Ita Ne Thup göi 03 Mei
Nyima 28 me 16 Qene Drehu
Angatre a “Xöte Thenge La Arenio”
“Angate lai itete xöte thenge la Arenio kowe la hnei nyidëti hna jötëti kow.”—HNA AMA. 14:4.
1. Nemene la mekuna ne la itretre drei Iesu göne la troa xötrethenge nyidrë?
TRAQA ha koi lue macatre nge sin ne cainöje Iesu “ngöne la sunago, [“nge” MN] kola ini e Kaperenauma.” Maine jë hnene laka, hace pala ha troa drenge la itre trenge ewekë i Iesu, ene pe “ala nyimu la angete dei nyidëti a hmaca pe, tha ce tro hmaca kö me nyidë.” Ame la Iesu a hnyinge kowe lo ala luako lao aposetolo, ka hape, ajane kö angatr troa hane tro triji nyidrë tune la itre xan, öni Simona Peteru e sa, ka hape: “Joxu, ithuëti nyihunieti koi deti? thawai cilieti la nöjei wesi ula ne shewengönie ka tha ase palua kö. Nyihunieti a lapaun, me wangate hmekune laka cilieti la Keriso la Hupuna i Akötesie ka shewengönie.” (Ioane 6:48, 59, 60, 66-69) Hnene pala hi la itre nyipi hlue i Iesu hna xötrethenge nyidrë. Thupene la kola sië angatr hnene la uati hmitrötr, hnei angatre pala hi hna trongëne la itre hna amekötine hnei Iesu.—Ite Hu. 16:7-10.
2. (a) Drei la “hlue ka nyipici me ka inamacan,” maine pena “ate thup ka nyipici me ka inamacan”? (b) Tune kaa la aqane amamane hnyawa hnene la hlue cili laka, angeic a catre “xöte thenge la Arenio”?
2 Hapeue la itre Keresiano hna iëne ngöne la hneijine enehila? Ame ngöne lo nyidrëti a perofetane “la hatene la hlepëti [“traqa” MN] hmaca [“nyidrë” MN], meminëti la puatine la fewatin [“memine la pune la fen” MN],” tre, hnei nyidrëti hna qeje pengöne la itre xaa hlue i nyidrë hna iën, lo hna troa hëne, ka hape, “hlue ka nyipici me ka inamacan,” maine pena “ate thupe nyipici.” (Mat. 24:3, 45; Luka 12:42) Ame la itre ka nyi atrene la hlue cili, tre, hnei angatr hna amamane ngöne la aqane mele i angatr laka angatr a “xöte thenge la Arenio kowe la hnei nyidëti hna jötëti kow.” (E jë la Hna Amamane 14:4, 5.) Itre nyipi jajiny la itre atre ne ej ngöne la götrane la ua, ke, thaa hna angazo angatre kö hnene la itre ini memine la itre aqane ujë i “Babulona Atraqat,” ene la tane la nöjei hmi ka thoi. (Hna ama. 17:5) Pëkö ini ka thoi “hna öhne ngöne la ite qe i angat,” nge “pëkö etha i angate” ngöne la fene i Satana. (Ioane 15:19) Ame hë elany, tre, tro la itre thelene la itre hna iëne qa la fene a “xöte thenge” hnyawa la Arenio e koho hnengödrai.—Ioane 13:36.
3. Pine nemene matre nyipi ewekë tro sa mejiune kowe lai hlue cili?
3 Hnei Iesu hna acile la hlue ka nyipici me ka inamacane troa musinëne la “hnalapa i nyidë,” ene la itre atrene ne la hlue isa ala caas, matre “troa thewe xeni koi angate ngöne la nyipi ijin.” Hnei nyidrëti fe hna upe la itre atrene la hlue cili troa musinëne “la nöjei ewekë i nyidëti asë.” (Mat. 24:45-47) Ame “la nöjei ewekë” cili, tre, kolo hi a qaja “la ka ala nyimu atraqat” ne “la ite xa mamoe.” (Hna ama. 7:9; Ioane 10:16) Hapeu, tro jë kö la itre atrene ne la hlu isa ala caas memine “la ite xa mamoe,” a mejiune kowe lai hlue hna acilën troa musinë angatr? Nyimutre la itre kepine matre ijije tro së a mejiune kowe lai hlue cili. Luetre la lue kepin ka tru: (1) Iehova a mejiune kowe lai hlue cili. (2) Nge ketre, Iesu mina fe a mejiune kowe lai hlue cili. Tro së a ce wange la itre mekune ka anyipicine laka, Iehova Akötresie me Iesu a mejiune kowe la hlue ka nyipici me ka inamacan.
Iehova a Mejiune Kowe La Hlu
4. Pine nemene matre ijije tro sa lapaune kowe la göxeni ne la ua hna thawa hnene la hlue ka nyipici me ka inamacan?
4 Pane mekune jë së, ka hape, nemene la ka aijijëne la hlue ka nyipici me ka inamacane troa thawa la göxeni ne la ua ngöne la nyipi ijin. Öni Iehova, ka hape: “Tro ni a ini ’ö me köjane koi ’ö la jëne qâ i ’ö troa trongën; tro ni a haji ’ö me alamekë eö.” (Sal. 32:8) Nyipici, Iehova a weniujine la hlu. Haawe, ijije tro sa mejiune hnyawa kowe la atrehmekune me trotrohnin, memine fe la itre hna amekötine hnene la hlu, ke, itre hna nyitrepene lai hnene la Tusi Hmitrötr.
5. Nemene la ka amamane laka, uati hmitrötre i Akötresie la ka hamë trenge catre kowe la hlue cili?
5 Iehova fe a amanathithine la hlue cili hnene la uati hmitrötre i Nyidrë. Ngacama thatreine kö troa öhne hnei lue mek la uati hmitrötre i Iehova ngo ame la itre thangane ne ej, tre, thaa ka sihngödri kö. Pane mekune jë së la hna kuca hnene la hlue göne la huliwa ne cainöj e cailo fen, laka kola anyipici Iehova, memine la Hupuna i Nyidrë, memine fe la Baselaia. Kola catre cainöjëne la maca ne Baselaia hnene la itre hlue i Iehova ngöne la 230 lao nöje me hnapet. Hapeu, thaa kolo kö lai a anyipicine hnyawa laka, kola eatrongëne lai hlue cili hnene la ua i Akötresie? (E jë la Ite Huliwa 1:8.) Nyipi ewekë tro la itre atrene la hlue a axeciëne hnyawa la itre mekune matre troa hnëkëne me hamëne la göxeni ne la ua kowe la nöje i Iehova e cailo fen, ngöne la nyipi ijin. Ame la angatr a axeciëne me trongëne la itre mekune cili, tre, angatre hi lai a amamane la ihnim, me hni ka menyik, memine la itre xaa götranene la wene ne la ua.—Gal. 5:22, 23.
6, 7. Tune kaa la aqane mejiune Iehova kowe la hlue ka nyipici?
6 Tro hë sa trotrohnine la kepine matre Iehova a mejiune kowe la itre atrene lai hlue cili ka nyipici, e hne së hna pane mekune la hnei Iehova hna thingehnaeane göi angatr. Hnei Paulo aposetolo hna cinyihane, ka hape: “Tro ha ho la trutru nge troa amelene hmaca la nöjei meci ka tha hnyeqete kö, nge troa ujë shë fe. Ke ijije troa xetëne la hnyeqete celë hnene la ka tha hnyeqete kö, memine la ka meci celë hnene la ka tha meci kö.” (1 Kor. 15:52, 53) Ame la itre hlue i Keriso hna iën ka mele nyipici koi Akötresie nge ka meci hë, tre, hna amele angatre hmaca matre itre angela pena ha angatr ka mele epine palua. Thaa tro hmaca kö angatr a mec, kolo lai a hape, ka pëkö pun la mele i angatr nge thatreine kö troa apaatrenyi angatr. Ketre, thaa tro hë a hnyeqetr la itre ngönetrei angatr. Kola qaja ngöne Hna Amamane 4:4, ka hape, ame la itre hna amelene hmaca cili, tre, angatr a lapa hune la itre theron, nge hna petrë angatr hnene la itre korona gool. Ketre iatrunyi ka tru catr hna troa kapa hnene la itre Keresiano hna iën. Ngo hetre itre xaa ewekë kö ka anyipicine laka, Akötresieti a mejiune kowe la itre hna iën.
7 Ase hë ithuemacany ngöne Hna Amamane 19:7, 8 ka hape: “traqa ha la troa faipoipo la Arenio; nge ase hë la tepu i nyidë hnëkë angeice kö. Nge hna nue koi angeice troa xetëne la mano lino ka hadehadeu me pë ethan ; nge ame la mano lino, celë hi thina ka meköti ne la ite ka hmitöt.” Hnei Iehova hna xome la itre Keresiano hna iëne matre troa nyi föen la Hupuna i Nyidrë. Thaa tro hmaca kö a hnyeqetr la ngönetrei angatr, nge thaa tro hë angatr a mec, ngo tro pe angatr a itre joxu, nge kolo fe a “troa faipoipo la Arenio;” drei la itre ahnahna ka tru! Itre nyipi hatrene lai ka amamane, ka hape, Akötresieti a mejiune kowe la itre hna iën, ene la “itete xöte thenge la Arenio kowe la hnei nyidëti hna jötëti kow.”
Iesu a Mejiune Kowe Lai Hlu
8. Tune kaa la aqane amamane Iesu laka nyidrëti a mejiune kowe la itre dreng ka xötrethenge nyidrë?
8 Nemene la ka anyipicine laka, Iesu a mejiune hnyawa kowe la itre hlue i nyidrë hna iën? Ame ngöne lo jidri tixenuë ne mele nyidrëti e celë fen, hetre hnei Iesu hna thingehnaeane kowe lo ala 11 lao aposetolo i nyidrë ka nyipici. Öni nyidrëti koi angatr, ka hape: “Nyipunieti la angete cile huti thenge ngöne la hna tupathi ni. Nge ini a hamëne koi nyipunie la baselaia, tune lo hnei Angakakati hna hamëne koi ni; mate tro nyipunie a xeni me iji ngöne la laulaunge ngöne la baselaiang, me lapane la ite therone kola amekötine la ite tribu i angete Isaraela ka luako.” (Luka 22:28-30) Ame lo lai Iesu a isisinyikeu memine lo ala 11 lao aposetolo, tre, thatraqane mina fe la ala 144 000 lao hna iën. (Luka 12:32; Hna ama. 5:9, 10; 14:1) Hapeu, maine thaa mejiune ju Iesu kowe lo itre hna iën, tro kö nyidrëti a ië angatr matre troa ce musi me nyidrë?
9. Nemene la “nöjei ewekë i [Keriso] asë”?
9 Ketre, hnei Iesu hna acile la hlue ka nyipici me ka inamacane “troa musinëne la nöjei ewekë i nyidëti asë,” ene la nöjei ewekë ne la Baselaia e celë fen. (Mat. 24:47) Ame ngöne la itre ewekë cili, tre, kola qaja la iwahutine la sasaiatri ne la Itretre Anyipicine i Iehova me itre Bethela ngöne la itre nöj, me itre Uma ne Asabele me itre Uma ne Baselaia e cailo fen. Kolo mina fe a qaja la huliwa ne cainöjëne la Baselaia me inine la itre atr. Maine nyimutre la itre ewekë i nyipunie ka tru alameken, hapeu, tro jë kö nyipunieti a upe la ketre atr hnei nyipunieti hna thaa mejiune kow, troa thupëne me huliwane itre ej?
10. Nemene la ka amamane laka ce Keriso memine la itre hlue i nyidrë hna iën?
10 Ame ngöne la itre hnepe ijin qëmekene tro nyidrëti a elë hnengödrai eë nge thupene lo hna amele nyidrëti hmaca, hnei Iesu hna iamamany kowe la itretre drei nyidrë ka mele nyipici me thingehnaeane koi angatr, ka hape: “Hana wang ini a ce me nyipunie ngöne la nöjei drai asëjëihë uti hë la pune la fene hnengödrai.” (Mat. 28:20) Hapeu, hnei Iesu kö hna eatrëne la hna thingehnaeane celë? Ame ngöne lo 15 lao macatre ka ase hë, hna e la 40 koi 100 la etrune lao ekalesia ne la Itretre Anyipicine i Iehova e cailo fen; kola hape 70 000 lo etrun, ngo elë hë koi 100 000 enehila. Nge tune kaa fe kowe la etrune la itre hnainin? Traqa koi ala 4 milio nge 500 000 la itre hnainine ka xome la bapataiso ngöne lo itre macatre cili, kola hape 800 nge sine la itre ka xome la bapataiso ngöne la drai. Ame la kola elë la etrune la itre ekalesia memine la itre atr ka xome la bapataiso, tre, celë hi lai hatrene laka, Iesu Keriso a eatrongëne la itre hna iëne ngöne la itre ijine angatr a icasikeu, nge nyidrëti fe a xatua angatr ngöne la huliwa ne inine la itre atr.
Ka Nyipici Nge Ka Inamacane La Hlu
11, 12. Tune kaa la aqane amamane hnene la hlue laka, ka nyipici me ka inamacane angeic?
11 Pine laka pexeje la mejiune i Iehova Akötresie me Iesu Keriso kowe la hlue ka nyipici nge ka inamacan, hapeu, thaa tro jë kö së a hane ujë tui nyidro? Hnene lai hlue cili hna amamane hnyawa laka, ka nyipici angeice kowe la hnëqa hna athipe koi angeic. Drei la ketre ceitun: 130 hë lao macatre ne cinyihane la zonal, hna hape, La Tour de Garde. Ame la itre icasikeu, me itre asabele me kovasio ne la itretre Anyipicine i Iehova, tre, itre eje pala hi a hamë ithuecatre koi së ngöne la götrane la ua.
12 Ame la hlue cili, tre, ka inamacane fe, pine laka thaa kolo kö a xomi mekune menu e pëkö hna amekötine hnei Iehova; nge ketre thaa ka hmitre kö trongëne la itre hna amekötine hnei Nyidrë. Drei la ketre ceitun: kola kapa hnene la itre hene ne la hmi ka thoi la itre aqane ujë ka pi tru ne la itre atr ne fen memine la aqane thaa xoue Akötresieti angatr ngo ame pe la hlu, tre, angeice pe a hmekë së qa ngöne la itre nyinyithiina ne la fene i Satana ka ngazo. Atreine la hlue troa hamëne la itre eamo ka ainamacanëne ngöne la nyipi ijin, pine laka, Iehova Akötresie me Iesu Keriso a amanathithi angeic. Celë hi lai kepine matre loi e tro sa mejiune hnyawa kowe lai hlue cili. Ngo tro sa amamane tune kaa laka, easa mejiune kowe lai hlue ka nyipici me ka inamacan?
“Ce Tro” Jë Memine La Itre Hna Iëne Ka Xötrethenge La Arenio
13. Tune la hna perofetane hnei Zakaria, kola aijijë së tune kaa troa amamane laka, easa mejiune kowe la hlue ka nyipici me inamacan?
13 Ame hnine la Tusi Hmitrötr, tre, kola qeje pengöne hnene la tusi Zakaria la “ala luepi” ka easenyine “la ate Iuda” me hape: “Tro huni a ce tro me nyipunie.” (E jë la Zakaria 8:23.) Pine laka kola hëne “la ate Iuda” ka hape, “nyipunie,” hatrene hi lai laka, ala nyimu la itre atr. Ame ngöne la hneijine së, tre, hna nyi hatrene lai hlue hnene la itre thelene la itre hna iën, ene la itre atre ne la “Isaraela i Akötesie.” (Gal. 6:16) Ame “la ala luepi qa ngöne la ite qene hlapa asë,” tre, angatr a nyi hatrene la itre xaa mamoe ka ala nyim. Kola “ce tro” memine la hlue ka nyipici me ka inamacane hnene la ka ala nyim, tune lo aqane xötrethenge Iesu hnene la itre hna iëne kowe la hnei nyidrëti hna tro kow. Ame la ka ala nyimu atraqatr, tre, loi e thaa tro kö angatr a hmahma troa amamane laka, angatre fe hi lo itre sine ce huliwa ne la “angete sine la hna hëne qa hnengödrai.” (Heb. 3:1) Thaa hmahma fe kö Iesu troa hëne la itre hna iëne ka hape, angatr la itre “tejine” me nyidrë.—Heb. 2:11.
14. Tune kaa la aqane tro sa nyipici ngöne la easa xatuane la itre trejine me Keriso?
14 Ame la easë a xatuane la itre trejine me Iesu Keriso, tre, easë hi lai a xatua nyidrë. (E jë la Mataio 25:40.) Qa ngöne lai, tune kaa la aqane tro la itre ka mejiune troa mel e celë fen a xatuane la itre trejine me Iesu Keriso hna iën? Ame la pane ewekë, tre, ene la troa xatua angatr ngöne la huliwa ne cainöjëne la maca ne Baselaia. (Mat. 24:14; Ioane 14:12) Ngacama kola uti trootro la etrune la itre hna iën e celë fen, ngo kolo pe a elë la etrune la itre xaa mamoe. Ame la kola hane xome la huliwa ne cainöj hnene la itre ka mejiune troa mel e celë fen, tune la itre pionie hut, tre, angatre hi lai a xatuane la itre hna iën ngöne la huliwa ne inine la itre atr. (Mat. 28:19, 20) Thaa tro kö sa thëthëhmine laka, kola aijijë së fe troa hane sajuëne la huliwa cili hnene la itre ahnahna ka nyimu pengön hne së hna hamën.
15. Tune kaa la aqane tro la itre Keresiano, angatr isa ala caasi a ujë kowe la göxeni ne la ua hna hamën hnene la hlue memine la itre hna amekötine hnene ej?
15 Hlue ka nyipici me ka inamacan a thawa la göxeni ne la ua ngöne la nyipi ijin, jëne la itre itus ka qeje pengöne la Tusi Hmitrötr me itre icasikeu; haawe, pine laka itre Keresiano së, tune kaa la aqane goeëne së lai? Easë kö a madrine troa hane ce thawa itre ej me trongëne la itre hne së hna inin? Nemene la aqane ujë së kowe la itre mekune hna axeciëne hnene la hlu? Maine tro sa drengethenge la itre hna amekötin, tre, easë hi lai a amamane laka, easa lapaune kowe la hnei Iehova hna amekötin.—Iako. 3:17.
16. Pine nemene matre loi e tro la itre Keresiano asë a drenge la itre trejine me Keriso?
16 Öni Iesu ka hape: “Dengë hë la ite mamoenge la aqane ewekëng, nge ate hmekunyi angate kö ni, nge angat’ a xöte thenge ni.” (Ioane 10:27) Celë hi lai hna trongëne hnene la itre Keresiano hna iën. Tune kaa fe kowe la itre ka “ce tro” me angatr? Nyipi ewekë tro angatr a hane drei Iesu. Nge ketre, loi e tro angatr a drengethenge la itre trejine me nyidrë. Nyipici, sipu hnëqa i angatre hi lai troa thupëne la nöje i Akötresie ngöne la götrane la ua. Nemene la aliene la kola hape, troa drenge la aqane ewekë ne la itre trejine me Keriso?
17. Nemene la aliene la kola hape, troa drenge la hlue?
17 Ame la hlue ka nyipici me ka inamacan, tre, hna nyi hatrene enehila hnene la Lapa Ne Xomi Meköt; eje hi la ka elemekene la huliwa ne cainöjëne la Baselaia e cailo fen. Ame la itre atrene la Lapa Ne Xomi Meköt, tre, kolo hi lo itre qatre thup hna iëne ka macaj. Angatre hi lo hna qaja, ka hape, “ite mekene” së. (Heb. 13:7) Maine tro sa mekune lo 7 000 000 lao atr ka cainöjëne la maca ka loi e cailo fen, ene lo itre ka sine la 100 000 lao ekalesia, tre, mama hnyawa hi e cili laka, tru catre “la huliwa kowe la Joxu” hna troa kuca hnene la itre ka elemekene la huliwa, ene la itre hna iën. (1 Kor. 15:58) Maine tro sa drengethenge la hlue cili, tre, kösë easë hi lai a catre ce huliwa memine la Lapa Ne Xomi Meköt.
Hna Amanathithine La Itre Ka Drengethenge La Hlu
18, 19. (a) Hna amanathithine tune kaa la itre ka drenge la hlue ka nyipici me ka inamacan? (b) Nemene la hne së hna troa catre kuca?
18 Qaane lo ijine kola acile la hlue ka nyipici nge ka inamacan, hnene eje pala hi hna “ujëne la ka ala nyimu kowe la thina ka meköt.” (Dan. 12:3) Kolo fe lai a qaja la itre ka troa mele pe ngöne la ijine kola troa nyipune la fene celë. Drei la ketre manathith, ene la troa jele meköti së hnei Akötresie!
19 Ame ngöne la itre drai ka troa xulu, ngöne la ijine tro ‘la lapa ka hmitrötr, Ierusalema ka hnyipixe laka, 144 000 la etrune la itre atrene ej, troa uti qa hnengödrai thei Akötresie, nge hna hnëkëne ej kösë jajinyi ka troa faipoipo hna thaipine thatraqane la fö’ i angeic. Ame ngöne la ijine cili, nemene la hna troa melëne hnene la itre ka drengethenge la aqane ewekë ne la hlu? Önine la Tusi Hmitrötr, ka hape, “Nge tro nyidëti Akötesieti a ce me angat. Nge tro nyidëti a köle tije la nöjei tenge timida asëjëihë qa ngöne la ite lue meke i angat; nge pa hmaca kö mec, me hace hni me teij, me aköt; ke patë hë la ite ewekë hnapan.” (Hna ama. 21:2-4) Qa ngöne lai, catre pi së drengethenge Iesu Keriso memine la itre trejine me nyidrë hna iën, ene lo itre hnei nyidrëti hna mejiune kow.
Nemene Hë La Hnei Epuni Hna Inin?
• Nemene la ka amamane laka, Iehova a mejiune kowe la hlue ka nyipici me ka inamacan?
• Nemene la ka amamane, ka hape, Iesu Keriso a mejiune hnyawa kowe lai hlu?
• Pine nemene matre loi e tro sa lapaune kowe la atre thupe ka nyipici?
• Tune kaa la aqane tro sa amamane laka, easa lapaune kowe la hlu?