“Mekuneju Kowe La Ite Mekene i Nyipunie”

KOLA mama la trengewekë i Paulo celë ngöne Heberu 13:7. Qaane lo Penetekos macatre 33 M.K. (Ame la aliene la M.K., tre, kola hape, “Ite macate i Keriso”), hnene la itre aposetolo i Iesu Keriso, lo itre ka nyi atrene la lapa ne xomi meköt hna eatrëne hnyawa la hnëqa i angat. Hnei angatr hna elemekene la ekalesia hna nyipi eköth, me hamëne trongëne la itre ithuemacany. (Ite hu. 6:2-4) Ame hë lo macatre 49 M.K., tha itre aposetolo hmekuje hë ngo kolo fe a hane sine la lapa cili hnene la itre xa atren. Ame lo ijine kola axecië mekun göi troa peritomon, kola qaja ka hape, ame la itre ka ameköti ewekë, tre kolo itre “aposetolo me ite qate” ne Ierusalema, angatre hi lo ka nyi atrene la lapa ne xomi meköt. (Ite hu. 15:1, 2) Qa i angatr troa ce ithanatane me sei jolen la itre jol hna amejën hnene la itre keresiano ngöne la nöjei götrane hnei angatr hna mele ngön. Kola iupi fë tusi me itre hna axeciën kowe la itre ekalesia, ame hna aijijëne la itretre dreng asë troa casi palahi ngöne la mekune me huliwa. Itre ekalesia asë a drengethenge me mele thenge la aqane ameköti ewekë hnei lapa ne xomi meköt. Ame hë la thangane lai, hna amanathithi angatr hnei Iehova nge kolo palahi a nyi xane la nöjei ekalesia.—Ite hu. 8:1, 14, 15; 15:22-31; 16:4, 5; Heb. 13:17.

² Ame hë la kola meci la itre aposetolo, hetrenyi hë la iamenumenu e hnine la ekalesia. (2 Thes. 2:3-12) Tune lo hna perofetan hnei Iesu göi qitr me zizania, tro la zizania (itre ka selën ka hape itre keresiano angatr) a cia thahe la qitr (itre keresiano hna iën). Ame ngöne la itre hadredre lao macatre, hna nue la lue lapa cili troa ce kökötr uti hë la hneijine menu, ene la “hneijin ne kola troa nyipune la fen.” (Mat. 13:24-30, 36-43, MN) Ame ngöne la itre macatre cili, hetre itre keresiano hna iën nge ka xötrethenge Iesu hnyawa, ngo ame pe, pëkö lapa ne xomi meköt e celë fen, ene lo gojenyi ne thewe xen hna acile me huliwane hnei Keriso matre troa hamë ithuemacanyi kowe la itretre drei nyidrë. (Mat. 28:20) Ngo ase hë nyidrëti qaja amë hë ka hape, ame ngöne la hneijine menu, tro lai a saze.

³ “Drei la hlue ka nyipici me ka inamacan?” Hna jëne la hnyinge celë la Iesu Keriso a xome la ketre ceitun ka nyipiewekë catre ngöne la itre hna perofetan. Celë hi ketre götrane ne la “hatene” hnei nyidrëti hna hamëne göne la “hneijin ne kola troa nyipune la fen.” (Mat. 24:3, 42-47, MN) Hnei Iesu hna amamane ka hape, ame la “hlue” tre, troa tru catre hnei jole i angeic ngöne la hneijine ne la pun. Ame la hnëqa ne la “hlue cili,” tre, ene la troa “thewe xeni . . . ngöne la nyipi ijin.” Hnei Iesu ekö hna xomiujine la itre ekalesia jëne la ketre neköi lapa ne la itre trejine trahmany, ngo tha jëne kö la ca atr. Ketre tune mina fe enehila ngöne la hneijine la pun, Iesu a xomiujine la itre ekalesia jëne la hlue ka nyipici, lo neköi lapa ne la itre trejine ngo tha jëne kö la ala cas.

AQANE TROA ATREHMEKUNE LA“HLUE KA NYIPICI ME KA INAMACAN”

⁴ Drei lai “hlue” hnei Iesu hna acile troa thewe xen? Tha sesëkötre kö së laka, itre Keresiano hna iëne e celë fen. Tusi Hmitrötr a qeje angatre ka hape, “xötete huje joxu,” nge hna ahnithe koi angatre troa qaja ‘amamane la nöjei thiina ka loi ne la Atre hë angatr qa ngöne la jidre kowe la lai Nyidrë nyine hain.’ (1 Pet. 2:9; Mal. 2:7; Hna ama. 12:17) Hapeu, itre hna iën asë hi la ka nyi atrene la hlue ka nyipici? Ohea. Ame la ketre ijine Iesu a kuca la ketre iamamanyikeu, hnei nyidrëti hna ithuane la ka alanyimu, ala 5 000 lao trahmany, nge tha hna e kö la itre föe me itre nekönatr. Tha hnei nyidrëti kö hna hamëne mekötine la xen kowe la itre atr, ngo hnei nyidrëti pe hna pane thawa “koi angete deng, nge angate pena kowe la ka ala nyimu.” (Mat. 14:19) Haawe, hnei Iesu hna thuane la ka alanyimu jëne la ka ala xalaith. Enehila mina fe, nyidrëti a thewe xen tune lai.

⁵ Matre hna nyi atrene lai “ate thupe nyipici, me ka inamacan,” hnene la neköi lapa ne la itre trejine trahmanyi hna iën ka hnëkëne me thewe xen, ngöne la ijine Keriso hë la. (Luka 12:42) Ame ngöne la itre drai ne la pun, hnene la itre trejine hna iën ka nyi atrene “la hlue ka nyipici me ka inamacan” hna ce huliwa ngöne la hnalapa ne xomi meköt. Angatr a nyi atrene enehila la Lapa Ne Xomi Meköt ne la Itretre Anyipici Iehova.

⁶ Jëne la lapa cili, Keriso a hamëne la itre ithuemacanyi göne la aqane troa eatre la itre hna perofetane hnine la Tusi Hmitrötr, me hamëne fe la itre eamo ka ijij ngöne la aqane troa trongëne la itre trepene meköti ngöne la nöjei drai ne mele së. Hna thawa pë hë la göxeni cili, jëne la itre ekalesia ne la Itretre Anyipici Iehova. (Is. 43:10; Gal. 6:16) Ame ngöne la itre ijine hna qaja e hnine la Tusi Hmitrötr, ame la hlue hna mejiune kow, tre, ketre atre thupëne me musinëne la hnalapa. Haawe, qa ne la hlue “ka nyipici me ka inamacan” troa thupëne la hnalapa ne la itre hlue i Akötresie. Matre, qa ne fe la hlue ka nyipici troa thupëne la itre mo me itre jia ne huliwa, me huliwa ne cainöj, me itre porogarame thatraqane la itre asabele, me acile la itre qatre thup matre troa cilëne la itre xa huliwa ne la organizasio, me kuca la itre itusi ka qeje Tusi Hmitrötr. Itre atrene la “hnalapa” asë a kepe thangane la itre ewekë celë.—Mat. 24:45.

⁷ Drei la itre atrene la hnalapa? Kolo itre atr hna ithuan. Ame ekö, itre hna iëne hmekuje hi la itre atrene la hnalapa. Nge e thupene hë, nyixane jë hi la itre atrene la hnalapa hnene la ka alanyimu, ene la “itre xa mamoe.” (Ioane 10:16) Matre kola ce kapa la xeni ne la u qaathene la hlue ka nyipici hnene la lue lapa asë.

⁸ Ame la Iesu elanyi a traqa troa iameköti ngöne la ijine akötre atraqatr, tro nyidrëti a acile la hlue ka nyipici matre troa ‘musi hune la nöjei ewekë i nyidëti asë.’ (Mat. 24:46, 47) Tro la itre ka nyi atrene la hlue ka nyipici a kapa elanyi la edrö i angatr e hnengödrai. Tro angatr memine la itre ka sine la ala 144 000 a ce musi me Keriso e hnengödrai. Maine nyipici laka, pë hë hlue ka nyipici me ka inamacan elanyi ngo, tro palahi Iehova me Iesu a hamëne trongëne la itre ithuemacanyi kowe la itre jini ne la Baselaia, jëne la itre “joxu” hna acil.—Sal. 45:16.

KEPIN MATRE TRO SA ‘MEKUNE KOWE LA ITRE MEKENE SË’

⁹ Nyimu kepin matre tro sa ‘mekune kowe la itre mekene së’ me mejiune koi angatr. Pine nemene matre hetre eloine koi së troa ujë tune lai. Öni Paulo aposetolo: “Angat’ a hmekëne thatraqane la ite u i nyipunie, ke itete troa qeje gelen ; mate troa kuca lai memine la madin, nge tha memine la aköt ; ke ka pë thangane lai koi nyipunie.” (Heb. 13:17) Jëne mele së hi lai la troa idrengethenge me huliwa thenge la aqane ameköti ewekë ne la itre ka elemeken, ke angatr a thupëne matre lolo palahi la aqane imelekeu së me Iehova.

¹⁰ Öni Paulo ngöne 1 Korinito 16:14, ka hape: “Kuca jë la nöjei ewekë asë i nyipunie ngöne la ihnim.” Matre ame la itre mekune hna axeciëne thatraqane la nöje i Akötresie tre, hna nyitrepene itre ej hnene la ihnim, thiina ka sisitria. Hna qejepengöne la ihnim ngöne 1 Korinito 13:4-8, kola hape: “Ihnimi la ate xome ahoeane me ka menyik ; tha ate ikucanyi kö la ihnim ; tha ate selëne kö la ihnim, nge tha ate pi tru kö, tha thina ka qali kö, tha ate thele ewekë i nyëne kö, tha ate canga elëhni kö, tha ate meku ngazo kö ; tha ate madine kö la thina ka tha meköti kö, ngo ate madine la nyipici ; ate juetëne la nöjei ewekë asë, ate kapa la nöjei ewekë asë, ate mejiune la nöjei ewekë asë, ate xomi hnine la nöjei ewekë asë. Tha tro kö a ase la ihnim.” Qa ngöne laka, ihnimi hi la trepene la nöjei mekune hna axeciën, nge nyine loi kowe la itre hlue i Iehova, haawe, ka tingeting la hni së, nge ka mejiune së kowe la aqane axecië mekun thatraqai së. Ketre, celë hi hatrene la ihnimi Iehova lai kowe la nöjei hlue i Nyidrë.

¹¹ Ame ekö ngöne lo hneijine la itre pane keresiano, hnei Iehova hna xomiujine la nöje i Nyidrë jëne la itre atr ka ngazo. Ngo eje hi lai laka, ame lo itre drai ekö, tre, hnei Iehova hna upe la itre atr matre troa kuca la aja i Nyidrë. Hnei Nyidrëti hna upi Noa troa cane la ketre aka me troa thuemacane la itre atr laka, tro Nyidrëti a apatrene la fen ngöne la hneijine i angatr. (Gen. 6:13, 14, 22; 2 Pet. 2:5) Hnei Nyidrëti mina fe hna upi Mose troa thapa la nöje i Nyidrë qaa Aigupito. (Eso. 3:10) Hnei Iehova mina fe hna xatuane la itre atr ka tha pexeje kö troa cinyihane la Tusi Hmitrötr jëne la uati hmitrötr. (2 Tim. 3:16; 2 Pet. 1:21) Tha hnene kö laka, itre atr ka ngazo la ka elemekene la huliwa ne cainöj me huliwa ne ini, matre tro ha puje la lapaune së kowe la organizasio i Akötresie. Kolo pe a acatrene hnyawa la mejiune së, pine laka mama hi koi së ka hape, maine patre ju la ixatua qaathei Iehova, thatreine jë kö tro la hlue ka nyipici a kuca la nöjei huliwa enehila. Hnene la hlue ka nyipici hna amamane ngöne la itre macatre ka ase hë, ene mina fe la itre ijine jol ka hape, uati hmitrötr la ka wenë ameköti angatr. Nyimu manathithi hna kapa hnene la götrane ka mama ne la organizasio i Iehova. Haawe, catre jë së sajuëne ej me mejiune hnyawa kowe ej.

AQANE TROA AMAMAN LA MEJIUNE SË KOWE LA LAPA NE LA HLUE

¹² Ame koi itre hna athipi qan e hnine la ekalesia, tre, angatr a amamane la mejiune i angatr ngöne la angatr a kapa madrine me eatrën asë la hnëqa i angatr. (Ite hu. 20:28) Pine laka itretre cainöjëne së la Baselaia, haawe, easë a catre troa tro fë la maca ka loi ngöne la itre hnalapa trootro, me iwai hmaca, me ini Tus me itre atr ngöne la itre hnalapa i angatr. (Mat. 24:14; 28:19, 20) Maine easa ajan troa kepe thangane hnyawa la göxeni ne la u hna hamëne hnene la “hlue ka nyipici me ka inamacan,” haawe, loi e tro sa hnëkë hnyawa kowe la nöjei icasikeu me hane sine itre ej. Ceitune hi lai memine la itre asabele hna kuca ngöne la nöjei macatre. Ame la easa ce sin la itre icasikeu memine la itre trejin, easë hi lai a ithuecatrekeu ngöne la itre ijine cili, nge hetre eloin hne së hna kapa qa ngön.—Heb. 10:24, 25.

¹³ Kola mama fe la mejiune së kowe la “hlue ka nyipici me ka inamacan,” ngöne la easa sajuëne la organizasio hnene la itre ewekë së. (Ite edomë 3:9, 10) Ame la easa öhne la itre trejine e cile kowe la itre jol me aja ewekë, easë a canga nyinyape troa hane hamë ixatua koi angatr. (Gal. 6:10; 1 Tim. 6:18) Hnene la ihnimi së kowe la itre trejin, matre easë palahi a thele la nöjei ijine troa amamane la ole së kowe la itre loi hne së hna kapa qaathei Iehova me organizasio i Nyidrë.—Ioane 13:35.

¹⁴ Loi e tro fe sa amamane la mejiune së kowe la organizasio i Nyidrë, hnene la hna sajuëne la itre mekune hnei angatr hna axeciën. Kolo fe a hape, tro sa drengethenge la itre hna amekötin qaathene la itre ka cilë hnëqa, tune la itretre thupëne la sirkoskripsio me itre qatre thupe ne la ekalesia. Angatre hi lo itre hna qaja ka hape, “ite mekene i nyipunie,” ene lo itre atr nyine tro sa drengethenge me metrötrën. (Heb. 13:7, 17) Ngacama nango jole tro sa trotrohnine hnyawa la itre xa mekune hna axeciën, ngo xecie hnyawa koi së laka, troa cile huti la itre manathithi hne së hna troa kapa elany e hne së hna sajuëne la itre mekune cili. Iehova e cili a amanathithi së hnene la hne së hna drengethenge la Wesi Ula i Nyidrë memine la organizasio i Nyidrë. Celë hi aqane amamane së lai la idrengethenge me metrötre së kowe la musi Iesu Keriso, Joxu së.

¹⁵ Nyipici laka, nyimu kepine ka upi së troa mejiune hnyawa kowe la “hlue ka nyipici me ka inamacan.” Satana, lo haze ne la fene hnengödrai, a kuca asë la hnei angeic hna atrein, matre troa thaipiëne la ëje i Iehova me adrone la organizasio i Nyidrë. (2 Kor. 4:4) Tha tro pi kö sa nue la itre nyinyithiina i angeic, troa athixötrë së. (2 Kor. 2:11) Atre hi angeic ka hape, “xoxopate pe hi la ijine” i angeic qëmekene troa kuië angeic hnine la hnaop. Celë hi matre, angeic a thele troa amenune la itre hlue i Iehova. (Hna ama. 12:12) Ngo hnene laka Satana a catre itupathi, loi e tro palahi sa catre qale koi Iehova, me mejiune hnyawa kowe la gojenyi ne thewe xen hna acil hnei Nyidrëti matre troa eatrongëne la nöje i Nyidrë enehila. Maine tro sa nue asë la mejiune së koi Iehova me kowe la itre hnei Nyidrëti hna amekötin, tro hë së a casi hnyawa memine la itre trejine e cailo fen.