Mele Ka Tingeting Ngöne La Fen Ka Hnyipixe

Nemene fe la alien la mekune i nyipunie ngöne la iatr celë? Hapeu, aja i nyipunieti kö troa hane mel tune cahu, troa tingeting, me madrin, me meledrai? Eje hi. Ngo, hapeu, la troa mejiun kowe la itre aqane mele celë ka troa cile huti elany ngöne la fen, tro kö a xome ceitu me pu ne jidr?

Nyimutre la itre atr ka mekun tune lai. Enehila, easa goeën la itre isi, me ihumuth, me jiinë xen, me kucakuca, nge kola qatre trootro​—xalaithe hi la itre hace hna e. Ngo ame pe ke, hetre kepin matre tro sa mejiun. Tusi Hmitrötr a qaja la pengön la itre drai ka troa xulu, ene la hne së hna “treqene thenge la hnei [Akötresie] hna thinge hnaeane, la hnengödrai ka hnyipixe memine la fene hnengödrai ka hnyipixe; nge eje la thina ka meköti e cili.”​—2 Peteru 3:13; Isaia 65:17.

Ame la “hnengödrai ka hnyipixe” me “fene hnengödrai ka hnyipixe,” tune la hna qaja hnei Tusi Hmitrötr, tre, thaa kolo kö a qaja la hnengödrai me fene hnengödrai hne së hna goeën, laka, troa nyihnan lue ej hnei ka hnyipixe. Ka pexej la aqane xupe lue ej, nge Tusi Hmitrötr a amaman laka, tro lue ej a cile hut palua kö. (Salamo 89:36, 37; 104:5) Ame la “fene hnengödrai ka hnyipixe” tre, kola qaja la itre atr elany ka meköt nge ka troa lapan la fen, nge ame la “hnengödrai ka hnyipixe” tre, ketre baselaia, nge mus ka pexej hna acil e koho hnengödrai, kola troa mus kowe la itre atr e celë fen. Ngo, hapeu, ka loi kö la troa mejiun laka troa eatr elany la “fene hnengödrai ka hnyipixe”, maine fen ka mingöming?

Nyipici laka, aja i Akötresie ngöne la qaan, troa ej ngöne la fen la itre aqane mel cili ka mingöming. Hnei Nyidrëti hna amë la lue pane trefën e celë fen, ngöne la Paradraiso e Edena, nge lolo fe la hnëqa hna hamë nyidro, hna hape: “Manapi me hate, me atiqane la fene hnengödrai, me xom’ acon’ ej.” (Genese 1:28) Aja i Akötresie tro nyidroti a hnaho, me atiqan trongën la fen matre paradraiso asë pi. Ngacama, hnei nyidroti hna thaa drei Akötresie, matre thaa ijiji nyidroti hmaca kö troa hane mel epine palua, ngo ame pe, ke, thaa saze kö la trepene mekune i Akötresie. Nge, tro lai a eatr ngöne la fen ka hnyipixe!​—Isaia 55:11.

Eje hi laka, ame la nyipunieti a qaja lo Thithi ne la Joxu, ene lo Tretretro Hun, ngöne lo kola sipon troa hlepëti la Baselaia, nyipunieti hi lai a thithi fë la mus e hnengödrai, matre tro ej a apaatren la iangazo qa celë fen, me musi hun lai fene hnengödrai ka hnyipixe. (Mataio 6:9, 10) Nge ka xecie koi së laka, tro Akötresieti a eatrën la thithi celë, pine laka, hna thingehnaean hnene la Wesi Ula i Nyidrë ka hape: “Tro ha la ange ka meköti a hetenyi la nöj, me lapa palua kö ngön’ ej.”​—Salamo 37:29.

Mel Ngöne La Fen Ka Hnyipixe i Akötresie

Tro la Baselaia i Akötresie a hamën la itre manathith ka sisitria, me axulun la nöjei ewekë ka loi, ene lo itre ewekë hnei Akötresieti hna hnëkëne hë ekö ngöne la qaan thatraqan la nöje i Nyidrë, matre tro angatr a mele madrin ngöne la fen. Troa paatr la imethinë, me itre pun ka ngazo qa ngön, nge tro mina fe la nöjei atr e celë fen a caas me ce mele tune la itre treme sineen. Ame e hnin la Tusi Hmitrötr, ke, Akötresieti a thingehnaean ka hape troa ‘nyi pun la ite ishi uti hë la can la fene hnengödrai.’ “Tha tro kö la kete nöj’ a xejë la taua kowe la kete nöj, nge tha tro hmaca kö angat’ a ini ishi.”​—Salamo 46:9; Isaia 2:4.

Eje hi laka, tro hë a paradraiso la ihnadro asë, tun la ketre hlapa. Öni Tusi Hmitrötr ka hape: “Tro la hnapapa memine la ga qaqacil’ a madin’ it’ ej, nge tro la hnit’ a aciacin, me enge tune la peledë. . . . Ke xulu hë la timi ngöne la hnapapa me ite hneopegejë ngöne la ga cepunikë. Nge tro ha hneopegejë la sarab, nge tro ha timi ka qeqe a ga qaqacil.”​—Isaia 35:1, 6, 7.

Nyimutre la itre kepin ka troa amadrinë së ngöne la Paradraiso e celë fen. Pë hmaca kö tro la itre atr a mecijin. Öni Tusi Hmitrötr ka hape: “Ase hë wa la fene hnengödrai.” (Salamo 67:6; 72:16) Tro angatr asë a isa kepe thangan la hnei angatr hna isa huliwa, tune la hna thingehnaean hnene la Atre Xupi së ka hape: “Nge tro angat’ a xupi ite uma me lapan’ it’ ej, nge tro angat’ a eënyi vine me iji wen’ it’ ej. . . . tha tro kö angat’ a eënyi vin, nge tro kete a ate a ij.”​—Isaia 65:21, 22.

Ame ngöne la fen ka hnyipixe i Akötresie, tre, pë hmaca kö tro la itre atr a ilapa trai ngöne la itre iuma ka draië, pë hmaca kö kaban, ke, hanawang la aja i Akötresie: “Tro angat’ a xupi ite uma me lapan’ it’ ej . . . Tha tro kö angat’ a xupi uma, nge kete ate a lapan.” Ketre mina fe, Tusi Hmitrötr a thingehnaean ka hape: “Tha tro kö angat’ a huliwa gufa.” (Isaia 65:21-23) Qa ngöne lai, tro la itre atr a kepe thangan la huliwa i angatr, nge hetre madrin hna kapa qa ngön. Pë hmaca kö atr ka mele menu, a thatre kö la nyine troa kuca.

Ngöne la ijin ka ijij, ke, tro la Baselaia i Akötresie a acile hmaca la itre aqan imelekeu ka tingeting hna melën ekö ngöne la hlapa e Edena, then la itre öni, me then la itre öni memin la itre atr. Öni Tusi Hmitrötr ka hape: “Tro la luko a ce lapa me nekö i mamoe, nge tro la lepad a ce meköle memine la nekö i got, nge tro la nekö i kau me nekö i liona a ce memine la öni ka pipixenyë, nge tro la nekönate ka co a e nyuden.”​—Isaia 11:6-9; Hosea 2:18.

Ngo pane mekune ju, ame ngöne la Paradraiso e celë fen, tre, troa nyinyin la meci ne la nöjei ka wezipo, memin la itre sine atr! Wesi Ula i Akötresieti a anyipicin koi së laka: “Tha tro kö a qaja hnene la ate lapan’ eje, ka hape, Ini a mec.” (Isaia 33:24) “Tro [Akötresie] a köle trije la nöjei tenge timida asëjëihë qa ngöne la ite lue meke i angat; nge pa hmaca kö mec, me hace hni, me teij, me aköt, ke patë hë la ite ewekë hnapan.”​—Hna Amamane 21:4.

Ijiji Nyipunieti Fe La Itre Manathithi Celë

Eje hi laka, ame ngöne la nyipunie a dreng la itre hna thingehnaean hnei Akötresie, kola kökötr fe thei nyipunie la ajan troa hane mel ngöne la fen ka hnyipixe me ka meköt i Nyidë. Nge ngacama jol e troa kapa hnei itre xan, ke kola mekun ka hape, mingöming pala ha e troa jele nyipicin, ngo ame pe, tre, ka xecie koi së laka, troa eatr la itre ewekë cili, pine laka, itre ej a troa xulu qa ngön la ihnatrapaime ne la Atre Xupi së ka tru ihnimin.​—Salamo 145:16; Mika 4:4.

Nyipici laka, hetrenyi la itre hna amekötin nyine tro sa trongën, maine easë a ajan troa mele epin palua ngöne la Paradraiso ka troa xulu e celë fen. Hnei Iesu hna amaman koi së la ketre hna amekötin ka sisitria ngöne la thithi nyidrë koi Akötresie, kola hape: “Dei lola mele ka tha ase palua kö, laka tro angat’ a ate hmekua cilie la nyipi Akötesieti ka cas, me Iesu Keriso la hnei cilieti hna upengëtin.”​—Ioane 17:3.

Haawe, maine hetre nyipi aja the së troa mel ngöne la fen ka hnyipixe i Akötresie, nyipi ewekë tro sa atrehmekun la aja i Nyidrë, nge thupene lai, loi e troa trongën ej. Eje hi lai laka: “Kola pate la fene hnengödrai [celë], memine la hna aja kow; ngo troa cile huti epine palua la ate kuca la aja i Akötresie,” nge ketre, tro angeic a mele kaloi me kapa la itre manathith ka cile hut, hna hamën hnene la Atre Xupi së ka tru ihnimin.​—1 Ioane 2:17.

Maine pëkö hna qaja, ke, troa xome la itre mekene tusi ngöne hi lo Lifu Bible​—The Bible Society in the South Pacific.