Nyihlue i Iehova Jë, Atre Nuamacanyi Së

1, 2. (a) Pine nemene matre kola ce porotrikëne la ithahluë memine la atreine troa isa axecië mekun ekö? (b) Drei la Atre Nuamacanyi së?

HNENE la itre pane keresiano ekö hna mel fene la musi Roma. Nge, ka tru kowe la itre atrene la nöje cili la trenge wathebo, me aqane ameköti ewekë e cili, memine la aqane nue angatr troa isa axecië mekun. Nge ame ngöne la ijine cili, itre hlue la ka kuca la itre huliwa ka catr. Celë hi ka acatrene la musi Roma. Hna traqa la ijine laka, maine ala kön la atre Roma ke, casi hna thahluën. Nge, kola porotrikëne la ithahluë memine la atreine troa isa axecië mekun hnene la itre atr asë, ene mina fe la itre keresiano.

² Hnei Paulo aposetolo hna hane qejepengöne la aqane nuamacane la atr. Tha hnei angeice kö hna thele nyin la itre jole ne la fen, tune la aqane ujë ne la itre xa atr. Hnei angeice pe memine la itre xa keresiano hna catre cainöjëne la maca ka loi ne la Baselaia i Akötresie. Hnei angatr hna qaja la enyipiewekëne la mele hna huujën hnei Iesu Keriso. Hnei Paulo hna qaja kowe la itre xa keresiano la pengöne la Atre Nuamacanyi së. Öni angeic: “Ame la hnei ua i Iehova hna hne ngön, tre, e cili hi la atr hna nuamacany.”—2 Korinito 3:17, MN.

3, 4. (a) Nemene la hna qaja hnei Paulo ngöne la itre xötr qëmekene 2 Korinito 3:17? (b) Nemene la nyine tro sa kuca matre troa hane nuamacanyi së?

³ Ame ngöne la hnaaluene tusi Paulo kowe la angetre Korinito, hnei angeic hna amexeje lo ewekë ka traqa koi Mose, lo nyidrëti a uti qa ngöne la wetre Sinai, thupene la hna ithanata memine la angela i Iehova. Kola hudrume la iqëmeke i nyidrë! Ame la kola öhnyi Mose hnene la angetre Isaraela tre, xou ju hi angatr. Matre hnei Mose hna atuthe la iqëmeke i nyidrë hnei maano. (Esodo 34:29, 30, 33; 2 Korinito 3:7, 13) Öni Paulo: “Ngo e hna qëmeke koi [Iehova], tro ha pate la [imaano] hna he qëmek.” (2 Korinito 3:16) Nemene la aliene la ithanata i Paulo?

⁴ Hne së hna ce wang ngöne la tane mekun hnapan laka, Iehova la Atre Xup la nöjei ewekë asë, nge pë fe kö ifego i Nyidrë. Matre, trotrohnine hi së laka, loi e troa ce me Iehova ke, ame la “hnei ua i Iehova hna hne ngön” tre, e cili fe la atre hna troa nuamacan. Öni Paulo, e aja së fe troa hane nuamaca së, nyipiewekë tro sa “qëmeke koi [Iehova],” ene la troa hane akökötrene la aqane imelekeu së me Nyidrë. Ame la angetre Isaraela ngöne la hnapapa, thupene la hna nuamacanyi angatr qa Aigupito, hnei angatr hna xome la aqane waiewekë i atr, ngo tha aqane waiewekë i Iehova kö. Kösë hna atuthe hnei maano la itre mekune me itre hni angatr. Ame la aja i angatr tre, tro kö angatr a isa sipu eatrëne la itre sipu aja i angatr.—Heberu 3:8-10.

5. (a) Nemene la hna thepe së qa ngön hnene la ua i Iehova? (b) Pine nemene matre ijije fe troa hane thapa la atr hna thahluën maine hna akalabusin qa ngöne la itre ewekë cili? (c) Nemene la lue hnying hne së hna troa ce wang?

⁵ Sisitria kö la aqane nuamacanyi së hnene la ua i Iehova, hune la aqane nuamacane la atr hna thahluën. Uati hmitrötr a thepe së qa ngöne la ngazo me mec, me qa ngöne la itre hmi ka thoi me itre hna majemine kuca. (Roma 6:23; 8:2) Drei la ketre ewekë ka lolo catr! Ngacama hna thahluëne la ketre atr, maine akalabusi angeice pena, ngo ijije hi troa thepe angeic qa ngöne la itre ewekë cili. (Genese 39:20-23) Celë hi ewekë ka traqa koi Harold King, ngöne la itre macatre ne akalabusi nyidrë, pine la lapaune i nyidrë. Nyidrëti a ithanatane la hnei nyidrëti hna melëne ngöne JW Library. (Tro jë kowe la hna hape, INTERVIEWS ET TÉMOIGNAGES > L’ENDURANCE DANS L’ÉPREUVE.) Ame enehila, troa sa la lue hnying: Nemene la aqane tro sa amamane laka, ka tru koi së la aqane nuamacanyi së? Troa hetre thangane tune kaa ngöne la mele së la hna nuamacanyi së?

SISITRIA LA AQANE NUAMACANYI SË HNEI AKÖTRESIE

6. Nemene la aqane amamane angetre Isaraela laka, pëkö hni ne ole i angatr koi Iehova?

⁶ Ame la easa kapa la ketre ahnahna, hetre hni ne ole së kowe la atre hamëne ej. Ngo, tha hna hane kö olene koi Iehova hnei angetre Isaraela, la hna thepe angatr. Itre treu thupene la hnei Nyidrëti hna thepe angatr qa Aigupito, hnei angatr hna piine hmaca lo itre xen e cili. Hnei Iehova hna ithua i angatr mana, ngo angatr a eetr. Angatr a pi bëeke hmaca a tro Aigupito! Ka tru catre kö koi angatr la ‘itre ie, itre kokuma, me itre wanathim, me itre liki, me itre salatr, me itre galika,’ hune la hnei Iehova hna kuca koi angatr, ene la hna thepe angatr me aijijë angatr troa nyihlue i Nyidrë. Ame hnei Iehova hna elëhni koi angatr. (Numera 11:5, 6, 10; 14:3, 4) Hetre ini nyine tro sa xom.

7. Nemene la aqane trongëne Paulo la eamo ka mama ngöne 2 Korinito 6:1, nge nemene la aqane tro sa nyitipu angeic?

⁷ Hnei Paulo hna hmekëne la itre keresiano matre tro palahi angatr a amamane la hni ne ole i angatr koi Iehova. Ase hë Iehova lo thepe së qa ngöne la ngazo jëne Iesu Keriso. (E jë la 2 Korinito 6:1.) Tha ka hmaloi kö koi Paulo ke, tha ka pexeje kö angeic, nge hna musinë angeic hnene la ngazo me mec. Ngo, öni angeic: “Ini a ole koi Akötesie jëne Iesu Keriso Joxu shë.” Pine nemene matre qaja jë Paulo tune lai? Angeic a qaja kowe la itre keresiano ka hape: “Ase hë nue qa ngöne la wathebo ne la ngazo me meci hnene la wathebo ne la [u]ati ne mele thei Keriso Iesu.” (Roma 7:24, 25; 8:2) Ceitu së hi me Paulo laka, tha tro pi kö sa thëthëhmine la aqane thepe së hnei Iehova qa ngöne la ngazo me mec. Eloine hi, hna aijijë së hnene la thupene mel troa nyihlue i Iehova cememine la mekuthetheu ka wië. Nge, celë hi ka thue madrine së lai.—Salamo 40:8.

8, 9. (a) Nemene la aqane hmekë së hnei Peteru? (b) Troa gufa tune kaa la aqane nuamacanyi së?

⁸ Tha tro hmekuje kö sa qaja la ole së koi Iehova, ngo loi e tro fe sa thupën wanga troa gufa la aqane nuamaca së hnei Nyidrë. Hnei Peteru aposetolo hna hmekë së me xatua së matre tha tro pi kö sa mekune ka hape, pine laka, ase hë nuamacanyi së, haawe, ijiji së hi troa kuca la ngazo. (E jë la 1 Peteru 2:16.) Kola amekunë së lo ewekë ka traqa kowe la angetre Isaraela ngöne la hnapapa. Ngo, nyipiewekë catre kö la eamo celë koi së itre ka mel enehila. Satana me fene i angeic a amamane la itre ewekë nyine heetrën, me nyine xen, me nyine ij, me itre nyine iamadrinë. Nge, itre ka kuci publicité a amamane la itre atr ka mingöming matre tro sa itön la itre ewekë ka tha nyipiewekë kö. Haawe, canga tro hi së lai a piine la itre ewekë ne fen, nge tro ha gufa la aqane nuamacanyi së.

⁹ Ka nyipiewekë catre fe la eamo i Peteru ngöne la easa axecië mekun göi ini maine huliwa. Ame enehila, kola ukune la itre thöth troa huliwa catr matre tro nyudreni a hane lö ngöne la itre uma ne ini ka tru. Alanyimu la itre ka qaja koi nyudreni ka hape, e tro nyudreni a sisedrëne la itre ini ka tru tre, tro nyudreni lai a hetre huliwa ka loi, me mani, nge tro ha metrötrë nyudren. Tro la itre atr cili a amamane la itre ithuemacanyi ka troa anyipicine laka, tru catre kö la manie hna kapa hnene la itre ka sisedrëne la itre ini ka tru, hune la itre ka canga qeje fenes. Celë hi matre, canga tro hi la itre thöth a iëne troa sisedrëne la itre ini ka tru ke, nyudreni a mekune ka hape, troa hetre thangane lai kowe la mele i nyudreni elany. Ngo, nemene la nyine troa mekune hnyawa hnei nyudreni me itre keme me thine i nyudren?

10. Nemene la nyine tro sa mekune hnyawa ngöne la easa isa axecië mekun?

¹⁰ Alanyimu la itre ka mekune laka, ame ngöne la itre xa götrane la mel tre, isa qanyi së kö isa axecië mekun. Ngazo hi e huliwa jë la mekuthethewe së. Maine jë, angatr a mekune lo hna qaja hnei Paulo, lo kola hape: “Hna uëne laka meku hni ni . . . hnene la mekuthethewe i kete?” (1 Korinito 10:29) Nyipici laka, isa qanyi së kö isa axecië mekun göi ini me huliwa. Ngo, tha tro pi kö sa thëthëhmine laka, hetre ifego së, nge tro kö sa isa xeni pune la itre huliwa së. Celë hi kepine matre, öni Paulo: “Ijiji ni la nöjei ewekë asëjëihë, ngo tha nyipi ewekë kö la nöjei ewekë asëjëihë ; ijiji ni la nöjei ewekë asëjëihë, loi pe ame la nöjei ewekë asëjëihë, te, tha nyine akeukawan.” (1 Korinito 10:23) Celë hi matre, loi e tro sa mekune hnyawa, laka, ame la easa isa axecië mekun, tre, hetre ewekë kö ka sisitria hune la itre sipu aja së.

LOI E TROA HETRE THANGANE LA AQANE NUAMACANYI SË

11. Pine nemene matre hnei Iehova hna thepe së qa ngöne la ngazo me mec?

¹¹ Ame la Peteru a hmekë së matre tha tro kö a gufa la aqane nuamaca së, angeice hi lai a qaja hnyawa la nyine tro sa kuca, ene la troa “tune la ite hlue i Akötesie.” Pine nemen matre Iehova a upi Iesu troa thepe së qa ngöne la ngazo me mec? Atre hi Nyidrëti laka, ijiji së hi troa nue la mele së ka pexej troa nyihlue i Nyidrë.

12. Nemene la tulu hna amë pe hnei Noa me hnepe lapa i angeic?

¹² Ame la easa nue la traem, me trengecatre së troa nyihlue i Iehova tre, easë hi lai a amamane hnyawa laka, hetre thangane la aqane nuamacanyi së. Celë hi ka troa sewe së troa amë panëne ngöne la mele së, la itre aja ne fen, memine la itre sipu aja së. (Galatia 5:16) Pane mekune jë la pengöi Noa me hnepe lapa i angeic. Angatr a mel ezine la itre atr ka iakötrë, nge ka kuci ngazo. Ngo, tha hnei angatre kö hna nue la itre aja, memine la itre huliwa ne la itre atr cili troa ajojezi angatr. Hnei angatre pe hna catre kuca la huliwa hnei Iehova hna athipe koi angatr. Hnei angatr hna cane la aka, me hnëkë xeni thatraqai angatr memine la itre öni. Ketre, hnei angatr hna thuemacane la itre atr laka, troa traqa la Iwë. “Ame hnei Noa hna kuca asë tune lo hnei Akötesieti hna ahnithe koi angeic ; tune hi lai hnei angeice hna kuca.” (Genese 6:22) Haawe, mele ju pe kö Noa me hnepe lapa i angeic ngöne la kola lepe apatrene la fen.—Heberu 11:7.

13. Nemene la hnei Iehova hna upi së troa kuca?

¹³ Nemene la hna upi së hnei Iehova troa kuca enehila? Hnene laka, easë la itretre drei Iesu, haawe, hnei Akötresieti hna upi së troa cainöje trootro. (E jë la Luka 4:18, 19.) Ame enehila, Satana a atimekëne la itre atr, matre tha tro kö a mama koi angatr laka, hna thahluë angatr hnene la hmi ka thoi, memine la aja mo, me kuci politik. (2 Korinito 4:4) Loi e tro sa tui Iesu, ene la troa xatuane la itre atr troa atre Iehova, me nyihlue i Nyidrë, Atre Nuamacanyi së. (Mataio 28:19, 20) Tha huliwa ka hmaloi kö la troa cainöje trootro. Ame ngöne la itre xa götran, tha ajane kö la itre atr troa atrepengöi Akötresie, nge alanyimu la itre ka wesitr ngöne la easa cainöj koi angatr. Ngo, hnene laka, hnei Iehova hna upi së troa cainöj, loi e tro sa isa hnying, me hape, ‘Pine laka, ase hë nuamacanyi ni, nemene hë la thangane lai ngöne la aqane tro ni a huliwa i Iehova?’

14, 15. Nemene la hna axeciën hnene la itre xa hlue i Iehova? (Wange ju la pane iatr.)

¹⁴ Alanyimu la itre hlue i Iehova ka trotrohnine laka, easenyi hë la pune la fene celë. Celë hi matre angatr a ahmaloeëne la mele i angatr, me hane xome la huliwa ne pionie. Ketre ithuecatre ka tru koi së la aqane ujë i angatr. (1 Korinito 9:19, 23) Hetrenyi la itre trejin ka pionie ngöne la itre sipu teritoare i angatr, nge ame itre xan, angatr a tro kowe la ketre ekalesia ka aja ixatua. Ame ngöne la itre macatre ka ase hë, hna sasaithe la 250 000 lao trejin ka xome la huliwa ne pionie. Matre, traqa koi 1 100 000 lao pionie lapa. Ketre manathithi ka tru la troa nyihlue i Iehova tune lai!—Salamo 110:3.

¹⁵ Nemene la ka xatuane la itre trejine cili troa hetre thangane la aqane nuamacanyi angatr? Hanawange la hna melën hnei John me Judith. Traqa koi 30 lao macatre ne cainöje nyidro ngöne la itre traon ka nyimutre. Ame lo 1977, hna nyiqaane la Ini Thatraqane La Huliwa Ne Pionie. Nge, ame e cili, hna ithuecatre kowe la itretre ini troa fek kowe la ketre götrane gaa aja ixatua. Haawe, ame koi John me Judith, nyipiewekë troa ahmaloeëne la mele i nyidro. Ame hnei John hna saze huliwa. Thupene lai, hnei nyidroti hna fek kowe la ketre nöje trenyiwa, me cainöj e cili. Nemene la ka xatua nyidro troa elë hun la itre jol, tune la troa inine la ketre qene hlapa, me majemi kowe la ketre aqane mel, maine ngöne la kola saze la drai? Hnei nyidroti hna thithi koi Iehova, me mejiune kowe la ixatua i Nyidrë. Nemene hë la mekuna i nyidro thupene la itre macatre ne nyihlue i Iehova? Öni John: “Ame koi ni, ase hë ni kuca asë la hnenge hna atreine ngöne la huliwa ka lolo celë. Mama hnyawa ha koi ni la pengöi Iehova, Nyidrëti la ketre kem ka ihnim. Nge, eni ha trotrohnine hnyawa la aliene la hna qaja ngöne Iakobo 4:8, kola hape: “Eashenyijë koi Akötesie, nge tro nyidëti a eashenyi koi nyipunie. Hetre aliene hë la meleng.”

16. Nemene la thangane la aqane nuamacane la itre xa trejin?

¹⁶ Alanyimu la itre trejin ka tui John me Judith. Angatr a xome la huliwa ne pionie ngöne la itre macatre ka nyimutre. Ngo, ame itre xan, hnene la itre jol matre angatr a xome la huliwa ne pionie koi itre hnepe ijine hi. Alanyimu la itre trejin ka saen troa xupi Uma Ne Baselaia e cailo fen. Ame lo kola xupe la itre iuma e Warwick (Neweyok), traqa koi 27 000 lao trejin ka traqa troa ixatua. Lue wiik ne huliwa la itre xa trejin, nge ame itre xan, itre treu maine itre macatre. Alanyimu thei angatr la itre ka trotrije la hnalapa i angatr, me huliwa i maseta, matre troa hane huliwa e Warwick. Hetre thangane la aqane nuamacanyi angatr. Angatr a atrunyi Iehova, Atre Nuamacanyi së!

17. Nemene la manathithi hna troa kapa hnene la itre ka wangatrune la aqane nuamacanyi angatr?

¹⁷ Easa olene laka, easa hane atrepengöi Iehova, nge hna nuamacanyi së hnene la nyipi hmi. Epi tro sa amamane hnene la aqane axecië mekune së laka, easa wangatrune la aqane nuamacanyi së. Tha tro pi kö sa sixane la aqane nuamacanyi së, ngo loi e tro pe a hetre thangan ngöne la aqane catre nyihlue i Iehova hne së. Eje hi lai laka, tro hë sa madrine la itre manathithi qaathei Iehova ngöne la ijine troa eatr lo hna hape, “Tro ha nue la ite ewekë hna xupe qa ngöne la hna othe hnene la ka hnyeqet, kowe la hna nue gufane ka hadehadeu ne la ite nekö i Akötesie.”​—Roma 8:21.