Ini Hna Hamën e Perea

Hnei Iesu hna pane lapa e Perea, ngöne la “ketre götrane la hneopegejë Ioridrano.” (Ioane 10:40) Nge enehila, nyidrëti a tro e kolojë e Ierusalema.

Tha Iesu casi kö. Ce nyidrë me itretre dreng memine “la ka ala nyim,” itretre hle mani, me itre ka kuca la ngazo. (Luka 14:25; 15:1) Nge hetre itre Faresaio fe me itretre cinyihan, itre ka qeje Iesu. Nyimu ewekë nyine tro angatr a mekun thupen la Iesu a ase qaja la ceitun ne la mamoe ka patr, memine la nekönatr ka tro, me trenamo me Lazaro.—Luka 15:2; 16:14.

Ma Iesu pala kö a mekune la itre trengewekë, me aqane ihnyimasai hnei itre ka icilekeu. Matre nyidrëti a qaja hmaca jë koi itretre dreng, la itre ini hna hamën e Galilaia.

Öni Iesu: “Tro pala hi a hetre ewekë ka troa akeinyi nyipunie kowe la ngazo. Ngo ekölö pe la atre axulune la itre ewekë cili! . . . Haawe, wai nyipunieti kö. Maine tro la ketre trejin me nyipunie a tria, wenë ameköti angeice jë, nge e traqa ju angeice ietra, nue pi hë la ngazo i angeic. Nge e tro angeic a asevene kuca la ngazo koi nyipunie ngöne la ca drai, nge e tro angeic a asevene qaja ka hape, ‘Menu hë ni,’ qa i nyipunie troa nue la ngazo i angeic.” (Luka 17:1-4) Ma kolo jë a amekunë Peteru lo hnyinge i angeic göi troa asevene lao nue la ngazo i ketre.—Mataio 18:21.

Tro kö la itretre dreng a melëne la itre trengewekë i Iesu? Ame la angatr a sipo Iesu ka hape, “Nyixane jë la lapaune hun,” öni nyidrë koi angatr: “Maine tro la lapaune i nyipunie a tune la itine sinapi, tro hë nyipunieti a qaja kowe la Mopel celë ka hape, ‘Feke pi qa la, nge cia ju e kuhu hnagejë!’ Nge tro hë eje lai a drei nyipunie.” (Luka 17:5, 6) Eje hi, ijije troa kuca la itre ewekë ka tru hnene la lapaun ka co.

Thupene lai, Iesu a qaja jë laka, nyipiewekë troa tuluth la aqane waipengö së. Öni nyidrë koi itre aposetolo: “Maine hetre hluene la ketre e nyipunie ka trohneny maine ka axö öni pena, tro angeic a kepe nyën tune kaa la nyën a bëeke qaa helep? Tro kö angeic a qaja koi nyën ka hape, ‘Trohemi ma xen’?” Waea. Ngo tro pe angeic a qaja ka hape: ‘Hnëkë xeni jë koi ni, nge heetrëne jë la iheetre ne hlu, nge awe jë la itre hnenge hna ajan, nge e ase hë ni xeni me ij, eö pena ha a hane xeni me ij.’ Nge hapeu, tro kö angeic a olene la hlue i angeic pine idrei? Waea. Ketre tune mina fe, e ase hë nyipunieti kuca la nöjei huliwa hna ahnithe koi nyipunie, qaja ju ka hape: ‘Eahuni la itre hlue ka pë hnënyöngön, ke ame la hne huni hna kuca, tre, hnëqa huni kö lai.’ ”—Luka 17:7-10.

Nyipiewekë tro la nöjei hlue i Akötresie a trotrohnine laka, itre huliwa i nyidrë la ka tro pa ngöne la mele i angatr. Nge ketre, nyipiewekë troa isa lapa mekune laka, ahnahna ka tru la troa nyihlue i Akötresie, me nyi atrene la hnalapa i nyidrë.

Thupene lai, xulu pi hi la ketre atr ka tro fë maca i Maria me Maretha. Nyidro la lue xa i Lazaro, nge angatr a mel e Bethania e Iudra. Önine la ka tro fë maca: “Hanawang Joxu, wezipo hë lo atr hnei nyipëti hna hnim.”—Ioane 11:1-3.

Ngacama Iesu petre hi a atre ka hape, wezipo catre hë la sinee i nyidrë, ngo tha cile kö nyidrë. Öni nyidrë: “Tha hna tithi angeice kö hnei mec matre mec, ngo jëne lai, troa atrunyi Akötresie, nge tro fe hë a atrune la Nekö i atr.” Matre nyidrëti a pane lapa ju e cili koi lue drai, nge thupen lai, öni nyidrë koi itretre dreng: “Jë fe matre bëeke jë së kowe la nöj e Iudra.” Ngo sa jë hi angatr ka hape: “Rabi, eue hi lo, hnei angetre Iudra hna thele troa tranyi nyipë, ngo nyipëti hmaca kö a pi bëeke koi angatr?”—Ioane 11:4, 7, 8.

Sa jë hi Iesu ka hape: “Hetre 12 lao hawa ngöne la drai, eje hi? Nge maine tro ketre a tro e lai, tha tro kö angeic a kei hnene la ketre ewekë, ke angeic a goeëne la lai ne la fen. Ngo maine tro ketre a tro e jidr, tro hë angeic a kei, ke patre kö la lai thei angeic.” (Ioane 11:9, 10) Nyidrëti hi lai a qaja ka hape, tha pexeje pala kö la traeme hna nue koi nyidrë troa cainöj. Haawe loi tro nyidrë a nyipiewekëne hnyawa la traem i nyidrë.

Öni Iesu hmaca: “Lazaro lo sinee së a meköl, nge eni hë la a tro troa ahlë angeic.” Nge pine laka itretre dreng a mekune ka hape, Lazaro hi a pane mano, nge tro hmaca angeic a egöcatr, öni angatr: “Joxu, maine angeic a meköl, tro angeice lai a loi hmaca.” Öni Iesu: “Meci hë Lazaro . . . Ngo treilo pe matre tro së koi angeic.”—Ioane 11:11-15.

Toma a mekune laka, ma tro jë a humuthi Iesu e cili. Ngo pine laka, aja i angeic troa nyixöle i Iesu, öni angeic koi itre xa atre dreng: “Haawe, easë a tro, matre ce meci pi së me nyidrë.”—Ioane 11:16..