Meken 89

Hnëqa Ne Ihnim e Iudra

NGÖNE la pui ne xeni hmekune la alöat, itre wiike ka ase hë, ke hna tupathe troa humuthi Iesu hnene la angetre Iudra. Nyidrëti a tro jë ngöne la götrane ailopi, ngöne la ketre nöje gaa easenyi qa ngöne la hneopegejë ne Galilaia.

Hnei nyidrëti hna xome hmaca la gojenyi ne tro Ierusalema, thaa nyimu drai petre kö ne tro nyidrë, kola cainöje trootro e cahu hna tro, ngöne la itre lapa ne Pere, ketre lapa ngöne la götrane ahië ne la hneopegejë ne Ioridrano. Ame la kola ase hamëne la ceitune la atre trenamo me Lazaro, ke, nyidrëti a sisedrëne troa inine la itretre drei nyidrë la itre ewekë hnei nyidrëti hë hna qaja ngöne lo nyidrëti pala kö e Galilaia.

Nyidrëti a qaja ngöne la ijine cili ka hape ma loi kowe la ketre atr “troa fena ngöne la nyinawa i angeice la etë nyine amudromudron, me troa lö sai angeic’ e kuhu hnagejë,” hune la troa athixötrene la ketre ne la itre ka “co,” a itre hlue i Akötresie. Nyidrëti fe a qaja atrune la enyipi ewekëne la troa kapa la itre ngazo hna kuca koi së, öni nyidrë: “Maine [tejine me eö] a luengemene la o ngazo koi ’ö ngöne la drai ka cas, me a luengemene la o iloi me eö, kola hape ‘Ini a ietra,’ tro eö a nue angeice pi.”

Ame la kola hnyinge hnene la itretre drenge koi Iesu ka hape: “Nyi xane ju la lapaune hun,” nyidrëti a sa koi angatre ka hape: “Maine hetenyi nyipunie la lapaune tune la wene sinapi, tro nyipunie a qaja kowe la sukamine celë, ka hape, Feje më iwa eö jë, nge kelemi eö ju e kuhu hnagejë; nge tro ej’a dei nyipunie.” Haawe, kola hape, ngacama ka coco hi la lapaun, ngo atreine hi troa kuca la itre ewekë ka tru.

Thupene lai Iesu a qaja la ketre hna melëne matre tro la itretre drenge a trotrohnine hnyawa la aqane mekune hna kapa hnei Akötresie, Akötresie ka pucatine asë. Öni nyidrë: “Dei e nyipunie la tene hlue kola trohnenyi maine ithu a i öni, nge traqa ha nyëne qa ngöne la hlapa, ame hna qaja koi nyën, ka hape, Canga trohemi ma xen? Nge tha pane qaja koi nyën, ka hape, Hnëkënejë eö la hnenge hna troa xen, nge sileju la otene hni ’ö, me nyi hlue koi ni uti hë e ase hë ni xeni me ij; thupene lai, eö pena a xeni me ij? Hape u, angeic’ a ole kowe la hlue qa ngöne la hnei nyëne hna kuca la ite ewekë hna ahnith? Kete tui nyipunie, e asesë hë kuca la ite hna ahnithe koi nyipunie, öni nyipunie, ka hape, Eëhuni la ite hlue ka pë tropan, ase hë huni kuca la qâ huni troa kuca.” Thaa tro pi kö a mekune hnene la ketre hlue i Akötresie ka hape angeice a pane amadrinë Akötresie ngöne la angeice a nyihlue i Nyidrë. Ohe, tro pala hi angeice a mekune laka ketre hnëqa ka sisitria la troa thili koi Nyidrë, nge ketre atr hna mejiune kow hnine la Uma i Nyidrë.

Ma thupene la hnei Iesu hna qaja la ceitune celë, kola traqa la ketre ka ithuemacany. Hna upe hnei Maria me Maretha, lue xa i Lazaro, ka lapa e Bethania, e Iudra. Önine la ka ithuemacanyi ka hape: “Joxu, da xajawatine la hnei cilieti hna hnime kola elelengë.”

Kola sa hnei Iesu ka hape: “Tha tro kö a meci palua kö la ate cili, ngo loi pe nyine atrunyi Akötesie, mate tro fe a atrune la Nekö i Akötesie hnen’ ej.” Iesu a lapa lue drai e cili, nge nyidrëti a qaja jë koi angetre drei nyidrë ka hape: “Tro hmaca shë Iuda eë.” Ngo angatre a amekunë nyidrë ka hape: “Rabi, hnei angete Iuda hna thele troa trânyi cilie ekö hnei etë, nge cilieti a jötëti hmaca kowe lai?”

Iesu a sa jëne la hnyinge celë ka hape: “Hape u, tha luako la o haua ngöne la drai? Maine tro la ate e lai, te, tha thixöte kö angeic, ke angeic’ a öhne la lai e celë fen. Ngo maine tro la ate e jid, angeic a thixöt, ke pëkö lai thei angeic.”

Ame la aliene la trenge ewekë i Iesu, ke, ame la itre “haua ngöne la drai,” ene la eqeane la hna cainöje i nyidrë e celë fen, eqeane hna sa hnei Akötresie, ke, thaa fenesi pala kö, nge qëmekene troa nyipune la ijine cili, pëkö ka atreine troa angazo nyidrë. Nyipi ewekë koi nyidrë troa huliwane hnyawane la ijine ka xoxopatre pe hi ngöne la “drai,” ke thupene lai tro ha traqa la “jid,” ene la ijine tro la itre ithupëjia me nyidrë a humuthi nyidrë.

Iesu a sisedrëne ka hape: “Mekölë hë Lazaro, sine shë; ngo ini a tro troa ahlë angeice jë qa hna meköl.”

Ma kolo jë mekune hnene la angetre drenge ka hape kola meköle hnei Lazaro, nge hatrene ka loi hi lai göi troa egöcatre hmaca, öni angatre koi nyidrë ka hape: “Joxu, maine angeic’ a meköl, tro angeice a mel.”

Haawe Iesu a qaja mekötine koi angatre ka hape: “Meci hë Lazaro. Nge ini a madine göi nyipunie, ngöne laka pate ni e cili, mate lapaune nyipunie; ngo tro shë koi angeic.”

Toma a mekune laka ijije troa humuthi Iesu e Iudra. Ngo, aja i angeice troa sajuë Iesu, nge angeice a thuecatre kowe la itre xaa angetre drenge ka hape: “Tro fe shë, mate tro sha ce meci me nyidë.” Ene pe angatre a nue la mele i angatr, me ce tro me Iesu Iudra eë, matre troa hane kuca la hnëqa ne ihnimi cili. Luka 13:22; 17:1-10; Ioane 10:22, 31, 40-42; 11:1-16.

▪ Ekaa la hna xötrei cainöje hnei Iesu?

▪ Nemene la ini hnei Iesu hna qaja lapaan, nemene la ewekë hna majemine melëne hnene la itre atr hnei nyidrë hna qeje pengön, nge nemene la ini hna xome qa ngön?

▪ Nemene la maca ka traqa koi Iesu, nge nemene la aliene la itre hnepe hnëewekë hna hape “drai” me “jid”?

▪ Nemene la mekune i Toma la angeice a qaja ka hape, ‘Tro fe shë, mate tro sha ce meci me nyidë’?