Enyipicine La Itre Mekune Göi u
“Tro hë nyipunie a ate la nyipici, nge tro ha nue amacai nyipunie hnene la nyipici.”—IOANE 8:32.
1. Pine nemene matre, nyipi ewekë troa wange la itre ini hne së hna kapa göi u me mec?
AME la itre mekune ka qeje pengöne la mec, memine la mele e thupene la mec, ke, wene ne la itre hna ini ngöne la isa hmi ne la itre atr me isa aqane mele i angatr. Qa ngöne la itre mekune hne së hë hna ce wang, catre la mejiune ne la itre atr göi u, ene laka, tro eje a traqa kowe la hna ie, e thupene la hna anyimua unen; nge itre xane a mekune ka hape, pë hmaca ju kö xaa mel, e hune la mele celë. Qa ngöne lai, maine jë tro la ketre atr a mejiune troa traqa kowe la pun, ene la ketre musi ka draië catr, thupene la hna mec, nge ame ketre, troa traqa kowe la Nirvana; ame itre xan, kola mejiune troa kapa la itre manathithi e koho hnengödrai. Matre drei la ka nyipici e angatre lai? Pine laka, troa hetre thangane la itre ini hne së hna kapa, ngöne la itre aqane ujë së, me itre huliwa së, me itre mekune hne së hna troa axeciën, hapeu, nyipici laka, thaa tro kö a hane hmala la hni së troa thele la mekune ka sa la hnyinge cili?
2, 3. (a) Pine nemene matre, ijije hi tro së a mejiune kowe la hna qaja hnei Tusi Hmitrötre göi u? (b) Tune la mekune i Tusi Hmitrötr, nemene la nyipici göi u?
2 Pë hmaca ju kö ketre tusi ka tune la Tusi Hmitrötr e celë fen, celë hi itusi ka hekö catr; eje a qeje pengöne la aqane trongene la mele ne la atr, qaane ekö ngöne la kola nyiqaane xupe la pane atr, ene la pane u. Thaa hna angazone kö la itre ini ne ej, hnene la itre filozofi, memine la itre ini i atr. Kola qaja amamane hnyawa hnei Tusi Hmitrötre la nyipici göi u: Ame la u i epuni ke, epuni hi lai, e meci hë la itre atr, haawe, pë hë mele thei angatr, paatre hë, nge ame koi itre ka meci thaa hna thëthëhmine ëjene hnei Akötresie, tro ha amele angatre hmaca ngöne la ijine ka ijij. Nemene la aliene la itre mekune celë koi epun?
3 Hnei Iesu hna qaja kowe la itretre drei nyidrë ka hape: “Tro hë nyipunie a ate la nyipici, nge tro ha nue amacai nyipunie hnene la nyipici.” (Ioane 8:32) Eje hi laka, troa nue amacanyi së hnene la nyipici. Ngo qa ngöne nemene tro la nyipici göi u a nue amacanyi së?
Inue Amacanyi Qa Ngöne La Qou Me Pë Mejiun
4, 5. (a) Nemene qou la hna apaatrene hnene la nyipici göi u? (b) Nemene la aqane hamëne hnene la mejiune kowe la melehmaca, la trenge catre kowe la ketre thöthi ka tro ha mec?
4 Kola qaja hnene la itus, The World Book Encyclopedia, ka hape, “Ala nyimu catre la itre atr ka qoue mec, matre angatre a tupathe troa xome trije eje qa ngöne la itre mekune i angatr.” Öni Toynbee, ketre trahmanyi ka inine la mele ne la atr, ka hape, “Ame la hnepe hnëewekë hna hape ‘mec,’ ke, kösë thaa hane hmaca fe kö qaja hnene la itre atr ne la götrane ahuë.” Ame pena ha ngöne la itre xaa nöj, thaa hna qaja hmaca kö hnene la itre atr la hnepe hnëewekë cili, ngo hna majemine pena ha qaja ka hape, “paatre hë” ngo thaa qaja pe ka hape “meci hë,” ngöne la kola qeje pengöne la atr ka meci hë. Ame la qoue mec, ke, ene la kola qouene la hna thatre, pine laka, ame kowe la ka ala nyim, ewekë ka sihngödri la mec. Kola apaatrene la qou cili, hnene la atrehmekune ne la nyipici, eje a fe la itre lue meke së ngöne la ewekë ka traqa koi së e meci hë së.
5 Hanawange la ketre ceitun, ene la aqane mekune i Micheline, ketre jajinyi ka 15 lao macatre. Hna tithi angeice hnene la ketre meci ka tru, leucémie la ëjen, nge meci pe hi la hna treqen. Kola mekune hmaca hnei Paula thine i angeic, me qaja ka hape: “Öni Micheline ka hape, thaa itupathe ka tru kö koi angeic la mec, pine laka, atre hi angeice ka hape, thaa angeice kö a troa meci palua. Hne huni pala hi hna ithahnatane la fene ka hnyipixe i Akötresie, memine lo itre atr hna troa amelene hmaca. Atraqatre la lapaune i Micheline koi Iehova Akötresie, me kowe la melehmaca, nge pëkö luelue ngön.” Haawe, jëne la mejiune kowe la melehmaca, hna nue amacane la nekö jajinyi celë qa ngöne la ehacene la qoue mec.
6, 7. Kola nuamacanyi së qa ngöne nemene hleuhleu, hnene la nyipici göi u? Hamëne ju la ketre ceitun.
6 Nemene la thangane la nyipici kowe la keme me thine i Micheline? Kola qaja hnei Jeff, keme i angeice ka hape: “Pëkö hace me akötre ka tru hune la meci ne la nekö i nyiho jajiny. Ngo catre la lapaune i nyiho kowe la hna thingehnaeane hnei Iehova, göi melehmaca, nge nyiho a nyiqaane lapa goeëne lo ijine tro nyiho a iöhnyi me imadri hmaca me Micheline hnimina i nyiho. Drei la madrine huni elanyi ala kön, troa caasi hmaca me ce mel!”
7 Eje hi laka, jëne la nyipici ngöne la u, kola nue amacanyi së qa ngöne la pë mejiun, me hleuhleu, itre ewekë ka traqa koi së ngöne la kola meci la ketre atr hne së hna hnim. Nyipici, pëkö ka troa apaatrene asë la akötr memine la hleuhleu, ngöne la kola meci la ketre atr hne së hna hnim. Ngo, jëne la mejiune kowe la melehmaca, kola ahmaloeëne la hace, me aijijëne troa xomihnine la akötre cili.
8, 9. Kola nue amacanyi së qa ngöne nemene qou, hnene la nyipici göne la pengöne la itre ka meci hë?
8 Kola nue amacanyi së fe qa ngöne la qoue mec, hnene la nyipici qa hnine la Tusi Hmitrötr, göi pengöne la ka mec. Nyimutre la itre atr hna nyihluëne hnene la itre ewekë hna majemine kuca ngöne la kola meci la ketre atr; ame hë la angatre a atre la nyipici göi pengöi itre ka mec, haawe, thaa qoue hnëjine hmaca kö angatr, memine lo itre ewekë hatrene ngazo, me itre wene drösinöe nyine ithupë, me itre nyine kuci haze; ketre, thaa hane hmaca fe kö angatre hujëne la itre ewekë i angatr ka sisitria, matre troa amadrinëne la itre xötrapane i angatr, me sewe nyudrene troa bëeke matre troa nyiakekëne la itre ka mel. Ketre, pine laka, “tha’te kö la kete ewekë” hnene la ka mec, haawe, gufa kö lo lai itre hna majemine kuca.—Ate Cainöj 9:5.
9 Eje hi laka, ame fe la nyipici göi u, hna amamane e hnine la Tusi Hmitrötr, ke, eje a inuamacany, nge sisitria troa mejiune kow. Ngo pane wange ju fe la ewekë ka sisitria hna amekötine hnei Tusi Hmitrötr, thatraqai epuni elany.
[Iatr ne la götran 29]
Kola nuamacanyi së hnene la nyipici göi u, qa ngöne la qoue mec, me qoue ka mec, memine la hleuhleu pine la meci ne la ketre atr hne së hna hnim