‘Trojë Nge Loi e Troa Inine La Itre Atr, Me Bapataiso Angate’
“Qa ngöne lai, trojë nyipunie a inine la nöjei nöj’asëjëihë, me bapataiso angate . . . , ini angate jë troa trongëne la nöjei ewekë asëjëihë lo hnenge hna ahnithe koi nyipunie.”—MATAIO 28:19, 20.
1. Nemene la mekune hna axeciëne hnene la nöje Isaraela, fene la wetre sinai?
AME ngöne lo 3500 lao macatre ka ase hë, hna nyi xepu hnene la ketre nöje koi Akötresie. Kola cacaxenyi hnei angetre Isaraela fene la wetre sinai, nge angatr a qaja ka hape: “Tro nyihunie a kuca la nöjei ewekë asë hnei Iehova hna ulatin.” Qaane ju hi lai, nöje i Akötresieti hë angatr, ceitune me “atu ka co” i Nyidrë. (Esodo 19:5, 8; 24:3) Atraqatre la mejiune i angatr laka, troa thupë angatr hnei Nyidrë, nge troa mele hnene la itre matra i angatr ngöne la ketre nöje “ka di hnei zane thi me hani”.—Levitiko 20:24.
2. Nemene la aqane imelekeu ne la itre atr me Akötresieti enehila?
2 Ngo, tune la hna wanga atremekune hnei Asafa, atre cinyihane la Salamo, ame angetre Isaraela, tre, “tha hna trongëne kö hnei angate la hna isisinyikeu me Akötesie, nge xele kö angate troa trongëne la wathebo i nyidë.” (Salamo 78:10) Thaa hnei angatre kö hna trongëne lo hna isisinyikeu ekö hnei itre xötrapane i angatr me Iehova. Celë hi matre, hna aluzine hnene la nöj lo ketre aqane imelekeu ka ketrepengöne kö me Akötresie. (Ate Cainöj 5:4; Mataio 23:37, 38) Matre hnei Akötresie, hna, “xöji angete ethen, troa xome qa thei angate la nöje thatraqane la atesiwa i nyidë.” (Ite Huliwa15:14) Nge ame ngöne la itre drai tixenuë celë, Nyidrëti a icasikeune “la ka ala nyimu atraqat, lo tha’teine kö kete ate e, qa ngöne la ite xöte nöj’asë, me ite tribu, me nöjei ate, me ite qene hlapa,” itre ka madrine me wanga atremekune laka: “Ame la mele, te, qa thei Akötesi shë, ate tuenietine la theron, me qa thei Arenio.”—Hna amamane 7:9, 10.
3. Nemene la itre nyine tro sa kuca matre tro sa hane imelekeu hnyawa me Akötresie?
3 Maine easa ajan troa hane imelekeu tune lai me Iehova, tre, nyipi ewekë tro sa nue la mele së koi Nyidrë, me nyi hatren’ej qëmekene la nöjei atr, jëne la bapataiso hnine la tim. Aqane tro hi lai a amamane laka easë a drengethenge la hnei Iesu hna amekötine kowe la itretre drei nyidrë, kola hape: “Qa ngöne lai, trojë nyipunie a inine la nöjei nöj’asëjëihë, me bapataiso angate kowe la atesiwa i Tetetro, me Hupuna, me Uati Hmitöt; ini angate jë troa trongëne la nöjei ewekë asëjëihë lo hnenge hna ahnithe koi nyipunie.” (Mataio 28:19, 20) Hnei angetre Isaraela hna dreng la kola e hnei Mose “la tusi ne isisinyikeu.” (Esodo 24:3, 7, 8) Celë hi matre, trotrohnine hnyawa ha angatr la itre hnëqa i angatre koi Iehova. Ceitune hi lai me enehila, laka, qëmekene troa xome la bapataiso, nyipi ewekë troa pane atrehmekune hnyawa la aja i Akötresie e hnine la Tusi Hmitrötr.
4. Nemene la aqane troa hnëkë kowe la bapataiso? (wange ju fe cahu lue hnying göi bapataiso)
4 Mama catre laka ame la aja Iesu, tre, troa nyitrepene hnyawa hnene la itretre drei nyidrë la lapaune i angatr, qëmekene tro angatr a xome la bapataiso. Thaa hnei nyidrëti mekuje kö hna upe la itretre drei nyidrë troa tro me inine la nojei atr, ngo hnei nyidrëti fe hna ini angatr troa ‘trongëne la nöjei ewekë asëjëihë lo hnei nyidrë hna ahnith.’ (Mataio 7:24, 25; Efeso 3:17-19) Celë hi matre, ame la itre ka ijij troa xome la bapataiso, tre, loi e nyimu treu ne inine hë angatre la Tusi Hmitrötr, maine caa macatre maine luetre; nyine tro hi lai a amamane laka thaa eje kö la troa nyimenyim, ngo loi pe troa ijije la atrehmekun. Ame ngöne la kola troa bapataiso, lue hnying ka sisitria nyine troa sa hnene la itre ka troa bapataiso. Nge tune lo hnei Iesu hna qaja hnyawa ka hape: ‘loi la ewekë së a Eje hi, eje hi; Pëkö, pëkö.’ Haawe, ka loi e tro hmaca së asë a ce wange hnyawa la aliene la lue hnying cili.—Mataio 5:37.
Ietra Me Sa Xepu
5. Nemene la lue ewekë ka sisitria hna pane amexej ngöne la pane hnying göi bapataiso?
5 Kola pane hnyinge kowe la itre ka troa bapataiso, ka hape, ase jë kö angeic ietrane la itre aqane mele i angeic ka ngazo ekö, me hane nue la mele i angeic koi Iehova matre troa kuca la aja i Nyidrë. Kola amamane hnyawa hnene la hnyinge celë la lue ewekë ka sisitria nyine troa pane wange hnyawa qëmekene troa xome la bapataiso; ene la troa ietra, memine la troa sa xepu (troa nue la mele së troa nyihlue i Iehova).
6, 7. (a) Pine nemene matre nyipi ewekë troa ietra, qëmekene troa bapataiso? (b) Thupene la hna ietra, nemene la itre ewekë nyine troa saze?
6 Pine nemene matre kola ietra hnene la ketre atr qëmekene troa xome la bapataiso? Kola qeje pengöne hnei Paulo, aposetolo ka hape: “Eëshë asëjëihë fe hna ce thina me angat’ ekö ngöne la ite aja i ngönetei shë.” (Efeso 2:3) Qëmekene tro sa atrehmekune la aja i Akötresie, easë a mele thenge la aqane waiewekë i fen, me itre emekötine ej me itre ka nyipi ewekë kow ej. Hna musinëne ekö la mele së hnei Satana, haze ne la fene celë. (2 Korinito 4:4) Ngo ame hë la easa atre la ëje i Akötresie, ketre kolo fe hi a xecie hnyawa ekuhu hni së la trenge pi tro sa mel, a thaa “kowe [hmaca kö] la ite aja i ate ngöne la ijine i angeice ngöne la ngönetei, loi pe kowe la aja i Akötresie.”—1 Peteru 4:2.
7 Ame lai mele ka hnyipixe cili, tre, tru catre la itre manathithi hne së hna kapa qa ngön. Ame la hnapan, tre, kola aijijë së troa eköthe la aqane imelekeu së me Iehova. Hnei Davita hna aceitunëne la aqane imelekeu cili memine la ihë i Akötresie troa lö hnine la “uma ne heta” me lapa hnine lo hna qaja ka hape, “wete ka hmitöte i cilie”. (Salamo 15:1) Eje hi lai laka, thaa Iehova kö a hëne la nöjei atr menu, ngo kolo hmekuje hi lo itre “ate tro meköt, me kuca la meköt, me qaja la nyipici qa kuhu hni [angatr].” (Salamo 15:2) E tro sa xei kowe lo itre aqane mele së ekö qëmekene troa atre la nyipici, maine jë saze hë la aqane ujë së memine la itre thiina së, matre troa ihmeku memine la itre hna amekötine e hnine Tusi Hmitrötr. (1 Korinito 6:9-11; Kolose 3:5-10) Nemene la ka upi së troa saze? Hnene hi la aja ka eje the së troa ietrane la itre ngazo së ekö, nge easa catre thele troa amadrinë Iehova. Celë hi matre, easa saze hnyawa la aqane ujë së, hnene la hna trije la isa mele thatraqai së hmekuj, memine la aqane mele ne la fen, nge kola trongëne la thiina ka amadrinë Akötresie.—Ite Huliwa 3:19.
8. Tune kaa la aqane tro sa nue la mele së (sa xepu), nge nemene la ka isilinekeun ej memine la bapataiso?
8 Kola hnyingëne mina fe kowe la atr ka troa xome la bapataiso, ka hape, ase jë fe kö angeic nue la mele i angeic koi Iehova troa kuca la aja i Nyidrë. Ame la ewekë nyine troa kuca qëmekene troa xome la bapataiso, tre, ene la troa pane nue la mele së (sa xepu). Easë a qaja koi Iehova ngöne la thith, la aja së troa nue la mele së koi Nyidrë jëne Keriso. (Roma 14:7, 8; 2 Korinito 5:15) Qa ngöne lai, Iehova ha la Maseta së nge Ewekë i Nyidrëti hë së, nge tui Iesu, easa thele troa kuca la aja ne la Akötresi së. (Salamo 40:8; Efeso 6:6) Ame la easa sa xepu koi Iehova, tre, isa easë caas, nge acaa tro hi sa qaja koi Nyidrë ka hape easa troa nue la mele së koi Nyidrë. Pine laka ame la easa nue la mele së ngöne la gaa sihngödr, tre, easë hmekuje hi me Akötresie, haawe, ame pena ha lo lai ijine bapataiso, kola aijijë së troa qaja amamane qëmekene la ka alanyimu laka, ase hë së sa xepu kowe la Tretretro së ekoho hnengödrai.—Roma 10:10.
9, 10. (a) Kola hapeu la troa kuca la aja i Akötresie? (b) Tune kaa mina fe la aqane wanga atrehmekune hnene la itre musi ne Alema ekö, lo aqane nyi xepu së koi Akötresie?
9 Nemene la aqane tro sa xötrethenge la tulu i Iesu, ngöne la aqane troa kuca la aja i Akötresie? Öni Iesu kowe la itretre drei nyidrë, ka hape: “Maine kete ate a ajane troa xöte thenge ni, loi e tro angeic’ a xele angeice kö, me xome la satauro (sinöe) i angeice kö, me xöte thenge ni fë.” (Mataio 16:24) Iesu a e wengëne e celë la köni ewekë nyine tro sa kuca. Ame la hnapan, tre, tro sa “xele” së kö. Kolo hi lai a hape, tro sa nuetrije la thiina së ka pitru, me itre thiina së ka ngazo me kapa la itre eamo memine la hna amekötine hnei Akötresie. Ame la ewekë hnaaluen, tro sa ‘isa ajöne la sinöe së.’ Ngöne la hneijine i Iesu, ame lai hna qaja ka hape, easa ajöne la sinöe së, tre, kolo hi lai a nyi hatrene la hleuhleu me akötr. Pine laka itre Keresiano së, easë a kapa la akötr ngöne la itre xaa ijin, pine laka, atre hi së ka hape, easa akötr pine la maca ka loi. (2 Timoteo 1:8) Ngacama kola hnyima sai së maine goeën amenyi së hnene la itre atre ne fen, ngo tui Keriso, easë a ‘tha nyipine la hmahma,’ nge atraqatre la madrine së laka hna kepe së hnei Akötresie. (Heberu 12:2) Ame la ewekë hnaakönin, ke easë a xötrethenge Iesu “uti hë epin’epine palua.”—Salamo 73:26; 119:44; 145:2.
10 Kola mama mina fe laka, hetrenyi la itre ithupëjia me easë ka trotrohnine la aliene la kola nue hnene la Itretre Anyipici Iehova la mele i angatr troa nyihlue i Iehova. Drei la ketre ceitun, ame ngöne la ketre hnë iakötrë ekö e Alema, Buchenwald la ëjen, tre, hetrenyi la ketre pepa nyine troa saenëne hnene la Itretre Anyipici Iehova ka pi cile catr ngöne la lapaune i angatr; hna cinyihane ka hape: “Eni la ketre ka inine la Tusi Hmitrötr ka catre lapaun; thaa tro jë kö ni a hutrö kowe lo hnenge hna isisinyikeu me Iehova.” Drei la itre trengewekë ka amamane hnyawa la aqane troa ujë la itre atr ka nue la mele i angatr koi Akötresie (ka sa xepu koi Nyidrë) matre troa nyihlue i Nyidrë uti hë la pun!—Ite Huliwa 5:32.
Hna Goeë Angatr Ceitune Me Itretre Anyipici Iehova
11. Nemene la manathith hna kapa qa ngöne la hna xome la bapataiso?
11 Ame ngöne la hnaaluene hnying, kola troa qaja hnene la ka bapataiso ka hape trotrohnine hnyawa hi angeic laka, ame hë kowe la nöjei atr, tre, atre anyipici Iehova fe hë angeic. Ame la kola ase bapataiso, angeice hë enehila la ketre hlue hna siëne troa xome la ëje i Iehova. Hane hi lai ketre manathithi ka sisitria, nge ketre hnëqa ka nyipi ewekë catr. Kola fe gojenyine mina fe la ka xötrei bapataiso, troa hane mele epine palua, ngo eje hi lai laka, loi e tro angeic a mele nyipici pala hi koi Iehova.—Mataio 24:13.
12. Nemene la nyine troa kuca ngöne la easa atrune la ëje i Iehova?
12 Eje hi lai laka, ketre manathithi ka sisitria catr la troa xome la ëje i Iehova, Akötresie ka pucatin’asë. Öni Mika, perofeta ka hape: “Ke nöjei ate asë a isa tro ngöne la ëjene la ite haze i angat, tro pe kö sha tro ngöne la atesiwa i Iehova Akötesi shë epine palua.” (Mika 4:5) Nge maine nyipici laka ketre manathithi ka tru la troa xome la ëje i Iehova, ngo hetre nyine tro fe kö së a hane kuca. Ene la tro sa hetrenyi la ketre aqane mele ka atrune la ëje hne së hna xom. Tune lo hnei Paulo hna amexeje hmaca kowe la itre Keresiano ne Roma, e thaa kuca thenge kö së lo hne së hna cainöjën, ke troa “jele ngazone,” la atesiwa i Akötresie, nge thaa tro hë a hane mejiune kow hnene la itre atr.—Roma 2:21-24.
13. Pine nemene matre qâ ne la atr ka sa xepu hë koi Iehova troa anyipici Nyidrë?
13 Hetre hnëqane hë la atr ka Anyipici Iehova, ene la troa anyipicine la ëje ne la Akötresi angeic. Ame angetre Isaraela, tre, itre atrene angatr la ketre nöje ka sa xepu hë koi Iehova; ene pe Nyidrëti a sipo angatre jë itretre anyipici Nyidrë, matre tro angatr a qaja amamane laka Akötresieti Nyidrë ka epine palua. (Isaia 43:10-12, 21) Ngo thaa eatrëne kö hnene la nöje la itre götrane qa cili, ene pe thipetriji angatre pi hi epine palua hnei Iehova. Nge tune kaa fe itre nyipi Keresiano enehila? Atraqatre la madrine së troa atrunyi Akötresie me anyipicine la ëje i Nyidrë. Easë a kuca tune lai, pine laka, easë a hnimi Nyidrë nge aja së troa ahmitrötrëne hmaca la atesiwa i Nyidrë. Hapeu, atreine kö së lapa thaupu fë la nyipici hne së hna atre, ene la pengöne la Tretretro së e koho hnengödrai memine la aja i Nyidrë? Ce mekune së hi me Paulo, ngöne lo angeic a qaja ka hape: “Hna musinë ni; ngo ekölö hi ni, e thaa cainöjëne kö ni la maca ka loi!”—1 Korinito 9:16.
14, 15. (a) Nemen la itre hna kuca hnene la organizasio i Iehova matre tro sa kökötre ngöne la götrane la ua? (b) Nemene la itre ewekë hna hnëkëne thatraqai së matre tro sa acatrene pala hi la lapaune së?
14 Ame la hnaaluene hnying ke kolo fe a amekunëne la hnëqa ne la ka bapataiso, ene la troa ce huliwa memine la organizasio i Iehova hnei Nyidrëti hna eatrongëne jëne la Uati Hmitrötre i Nyidrë. Thaa easë caasi kö a nyi hlue i Akötresie; nyipi ewekë catre fe koi së la ixatua, me trenge catr, me ithue catr qaathene la “ange tejine.” (1 Peteru 2:17; 1 Korinito 12:12, 13) Hetrenyi la ketre hnëqa ka sisitria hna cilëne hnene la organizasio i Akötresie, jëne tro sa kökötre ngöne la götrane la ua. Ej a kuca la itre itusi ka nyimutre hna nyitrepene hnei Tusi Hmitrötr, nyine troa xatua së matre tro sa kökötre ngöne la nyipi atrehmekun, me inamacane ngöne la aqane tro sa cile kowe la itre jol, nge troa acatrene la aqane imelekeu së me Akötresie. Kola aceitunëne la föe trene ha kuku ka thele troa thupëne me ithuane hnyawa la itre nekö i nyiidro, memine la “hlue ka nyipici me ka inamacan”, laka, ej a thawa ngöne la ijine ka ijij, la göxeni ne la ua, ka nyipi ewekë catr matre tro sa egöcatr ngöne la lapaun.—Mataio 24:45-47; 1 Thesalonika 2:7, 8.
15 Ame ngöne la itre icasikeu ne la wiik, tre, kola inine la itre atre i Iehova me hamëne koi angatr la itre ithuecatr hnei angatr hna ajan, matre troa Itretre Anyipici Iehova ka mele nyipici me cile hut. (Heberu 10:24, 25) Kola ini së troa ithanata kowe la itre xaa atr hnene lo icasikeu ne la Ini Ne Cainöj Qaathei Akötresie, nge ame la Icasikeu Ne La Huliwa, tre, kola xatua së troa tro fë hnyawa la maca ne Baselaia. Ngöne la itre icasikeu së me jëne la itre sipu ini tusi së, easa öhne la aqane eatrongëne Nyidrë la organizasio i Nyidrë jëne la uati hmitrötre i Nyidrë. Jëne la itre ewekë cili hna hnëkëne pala hi thatraqai së, Akötresieti a hmekë së qa ngöne la itre hulö, me xatua së matre tro sa itre hlue ka maca troa cainöj, me ithuecatre koi së matre tro pala hi sa hlëhmeke ngöne la götrane la ua.—Salamo 19:7, 8, 11; 1 Thesalonika 5:6, 11; 1 Timoteo 4:13.
Nemene La Ka Troa Upi Së Troa Bapataiso?
16. Nemene la ka upi së troa nue la mele së koi Iehova?
16 Kola amekunëne hmaca hnene lo lue hnying kowe la ka bapataiso, la aliene la bapataiso hnine tim memine la itre nyine troa kuca thupene lai. Nemene la ka troa upi angeic troa axecië mekun, me hane xome la bapataiso? Ame laka itretre dreng pi së enehila hna bapataison, tre, thaa hna uku së kö troa bapataiso hnei ketre me ketre, ngo hna “e” së pe hnei Iehova. (Ioane 6:44) Hnene laka “Akötesieti la ihnim,” haawe, ame la aja i Nyidrë, ke tro la itre hnei Nyidrëti hna xup asë a drengethenge Nyidrë pine laka angatr a hnimi Nyidrë, ngo thaa hnene kö laka hna upi angatr. (1 Ioane 4:8) Hna e së koi Iehova jëne la itre thiina i Nyidrë me itre aqane ujë i Nyidrëti koi së. Hnei Nyidrëti hna hamëne thatraqai së la Hupuna i Nyidrëti ka caas, me aijijë së troa mele ka loi elany. (Ioane 3:16) Celë hi matre, kola hmala la itre hni së troa nue koi Nyidrë la mele së.—Ite Edomë 3:9; 2 Korinito 5:14, 15.
17. Thaa easë kö a nue la mele së koi nemen?
17 Thaa easë kö a nue la mele së kowe la ketre kepine maine ketre huliwa pena, ngo koi Iehova hmekuje hi. Ame la huliwa hnei Akötresie hna hamëne kowe la itre atre i Nyidrë, tre, ka troa saze, ngo ame la hna sa xepu hnei angatr koi Nyidrë, tre, eje pala hi. Drei la ketre ceitun, ame la hnei Nyidrëti hna sipo Aberahama troa kuca, tre, ka isa pengöne catre memine la hnei Nyidrëti hna upi Ieremia troa kuca. (Genese 13:17, 18; Ieremia 1:6, 7) Ngo hnei nyidroti asë hi hna eatrëne la huliwa ka sisitria hnei Akötresieti hna upi nyidroti troa kuca; pine nemen? Pine laka atraqatre la ihnimi nyidroti koi Iehova, nge hetre hni ne ajane i nyidro troa kuca la aja i Nyidrë. Ame enehila ngöne la hneijin ne la pun, kolo asë hi a thele hnene la itretre drei Keriso hna bapataison, troa trongëne la hna amekötin, ene la troa cainöjëne la maca ka loi ne la Baselaia, nge tro pena angat a hane inine la itre atr. (Mataio 24:14; 28:19, 20) Maine tro sa catre hane xome la huliwa cili, easë fe hi lai a hane amamane kowe la Tretretro së e koho hnengödrai laka, atraqatr la ihnimi së koi Nyidrë, nge ase hnyawa ha së nue la mele së koi Nyidrë.—1 Ioane 5:3.
18, 19. (a) Nemene la hna qaja amamane hnene la ka bapataiso? (b) Nemene la hne së hna troa wang ngöne la ini ka troa xulu?
18 Ngacama kola fe gojenyi së hnene la bapataiso kowe la itre manathithi ka nyimutre, ngo thaa kolo kö lai a hape troa sesë nyimenyime kow. (Luka 14:26-33) Ame bapataiso, tre ej a nyihatrene la ewekë hne së hna axeciën ka troa tro pa hune la nöjei nyine tro sa kuca asë. (Luka 9:62) Ame la troa xome la bapataiso, tre, kösë kolo hi la a qaja amamane kowe la ka alanyimu ka hape: “Ame la Akötesieti celë, Akötesi shë epin’epine palua; tro nyidëti a ea trongë shë uti hë la mec.”—Salamo 48:14.
19 Tro pë hë së a ce wange ngöne la ini ka troa xulu, la itre xaa mekune ka qaja la bapataiso hnei tim. Hapeu, hetre itre nyipi kepine kö ka sewe së troa xome la bapataiso? Hapeu, nyipi ewekë fe kö troa hane wang la macatre ne la atr ka ajan troa bapataiso? Nemene la aqane tro sa metrötrëne hnyawa la ijine bapataiso?
Ijiji Nyipunieti Kö Troa Qeje Pengön?
• Pine nemene matre kola pane ietra hnene la Keresiano qëmekene troa bapataiso angeic?
• Kola hapeu la hna hape, troa nue la mele së (troa sa xepu) koi Akötresie?
• Nemene la itre nyine troa kuca maine easë fe hë a hane xome la ëje i Iehova?
• Nemene la ewekë ka troa upi së troa axeciëne la mekun, ene la troa hane xome la bapataiso?