Jëne Nemene Matre Madrine Jë La Fami?

HANE HI LA HNA QAJA HNENE LA TUSI HMITRÖTR

“Madrine pe la atre drenge la itre trengewekë i Akötresie, me catre trongëne ej!”—Luka 11:28, Fene Ka Hnyipixe.

HANE HI LA ALIENE KOI SË

Troa öhne la nyipi ihnim.—Efeso 5:28, 29.

Troa hetre metrötr.—Efeso 5:33.

Troa hetre tingeting.—Mareko 10:6-9.

TRO KÖ SA MEJIUNE KOWE LA HNA QAJA HNENE LA TUSI HMITRÖTR?

Eje hi, hane hi la lue kepin:

• Akötresieti la Qaane la mele ne la fami. Önine la Tusi Hmitrötr, Iehova Akötresie “la qaane la nöjei hnepe lapa.” (Efeso 3:14, 15) Kolo hi lai a hape, maine hetre fami jë, ke hna acile hnei Iehova. Pine nemene matre ka nyipiewekë tro sa atre lai?

  Pane mekune jë: Maine tro epuni a xeni la ketre xeni ka loi, nge epuni a pi atre la aqane kuca, ke tro epuni a hnyingë drei la nöjei pengöne ëje ne xeni hna lomën e hnine la xeni cili? Eje hi, tro epuni lai a hnyingëne kowe la atr ka kuca la xeni cili.

  Haawe, maine easa ajane troa madrine la fami, ke loi e tro sa hnyingëne koi Iehova, la Qaane la fami.—Genese 2:18-24.

• Akötresie a meku së. Nyipiewekë tro la itre fami a thele la itre hna amekötin hnei Iehova e hnine la Trengewekë i Nyidrë. Pine nemen? “Ke nyidrëti a meku nyipunie.” (1 Peteru 5:6, 7) Aja i Iehova tro sa mele madrin, nge ka hetre thangane ka loi pala hi la itre hna amekötin hnei Nyidrë!—Ite Edomë 3:5, 6; Isaia 48:17, 18.