Meken 7

Iesu Me Itre Magoi

NYIMUTRE la itre atr ka traqa qaa kohië. Itre magoi angatr, ene lo itre atr ka qeje pengöne la itre wëtresij. Hnei angatre hna öhne e kohië la ketre wëtresiji ka ketre pengöne kö, matre angatre a xötrethengene ju ej, a itre hadredre lao kilomet uti hë Ierusalema.

Ame la kola traqa ngöne la traone hnene la itre magoi, angatre a hnyinge ka hape: “E ka anganyidë la hna hnahone Joxu i angete Iuda? Ke öhnë hë huni e kohië la wëtesiji anganyidë, nge traqa ha huni troa atrunyi anganyidë.”

Ame la kola drenge la ithuemacanyi cili e Ierusalema hnei Heroda joxu, nyidrëti a hnehengazo; ame hnei nyidrë hna icasikeune la angetre huje me hnyingë angatre la hna troa hnaho Keriso ngön. Jëne la Tusi Hmitrötr, angatre a sa ka hape: “E Betheleema.” Ame hnei Heroda hna thenge juetrëne la itre magoi me qaja koi angatre ka hape: “Troja thel’ agöne la medeng, nge e öhnë hë, thue macanyi ni, mate trojë fe ni troa hane atrunyi nyidë.” Trenga thoi, pine laka, nyidrë a ajane troa humuthe la nekönatr!

Ame petre hi la kola mekune troa tro hnene la itre magoi, ene pe traqa ju hi la ketre ewekë ka ketre pengöne kö. Ame pena ha lo wëtresiji hnei angatre hna öhne e kohië, ke eje pena ha a weje mekene la tronge i angatr. Eje hi laka, thaa ketre wëtresiji menu kö, ngo eje a troa amamai gojenyi koi angatr. Kola xötrethengene eje hnene la itre magoi, uti hë la traqa me cile hmekune la uma hna lapa hnei Iosefa me Maria.

Ame la kola lö hnine la uma hnene la itre magoi, angatre a öhnyi Maria memine la nekö i nyidro, ene Iesu. Ame hnei angatre asë hna wakukup. Nge angatre a shei qene la itre trenge nyi angatr, ene la itre ahnahna, gool, me libanu, me muro. Thupene lai, ame hë la angatre a bëeke troa hane tro fë la ithuemacanyi koi Heroda, e cili hna shewe angatre hnei Akötresie ngöne la pu, kola hape, trije ju hë tro kowe la joxu. Haawe, angatre a bëeke hmaca jë kowe la nöje i angatr, ngöne la ketre gojenyi pena ha.

Hapeue la mekune i epun, drei la ka kuca matre mama pi la wëtresiji ngöne la hnengödrai, nge matre amamai gojenyi kowe la itre magoi? Thaa hnene kö lo lai wëtresiji hna köjane mekötine la gojenyi ne tro Betheleema koi Iesu. Ohe, hnene eje hna pane tro sai angatre a tro Ierusalema matre troa iöhnyi me Heroda, lo atre ajane troa humuthi Iesu. Eloine pe hna sewe angatre hnei Akötresie troa bëeke fë la ithuemacany, ngo maine ju tro ha humuthi Iesu. Ame la ka ajane troa meci hnei Iesu, ke Satana Diabolo, lo ithupëjia me Akötresie, nge hnei angeice hna xome la wëtresiji cili matre troa thele troa traqa kowe la aja i angeic. Mataio 2:1-12; Mika 5:2.

▪ Nemene la ka amamane laka, ame la wëtresiji hna öhne hnene la itre magoi ke thaa ka ceitune kö memine la itre xaa wëtresiji menu?

▪ Ekaa Iesu ngöne la kola öhnyi nyidrë hnene la itre magoi?

▪ Easë a atre tune kaa laka, Satana la ka amamane la wëtresiji matre nyine troa amamai gojenyi kowe la itre magoi?