Ita Ne Thup göi 6 Mei

Nyima 28 me 8 Qene Drehu

Loi E Tro Sa Fedre Catr Koi Keriso Me Kowe La Hlue Ka Nyipici Me Ka Inamacan

“Joxu i angeic . . . a acilë angeice troa musinëne la nöjei ewekë i nyidëti asë.”—MATAIO 24:45-47.

1, 2. (a) Thenge la hna amekötine hnei Tusi Hmitrötr, drei la ka troa xomiujine la mele së? (b) Nemene la ka amamane ka hape Keriso la ka elemekene hnyawa la ekalesia?

“THE tro kö a hë nyipunie, ite meken; ke casi hi la mekene i nyipunie, ene Keriso!” (Mataio 23:10) Jëne la itre trenge ewekë celë, Iesu a amamane hnyawa kowe la itretre drei nyidrë laka, pëkö atr e celë fen a troa thele troa musinën me nyi mekene i angatr. Ame la sipu he i angatr, tre nyidrëti e koho hnengödrai, ene Iesu Keriso. Iehova la ka acili Iesu ngöne la göhnë cili. Hnei Iehova hna “amele nyidëti hmaca jë qa hna mec, nge . . . me nyine he ne la nöjei ewekë asë thatraqane la ekalesia, celë hi ngönetei nyidë.”—Efeso 1:20-23.

² Pine laka Keriso la “he ne la nöjei ewekë asë” memine fe la ekalesia i Keresiano, haawe, nyidrëti a musi hune la nöjei atrene asë la ekalesia. Öhne asë hi nyidrëti la itre ewekë ka traqa e hnine la ekalesia. Nyidrëti a wanga atrune la aqane mele ne la nöjei gurup maine ekalesia pena, ngöne la götrane la ua. Kola amamane hnyawa lai ngöne la tusi Hna Amamane hna cinyihane hnei Ioane aposetolo ngöne la pune la hneijine i Iesu. A faifi lao qaja Iesu kowe lo sevene lao ekalesia laka atre hi nyidrë la itre huliwa i angatr, me itre thiina ka loi me itre ngazo ka eje thei angatr; nge hnei nyidrëti hna eamo me ithuecatr thenge la aqane atrepengöne nyidrë lai itre ekalesia. (Hna Amamane 2:2, 9, 13, 19; 3:1, 8, 15) Hetre nyipi kepine matre tro sa mejiune laka atre hnyawa fe Iesu la pengöne la itre xaa ekalesia ne Asia, me Palestine, Suria, Babulona, Heleni, me Italia, me itre xane ju kö. (Ite Huliwa 1:8) Tune kaa fe enehila?

Ketre Hlue Ka Nyipici

3. Pine nemen matre ijije hi troa aceitunëne la ekalesia memine la ketre ngönetrei, nge Keriso la he ne la ngönetrei cili?

³ Thupene lo hna amele nyidrëti hmaca qa hna mec, nge itre hnepe ijin qëmekene tro nyidrëti a elë hnengödrai eë kowe la Tretretro i nyidrë, hnei Iesu hna qaja kowe la itretre drei nyidrë, ka hape: “Ase hë hamë ni la nöjei musi asë e hnengödrai me celë fen.” Hnei nyidrëti fe hna qaja ka hape: “Hanawang, ini a ce me nyipunie ngöne la nöjei drai asëjëihë uti hë la pune la fene hnengödrai.” (Mataio 28:18-20) Tro pala pë hë nyidrëti a ce me angatr me eatrongë angatr. Ame ngöne la itre tusi Paulo kowe la itre Keresiano ne Efeso me Kolose, hnei Paulo aposetolo hna aceitunëne la ekalesia i Keresiano memine la ketre “ngönetrei,” laka Keriso la He. (Efeso 1:22, 23; Kolose 1:18) Tune la hna qaja hnene la ketre atr ka qeje pengöne la Tusi Hmitrötr (A. Davidson, Cambridge Bible for Schools and Colleges), ka hape ame la ceitune celë, tre, “thaa kolo kö a qaja hmekuje la enyipiewekëne la He kowe la ngönetrei, ngo kolo fe a qaja la aqane eatrongëne hnene la He la itre xaa götrane ne la ngönetrei. Tro itre eje a drenge la hna amekötine hnene la He.” Drei la hnei Keriso hna xome matre nyine jiane huliwa i nyidrë qaane lo kola acili nyidrë troa musinëne la Baselaia lo 1914?—Daniela 7:13, 14.

4. Thenge la hna perofetane hnei Malaki, nemene la hna öhne hnei Iehova me Iesu Keriso ngöne la nyidroti a traqa troa tupathe la ēnē ngöne la götrane la ua?

⁴ Hna perofetane hnei Malaki laka tro Iehova, “lo Joxu,” a traqa kowe la ene maine uma i Nyidrë matre troa amekötin me xödrane ej, cememine la “maca ne la isisinyikeu,” i Nyidrë, hna xötrei acile troa mus, ene lo Hupuna hna xötrei acile troa mus, ene Iesu Keriso. “Ijinë hë” troa ‘amekötine la uma i Akötresie; kola mama hnyawa la ewekë cili ngöne lo macatre 1918.a (Malaki 3:1; 1 Peteru 4:17) Hna pane waipengöne hnyawa la itre atr ka qaja ka hape angatre la ka nyi trenge ewekë i Akötresie, nge angatre la itre nyipi hlue i Nyidrë e celë fen. Hna upetrije lo itre hmi ka sipu selëne ka hape hmi Keresiano angatr, ene lo itre hmi ka inine ngöne la itre macatre ka nyimutre la itre ini ka ahleuhleunyi Akötresie, nge ka anenine la madra ngöne lo Pane Isi Ka Tru ne la fen. Hna tupathe la itre thelene ne la itre Keresiano hna iën ka mele nyipici, me nyihnyawa angatr tune hnei eë, me kepe angatr; matre kösë xajawai Iehova, tre, “angat’a tro fë la huje ngöne la thina ka meköt.”—Malaki 3:3.

5. Hnei Iesu hna qaja la “hlue” ka nyipici ngöne la nyidrëti a perofetane la “hlepëti” nyidë. Matre drei hë lai “hlue”?

⁵ Ka ihmeku la hna perofetane hnei Malaki memine lo hatren hna hamëne hnei Iesu kowe la itretre drei nyidrë, ka aijijë angatre troa atrehmekune lo ijin hna perofetan, ene lo “hatene la hlepëti hmaca enëtilai, meminëti la [“pune la fene hnengödrai,” MN.] Tro mina fe a hane atrehmekune jëne la hatrene cili, la “hlue”, laka thaa alacaasi kö ngo ketre gurup. Hnei Iesu hna qaja ka hape: “E ka la hlue ka nyipici me ka inamacan, lo hnene la joxu i angeice hna acile troa musinëne la hnalapa i nyidë, troa thewe xeni koi angate ngöne la nyipi ijin? Manathithi hë la hlue cili, e traqa la joxu i angeic’ a öhnyi angeic’ a kuca tune lai. Nyipici ini a qaja koi nyipunie, tro nyidëti a acilë angeice troa musinëne la nöjei ewekë i nyidëti asë.” (Mataio 24:3, 45-47) Ame la Keriso a “traqa” troa wange la “hlue” ngöne lo macatre 1918, hnei nyidrëti hna öhne la thelene la itre hna iëne hnene la uati hmitrötr, qaane hë lo 1879, angatr a “thewe xen ngöne la nyipi ijin,” jëne la zonal La Tour de Garde (Ita Ne Thup) memine la itre xaa itus. Hnei nyidrëti hna kepe angatr, ceitune me ketre jiane huliwa i nyidrë, maine ketre “hlue,” pena, nge ame hë ngöne la macatre 1919 kola nue angatr troa thupëne hnyawa la itre ewekë i nyidrëti asë e cailo fen.

Troa Thupëne Hnyawa La Itre Ewekë i Keriso e Celë Fen

6, 7. (a) Nemene la itre xaa aqane hëne Iesu la “hlue” i nydrë ka nyipici? (b) Nemene la aliene la hnëewekë hnei Iesu hna xom, hna hape “atre thup”?

⁶ Itre hnepe treu qëmekene tro Iesu a perofetane me hamëne la hatrene la hlepëti hmaca i nyidrë, me amamane laka hetrenyi la ketre “hlue” ka nyitrenge ewekë i nyidrë e celë fen; tre, nyimu pengöne aqane hëne nyidrë lai “hlue” cili, me amamane la itre hnëqa ne ej. Hnei Iesu hna qaja ka hape: “E ka la ate thupe nyipici, me ka inamacan, lo hnene la joxu i angeice hna acile troa musinëne la hnalapa i nyidë, troa thawa la xen, edö i angate ngöne la ijin? Nyipici in a qaja koi nyipunie, tro nyidëti a acilë angeice troa musinëne la nöjei ewekë i nyidëti asë.”—Luka 12:42, 44.

⁷ Ame e celë kola qaja la hlue ceitune me ketre atre thup, ketre hnëewekë ka ujën lo ketre xötrehnëewekë qene Heleni ka qaja la “ketre atr ka thupëne la ketre uma, maine ketre trenadro pena.” Ame lai ketre atre thupe cili, tre, thaa kolo kö lo ilapane la itre ka inamacan ka qeje pengöne la itre mekune ka lolo qa hnine la Tusi Hmitrötr. Thaa kolo hmekuje kö a hamëne hnene la “atre thupe nyipici” la xeni ne la ua “ngöne la ijin” ka ijij, ngo kolo mina fe a acilën eje fe matre troa musinëne la hnalapa i Keriso, ene lo itretre thup, me nue koi angatr asë troa thupëne la ekalesia i Keriso memine la itre huliwa ne ej e celë fen, ene lo, “ite ewekë i nyidëti asë.” Nemene la itre ewekë i Keriso?

8, 9. Nemene la itre “ewekë” hna thupëne hnene la hlue hna iën?

⁸ Ame la itre hnëqa ne la hlue, tre ene fe la troa elemekene la itre jiane huliwa hna xome hnene la itretre drei Keriso troa kuca la itre huliwa ne la Keresiano, tune la itre Bethela, memine la itre hnë hmi ene la itre Uma Ne Baselaia me Itre Iuma Ne Asabele e cailo fen asë. Ame la huliwa ka nyipi ewekë catre hna kuca hnene la hlue, tre, ene la troa acatrene la lapaune ne la itre atr jëne la itre porogarame ne ini Tusi Hmitrötr hna hamëne ngöne la nöjei icasikeu ne la wiik me ngöne la itre ijine asabele me Kovasio. Ame ngöne lai itre ijine icasikeu cili, tre kola hamëne la itre ithuemacanyi göi troa qejepengöne la aqane eatre la itre hna perofetane hnei Tusi Hmitrötr, me hamëne la ixatua ngöne la ijine ka ijij ngöne la aqane troa trongëne la itre trepene meköti ne la Tusi Hmitrötr ngöne la nöjei drai ne mele së.

⁹ Ame mina fe la itre hnëqa ne la hlue, tre, ene la troa xomiujine hnyawa la huliwa ka sisitria catr; troa cainöjëne la “maca ka loi celë ne la baselaia” me troa “inine la nöjei nöj’ asëjëihë.” Kolo lai a hape, troa inine la itre atr troa trongëne la nöjei ewekë asë, hnei Keriso, He ne la ekalesia hna upi së troa kuca ngöne la hneijine ne la pun. (Mataio 24:14; 28:19, 20; Hna Amamane 12:17) Ame hë la thangane la hna cainöj me inine la itre atr, tre kola traqa la “ka ala nyimu atraqat,” ene la itre sine ce huliwa ne lo thelene la itre hna iën. Ame lai “nöjei ewekë lo hna ajane hnei nöj’ asë,” a hna thatreine kö troa e, tre, celë fe hi lo itre “ewekë” ka lolo i Keriso lai hna thupëne hnene la hlue ka nyipici.—Hna Amamane 7:9; Hagai 2:7.

Lapa Ne Xomi Meköt Ka Nyi Trenge ewekëne La Lapa Ne La Hlue

10. Drei la hna acile matre troa axecië mekun ekö ngöne lo hneijine i Iesu, nge nemene la thangane lai ngöne la itre ekalesia?

¹⁰ Ka nyipi ewekë catre la itre hnëqa ne la hlue ka nyipici, pine laka, nyimutre la itre mekune hna troa axeciën. Ame ngöne lo ekalesia i Keresiano ekö, hna nyitrenge ewekëne la lapa ne la hlue hnene la itre aposetolo memine la itre qatre thup e Ierusalema. Angatr a axeciëne la itre mekun thatraqane asë la ekalesia i Keresiano. (Ite Huliwa 15:1, 2) Ame ngöne lo hneijine i Iesu, tre, hna iupi fë kowe la itre ekalesia la mekune hna axeciën hnene la lapa ne xomi meköt, hna jëne tus me itre ka tro fë maca ne la lapa. Atraqatre la madrine ne la itre pane Keresiano troa kapa la ixatua ka lolo cili, nge hnene la aqane ce huliwa i angatr memine la lapa ne xomi meköt, ene pe hetrenyi la tingeting memine la caas thei angatr.—Ite Huliwa 15:22-31; 16:4, 5; Filipi 2:2.

11. Drei la hnei Keriso hna acile enehila troa eatrongëne la ekalesia, nge tune kaa la aqane tro sa goeëne la gurupe cili, ene lai itre Keresiano hna iën?

¹¹ Ame enehila tre kola troa tune ekö lo hneijine i Iesu, laka, hetrenyi la ketre gurup ka co; kolo hi lo itre atre thupe lai hna iën, angatre hi lo lai Lapa Ne Xomi Meköt ne la itretre drei Keriso enehila e celë fen. Iesu Keriso la He ne la ekalesia, nge nyidrëti a eatrongëne hnene la “themie maca” i nyidrë (mene i nyidrë) la itre hlue ka mele nyipici, matre tro angatr a elemekene la huliwa ne la Baselaia. (Hna Amamane 1:16, 20) Thaa nanyi menu kö lo ijine meci Albert Schroeder, ketre atrene la Lapa Ne Xomi Meköt. Ka hekö catre hë nyidrë hane xome la hnëqa cili; hnei nyidrëti hna cinyihane ka hape: “Kola icasikeu hnene la Lapa Ne Xomi Meköt ngöne la nöjei Drai Hnacian; kola nyiqaane hnene la thith me sipone la ixatua ne la uati hmitrötre i Iehova. Kola catre thele matre troa xecie hnyawa laka, ame asë la nöjei ewekë me nöjei mekune hna axeciën tre ka ihmeku hnyawa itre ej memine la Wesi Ula i Akötresie, ene la Tusi Hmitrötr.”b Ijije hi tro sa mejiune hnyawa kowe lai itre Keresiano hna iën ka mele nyipici. Nge ame göne la Lapa Ne Xomi Meköt, tre, loi e tro sa xötrethenge la hna amekötin hnei Paulo ka hape: “Ideiju kowe la ite mekene i nyipunie, me denge thenge ju ; ke angat’ a hmekëne thatraqane la ite u i nyipunie.”—Heberu 13:17.

Loi e Tro Sa Metrötrën La Hlue Ka Nyipici

12, 13. Nemene la itre kepine qa hnine la Tusi Hmitrötr ka upi së troa metrötrëne la lapa ne la hlue?

¹² Ame la ketre kepine ka tru matre troa amamane la metrötre së kowe la hlue ka nyipici, tre, aqane tro hi së lai a amamane la metrötre së koi Iesu Keriso lo Maseta së. Kola qeje itre hna iën hnei Paulo, ka hape: “Nge hlue i Keriso la hna hëne nge ate gufa. Hna itö nyipunie hnene la thupen.” (1 Korinito 7:22, 23; Efeso 6:6) Qa ngöne lai, ame la easa huliwa nyipici me drengethenge la itre hna amekötine hnene la hlue ka nyipici memine la Lapa Ne Xomi Meköti ne ej, easë hi lai a drengethenge Keriso, lo Maseta ne la hlue. Ame la easa metrötrëne hnyawa la jiane huliwa hnei Keriso hna xome matre troa thupëne la itre ewekë i nyidrë e celë fen, celë hi ketre aqane tro së lai a amamane laka “Iesu Keriso la Joxu, nyine atrunyi Akötesie Tetetro.”—Filipi 2:11.

¹³ Ame la ketre kepin qa hnine la Tusi Hmitrötr ka upi së troa amamane la metrötre së kowe la hlue ka nyipici, ke, ame lo lai itre Keresiano hna iën e celë fen, angatre hi lo hna qaja hnei Tusi Hmitrötr kola aceitunëne me ketre “ēnē” nyine hnamunë i Akötesie jëne la “ua.” Haawe, ketre itre “ka hmitöt” angatr. (1 Korinito 3:16, 17; Efeso 2:19-22) Hnei Iesu hna nue kowe la lapa cili hna aceitunën me ēnē ka hmitrötr troa thupëne la itre ewekë i nyidrë e celë fen; nge kola hape lapa ne la hlue hmekuje hi la atrekë hnëqane la itre xaa mekune hna axeciëne e hnine la ekalesia i Keresiano, nge eje la ka elemekene la ekalesia. Celë hi matre, loi e tro asë hi së a goeëne la itre huliwa e hnine la ekalesia ceitune me hnëqa ka hmitrötr ne la hlue, me troa xötrethenge, nge troa sajuëne la hna amekötine nge ka xulu qaathene la hlue ka nyipici memine la Lapa Ne Xomi Meköti ne ej. Eje hi laka, ketre hnëqa ka lolo catre hna wangatrune hnene la “ite xa mamoe,” ene la troa xatuane la hlue matre troa thupëne la itre ewekë ne la Maseta.—Ioane 10:16.

Loi e Troa Ce Huliwa Nyipici Memine La Lapa Ne La Hlue

14. Tune la hna perofetane hnei Isaia, tune kaa la aqane xötrethenge hnene la itre xaa mamoe la lapa ne la hlue hna iën, nge nemene la aqane “huliwa meci” angatr?

¹⁴ Hna ahnithe hë ekö hnine la hna perofetane hnei Isaia la aqane drengethenge me ipië ne la itre xaa mamoe kowe la itre atrene la Isaraela ngöne la götrane la ua; öni Isaia perofeta ka hape: “Dei la hna ulatine hnei Iehova ka hape, Ame la mo ne Aigupito me ite mo ne Aithiope nyine itön, me angete Seba ite ate ka hoea, te, troa tro fë koi ‘ö, nge ite ewekë i ‘ö hë; tro angat’ a xöte thenge eö; tro angat’ a tro hna ote eno fao, nge tro angat’ a wewë koi ‘ö, me xëwe koi ‘ö, me hape, Eje thei nyipëti Akötesie, nge pëkö kete; nge pëkö xa Akötesie.” (Isaia 45:14) Kösë ame enehila, tre, kola tro xötrethenge hnene la itre xaa mamoe me tro hutröne la lapa ne la hlue memine la Lapa Ne Xomi Meköti ne ej, angatr a nue troa eatrongë angatr. Ame la itre xaa mamoe, tre, angatr la ‘itre mo,’ ene la itre ka huliwa mec, me nue la trenge catre me itre mo i angatr matre troa sajuëne la huliwa ne cainöj e cailo fen; huliwa lai hnei Keriso hna upe la itre hna iën troa kuca e celë fen.—Ite Huiwa 1:8; Hna Amamane 12:17.

15. Tune kaa la aqane ahnithe hnene la hna perofetane hnei Isaia 61:5, 6, lo aqane iothekeune la itre xaa mamoe memine la Isaraela ngöne la götrane la ua?

¹⁵ Kola olene me madrine hnene la itre xaa mamoe troa nyihlue i Iehova me nue troa weni iuji angatr hnene la lapa ne la hlue memine la Lapa Ne Xomi Meköti ne ej. Angatr a wanga atrehmekune thene la itre hna iën la itre atrene la “Isaraela i Akötesie.” (Galatia 6:16) Kola xome la itre “trehnyiwa” me “ite ate ne la ite nöj” troa nyihatrene la itre xaa mamoe ka caasi memine la Isaraela ngöne la götrane la ua; angatr a madrine troa huliwa ceitune me itre ka “eëny” me ka “thupë vin” fene la musi ne la itre hna iën, ene lo “itete huje koi Iehova” me itre ‘hlue i Akötresie.’ (Isaia 61:5, 6) Angatr a catre catre cainöjëne la maca ka loi ne la Baselaia me inine la itre atr ne la nöjei nöj. Angatr a xatuane hnyawa cememine la hni ka ajan la lapa ne la hlue, matre troa thupëne me nyihnyawane la itre atr ka hni ka ajan ka xötrei traqa.

16. Nemene la ka upe la itre xaa mamoe troa huliwa nyipici me xatuane la hlue ka nyipici me ka inamacan?

¹⁶ Kola atrehmekune hnene la itre xaa mamoe laka, atraqatre la manathithi hnei angatre hna kapa qa ngöne la etrune la hna huliwa la hlue ka nyipici; laka ej a hamëne la xeni ne la ua ngöne la ijine ka ijij. Angatr a atrehmekune hnyawa laka maine paatre ju la hlue ka nyipici me ka inamacan, ma nango co hi maine thatreine pena kö troa atre la trenge nyipici ne la Tusi Hmitrötr, tune la musi cile i Iehova, memine la troa ahmitrötrëne la ëje i Nyidrë, memine la Baselaia, me hnengödrai me fene hnengödrai ka hnyipixe, me u, me pengöne la itre ka mec, memine la nyipi pengöi Iehova, me Hupuna i Nyidrë, me Uati Hmitrötr. Hnene laka hetre hni ne ole memine la aqane mele nyipici angatr, matre kola xatuane hnene la itre xaa mamoe la itre “trejine” hna iëne hnei Keriso e celë fen ngöne la hneijine ne la pun.—Mataio 25:40.

17. Nemene la hna mekune hnene la Lapa Ne Xomi Meköt laka nyipi ewekë troa kuca, nge nemene la hne së hna troa ce ithanatan e wiike ka troa xulu?

¹⁷ Pine laka kola nango co trootro la etrune la itre hna iën, haawe, thatreine kö troa tro hnei angatr asë kowe la itre ekalesia matre troa xecie hnyawa koi angatr laka kola thupëne hnyawa la itre ewekë i Keriso. Qa ngöne lai, kola iën hnene la Lapa Ne Xomi Meköt la itre trejine trahmanyi thene la itre xaa mamoe matre troa hane xome la itre xaa hnëqa ne itretre thup ngöne la itre biero ne la filial, me ngöne la itre distrik, me sirkoskripsio, me hnine la itre ekalesia ne la Itretre Anyipici Iehova. Tune kaa la aqane ujë së kowe la itre qatre thupe cili ka lapa fene la musi Keriso, ka hetre thangane kö lai kowe la aqane huliwa nyipici së koi Keriso me kowe la hlue ka nyipici? Tro pë hë së a ce wange lai ngöne la hna cinyihan ka troa xulu.

[Ithueamacany]

Troa Ce Wange Hmaca

• Drei la He së, nge nemene la ka amamane ka hape atrehmekune hnyawa hi nyidrëti la itre ewekë e hnine la ekalesia?

• Ame ngöne la kola waipengöne la “ēnē”, drei la hna öhne e huliwa ceitune memine la hlue ka nyipici, nge nemene la itre ewekë hna nue kowe la hlue troa thupën?

• Nemene la itre kepin qa hnine la Tusi Hmitrötr ka upi së troa huliwa nyipici kowe la hlue ka nyipici?