Mekene Faif
Inuamacany Kowe La Itre Ka Nyihlue i Iehova
1, 2. (a) Nemene la inuamacany hna hamën hnei Akötresie kowe la lue pane trefën? (b) Qaja jë la itre xaa wathebo nyine trepen la mele i Adamu me Eva.
AME ngöne lo Iehova a xupe la lue pane atr ene Adamu me Eva, lolo la mele i nyidro, thaa hna hnöthe kö la mele i nyidro tune la itre atr enehila, ngo hna nuamacanyi nyidro. Nyidroti a mele ngöne la Paradraiso, ene lo hlapa ka mingöming e Edena. Pëkö meci ka akötrën la mele i nyidro, pine laka, pexeje la lue mekune i nyidro nge ketre tune mina fe la lue ngönetrei i nyidro. Thaa hna hane fe kö ketri nyidroti hnene la mec, tu së enehila. Ketre, thaa hna xupi nyidroti kö matre ceitu me itre robo, ohea lue ka isa atreine nyidroti troa isa iën la nyine troa kuca me isa axeciën la isa mekune hna isa wang. Ngo eje hi lai laka maine nyidroti a ajan troa eje pala hi thei nyidro la inuamacanyi ka lolo cili, haawe loi e tro nyidroti a mele thenge la itre trenge wathebo i Akötresie.
2 Tro pe sa pane ce wang la itre wathebo hnei Akötresie hna acil, ngöne la Nyidrëti a xupe la fene hnengödrai me hnengödrai memine la atr me itre öni. Eje hi laka, ame petre kö ngöne la ijine cili thaa hnei Akötresieti kö hna cinyihane itre ej, ngo ame pe tre hna xupi Adamu me Eva matre tro nyidroti a drengethenge la itre wathebo cili, nge pëkö ejolen koi nyidro. Celë hi matre e mecijine hë nyidro, haawe, nyipi ewekë tro nyidroti a xen, ketre e drei pi iji hë, haawe, kolo ha ij, nge e lö hë la jö kolo hi lai a hape ijine tro ha meköl. Hnei Iehova fe hna hamën koi nyidroti la ketre hnëqa nyine tro nyidro a trongën, tune la ketre wathebo, ke eje a troa musi ngöne la mele i nyidro. Nyidroti a troa hnaho, me musi hune la itre nöjei pengöne ka mel ka nyimutre hune la ihnadro, me kötrën ahuën la itre ifego ne la Paradraiso uti hë la troa jilapane asë la fene hnengödrai. (Genese 1:28; 2:15) Drei la wathebo ka lolo nge ka hetre thangane ka loi! Hnene eje hna nue koi nyidroti troa kuca la ketre huliwa ka lolo catr, nge ka aijijë nyidro troa xome asë la itre hnei nyidroti hna atrein, matre troa kuca la itre ewekë ka hetre thangane catr kowe la mele i nyidro. Ketre, thaa hna xome acone kö la itre mekune i nyidro göne la aqane tro nyidroti a aeatrën la hnëqa i nyidro. Matre nemene hmaca pe kö la hna ajan?
3. Tune kaa la aqane troa inin hnei Adamu me Eva troa inamacan ngöne la aqane tro nyidroti a isa iën la itre mekun hnei nyidroti hna troa axeciën?
3 Thaa hnene kö laka atreine hi tro Adamu me Eva a isa amekötin la itre mekun i nyidro, tre, ame asë pë hë la itre mekune hnei nyidroti hna xom tre ka tro pala hi itre eje a hetre thangane ka loi. Nyipi ewekë tro nyidroti a axecië mekun, me sipu ië hna aja göi itre ewekë nyine tro nyidroti a kuca, ngo thaa tro pe a sasaith la itre trenge wathebo me itre trepene meköti Akötresie. Tune kaa la aqane troa atre hnei nyidroti la itre wathebo me itre trepene meköti cili? Loi e tro nyidroti a drengethenge la Atre Xupi nyidro, me goeën hnyawane la itre huliwa i Nyidrë. Hnei Akötresie hna hamëne koi Adamu me Eva la inamacan matre tro nyidroti a atreine trongëne la itre hna inin. Pine laka ka pexeje nyidro, haawe, thaa jole kö e tro nyidroti a eën la itre thiina ka ijiji Akötresie ngöne la nyidroti a troa axecië mekun. Eje hi lai laka tro ha mama hnyawa la itre thiina cili ngöne la mele i nyidro, e hetrenyi e kuhu lue hni nyidroti la hni ne ole kowe la itre hnei Akötresie hna kuca koi nyidro, nge hetre aja i nyidroti fe troa amadrinë Nyidrë.—Genese 1:26, 27; Ioane 8:29.
4. (a) Hapeu hna xomacone kö la mele i Adamu me Eva la kola wathebo nyidroti troa xeni wene la isinöe? (b) Pine nemen matre ka lolo lai hna amekötine cili?
4 Eje hi lai laka hnei Akötresie hna thele troa tupath la aqane mele nyipici i Adamu me Eva koi Nyidrë Atre xupi nyidro, memine fe la hni ne ajane i nyidro troa lapa hnyawa hnine la itre ifego hna acile hnei Nyidrë. Hnei Iehova hna hamën la wathebo celë koi Adamu, hna hape: “Tro eö a xeni qa ngöne la nöjei sinöe asëjëihë ngöne la hlapa ; ngo the tro kö eö a xeni qa ngöne la sinöe ne ate hmekune la loi me ngazo ; ke tro eö a meci ngöne la drai ne xeni eö qa ngön’ ej.” (Genese 2:16, 17) Hna thuemacanyi Eva fe la wathebo cili, thupene lo kola xupi angeic. (Genese 3:2, 3) Hapeu, kolo kö a xomacon la mele i nyidro hnene la wathebo cili troa kuca la hnei nyidroti hna ajan? Ohea. Ngacama caasi hi la isinöe nyine thaa tro kö nyidroti a xeni wen, ngo ame pe, tre nyimutre catre pe kö la nöjei pengöne xen hna nue tro nyidroti a xom. (Genese 2:8, 9) Ka meköti la tro nyidroti a kapa laka ame la ihnadro, tre, ewekë i Akötresie pine laka Nyidrëti la ka xupe ej. Haawe, ijij tro Nyidrëti a acile la itre trenge wathebo ka ihmeku memine la aja i Nyidrë, nge ka hetre thangane ka loi kowe la itre atr.—Salamo 24:1, 10.
5. (a) Tune kaa la aqane aluuzine Adamu me Eva lo inuegufa hna nue koi nyidroti hnei Akötresie? (b) Nemene pë hë la ka nyihnan la inuegufa i Adamu me Eva, nge nemene la itre ethane lai koi së?
5 Ngo nemen la ewekë ka traqa? Hnene la ketre angela ka pi kuci mekun hna huliwane menun la inuegufa ka eje thei angeic, ene pe Satana pi hi angeic, kola hape “Ka Icilekeu.” Hnei angeic hna iaö Eva me iele nyiidro troa kuca la ketre ewekë ka thaa ihmeku hë memine la aja i Akötresie. (Genese 3:4, 5) Hna xötrethenge Eva hnei Adamu, ene pe angeic a hane ena ju fe la wathebo i Akötresie. Pine laka hnei nyidroti hna xom la ifekë ewekën, haawe luuzi hë nyidro qa ngöne lo lai inuegufa ka hadrehadreu. Musi hë la ngazo hui nyidro, nge tune lo hna qaja hnei Akötresie, meci la pune koi nyidro. Ame pë hë la edrö hnei nyidroti hna hamën kowe la itre matra i nyidro, tre, ngazo a kola mama ngöne la mele së laka canga saqe hi la pi tro së a kuca la ngazo. Ketre, ngazo mina fe a akucakucan la mele së, matre kola tithi së hnene la itre mec, nge easë fe a qatre trootro me mec. Nyixane jë kö la ngazo hnene laka catrehnin la iajojezi Satana, haawe, hetre ethane catr la ngazo ngöne la mele ne la atr, kola amamane hnene la imethinë, me ihumuth, me isi matre tru catr la itre atr ka mec, itre milio la etrun. Isapengöne catre lai memine lo inuamacanyi hnei Akötresieti ekö hna hamën kowe la itre atr ngöne la qaan!—Deuteronomi 32:4, 5; Iobu 14:1, 2; Roma 5:12; Hna Amamane 12:9.
Troa Öhne Ekaa La Inuamacany
6. (a) Troa öhne ekaa la nyipi inuamacany? (b) Nemene pengöne inuamacanyi lo hna qaja hnei Iesu?
6 Qa ngöne laka ngazo catr la pengöne la mel enehila hnedrai së, haawe, thaa sesëkötre kö së la kola thele hnene la itre atr matre troa atraqatre catre thei angatr la inuamacany. Ngo tro sa öhne ekaa la nyipi inuamacany? Hna qaja hnei Iesu ka hape: “Maine tro nyipunie a xome hutine la tenge ewekënge, itete dei ni nyipunie ka nyipici ; nge tro hë nyipunie a ate la nyipici, nge tro ha nue amacai nyipunie hnene la nyipici.” (Ioane 8:31, 32) Thaa celë kö la inuamacanyi la hna ajan hnene la itre atr la angatr a thele troa thapa la musi qaathene la ketre atr, maine hnene la ketre baselaia qaathene la ketre baselaia. Ohea, ame la inuamacanyi celë, tre eje a troa lepe apaatren la qaan la itre jol ka eje thene la atr. Celë hi hnei Iesu lai hna qaja, ene la troa nuamacanyi së qa ngöne la musi ne la ngazo. (Ioane 8:24, 34-36) Qa ngöne lai, ame la kola xötrethenge Iesu Keriso hnyawa hnene la ketre atr, ene pe kola saze la mele i angeic, kola nuamacanyi angeic!
7. (a) Nemen la aliene la kola hape qaane enehila, hna nuamacanyi së hë qa ngöne la ngazo? (b) Nemene la nyine troa kuca matre troa kapa lai inuamacanyi cili?
7 Thaa tro kö sa mekune ka hape, pëhë ethane lo ngazo ngöne la mele ne la itre nyipi Keresiano ngöne la hnedrai së enehila. Pine laka edrö i angatr la ngazo, tro pala kö angatr a isi memine ej. (Roma 7:21-25) Maine kola melëne hnyawa hnene la ketre atr la itre ini qaathei Iesu, eje hi lai laka, thaa angeice hmaca kö a lapa fene la musi ne la ngazo. Thaa ngazo hmaca kö a musinën la mele i angeic tune la thiina ne la atr ka ithahluë, kola athipe la itre huliwa koi së me iupi troa kuca meekën itre ej. Thaa hna othe hmaca kö la keresiano hnine la ketre mel ka pë kö alien, nge ka ajolën la mekuthethewe i angeic. Ohea, lapa hnyawa la mekuthethewe i angeic xajawa i Akötresie, pine laka hna senge la itre ngazo i angeic, ke hnei angeic hna lapaun kowe la mele hna huujën hnei Keriso. Ame ngöne la itre xaa ijin, kolo mina a thele troa musinë angeic hnene la itre aja ne troa kuca la ngazo, ngo hetre trenge catre i angeic troa tro trije itre ej, hnene hi laka thaa thëthëhmine kö la itre ini ka wië i Keriso, ene pe angeice hi lai a amamane ka hape, thaa ngazo hmaca kö la maseta i angeic.—Roma 6:12-17.
8. (a) Nemen la aqane nuamacanyi së hnene la nyipi hmi Keresiano? (b) Nemene la aqane tro sa mele hnine la itre musi ne la fene celë?
8 Tro sa ce wang la itre aqane nuamacanyi së itre Keresiano. Hna nuamacanyi së qa ngöne la itre ethan la itre ini ka ngazo, me qa ngöne la kuci haze. Kola thepe së qa ngöne la xoue u ne ka mec, hnene la nyipici ka ini së la pengöne la atr e meci hë me melehmaca. Kola nuamacanyi së mina fe qa ngöne laka, hetre mejiune së hë, ene la troa nyihnan la itre musi ka ngazo hna cilën hnei itre atr hnene la Baselaia ka meköti Akötresie. (Daniela 2:44; Mataio 6:10) Ngo ame pe ngacama hna nuamacanyi së hë, tro pala hi së a metrötrën la itre musi enehila memine la itre wathebo ne itre ej.—Tito 3:1, 2; 1 Peteru 2:16, 17.
9. (a) Nemene la aqane hnimi së me xatua së hnei Iehova matre troa nuamacanyi së hnyawa enehila? (b) Tune kaa la aqane tro sa axeciën la itre mekun ka loi?
9 Thaa hnei Iehova kö hna nue së troa isa mel hnine la ngazo me mele ka tria, matre tro sa atre la aqane mele ka sisitria. Atre hi Nyidrëti la aqane xupi së, memine la ewekë ka troa hamë së la nyipi madrin, me loi thatraqane la mele së epine palua. Ketre atre mina fe Nyidrëti la itre mekune me aqane ujë ka troa angazonekeu së me Nyidrë memine fe la itre xaa atr, maine jë tro la itre ewekë cili a thingi jë së kowe lo mele ngöne la fene ka hnyipixe. Ngo hnene la ihnimi Nyidrëti koi së matre Nyidrëti a hmekë së qa ngöne la itre ewekë cili, jëne la Tusi Hmitrötr memine la organizasio i Nyidrë e celë fen. (Mareko 13:10; Galatia 5:19-23; 1 Timoteo 1:12, 13) Isa qanyi së pë hë troa isa iën, maine tro sa drengethenge Nyidrë maine tro pena a xele ma drei Nyidrë. E pi thaa tro kö së a tui Adamu, ngo loi e tro pe a wangatrune hnyawa la hna qaja hnei Tusi Hmitrötr, matre tro hë lai a xecie hnyawa e kuhu hni së la itre mekune hne së hna xom. Tro hë së a amaman laka ame la sipu hne së hna troa nyipiewekën ngöne la mele së, tre, ene la troa lolo hnyawa pala hi la aqane imelekeu së me Iehova.
Kola Thele Ketre Pengöne Aqane Inuamacany
10. Nemene la ketre pengöne aqane inuamacany me aqane mel hna thele hnene la itre xaa ka anyipici Iehova?
10 Ame ngöne la itre xaa ijin, kola ajan hnene la Itretre Anyipici Iehova thöth, ame itre xan, tre itre thupëtresiji hë, angatr a thele la ketre pengöne aqane inuamacany me aqane mel. Ase hë ahmo angatre hnene la fen nge kola huli angatre hnene ej; nge qa ngöne laka, jilapa ha la itre mekune ne la fene celë e kuhu itre hni angatr, haawe catrehnine fe la ajane thei angatre troa kuca la itre ewekë ka thaa ihmeku kö memine la hmi i keresiano, nge kola haöthe la fen hnene itre ej. Maine jë thaa angatre kö a thele troa doroge, me iji menu la kahaitr maine troa kuci ngazo pena. Ngo angatr a nyiqaan troa hane ce tro lapaa memine la itre atr, thaa itre nyipi Keresiano kö, me thele troa hane kepe angatr hnene la itre atr cili. Maine jë angatre fe hë a hane nyiqaan troa xötrethenge la aqane ewekë memine la aqane ujë ne la itre atr cili.—3 Ioane 11.
11. Ame ngöne la itre xaa ijin, drei la ka uku së troa kuca la ngazo?
11 Ame ngöne la itre xaa ijin, kolo hmaca kö a uku së troa kuca la ketre thiina ka ngazo hnene la ketre atr ka hane sipu qeje angeice ka hape, ka hane fe nyihlue i Iehova. Ewekë lai ka traqa ha ekö thene la itre pane Keresiano, nge kola mama hnyawa fe enehila ngöne la hneijine së. Ame la ajane la itre atr cili tre, ene la troa kuca la itre ewekë hnei angatr hna mekune ka hape, ka troa amadrinën la mele i angatr, ngo ka thaa ihmeku kö memine la itre trenge wathebo i Akötresie. Ene pe angatr a hane ukun la itre xan troa hane tupath lai itre “aqane madrine cili.” Matre angatr a ‘thingehnaean troa nuamacan la itre xan, ngo angatre pe la itre hlue ne la thiina ka sis.’—2 Peteru 2:19.
12. Nemen la itre ethan la ketre aqane ujë ka thaa ihmeku kö memine la itre trenge wathebo me itre trepen meköti Akötresie?
12 Ka hetre ethane pala hi la aqane inuamacanyi me aqane mele cili, pine laka kolo hi lai a ena la itre trenge wathebo i Akötresie. Tune la ce meköl troa kuci ngazo nge thaa ka faipoipo kö, ka nyimu ethan la thina cili, ene la hleuhleu, me tithe hnei meci ka ngazo, me mec, me hnaho gojeny, maine tro pena ha a sei hna cil. (1 Korinito 6:18; 1 Thesalonika 4:3-8) Ketre tune la ka doroge, laka, troa canga elëhni, me jole troa ithanata me goe, nge troa enuenu la he, me jole troa mano, nge troa pu menu, me mec. Ame la pune kowe la ka doroge, tre, jole catr e troa nue trije ej, nge tro fe a traqa kowe la ihumuthi pine la ewekë cili, ke loi e tro pala hi a hetreny. Kösë caasi hi la itre ethane la dorog memine la ka tru hna iji ka kahaitr. (Ite Edomë 23:29-35) Kola mekune hnene la itre atr ka kei kowe la itre ewekë cili ka hape, ase hë nue gufa angatr, maine celë hë la mele lai, ngo ame pë hë e thupen, angatr a wangatrehmekune hnyawa ka hape, angatre a nyihluene la ngazo. Nge drei la ketre maseta ka iakötrë catr, ene la ngazo! Loi e tro sa mekune hnyawa la itre ewekë cili enehila, matre thaa tro kö së a hane xeni pune ka ngazo qa ngöne la itre aqane ujë ka sisi cili.—Galatia 6:7, 8.
Hna Nyiqaan Ekaa La Itre Jol
13. (a) Ame ngöne la itre xaa ijin, nemen la ka acian la itre aja, ene pe traqa pi koi së la itre jol? (b) Maine easë a ajan troa trotrohnin la pengön la itre “sine ce elo ngazo thiina,” mekune i drei la nyine tro sa nyipiewekën? (c) Ame ngöne la easë a sa la itre hnying ne la paragaraf 13, loi e troa amamane hnyawa la mekuana i Iehova.
13 Loi e tro sa hnyingëne thele ngöne la itre xaa ijin la qaan matre xulu jë la itre jol. Kola qaja hnei Tusi Hmitrötr ka hape: “Hna isa tupathe la nöjei ate e hna huli angate hnene la ite aja i angate kö, me hnihnin. Nge e upune hë la aja, ame hnen’ eje hna hnahonepi la ngazo ; nge e macajë hë la ngazo, ame hnen’ eje hna hnahonepi la mec.” (Iakobo 1:14, 15) Nemen la ka acian la aja? Kolo itre ewekë ka löthe la itre mekune së. Kola xulu pi lai qa ngöne la hna ce nyi sinen, me ce tro lapaa memine la itre atr ka thaa drengethenge kö la itre trepene meköti ne la Tusi Hmitrötr. Eje hi laka, loi e tro asë hi së a kötren la itre “sine ce elo ngazo thiina.” (1 Korinito 15:33, MN ) Ngo drei la itre sine ce elo ngazo thiina? Tune kaa la mekuna i Iehova? Loi e tro sa thele ewekë hnyawa jëne cahu itre hnying me itre xötr ne la Tusi Hmitrötr.
Maine kola mama koi së laka ka lolo la itre xaa atr, hapeu, kolo fe lai a hape itre sine ce elo ka lolo angatr? (Genese 34:1, 2, 18, 19)
Hapeu kolo kö a amaman hnene la alien la itre porotrike i angatr, me aqane ihnyima i angatr laka, ijije hi tro sa hane sine la itre tronge i angatr? (Efeso 5:3, 4)
Maine easë a caas me ce mel memine la itre atr ka thaa hnimi Iehova kö, nemen la mekune i Nyidrë kowe la aqane ujë cili? (2 Aqane lapa ite joxu 19:1, 2)
Maine easë a troa ce memine la itre atr ngöne la hna huliwa, me ngöne la hna ini, pine nemen matre nyipi ewekë tro sa hmekëne hnyawa? (1 Peteru 4:3, 4)
Jëne la televizio me sinema, me ëternet, me itre itus, me itre zonal, atreine hi tro sa hane ce sinee memine la itre xaa atr. Ngöne lai itre hna amaman koi së jëne la itre ewekë cili, nemen la nyine tro sa hmekëne hnyawa? (Ite Edomë 3:31; Isaia 8:19; Efeso 4:17-19)
Nemen la hna amaman koi Iehova hnene la aqane iëne së la itre atr hne së hna xome troa itre sinee së? (Salamo 26:1, 4, 5; 97:10)
14. Nemen la aqane inuegufa ka sisitria hna treqen hnene la itre atr enehila ka drengethenge hnyawa la itre eamo ne la Wesi Ula i Akötresie?
14 Cahmijë hë la fene ka hnyipixe hna thingehnaean hnei Akötresie. Jëne la musi ne la Baselaia i Akötresie e koho hnengödrai, tro ha thapa la itre atr asë qaathene la iajojezi Satana memine la fene i angeic ka ngazo. Tro ha paatre trootro qaathene la itre atr ka drengethenge la itre ethan asë ne la ngazo, ene pe tro ha pexej la mekune memine la ngönetrei i angatr; haawe ijiji angatre hë troa mele epine palua ngöne la Paradraiso. Tro hë la itre hna xupe asë a madrin troa isa iën la hnei angatr hna troa kuca thenge la “Ua i [Iehova].” (2 Korinito 3:17) Hapeu aja së la troa aluuzin la ewekë cili qa ngöne la hna sixan la itre eamo hna hamën enehila hnene la Wesi Ula i Akötresie? Loi e tro sa amamane hnyawa enehila ngöne la aqane nuamacanyi së itre Keresiano, laka, easë a ajane catrën la hna “nuegufane ka hadehadeu ne la ite nekö i Akötresie.”—Roma 8:21.
Revizio
• Nemen la aqane nuegufan ekö lo lue pane trefën? Nemen la eisapengönen la inuamacanyi cili memine la hna melën hnene la itre atr enehila?
• Nemene la aqane inuamacanyi hna melën hnene la itre nyipi Keresiano? Nemen la aqane isapengöne ne ej memine la aqane inuamacanyi hna kapa hnene la fen?
• Pine nemen matre nyipi ewekë troa kötren la itre sine ce elo ka ngazo thiina? Itre mekuana i drei la hne së hna troa kapa ngöne la easë a troa iën la itre hne së hna troa ce sinee memin, ene la ewekë lai hna thaa kuca kö hnei Adamu?
[Iatr ne la götran 46]
Kola hmekë së hnene la Wesi Ula i Akötresie ka hape: ‘The iaö nyipunieti kö; troa athixötrëne la itre hna majemine ka loi, hnene la itre sine ce elo ngazo thiina’