Iehova a Inine La Itretre Thup Thatraqane La Hna Axö Mamoe i Nyidrë
“Tro Iehova a hamëne la inamacan ; qa ngöne la ineula i Nyidëti la troa ate hmekune me trotrohnin.”—ITE EDOMË 2:6.
1, 2. Pine nemene matre itre trejine trahmanyi a thele troa cilën la itre hnëqa ka tru ngöne la ekalesia?
KOLA qaja hnei Nick, ka sevene hë lao macatre ne qatre thupe angeic, kola hape: “Atraqatre la madrinenge la kola acili ni troa qatre thup. Matre kösë ketre hnëqa lai ka aijijë ni troa akökötrene la huliwange koi Iehova. Hnenge hna mekune laka hetre gufang koi Nyidrë, ene la troa olene la nöjei ewekë hnei Nyidrë hna kuca thatraqai ni. Eje fe thenge la ajane troa catre xatuane la itre atrene la ekalesia, tune la aqane xatua ni hnene la itre xaa qatre thup.” Maine nyipici laka ka madrine angeic, ngo ame pe hetre ewekë hnei angeice hna hnehengazon. Angeic a sisedrëne ka hape: “Pine laka thaa thötre petre kö la macatreng qa ngöne lo kola acili ni, eni a xouen e pë ju theng elanyi la atreine waiewekë me inamacan, lue ewekë ka nyipi ewekë catre kowe la itre hna acile matre troa thupëne hnyawa la ekalesia.”
2 Nyimutre la itre kepine ka hamë madrine kowe la itre hna acile hnei Iehova troa thupëne la hna axö mamoe i Nyidrë. Paulo aposetolo a amekunëne la ketre kepine kowe la itre qatre thup ne Efeso, ngöne la nyidrëti a qeje Iesu, kola hape: “Sisitria la manathithi e troa hamën hune la troa kapa.” (Ite Huliwa 20:35) Ame hi la kola xome la hnëqa ne drikona me qatre thup hnene la itre trejine trahmanyi hna bapataisone hë, tre, celë hi itre xaa aqane tro angatre lai a ham koi Iehova me kowe la ekalesia. Ame koi itre drikona, tre, angatr a ce huliwa memine la itre qatre thup. Nyimutre fe la itre hawa hnei angatre hna xome matre troa eatrëne hnyawa la itre hnëqa ka nyipi ewekë hna athipe koi angatr. Kola upe la itre trejine trahmanyi hnene la ihnimi angatre koi Akötresie me kowe la atre lapa ezi angatr, troa eatrëne hnyawa la hnëqa i angatre ka tru alien.—Mareko 12:30, 31.
3. Pine nemene matre itre xan a cile hnö troa xome la itre hnëqa ngöne la ekalesia?
3 Nemene la nyine troa kuca hnene la ketre trejine trahmanyi ka nango cile hnö troa xome la itre hnëqa tune la troa drikona, me qatre thup, ke kola mekune laka thaa ijiji angeice kö? Tui Nick, maine jë tro angeic a xouene laka, paatre kö thei angeic la itre thiina ka ijij matre troa ketre atre thupë mamoe ka lolo. Hapeue nyipunie, trejine trahmanyi hna bapataison, nyipunieti fe kö a hane mekune tune lai? Thaa ngazo kö troa hnehengazo tune lai. Tro Iehova a hnyingë thupene kowe la itre qatre thupe hna acil, la aqane thupëne angatre la hna axö mamoe. Hnei Iesu hna qaja ka hape: “Ame la hna hamëne atrune kow, tro ha thele atrune thei angeic ; nge ame la hna amë atrune then, tro ha hëne atrune qa thei angeic.”—Luka 12:48.
4. Nemene la aqane xatuane Iehova la itre hnei Nyidrëti hna acil, matre troa thupëne hnyawa la itre mamoe i Nyidrë?
4 Hapeu, aja i Iehova kö tro la itre hna acile troa drikona me qatre thup, a ketre xome caasine la itre hnëqa i angatr? Ohea, Nyidrëti a hamëne la ixatua ka ijij matre atreine angatre troa cile kowe la itre ejolen, nge tro fe a tro loi la aqane xome angatre la hnëqa i angatr. Tune la hna ce ithanatane ngöne lo hna cinyihane hnapan, Iehova a hamëne koi angatr la uati hmitrötre i Nyidrë, nge wene ne hi la ua cili la ka xatua angatre troa thupëne me hnime la itre mamoe. (Ite Huliwa 20:28; Galatia 5:22, 23) Ketre, Iehova a hamë angatre la inamacan, me atrehmekun, me atrein waiewekë. (Ite Edomë 2:6) Tune kaa la aqane kuca i Nyidrë? Tro sa ce ithanatane la köni aqane ini angatre isa ala caas, itre hna acile hnei Iehova, matre troa thupëne hnyawa la itre mamoe i Nyidrë.
Ini Hna Kapa Qaathene La Itre Qatre Thup Ka Hekö Hë
5. Pine nemene matre lolo la aqane thupë mamoe hnei Peteru me Ioane?
5 Ame la kola cile hnei Peteru me Ioane, qëmekene la hnaakootre i angetre Iudra, tre, hnene la itre ka ameköti nyidro hna xomi nyidro ceitune me itre ka “tha ’te tus, me tha hna inin.” Ka atreine nyidro e tusi me cinyany, ngo thaa hnei nyidroti kö hna kapa la ini qaathene la itre keme ne hmi göi troa atrepengöne la Itre Hna Cinyihan. Ngo kola mama thei nyidro me itre xaa ka xötrethenge Iesu laka itretre ini ka atrein, ke nyimutre catre la itre ka drei angatr, a itretre drenge fe hë angatr. Hna tune kaa matre itretre ini ka tru hë angatr enehila, ngo ame ekö, tre, itre atr thaa hna inine kö? Ame la kola ase drei Peteru me Ioane hnene la itre ka amekötin, angatre hi a “wangate hmekunyi nyido laka luete qa thei Iesu.” (Ite Huliwa 4:1-4, 13) Nyipici laka, hnei nyidroti hna kapa la uati Hmitrötr. (Ite Huliwa 1:8) Ngo mama catre fe, a kowe mina fe la itretre amekötin ka pëkö atrehmekune ngöne la ua, laka hnei Iesu hna inine la itre atr celë. Ame ngöne lo ce nyidrëti e celë fen me angatr, thaa hnei nyidrëti hmekuje kö hna inine la itre aposetolo troa acaasine la itre atr hna aceitunëne me mamoe, ngo hna ini angatre fe la aqane troa thupë angatre hnyawa e itre atrene fe hë angatre la ekalesia.—Mataio 11:29; 20:24-28; 1 Peteru 5:4.
6. Nemene la tulu hna amë pe hnei Iesu me Paulo göi troa inine la aqane thupë mamoe?
6 Thupene la hna amele Iesu hmaca, hnei nyidrëti hna catre inine la itre hna acile troa itretre thupë mamoe. (Hna Amamane 1:1; 2:1–3:22) Hanawange la ketre ceitun, hnei nyidrë hna sipu ië Paulo, me ini angeic ngöne la aqane troa xome la hnëqa cili. (Ite Huliwa 22:6-10) Atraqatre la madrine i Paulo la kola kapa la ini, nge hnei angeic hna ce ithawakeun me itre xaa ka thupë mamoe la hnei angeic hna inin. (Ite Huliwa 20:17-35) Tune mina fe, hnei angeic hna ketre sipu xome la traeme i angeic, me trenge catre i angeic troa ini Timoteo, matre troa ketre atre “kuci huliwa” i Akötresie, “ka pë nyine ahmahman.” (2 Timoteo 2:15) Haawe, catrecatre la itre otrene ka iothekeune la lue atr celë. Nge qëmekene lai, hnei Paulo hna qeje angeic ka hape: “Hnei angeice hna ce nyi hlue me ini ngöne la maca ka loi.” (Filipi 2:22) Thaa hnei Paulo kö hna thele tro Timoteo maine ketre atr pena, a ketre atre drei nyidrë. Hnei nyidrëti pe hna xatuane la itre ka ce huliwa me nyidrë troa ‘itretre nyitipu nyidrë, tui nyidrë koi Keriso.’—1 Korinito 11:1.
7, 8. (a) Nemene la hna melën hnene la ketre atr, ka amamane la itre thangane ka loi hna kapa hnene la itre qatre thup, e tro angatr a xomi tulu thei Iesu me Paulo? (b) Eu la ijine tro la itre qatre thup a nyiqaane troa inine la itre ka troa drikona me qatre thup elany?
7 Kola xötrethenge la tulu i Iesu me Paulo hnene la itretre thupë mamoe, angatr a ketre sipu inine la itre trejine trahmanyi hna bapataisone hë, nge caasi pala hi la itre thangane ka lolo hna kapa. Tro sa pane ce wange la hna melëne hnei Chad. Hnei angeic hna tru hnine la ketre fami laka ka isa hmi kö la itre atren, nge thaa hekö catre kö la kola acili angeice troa qatre thup. Öni angeic: “Ngöne la itre macatre ka ase hë, hna xatua ni troa kökötre ngöne la ua hnene la itre qatre thup ka hekö hë nge ka maca hnyawa ngöne la itre hnëqa i angatr. Hnene laka ka thaa hmi kö la kemeng, hna wanga atrunyi ni hnene la itre qatre thupe cili, matre kösë itre keme fe hë angatre koi ni ngöne la ua. Hnei angatre hna xome la traeme i angatr troa ini ni ngöne la huliwa ne cainöj, nge thupene lai, hna ini ni hnene la ketre qatre thup troa xome hnyawa la itre hnëqa hna athipe koi ni hnine la ekalesia.”
8 Tune la aqane amamane hnene la ceitune celë, ame la itretre thup ka atreine waiewekë, tre, loi e troa pane inine la itre trejine qëmekene la tro angatr a aejëne la itre hna amekötine göi troa drikona maine troa qatre thup. Pine nemen? Pine laka Tusi Hmitrötr a amekötin ka hape, tro la itre drikona me itre qatre thup a pane melëne la itre hna amekötin ka draië ngöne la thiina me ngöne la ua, qëmekene troa acili angatre ngöne la itre hnëqa cili. Nyipi ewekë troa “pane tupathi angat.”—1 Timoteo 3:1-10.
9. Nemene la hnëqa ne la itre qatre thup, nge pine nemen?
9 Eje hi lai laka, loi e troa pane inine la itre trejine trahmany, nge thupene lai troa hane tupathi angatr. Hanawange la ceitun: Maine kola troa kuca la ketre itupathi ka jole catr hnene la ketre ka ini, nge thaa hna kapa kö qaathene la itre ka hamë ini la ketre ini ka ijij, tune kaa, tro kö angeic a iene la itupath? Eje hi laka, tro angeice a triane la itupathi angeic. Qa ngöne lai, nyipi ewekë catre la troa pane ini. Ngo ame pe, kola inine hnyawa la itre thöth hnene la itre ka hamë ini, thaa göne tro hmekuje kö angatr a iene la itupath, ngo kolo fe a xatua angatr troa huliwane la ini hna kapa. Ketre tune mina fe, kola xatuane hnene la itre qatre thup ka catre huliwa, la itre trejine trahmanyi hna bapataisone hë troa eëne la itre thiina hna thele thene la itre trejin hna troa acile ngöne la itre hnëqa, ene pe kola hamë angatr la ini ka ijij thatraqane lai. Thaa itre qatre thupe kö a kuca lai matre tro hi a acili angatr ngöne la itre hnëqa, ngo göne matre tro fe angatr a atreine thupëne hnyawa la hna axö mamoe. (2 Timoteo 2:2) Nyipici laka, tro fe la itre trejine trahmanyi hna bapataisone a ketre sipu catre huliwa, me catr melëne la itre thiina hna thele thene la drikona me qatre thup. (Tito 1:5-9) Ngo eje hi lai laka, loi e hetre ajane thene la itre qatre thup ka hekö hë troa xatuane la itre trejine ka thele troa hane cilëne la itre hnëqa cili, ke tro angatre lai a kökötre nyimenyime ngöne la ua.
10, 11. Tune kaa la aqane troa nyiqaane inine hnene la itretre thupë mamoe la itre xaa trejin, matre troa cilën elanyi la itre hnëqa?
10 Tune kaa la aqane troa inine hnene la itretre thupë mamoe ka hekö hë, la itre xaa trejine troa hane xome hnyawa la itre hnëqa e hnine la ekalesia? Ame la ewekë hnapan nyine troa kuca, tre, ene la troa wanga atrune la itre trejine trahmanyi ne la ekalesia hnene la hna ce cainöje lapaa me angatr, me xatua angatre troa kökötre ngöne la aqane troa “thawa hnyawa la wesi ula ka nyipici.” (2 Timoteo 2:15) Itretre thupë mamoe ka maca a ce ithanatane memine lo itre trejine trahmanyi la itre manathith hna kapa qa ngöne la hna nyihluene la itre trejin, memine la sipu madrine ka eje thei angatr qa ngöne la hna eköthe amë la itre aja ngöne la ua, me thele troa eatrëne itre ej. Angatre fe a hamëne cememine la hni ka menyik, la itre eamo ka ijij nyine ixatua ngöne la aqane troa kökötr la trejin, matre tro angeice elanyi a ketre ‘tulu kowe la hna axö mamoe.’—1 Peteru 5:3, 5.
11 Ame la kola ase acile la ketre trejine troa drikona, thaa tro kö a hmaca e cili la ini hna hamën hnene la itretre thupë mamoe ka inamacan. Hnene la ketre qatre thup, Brus la ëjen, ka xome la hnëqa celë a itre macatre hë enehila, hna qaja ka hape: “Atraqatre la madrineng troa pane ce lapa memine la ketre drikona hna xötrei acil, me ce wange me angeic la itre hna amekötin hna fejan hnene la hlue ka nyipici me ka inamacan. Nyiho fe a ce e la itre xaa eamo thatraqane lai hnëqa cili, nge thupene lai, hetre aja thenge troa ce huliwa me angeic uti hë la majemi angeic kowe la hnëqa i angeic.” Ame la kola kökötre trootro hnene la drikona ngöne la hnëqa i angeic, loi e tro fe a ini angeic ngöne la huliwa ne thupë mamoe. Kola sisedrëne hnei Brus ka hape: “Maine kola ce tro me eni hnene la ketre drikona troa wange la ketre trejin maine ketre fami pena, tre, eni a xatua angeic troa iëne la itre xötre ka ijij, nge ka troa akeukawanyi angatr, me ithuecatr. Maine kola ajane hnene la drikona troa ketre atre thupë mamoe ka lolo elany, tre nyipi ewekë tro angeice a inine lai aqane troa xome hnyawa la itre xötre ka troa ketr la hni ne la atr.”—Heberu 4:12; 5:14.
12. Nemene la aqane tro la itretre thupë mamoe ka hekö hë a inine la itre hna xötrei acil troa qatre thup?
12 Nyipi ewekë fe troa inine hnyawa pala hi lo itre qatre thupe hna xötrei acil. Öni Nik ka hape: “Ketre ixatua ka tru koi ni la ini hnenge hna kapa qaathene la lue atre thup ka qatre hë. Atre kö la itre trejine celë la aqane troa senge la itre xaa hnepe jol. Ngo hnei nyidroti pala hi hna drei ni hnyawa, me wanga atrune la mekunang, ngacama isazikeu memine la mekuna i nyidro. Atraqatre la ini hnenge hna kapa qaathei nyidro, ene la hni ne ipië me metrötr ngöne la aqane imelekeu i nyidro memine la itre trejine trahmanyi me föe e hnine la ekalesia. Hna amamane hnyawa koi ni hnene la lue qatre thupe celë, la enyipiewekëne la troa maca la aqane xome la Tusi Hmitrötr, ngöne la kola thele troa senge la itre jol, maine troa akeukawane pena la hni ne la itre trejin.”
Hna Inine Hnene La Wesi Ula i Akötresie
13. (a) Nemene la ka nyipi ewekë kowe la trejine trahmanyi matre troa ketre atre thupë mamoe ka lolo? (b) Pine nemene matre thaa hnei Iesu kö hna ketre sipu qaja la mekuna i nyidrë?
13 Eje hi laka, Wesi Ula i Akötresie a qatrenge la itre wathebo, me itre trepene meköt, me itre tulu nyine troa xome hnene la ketre atre thupë mamoe matre ‘nyipi meköt, me hnëkëne thatraqane la nöjei huliwa ka loi asëjëihë.’ (2 Timoteo 3:16, 17) Maine hna kapa la itre ini ka tru thei mus hnene la ketre trejine trahmany, ngo tro angeic a ketre qatre thupe ka maca, e eje thei angeic la atrehmekune ne la Tusi Hmitrötr nge angeic mina fe a trongëne hnyawa la atrehmekune cili. Hanawange la tulu i Iesu. Pëkö atre thupë mamoe e celë fen ka ceitu me nyidrë, ka draië catre kö la atrehmekune i nyidrë, nge ka maca la aqane waiewekë, me inamacan ngöne la ua; ngo, thaa hnei nyidrëti kö hna mejiune kowe la sipu inamacane i nyidrë ngöne la nyidrëti a inine la itre mamoe i Iehova. Öni nyidrë: “Tha qa kö thenge la ining, ngo qa thei nyidëti ate upi ni.” Pine nemene matre Iesu a amamane ka hape, qaathene la Tretreto i nyidrë e koho hnengödrai la ini hnei nyidrëti hna hamën? Nyidrëti a qejepengöne ka hape: “Ame la ate qaja qa thei angeice kö, angeic’ a thele la nyine atrunyi angeice kö.”—Ioane 7:16, 18.
14. Kola amamane tune kaa hnene la itretre thupë mamoe laka, thaa angatre kö a ketre sipu atrunyi angatre kö?
14 Thaa ajane kö la itretre thupë mamoe ka nyipici troa ketre sipu atrunyi angatre kö. Angatre a nyitrepene la itre eamo me itre ithuecatre hnei angatre hna hamën, hnene la Wesi Ula i Akötresie, ngo thaa hnene kö la sipu inamacane i angatr. Angatre a trotrohnine laka, ame la hnëqa ne la qatre thup, tre, ene la troa xatuane la itre mamoe troa hetrenyi la “mekuna i Keriso,” ngo thaa ene kö la mekuna ne la itre qatre thup. (1 Korinito 2:14-16) Hanawange la ketre ceitun, kola xatuane hnene la ketre qatre thup, la lue trefën ka qëmeke kowe la itre jol ne la lapa trefën. Angeice a eköthe la eamo i angeic hune la hnei angeic hna melën, ngo thaa qaa pe kuhu hnine la itre trepene meköti ne Tusi Hmitrötr, me jëne la itre hna amekötin hnine la itre itusi hna fejane hnei hlue ka nyipici me ka inamacan. Haawe, nemene la thangane lai? Hnene jë laka hna ajojezine la eamo i angeic hnene la itre kutim ne la nöj, nge kolo hmaca pena ha eamo hmekune la itre ewekë hnei angeic hna melëne hë. Eje hi laka, thaa ka ngazo asë kö la itre kutim, nge maine jë ka melëne hë lai qatre thup la itre ewekë. Ngo, tro kö a sisitria catr la manathith hna kapa hnene la itre mamoe, e hna xatua angatre hnene la qatre thup troa drenge la nine ula i Iesu me itre trenge ithanata i Iehova, hune la troa xötrethenge la itre mekuna i atr maine itre kutime pena (itre qene nöj).—Salamo 12:6; Ite Edomë 3:5, 6.
Ini Hna Hamëne Hnene La “Hlue Ka Nyipici Me Ka Inamacan”
15. Nemene la huliwa hna athipe hnei Iesu kowe la “hlue ka nyipici me ka inamacan,” nge nemene la ka aijijën la hlue cili troa eatrën la hnëqa?
15 Peteru me Ioane me Paulo lo itretre thupë mamoe ka hane sine lo lapa hna qaja hnei Iesu, ene lo “hlue ka nyipici me ka inamacan.” Ame la itre atrene la lapa ne la hlue cili, tre, ene lo itre trejine me Iesu ngöne petre kö lo angatr e celë fen; hna ië angatr hnei uati hmitrötr, nge angatr a troa ce musi me Keriso ekoho hnengödrai. (Hna Amamane 5:9, 10) Ame ngöne la itre ijine la pune celë, kola uti trootro la etrune la itre trejine me Keriso hna iën. Ngo, kolo pala hi a kökötre catre enehila lo huliwa hna upi angatre troa kuca, kösë atraqatre catre kö hune ekö; kola qaja lo maca ka loi ne la Baselaia, laka, troa cainöjën qëmekene troa traqa la pun. Ketre, atraqatre nge lolo catr la huliwa ne la lapa ne la hlue! Pine nemen? Pine laka, hnei angatre hna inine la itre atrene la itre “xaa mamoe” matre troa xatua angatre ngöne la huliwa ne cainöj me ini. (Ioane 10:16; Mataio 24:14; 25:40) Ame enehila, hna kuca la götrane ka tru ne la huliwa hnene lo lai lapa ka nyipici ne la itre xaa mamoe.
16. Kola inine tune kaa hnene la lapa ne la hlue la itre trejin trahmanyi hna acile ngöne la itre hnëqa?
16 Kola hamë ini tune kaa hnene la lapa ne la hlue? Ame ngöne la hneijine Iesu, hna aijijëne la itre ka nyi trenge ewekëne la lapa ne la hlue, troa inine la itretre thup me acili angatre ngöne la itre ekalesia; nge tro pë hë la itretre thupe cili a inine pe la itre mamoe. (1 Korinito 4:17) Ceitune hi lai memine la hneijine së enehila. Kola aijijëne hnene la Lapa Ne Xomi Meköt (ene lo itre qatre thup hna iën ka ala xalaithe hi, ka nyitrenge ewekëne la lapa ne la hlue) troa inine la itre drikona me itre qatre thup me acili angatr ngöne la itre ekalesia ka nyimutre catr e cailo fen, itre thauzane la etrun. Ketre, hna eköthe hnene la Lapa Ne Xomi Meköt la itre ini thatraqane la itre atrene la Komite Ne Filial, me itretre thup ka wange trongëne la itre ekalesia, me itre qatre thup, me itre drikona ngöne la aqane troa thupëne hnyawa la itre mamoe. Hna hamëne la itre xaa hna amekötin jëne la itre tus, me itre hna cinyihane hnine la Ita Ne Thup, (La Tour de Garde) me jëne la itre xaa itus, tune la itus Organisés pour faire la volonté de Jéhovah (Hna hnëkën Troa Kuca La Aja i Akötresie).a
17. (a) Tune kaa la aqane amamane Iesu laka nyidrëti a mejiune kowe la lapa ne la hlue? (b) Tune kaa la aqane amamane hnene la itretre thupë mamoe ngöne la ua laka angatre a mejiune kowe la lapa ne la hlue?
17 Thaa ka tëtë kö la mejiune i Iesu kowe la lapa ne la hlue, matre nyidrëti a acilë angeice jë troa musinëne “la nöjei ewekë i nyidrë”, ene la nöjei ewekë i nyidrë ngöne la ua e celë fen. (Mataio 24:47) Kolo fe a amamane hnene la Itretre thupë mamoe hna acil laka, angatre a mejiune kowe la lapa ne la hlue; celë hi matre angatr a trongëne la itre hna amekötine koi angatr qaathene la Lapa Ne Xomi Meköt. Nyipici laka, maine itretre thupë mamoe a inine la itre xaa trejin, nge angatre a ketre sipu nue la Wesi Ula i Akötresie troa ini angatr, nge maine angatr a trongëne la ini hnei angatr hna kapa qaathene la lapa ne la hlue, angatre hi lai a aciane me akökötrene la tingetinge nyipine la hna axö mamoe. Drei la etrune la ole së koi Iehova pine laka, hnei Nyidrëti hna inine la itre trejine trahmanyi ka hnehengazone me thupëne hnyawa la nöjei atrene la ekalesia, nyudren isa ala caas!
[Ithueamacany]
a Hna fejane hnene la Itretre Anyipici Iehova
Itre Nyine Amekunën?
• Tro la itretre thupë mamoe ka maca ngöne la götrane la ua a inine tune kaa la itre xan?
• Pine nemene matre thaa itretre thupë mamoe kö a qaja la itre sipu mekuna i angatr ngöne la kola hamë ini?
• Tune kaa la aqane amamane hnene la itretre thupë mamoe la mejiune i angatr kowe la lapa ne la hlue, nge pine nemen?