Easenyi Hë Matre Paatre Pi La Nöjei Akötre Asë!

Ame ngöne la ketre ijin ne la mele së, maine jë ase fe hë së hane thele ka hape, ‘Pine nemen matre kola tru catre hnei akötr?’ Nyimutre catre la itre macatre ne akötr atraqatr la itre atr, pine la itre isi, me jiin, me itre ewekë ka ngazo ka traqa tune la itre sa, me itre ihumuth, me thiina ka thaa meköti kö, me wezipo, me mec. Ame ngöne lo itre macatre ka ase hë, itre hadredre la etrun, kola mama laka elë catre la akötr. Hapeu, tro kö a paatre elanyi la itre akötre asë?

Lapa hnyawa la itre mekuna së pine laka, tro ha paatre elanyi la itre akötr, nge easenyi catre hë! Kola qaja hnene la Wesi Ula i Akötresie, ene la Tusi Hmitrötre ka hape: “Ame hna patepi la ate ka ngazo . . . Nge tro la ange ka menyike a hetenyi la nöj, nge tro angat’ a madine la tingetinge atraqat.” Ije drai ne tro angatr a lapan la ihnadro? “Tro ha la ange ka meköti a hetenyi la nöj, me lapa palua kö ngön’ ej.”​—Salamo 37⁠:​10, 11, 29.

Thupene la hna apaatren la iakötrë memine la akötr, tro hmaca ha paradraiso la ihnadro. Thupene lai, tro la itre atr a mele epine palua, tro angatr a madrin nge pë hmaca kö ka troa wezipo. Kola ahnithe hnene la Wesi Ula i Akötresie ka hape: “Tro [Akötresie] a köle tije la nöjei tenge timida asëjëihë qa ngöne la ite lue meke i angat ; nge pa hmaca kö mec, me hace hni, me teij, me aköt.”​—Hna Amamane 21:​4.

Ame ngöne la fene ka hnyipixe cili, tro fe la itre atr ka meci hë a mele hmaca matre troa hane kapa la itre manathithi cili: “Tro ha mele hmaca la nöjei ka meköt, me ka tha meköti kö.” (Ite Huliwa 24⁠:15) Celë hi kepin matre Iesu Keriso a qaja kowe la ketre atr ka ngazo ka ietra me lapaune koi nyidrë ka hape: “Tro eö a ce me ini ngöne la paradaiso.”​—Luka 23⁠:⁠43, Les Saintes Écritures — Traduction du monde nouveau (MN ).

Pine Nemen Matre Nyiqaane Jë La Akötr?

Pine laka, hnei Akötresie hna mekune troa hamën kowe la itre atr la itre drai ka mingöming elany, pine nemene kö la Nyidrëti a nue troa nyiqaane akötr la itre atr? Pine nemen matre Nyidrëti a nue aqeane ju pë hë la akötr?

Ame ngöne lo Akötresieti a xupi Adamu me Eva, hnei Nyidrëti hna kuca matre troa pexej la ngönetrei me mekune i nyidro. Hnei Nyidrëti hna ami nyidroti hnine la ketre hlapa ka ceitun me paradraiso, nge lolo la huliwa hna upi nyidro troa kuca. Kola qaja hnei Tusi Hmitrötr ka hape: “Xajawatine hë Akötesie la nöjei ewekë asëjëihë lo hnei Nyidëti hna kuca, nge hana wang, nyipi loi.” (Genese 1:​31) Maine hnei nyidroti ju hna drengethenge Akötresie, tro nyidroti a hnahon la itre nekönatr ka pexej, nge troa paradraiso la fene hnengödrai asë; ketre, troa mele ngön hnene la itre atr ka troa mele tingeting me manathith epine palua.

Hnei Akötresie hna amë e kuhu hni Adamu me Eva la ahnahna ka lolo, ene la troa isa ië hna ajan; celë hi ewekë lai ka eje thene la atr. Thaa ceitui nyidroti kö memine la loto, laka, kola nyinyap e hetre ka xom; ohea, ketre nyidroti kö a isa axecië mekun. Ngo maine tro pala hi nyidroti a huliwane hnyawa lai ahnahna hna nue koi nyidro hnei Akötresie, ene la troa drengethenge la itre wathebo i Nyidrë, tro hë nyidroti a manathith, nge troa cile hut. Tune la aqane qaja hnei Akötresie, kola hape: “Ini Iehova, Akötesi ’ö, ate ini ’ö troa hete thangan, ate e eö ngöne la gojenyi tro eö a trongën.” (Isaia 48⁠:17) Maine tro sa huliwane angazon la ahnahna cili, ene la troa isa ië hna ajan, tro ha hetre ethane kowe la mele së, pine laka, ame la itre atr, tre thaa hna xupi angatre kö troa hetre mele ka loi e tröne la mus i Akötresie. Kola qaja hnei Tusi Hmitrötr ka hape: “Tha qâ i ate kö la jë i angeic ; tha qâ i ate troa amekötine la ite hna feke ca hnei angeic.”​—Ieremia 10⁠:⁠23.

Ngo ame la engazon, hnene la pane keme me thine së hna mekune ka hape, ijiji nyidroti hi troa mele ka loi e tröne la mus i Akötresie. Ngo ame la nyidroti a thipetrije la mus i Akötresie, thaa xatua nyidroti ju hi hnei Nyidrë nge luuzi fe hë lo mele i nyidro ka pexej. Ene pe nyiqaane ethitre trootro ju pë hë la mele i nyidro uti hë la qatre me mec. Pine laka easë la itre xötre nekö i nyidro, haawe, itre ka ngazo fe hë së nge easë fe hë a hane mec.​—Roma 5:​12.

Jole Ka Tru Hna Isenyin​—Musi Cil

Pine nemen matre thaa hna apaatrenyi Adamu kö me Eva me xupe hmaca pena la lue hna i nyidro? Pine laka hna isenyine la emekötine la musi ka pë sane i Akötresie. Hanawange la hnying, kola hape, Drei la ka meköti troa mus, nge musi drei la ka lolo? Qa ngöne lai, drei la ketre hnying, kola hape, Ijije kö troa hetre thangane ka loi la hna kuca hnene la atr e thaa hna lapa kö hnei angeic fene la mus i Akötresie? Hnene laka hnei Akötresie hna nue ijine koi angatr troa sipu mus, Nyidrëti a troa amamane hnyawa nge pë hmaca kö nyine troa isenyine laka, ka lolo catre kö troa musinë angatr hnei Nyidrë hune la tro angatr a sipu mus. Qea pi hë la ijine hna nue kowe la itre atr troa xome me tupath la nöjei aqane mel ka isazikeu me Akötresie, ene la nöjei pengöne aqane troa kuci politik, me nöjei aqane huliwan la mani, me nöjei pengöne aqane hmi.

Nemene hë la thangane lai? Kola mama jëne la itre macatre ka nyimu thauzan ne mele ne la atr, laka, kolo pala hi a tru catre hnei akötr. Kola mama ngöne la mele ne la atr ngöne lo caa hadredre lao macatre ka ase hë, laka, kola kökötre catre pala hi la akötr. Itre milio la etrune la itre atr ka meci ngöne lo Hnaaluene Isi Ka Tru. Kola e la 100 milio nge sin la etrune la itre hna humuthe ngöne la itre isi. Kola haöthe la fen hnene la ihumuth me iakötrë. Ketre kola lapane fe la fen hnene la xomi dorog. Kola tru catre mina fe la itre atr hna tithe hnene la itre meci ka solesole ka xulu qa ngöne la hna kuci ngazo. Kola e la 10 milio lao atr ka meci ngöne la nöjei macatre hnei jiin, nge itre xan hna wezipo. Kola ethitr e cailo fen la mele ne la fami, ketre tune mina fe la thiina ne la itre atr laka kola ngazo catr. Pëkö musi thene la itre atr ka atrein troa nyinyin la itre jole cili. Ketre pë jë kö ketre musi qaathei atr, ka atreine troa sewe së troa qatr, me wezipo me mec.

Ase hë Tusi Hmitrötr ekö ahnithe la pengöne la itre atr ngöne la hneijine së. Kola qaja la hnedrai së enehila hnene la Wesi Ula i Akötresie, ceitune me “ite drai hnapin” ne la fene celë, laka, “tro ha traqa la nöjei ijine ka aköte.” Nge tune la hna qaja hnene la Tusi Hmitrötr, ‘troa kökötre pala hi kowe la ngazo la itre atr ka thiina ka ngazo me itretre iaö.’​—2 Timoteo 3:​1-5, 13.

Easenyi Hë Matre Paatre Pi La Akötr

Mama hnyawa ha enehila laka, easenyi catre hë troa nyipune la pi musi ne la atr memine la aja i angeic troa mele trö i Akötresie. Nyimutre la itre ewekë ka amamane hnyawa ka hape, e tro la atr a mele e tröne la mus i Akötresie, thatreine jë kö troa tro loi la mele i angeic. Mus i Akötresieti hmekuje hi la ka troa axulune la tingeting, me madrin, mele ka pexej, me mele ka thaa ase palua kö. Haawe, easenyi hë matre nyipune pi la iakötrë me akötr hna nue hnei Iehova. Calemi catre hë la ijine tro Akötresieti a apaatrene la fene celë.

Hna perofetane hnine la Tusi Hmitrötr ka hape: “Ngöne la ite drai ne la ite joxu cili [itre ka musi enehila] tro Akötesieti ne hnengödrai a axulune la kete baselaia [e hnengödrai] ka tha tro kö a apaten’ epine palua. . . . Tro ej’ a lep’ anyilanyilane me apatene la nöjei baselaia asëjëihë cili [itre musi enehila], nge tro ej’ a cile hut’ epine palua.” (Daniela 2:​44) Ame la mekune ka tru ka eje ngöne la ini e hnine la Tusi Hmitrötr, tre, kola qaja la aqane tro la musi ne la Baselaia a anyipicine la musi ka pë sane Iehova, ene lo emekötine tro Nyidrëti a mus. Ame ngöne lo Iesu a qaja lo ketre igötranen la hatren “la ite drai hnapin,” öni nyidrëti ka hape: “Tro ha cainöjëne la maca ka loi celë ne la baselaia e cailo fene nyine anyipicine kowe la nöjei nöj ; ame hna traqapi la pun.”​—Mataio 24⁠:⁠14.

Drei la ka troa mele pe elanyi ngöne la kola nyipune la fen? Kola sa hnei Tusi Hmitrötr ka hape: “Tro la itre ka meköti a lapane la [“ihnadro,” MN ], nge tro la ite ka pë ethan’ a hne ngön’ ej. Ngo troa thupa tije la ite ka ngazo qa ngöne la [“ihnadro,” MN ].” (Ite Edomë 2:​21, 22) Ame itre ka meköt, tre, itre atr ka thele troa atre me kuca la aja i Iehova. Hnei Iesu hna qaja ka hape: “Nge dei lola mele ka tha ase palua kö, laka tro angat’ a ate hmekua cilie la nyipi Akötesie ka cas, me Iesu Keriso la hnei cilieti hna upengëtin.” (Ioane 17⁠:⁠3) Nyipici, “kola pate la fene hnengödrai . . . , ngo troa cile huti epine palua la ate kuca la aja i Akötesie.”​—1 Ioane 2:​17.

Maine pëkö hna qaja, ke, troa xome la itre mekene tusi ngöne hi lo Lifu Bible​—The Bible Society in the South Pacific.