Meken 98

Easenyi Hë Matre Meci Pi Iesu, Nge Kola Iwesitrë Hnene La Angetre Dreng

THAA nanyi kö Iesu me itretre drei nyidrë qaa Ioridrano, matre angatre a sasaithe ej, me tro Iudra jëne la distrik ne Pere. Ala nyimu la itre xaa ka ce tro me angatr, itre ka troa atrune la Penetekos ne macatre 33 a caa wiike pe hi.

Iesu a tro pa qëmekene la angetre dreng, nge angatre a haine la aqane catre fë nyidrë la mekuna i nyidrë. Easë a mekune lo ijine Lazaro a mec, ngöne la itre wiike ka ase hë, nge Iesu a troa mejë qaa Pere me tro Iudra eë, nge Toma a thuecatre kowe la itre xaa angetre drenge ka hape: “Tro fe shë, mate tro sha ce meci me nyidë.” Easë fe a mekune laka hna thele hnene la hnakootre ne la angetre Iudra troa humuthi Iesu thupene la hnei nyidrë hna amele Lazaro. Haawe, thaa sesëkötre kö së laka kola xou hnene la itretre drenge ngöne la angatre a lö e Iudra.

Iesu a jea sai angetre dreng, ene la ala truelof, matre troa hnëkë angatre kowe la itre ewekë ka troa traqa, öni nyidrë koi angatre ka hape: “Hana wang, eësha tro Ierusalema eë, nge tro ha wanaxoeëne la Nekö i ate kowe la ite tane i angete huj, me angete cinyihany, nge tro angat’ a axeciëne la tro angeic’ a mec, nge troa nue angeice koi angete ethen, troa hnyima fë me lepe hnei wameuc, me [“athipe hune la sinöe,” MN ]; nge tro angeic’ a mele hmaca e drai hnaakönin.”

Xalaithe la itre treu, nge akönia qaja ha Iesu la meci nyidrë me mele hmaca i nyidrë kowe la itretre drei nyidrë. Nge, ngacama angatre a drei nyidrë, ngo thaa nyipi trotrohnine kö angatr. Maine jë angatre a mekune laka kola troa acilëne hmaca la baselaia i Isaraela e celë fen, nge angatre a mejiune catrëne troa kapa la lolo me iatrunyi ngöne la baselaia cili ceme Keriso.

Ame thene la itre sine trongei angatre ka tro troa atrune la Penetekos, ke, Salome fe, lo thine i Iakobo me Ioane, lue aposetolo. Hnei Iesu hna ati ëje i nyidro ka hape “Lue nekö i hedeng,” hnene jë la aqane maca la mekune i nyidro. Ngo, nango e cili hë nyidroti mejiune troa hetrenyi la ketre göhnë ka sisitria ngöne la Baselaia i Keriso, nge hnei nyidro hna qaja amamane la aja i nyidro kowe la thine i nyidro. Ame hna tro pi eahlo koi Iesu matre troa göline la aja ne la lue nekö i eahlo; eahlo a thil, me sipo nyidrëti la ketre ewekë.

Iesu a hnyinge koi eahlo, me hape: “Nemene la aja i nyipo?”

Öni eahlo koi nyidrë ka hape: “Da ulatinejë mate tro la lue nekönge celë a lapa, kete ngöne la götrane maca i cilie, nge kete ngöne la götrane mi, hnine la baselaia i cilie.”

Trotrohnine hi nyidrë la qaane la aja celë, nyidrëti jë a qaja koi Iakobo me Ioane ka hape: “Tha ’te kö nyipo la hnei nyipo hna sipon. Hape u, cate nyipo troa hane iji la inege hnenge hna troa ij?”

Öni nyidroti e sa ka hape: “Tro ho a cat.” Ngacama Iesu a xötrei qaja koi nyidro ka hape nyidrëti a tro qëmeke kowe la ketre iaxösisi ka tru ka troa nyipune hnene la meci nyidrë, ngo kösë thaa trotrohnine kö nyidroti ka hape, celë hi la “inege” hnei nyidrë hna troa ij.

Ngo Iesu a qaja koi nyidro, ka hape: “Tro ha nyipo a hane iji la inegeng; ngo troa lapa ngöne la götrane maca, me minge, te, tha tro kö ni a hamëne menun, ngo koi angate hmekuje kö la hnei Kakati hna hnëkëne thatraqan.”

Thupene lai, kola drenge hnene la itre xaa angetre drenge la hna sipone hnei Iakobo me Ioane, ame hnei angatre hna wesitr. Thaa ekö catre kö, ngöne la aqane isa catre fë angatre la ka tru e angatr, maine jë tru la hna ithahnata hnei Iakobo me Ioane. Haawe, kola mama jëne la sipo hnapine i nyidro, laka, thaa hnei nyidroti kö hna trongëne la aqane amekötine hnei Iesu thatraqane lai. Drei la ewekë ka hace! Catre pala hi la aja thei angatre troa pi draië.

Iesu a icasikeune jë la ala truelofe matre troa una la jole ka traqa, nge matre aupune ju la wesitre hna aciane hnene ej, e kuhu hni ne la angetre drei nyidrë. Nyidrëti a hamëne la eamo celë cememine la ihnim: “Ate hë nyipunie laka thina i angete musinë angete etheni troa qene joxu hui angat, nge hna musinë angate hnei ite ka tru. Tha tro kö a tune lai thei nyipunie; ngo ame la ate ajane troa tru thei nyipunie, te, tro angeic’ a huliwa i nyipunie; nge ame la ate ajane troa pa thei nyipunie, te, tro angeic’ a nyi hlue i nyipunie.”

Hnei Iesu hna hamëne la tulu nyine tro angatre a xötre thenge; celë hi hnei nyidrëti hna qaja, kola hape: “Kete tune la Nekö i ate tha traqa kö troa hete hlue i angeic, ngo tro pe a hlue, me hamëne la mele i angeice nyine thupene mele ne la nöjei ate ka kösau.” Ame la traqa i Iesu, ke thaa kolo hmekuje kö a troa nyihluene la itre atr, ngo nyidrëti fe a troa meci thatraqai angatre asë! Loi e tro fe la itretre drenge a mele tui nyidrë: loi e tro angatre a ajane troa nyihlue, ngo thaa tro kö a thele troa nyihlue i angatr; ketre loi e troa hetre hni ka ipië, ngo thaa tro kö a pi draië. Mataio 20:17-28; Mareko 3:17; 9:33-37; 10:32-45; Luka 18:31-34; Ioane 11:16.

▪ Pine nemene matre kola xou enehila hnene la itretre dreng?

▪ Nemene la aqane hnëkëne Iesu la itretre drei nyidrë kowe la itre ewekë ka troa traqa?

▪ Nemene la hna sipo Iesu, nge nemene la aqane ujë ne la itre xaa aposetolo?

▪ Nemene la aqane una Iesu la jole ka agomegomëne la itre aposetolo?