Maca Ka Loi Hnei Angatr Hna Ajan Tro Fe Nyipunieti a Hane Dreng
AME lo Iesu petre kö e celë fen, hna traqa koi nyidrëti lo itretre drei nyidrë me hnyingëne ka hape: “Da ulatine jë koi huni jötëtia hlepëti eue la ite ewekë cili? Nge nemenëti la hatene la hlepëti hmaca enëtilai, meminëti la puatine la fewatin?” Nyidrëti a sa ju koi angatre ka hape, tro ha itö isi hnene la itre nöje ka nyimutre, me traqa la jiin me itre mec, me itre sa, nge tro fe a elë la ngazo, nge tro la itre keme ne hmi ka thoi a atriane la ka ala nyimu nge troa methinëne me akötrëne la itre nyipi hlue, nge troa nanazije fe la ihnimi kowe la meköt ne la ka ala nyim. E traqa pi la nöjei ewekë cili, hatrene hi lai, laka, traqa hmaca ha Keriso, ngacama thaa hna öhne kö hnei lue meke i atr ngo musi hë nyidrë ngöne la Baselaia e hnengödrai. Hapeu, thaa maca ka sisitria kö lai, maca ne qeje loi? Nge Iesu a sisedrëne ju la itre hna ewekë cili hnene la ketre götrane celë ne la hatren: “Nge tro ha cainöjëne la maca ka loi celë ne la baselaia e cailo fene nyine anyipicine kowe la nöjei nöj ; ame hna traqapi la pun.”—Mataio 24:3-14.
Pëkö eloine la itre ewekë ka traqa kowe la fene enehila; ame pe la hnene itre eje hna nyihatren, ene lo hlepëti i Keriso, tre, celë hi ka ithue madrine së lai. Tune lo aqane cinyihane me cainöjëne trongën, hna traqa la itre ewekë cili lo macatre 1914. Kola siji ifegone hnene la macatre cili, la pune la musi angetre ethen me xejë la ketre hneijine nyine troa sole qa ngöne la musi ne la atr kowe la Mus i Keriso Ka Caa Thauzane Macatre.
Hetre ijine ne troa pane ilapa treqe hna qaja hnei Salamo mekene 110, xötre 1 me 2, me Hna Amamane 12:7-12. Önine la itre hna cinyihane e cili, ka hape, tro Keriso a pane lapa ngöne la götrane maca i Akötresie e hnengödrai uti hë la troa acili Joxu nyidrë. Qa ngöne lai, isi jë hi e hnengödrai, ame la pun, tre, hna waja ukapië Satana kowe la fen. Ame la thangane lai, tre, kola trotro trane la fene hnene la nöjei pengöne akötr; hleuhleu me akötr. Ngo ame pe, musi hë Keriso nyipine la itre ithupëjia me nyidrë. Nge easenyi hë matre apaatrene pi la nöjei ngazo ka isa pengön jëne lo “aköte atraqate,” lo hna troa umuthe hnene la isi Amagedo. Thupene jë hi lai, kola jilapane la fene asë hnene la haodrai me tingeting, ke, celë hë lo Mus i Keriso Ka Caa Thauzane Macatre.—Mataio 24:21, 33, 34; Hna Amamane 16:14-16.
Kola qaja hnei Tusi Hmitrötr, ka hape: “Nge wangate hmekune ju eö la, ka hape, tro ha traqa la nöjei ijine ka aköte ngöne la ite drai hnapin. Ke tro nöjei ate a hnimi angate kö, me meciu mani, me selën, me nyi tru, me pi tru, me tha dei keme me thin, me tha ole kö me tha metöte kö, angete tha hnimi sinen, me tha ihnimi kö, me itete ixöjetij, me ka tha’ teine xomi hnöth, me ka cate mek, me itete tha ajane kö la loi, itete wanaxoe, me huliwa wathöthöl, me ka kekë, me itete ajane la nyine amadine ngo tha ajane kö koi Akötesie, angete kösë thina ka ijiji Akötesie, ngo xelene pe la menen’ ej ; iananyi pi eö me ite ka tune lai.”—2 Timoteo 3:1-5.
Hetre itre atr ka catre fë ka hape, ka qaane hë ekö la kola traqa kowe la mele ne la atr la itre ewekë ka tune la, ngo thaa hna traqa atrunyi pe tune enehila. Kola qaja hnene la itre ka edromëne la itre drai hnapan me ange qeje mekun, ka hape, thaa ase pala fe kö la atr cile kowe la ketre hneijine ka ceitu memine la hnei angeice hna melëne qaane lo macatre 1914. (Wange ju la götrane 7.) Thaa hna trotro tranyi angatre kö ekö hnene la itre akötre ka jilapane la fene enehila. Hetre itre xaa ewekë fe ka nyi sinatrongene lo hatrene la itre drai ne la pune hna qaja amamane hnei Keriso, hane hi la itre nyine tro sa wanga atrehmekun: Kola cainöjëne ngöne la fene asë la hlepëti i Keriso me Baselaia i nyidrë; thaa hna tune kö ekö la etrune la aqane tro fë la huliwa cili. Maine nyipici laka, tru la itre icilekeu ngöne la hna cainöje trootro, ngo eje hi lai laka, tru catre kö la hna axösisine la Itretre Anyipici Iehova. Kola traqa kowe la itre hadredre la etrune la itre hna humuthe ngöne lo itre lapa ne ithahluë i itre Nazi. Enehila pala hi, nyimu götrane hna wathebone kowe la Itretre Anyipici Iehova, nge ame ngöne la itre xaa götran, tre, hna xolouthi angatre me akalabusin me axösisine me humuth. Kolo itre ewekë lai ka nyi sinatrongene lo hatrene hna qaja hnei Iesu.
Tune la hna ahnithe hë ngöne Hna Amamane 11:18, ka hape, ‘hnene la itre nöj hna elëhni’ me icilekeu memine la Itretre Anyipici Iehova ka mele nyipici, nge celë hi ka tro lai a qajaqaja ka hape, calemi hë la “elëhnatresi” Iehova koi angetre ethen. Kola qaja mina fe hnene la itre xötre cili, laka, tro Akötresieti a “ajifelö [maine apaatrenyi] angahaetra angete ajifelönëti [maine angazone] la fewatin.” Kola mama hnyawa ngöne la hneijine së laka, troa jole catre la mele ne la atr elany, qa ngöne la aqane angazone angeice la fene enehila. Nyimutre la itre siatifik, angatr a hmekë së enehila, kola hape, maine tro pala hi la atr a nei poizin me angazone la ihnadro, haawe, tro hë eje elanyi a pë atren, ke pë hmaca kö ka atreine troa lapaane ej. Ngo hnei Iehova lo hna “xupe ej [la fen], mate troa lapan.” Tro Nyidrëti a canga apaatrene triji angatr, angetre angazone ej, wanga angazone asë pi angatre elanyi la ihnadro.—Isaia 45:18.
ITRE MANATHITHI FENE LA BASELAIA
Ame la mekun, ene laka, tro la itre atr a itre jini ne la Baselaia i Akötresieti elanyi e celë fen, tre, maine jë troa nango jole troa trotrohnine hnene la itre ka mekune ka hape, kola elë hnengödrai eë asë la itre atr ka loi thiina. Kola amamane hnei Tusi Hmitrötr, ka hape, ala xalaithe hi la itre ka troa tro koho hnengödrai, ngo ala nyimu catre kö la itre ka troa mele pë hë e celë fen. (Salamo 37:11, 29; Hna Amamane 7:9; 14:1-5) Tune la hna qaja hnene la ketre ewekë hna perofetane hnei Daniela, tro la Baselaia i Akötresie hna cilëne hnei Keriso, a lapane asë la ihnadro, nge troa musinëne ej hnei nyidrë.
Ame ngöne la hna perofetane cili, tre, hna nyihatrene la Baselaia i Keriso hnene la ketre etë ka uke qa ngöne la ketre wetr; kola nyihatren hnene la wetr la musi cile i Iehova. Kola lepe me apaatrene hnene la etë cili la ketre hnasaatr ka nyihatrene la itre musi ka tru, nge ame la etë cili atre “lepe la hnashaate, te, wete atraqate hë ej, mate atiqane la fene hnengödrai asë.” Kola qaja fe hnene la hna perofetane ka hape: “Nge ngöne la ite drai ne la ite joxu cili tro Akötesieti ne hnengödrai a axulune la kete baselaia ka tha tro kö a apaten’ epine palua ; nge tha tro kö a nue la baselaia cili kowe la ite xa nöj, tro ej’ a lep’ anyilanyilane me apatene la nöjei baselaia asëjëihë cili, nge tro ej’ a cile hut’ epine palua.”—Daniela 2:34, 35, 44.
Celë hi Baselaia lai me mejiune ka eje e hnine la Tusi Hmitrötr; mejiune kowe la ketre mele ka epine palua ngöne la ihnadro hna troa apuiloin me amingömingön; celë hi ewekë hna ajane lai troa ce ithanatane me nyipunie hnene la Itretre Anyipici Iehova. Troa aijijën la itre atr ka mele enehila, nge itre xan ka meci hë, itre milio la etrun, troa hane mele epine palua e celë fen. Haawe, tro ha eatre fene la Mus i Keriso Iesu Ka Caa Thauzane Macatre, lo aja i Iehova hna eköthe ekö ngöne la qaan, lo Nyidrëti a xupe la ihnadro me amë la lue pane atr. Thaa tro jë kö a kucakuca me hleuhleu la mele së ngöne la Paradraiso elanyi e celë fen, pine laka hetre ewekë ka lolo pala hi nyine tro sa kuca. Tune lo aqane hamëne ekö koi Adamu la ketre huliwa ngöne la hlapa e Edena, ketre, tune mina fe la itre ka troa mele elanyi ngöne la Paradraiso; atraqatre la huliwa nyine tro angatr a kuca, lo troa nyihnyawane la ihnadro, memine la itre isinöe ka cia hun me itre öni ka mele ngön. Tro hë la itre atr a “mele ahoeane kowe la huliwa ne la ite ime i angat.”—Isaia 65:22; Genese 2:15.
Ijije hi tro sa qaja la itre xötr ne la Tusi Hmitrötr ka nyimutre ka amamane la itre aqane mele elanyi ngöne la kola troa eatre lo thithi hnei Iesu hna inin me hamë së, hna hape: “Jiniati e hlepëtipi la baselaia i enëtilai. Longëtinejë la hanengë i enëtilai e celë fewatine axajanëti e kohoti hnengödrai.” (Mataio 6:10) Ngo tro fe sa hane wanga atrune la mekune celë, kola hape: “Hana wang, thei nöjei ate la uma ne heta i Akötesie, nge tro nyidëti a lapa thei angat, nge tro angat’ a nöjei nyidë ; nge tro nyidëti Akötesieti a ce me angat, ene Akötesi angat. Nge tro nyidëti a köle tije la nöjei tenge timida asëjëihë qa ngöne la ite lue meke i angat ; nge pa hmaca kö mec ; me hace hni me teij, me aköt ; ke patë hë la ite ewekë hnapan. Nge hna ulatine hnei nyidëti ate tuenietine la theron, ka hape, Hana wang, tro ni a ahmadradrane la nöjei ewekë asëjëihë. Nge öni nyidëti koi ni, ka hape, Cinyihaneju ; ke nyipici me meköti la nöjei tenge ewekë cili.”—Hna Amamane 21:3-5.
[Hna cinyihan ne la götran 15]
“Nöjei ijine ka aköte,”
NGO “ame hna traqapi la pun”
[Iatr ne la götran 18]
Pays-Bas
[Iatr ne la götran 18]
Nigéria