Aqane Troa “Nyipi Nue Amacai” Së

1, 2. (a) Nemene la hna kuca hnene la itre atr matre tha tro kö a musinë angatr? (b) Nemene hë la thangane lai?

AME enehila, kola thele hnene la itre atr troa isigöline la meköti angatr, nge tha ajane kö angatr troa axösisi angatr. Alanyimu la itre ka ajan troa thepe angatr qa ngön la itre iangazo, me itre iakötrë, nge tha tro hmaca kö a hetre ka pë ewekë. Ame itre xan, angatr a ajan troa nue angatr troa isa qeje mekun, me isa ië ewekë, me isa kuci melen. Itre atr asë a ajane troa mele madrin.

² Celë hi kepin matre, itre atr a cil kowe la itre mus. Hapeu, hune kö angatr? Ohea. Akötr me mec la pune la icilekeu. Kola jelenyipicine la hna qaja hnei Solomona joxu ngöne Ate Cainöj 8:9. Öni angeic: “Kete ate a musinëne la kete mate angazo nyëne kö.”

3. Nemene la nyine tro sa kuca matre troa madrin?

³ Tusi Hmitrötr a amamane la nyine tro sa kuca matre tro sa madrin. Öni Iakobo: “Ame la ate thuluëne ngöne la wathebo ka meköti me gufa kö, me cile huti ngön . . . tro ha manathithi la ate celë ngöne la huliwa i angeic.” (Iakobo 1:25) Qaathei Iehova la “wathebo ka meköt.” Haawe, atre hnyawa kö Nyidrëti la nyine tro sa kuca matre troa mele madrin. Tha hnei Iehova kö hna hnöthe la mele i Adamu me Eva, hnei Nyidrëti pe hna thele la ka loi thatraqai nyidro.

PENGÖNE LA MEL NGÖNE LA QAAN

4. Nemene la pengöne la mele i Adamu me Eva ekö? (Wange ju la pane iatr.)

⁴ Ame la easa e la mekene 1 me 2 ne la tusi Genese, easa trotrohnine laka, lolo catr la mel hnei Iehova hna hamën koi Adamu me Eva. Nge, celë hi mele lai hna ajan hnene la itre atr enehila. Pëkö ka pë thei nyidro, pëkö hna xouen, nge pëkö atr ka iakötrë. Tha hnehengazo kö nyidro göi xen, me huliwa, me sine mec, me mec. (Genese 1:27-29; 2:8, 9, 15) Ngo, hapeu, hnei Iehova kö hna nue nyidro troa isa kuci mekun? Tro sa ce ithanatane lai.

5. Nemene la ka nyipiewekë matre tro sa atreine isa axecië mekun?

⁵ Alanyimu la itre atr ka mekun ka hape, ame la troa sipu axecië mekun tre, kolo hi lai a hape, tro sa kuca asë la hne së hna ajan, nge tha tro kö a hetre pune koi së. Önine la ketre itus (The World Book Encyclopedia) ka hape, tro la itre atr a atreine isa axecië mekun, e ka meköt la itre ifego hna acile hnei mus. Haawe, kolo hi lai a hape, nyipiewekë troa hetre ifego. Ngo, drei la ka ijije troa acil la itre ifego?

6. (a) Pine nemene matre pë fe kö ifego i Iehova? (b) Nemene la aqane nue Iehova la itre atr troa sipu axecië mekun, nge pine nemen?

⁶ Tha tro pi kö sa thëthëhmine laka, Iehova hmekuje hi la ka pë ifego. Nyidrëti la Atre Xupe la nöjei ewekë, me Atre Musi Ka Sisitria. (1 Timoteo 1:17; Hna Amamane 4:11) Mingöminge catre la aqane qejepengöne Davita joxu la edraië i Iehova. (E jë la 1 Aqane lapa ite Joxu 29:11, 12.) Ngo, hnei Nyidrëti hna ami ifegone la itre hna xup asë. Haawe, easa trotrohnine laka, meköti e tro Nyidrëti a acili ifego thatraqai së. Qaane lo xötrei, hnei Iehova hna ami ifegone la itre hnei Nyidrëti hna xup.

7. Nemene la itre ewekë hne së hna kuca nge ka hamë madrine së?

⁷ Ngacama ijiji Adamu me Eva troa isa axecië mekun, ngo hnei Iehova hna amë la itre ifego thatraqai nyidro. Kola qaja la itre ewekë ka tha jole kö koi nyidro troa trongën. Maine aja i nyidro troa mel, loi e tro nyidroti a mano, me xen, me meköl. Hapeu, itre ifego lai ka hnöthe la mele i nyidro? Ohea. Hnei Iehova hna amekötine la itre ewekë cili, matre nyine loi koi nyidro. (Salamo 104:14, 15; Ate Cainöj 3:12, 13) Easë hi la a madrin la easa mano hnyawa, maine tupath la itre göxeni ka hnyapa, me meköle hnyawa e jidr. Tha drenge kö së ka hape, hace, maine kolo pena hnöthe la mele së hnene la itre ifego cili. Ka tui Adamu hi ekö me Eva.

8. Nemene la hnei Iehova hna amekötin koi Adamu me Eva, nge pine nemen?

⁸ Hnei Iehova hna upi Adamu me Eva troa hnaho, me nyihnyawane la ihnadro. (Genese 1:28) Hapeu, kolo kö a hnöthe la mele i nyidro hnene la hna amekötine cili? Ohea! Kolo pe a aijijë nyidro troa kuca matre troa paradraiso la ihnadro, nge hnë tro nyidroti a mele madrin memine la itre nekö i nyidro. Celë hi lo aja i Akötresieti lai. (Isaia 45:18) Ame enehila, hetrenyi la itre atr ka iëne troa lapa cas, maine tha tro pena kö a hnaho. Tha kolo kö lai a hape, angatre a icilekeu memine la aja i Akötresie. Nge ame itre xan, angatr a faipoipo me hnaho, ngacama hetre itre jol hnei angatr hna troa qëmeke kow. (1 Korinito 7:36-38) Angatr a mekune ka hape, itre xa jëne madrine lai. (Salamo 127:3) Maine drei Iehova ju hnei Adamu me Eva, tro nyidroti a madrin epine palua ngöne la mele i nyidro lue trefën, memine fe la hnepe lapa i nyidro.

THANGANE LA HNA THA IDREI

9. Pine nemene matre ka meköti la wathebo ka mama ngöne Genese 2:17?

⁹ Hnei Iehova fe hna qaja hnyawa koi Adamu me Eva la ewekë ka troa traqa koi nyidro, e tro nyidroti a tha idrei. Öni Nyidrë: “The tro kö eö a xeni qa ngöne la sinöe ne ate hmekune la loi me ngazo ; ke tro eö a meci ngöne la drai ne xeni eö qa ngön’ ej.” (Genese 2:17) Hapeu, ka meköti kö la wathebo cili? Kolo kö a hnöthe la mele i Adamu me Eva? Ohea. Ame kowe la itre ka qejepengöne la Tusi Hmitrötr, ka hetre aliene me eloine la hna amekötine celë. Önine la ketre e angatr ka hape, kola ini së laka, “Akötresie hmekuje hi la ka atre la ka loi . . . thatraqane la nöjei atr asë, nge Nyidrëti hmekuje hi la ka atre la ka ngazo . . . koi së. Maine itre atr a ajane troa mele ‘ka loi,’ nyipiewekë tro angatr a mejiune koi Akötresie, me drengethenge Nyidrë. Ngo, e tro angatr a tha idrei ke, angatre kö la ka troa isa axeciëne la ka loi . . . me ka ngazo koi angatre kö.” Celë hi ewekë ka jole catr kowe la atr.

10. Pine nemene matre tha ceitune kö la troa atreine isa ië ewekë memine la troa iëne la loi qa ngöne la ngazo?

¹⁰ Hetre itre atr ka mekun ka hape, tha hnei Iehova kö hna nue Adamu troa sipu axecië mekun. Tha trotrohnine kö angatr laka, tha ceitune kö la troa isa ië ewekë memine la troa iëne la loi qa ngöne la ngazo. Isa qanyi Adamu kö me Eva troa iën, tro nyidroti a drengethenge Iehova maine tha drei Nyidrëti pena. Ngo eje hi lai laka, Iehova hmekuje hi la ka troa amekötine göi loi me ngazo. Tha sihngödri kö la hna amekötine cili koi Adamu me Eva ke, hna nyihatrene hnene “la sinöe ne ate hmekune la loi me ngazo.” (Genese 2:9) Pëkö ka atre e easë la thangane la itre mekun hne së hna axeciën. Ketre, thatre kö së laka, tro palahi a tro loi la itre mekune hne së hna xom. Kola mama ngöne la kola axecië mekun hnene la itre atr laka, ngacama hetre nyipi kepin matre angatr a xome la ketre mekun, ngo ame pe, hace me akötr la pun. (Ite Edomë 14:12) Nyipici, hna nyi ifegone hi la hna atreine kuca hnene la itre atr. Ame la Iehova a wathebo Adamu me Eva troa xeni wene la sinöe, Nyidrëti hi lai a ini nyidro troa drengethenge Nyidrë, matre troa axecië mekune hnyawa. Nemene hë la mekun hna axeciën hnei Adamu me Eva?

11, 12. Pine nemene matre akötr la pune koi Adamu me Eva? Hamëne jë la ketre ceitun.

¹¹ Ngazo pe, hnei Adamu me Eva hna ena la wathebo i Iehova. Hnei Eva hna drei Satana lo kola sisinyi ka hape: “Tro ha maca la lue meke i nyipo, mate kösë lue akötesie nyipo, mate ate hmekune la loi me ngazo.” (Genese 3:5) Hapeu, ka lolo hë la mele i Adamu me Eva thupene la hnei nyidro hna axecië mekun, tune lo aqane qaja i Satana? Ohea. Hnene la hnei nyidroti hna trije la musi Iehova, akötr la pune koi nyidro. (Genese 3:16-19) Kola mama e cili laka, tha hnei Iehova kö hna nue kowe la atr troa sipu mus, me sipu iën la loi qa ngöne la ngazo.—E jë la Ite Edomë 20:24; Ieremia 10:23.

¹² Ceitune hi lai memine la ka xomi avio. Maine angeic a ajan troa traqa kowe la nöje hna tro kow, nyipiewekë tro angeic a xötrethenge hnyawa la gojenyi hna sija amë hë. Tro angeic a xome la itre jia ne huliwa hna hnëkëne hë göi gojeny, me dreng la itre ka amamai gojeny. Ngo, maine tha trongëne kö hnene la ka xomi avio la itre hna amekötin, me ketre sipu kuci mekun, haawe, troa hetre pune ka ngazo. Ceitu i Adamu me Eva memine la ka xomi avio. Hnei nyidroti hna isa kuci mekun, me thipetrij la hna amekötine hnei Akötresie. Nemene hë la pun koi nyidro? Akötr! Hnene la hnei nyidro hna tha idrei, matre ngazo me mec la pune koi nyidro, nge easë fe. (Roma 5:12) Hnei Adamu me Eva hna isa sipu iën la loi qa ngöne la ngazo. Ngo, hetre thangane ka ngazo koi nyidro, kolo pe a hnöthe la mele i nyidro. Luzi hë lo mel hnei Iehova hna hnëkëne thatraqai nyidro.

TROA THEPE SË QA NGÖNE LA NGAZO

13, 14. Nemene la nyine tro sa kuca matre troa nuamaca së?

¹³ Hetre itre ka mekun ka hape, loi e troa nue la itre atr troa isa kuci mekun. Nyipici laka, hetre eloine la troa nue së troa isa kuci mekun, ngo pane mekune jë la pengöne la fen, e pëkö ifego hna acil. Önine lo itus hna qaja ha e caha ka hape, ka jole catr la itre wathebo hna acil hnene la itre mus ke, kola thupëne la atr, ngo ame pe, kolo fe a hnöthe la mele i angatr. Haawe, tha ka hmaloi kö troa trongën. Celë hi kepin matre nyimutre catr la itre wathebo hna acil. Ketre, alanyimu catre la itre ka thel troa qejepengöne ej, me upe la itre atr troa trongëne itre ej.

¹⁴ Hnei Iesu Keriso hna qaja la nyine tro sa kuca matre troa nuamaca së, ene la tro sa atrein isa axecië mekun. Öni nyidrë: “Maine tro nyipunie a xome hutine la tenge ewekënge, itete dei ni nyipunie ka nyipici, nge tro hë nyipunie a ate la nyipici, nge tro ha nue amacai nyipunie hnene la nyipici.” (Ioane 8:31, 32) Matre, lue ewekë nyine tro sa kuca. Ame la hnapan, loi e tro sa kapa la nyipici hna tro fë hnei Iesu. Nge, ame la hnaaluen, loi e tro sa hane atre drei nyidrë. Maine tro sa ujë tune lai, tro ha nuamacanyi së. Ngo, troa nuamaca së qa ngöne nemen? Öni Iesu: “Ame la ate kuca la ngazo, angeice hi la hlue ne la ngazo.” Öni nyidrëti hmaca jë hi: “Maine tro ha la Neköne a nue amacai nyipunie, nyipi nue amacai nyipunieti hë.”—Ioane 8:34, 36.

15. Pine nemene matre ka sisitria catre kö la aqane inuamacany hna qaja hnei Iesu?

¹⁵ Ka sisitria catre kö la aqane inuamacany hna qaja hnei Iesu kowe la itretre drei nyidrë, hune la aqane inuamacanyi hna nyenyape thel hnene la itre atr enehila. Öni Iesu, “Maine tro ha la Neköne a nue amacai nyipunie, nyipi nue amacai nyipunieti hë.” Iesu a qaja la aqane troa thepe së qa ngöne la ithahluë ne la ngazo. Hna thahluë së tune kaa hnene la ngazo? Kola uku së troa kuca la itre ewekë ka ngazo. Nge, kolo fe a sewe së troa kuca la loi, me hnöthi së troa kuca asë la hne së hna atrein. Haawe, ame hë la pune lai tre, elëhni, akötr me mec. (Roma 6:23) Hna hane melëne fe hnei Paulo aposetolo la akötre cili. (E jë la Roma 7:21-25.) Tro kö a nuamacanyi së elany me pexeje la mele së tui Adamu me Eva ekö ngöne lo qaan, e patre palua ha la ngazo.

16. Nemene la nyine tro sa kuca matre troa nyipi nuamaca së elany?

¹⁶ Ame la Iesu a qaja ka hape, “Maine tro nyipunie a xome hutine la tenge ewekëng” tre, nyidrëti hi lai a amamane laka, hetre ewekë nyine tro sa kuca. Ame easë itre keresiano, ase hë së xele së kö, me kapa la itre ifego hnei Iesu hna acile thatraqane la itretre drei nyidrë. (Mataio 16:24) Matre, tune lo hnei Iesu hna thingehnaean, tro kö a ‘nyipi nue amaca së’ elany, ngöne la easa kapa la itre manathithi ka xulu qa ngöne la thupene mel.

17. (a) Nemene la nyine tro sa kuca matre troa hetrenyi la nyipi madrin? (b) Nemene la hne së hna troa ce wange ngöne la tane mekun ka troa xulu?

¹⁷ Maine easa ajane troa hetrenyi la nyipi madrin, nyipiewekë tro sa trongëne la itre ini Iesu, tune la aqane kuca la itretre drei nyidrë. Haawe, maine tro sa kuca lai, tro ha thepe së qa ngöne la ngazo me mec. (E jë la Roma 8:1, 2, 20, 21.) Ame ngöne la tane mekun ka troa xulu, tro sa ce wang la aqane tro sa inamacan ngöne la easa isa axecië mekune enehila. Celë hi aqane tro sa atrunyi Iehova epine palua, Nyidrë Atre nuamacanyi së.