Itre Magoi a Wai Iesu

Itre trahmanyi a traqa qaa Koië. Itre magoi angatr, itre ka waipengöne la aqane trongene la itre wëtresij, nge ka catre fë ka hape, atreine hi angatr qaja la mele ne la itre atr, jëne la hna waipengöne la itre wëtresij. (Isaia 47:13) Angatre pala kö e Koië ngöne la zi angatr, nge öhne ju hi angatr la “wëtresij”, ame hnei angatr hna xötrethenge a itre hadredre lao kilomet, tha angatr kö a tro Bethelema, ngo Ierusalema pe.

Ame ju hi la angatr a traqa e Ierusalema, angatr a hnyingëne ka hape: “Ekaa la atre hna hnahon, joxu i angetre Iudra? Ke hne huni hna öhne la wëtresij i nyidrë lo eahuni ngöne la götrane koië, matre eahuni a traqa troa atrunyi nyidrë.”—Mataio 2:1, 2.

Ame hnei Herodra, Joxu ne Ierusalema hna drei mejen, matre angeic a elëhni ju. Angeic a hëne jë la itre tane i angetre huuj, me itre xa hene ne hmi i angetre Iudra, me hnyingë angatr la götrane hna troa hnahone la Keriso. Angatr a sa jë thenge la itre Hna Cinyihan me hape: “E Bethelema.” (Mataio 2:5; Mika 5:2) Qa ngöne lai, hnei Herodra hna hën acon lo itre magoi me hape: “Tro jë, nge thele jë la nekönatr, nge e öhne hë nyipunie, thuemacanyi ni jë matre tro fe ni a hane tro, me atrunyi nyën.” (Mataio 2:8) Ngazo pe, Herodra a thele troa humuthi nyën!

Thupene ju hi la kola tro hnei itre magoi, mama pi hi la ketre ewekë. Ame lo “wëtresij” hnei angatr hna öhn e Koië, ej a mel qëmeke i angatr. Nyipici, tha wëtresije menu kö lai, ngo hna hamëne mekötine göi troa köja gojenyi angatr. Matre hnei itre magoi hna xötrethenge, uti hë cile jë ej hmekune la uma i Iosefa me Maria, me nekö i nyidro.

Ame la itre magoi a lö hnine la uma, traqa ju hi angatr a öhnyi Maria me nekönatr—Iesu. Ame hnei angatr hna thili ju qëmekei nyën. Nge angatr a hamë nyëne ju la itre ahnahna gool, me libanu, me muro. Ngo ame ju hi la angatr a mekune troa bëeke hmaca koi Herodra, Akötresie a wathebo angatre ju ngöne pu. Angatr a xome jë la ketre gojenyi troa bëeke kowe la zi angatr.

Drei la atrekë “wëtresij” ka köja gojenyi itre magoi? Pane mekune jë, tha hnene ej kö hna xomi angatr meköti koi Iesu e Bethelema. Ngo hnene eje pe hna eatrongë angatr a tro Ierusalema, nge e cili, hnei itre magoi hna iöhnyi me Herodra Joxu, atre pi humuthi Iesu. Maine tha mama ju Akötresie troa sewe itre magoi troa qaja la hnalapa i Iesu, tro hë Herodra a humuthi nyën. Haawe, mama cile hnyawa ka hape, hnei Satana, ithupëjia me Akötresie, nge atre pi humuthi Iesu, hna huliwane lai “wëtresij” matre eatrëne la aja i angeic.