la ngönetrei
[Iatr ne la götran 25]
Tro ha amelene hmaca la itre ka meci hë, ngöne la fene ka hnyipixe
[Iatr ne la götran 26]
“Tha tro hmaca kö angat’a ini ishi”
[Iatr ne la götran 27]
Troa ce mele tingetinge la atr memine la öni, hnine la paradraiso
[Iatr ne la götran 27]
‘Tro Akötresieti a saathe la iwanakoime i Nyidrë, me amejine la itre ewekë ka mele asëjëihë’
[Iatr ne la götran 28]
Thaa Baselaia i Akötresieti hmekuje kö a troa nyihnane la itre akötre hna xomi hnine ekö