Sabath drai 5 Ogas
Nyima 16 me 21
Ka Tru Koi Iehova La Tro Sa Drengethenge
“Neköng, inamacanepi, mate madinejë la hning.”—ITE EDOMË 27:11.
1. Nemene la ua (mene ne la fen) ka löthe la itre atr ne la hneijine së?
AME enehila, tre, hna haöthe la fene hnengödrai hnene la ajan troa mele caas me thaa idrei. Hnei Paulo aposetolo hna qaja la kepin, hnine la tusi angeic kowe la itre Keresiano ne Efeso, ka hape: “Lo hnei nyipunie hna trongën’ekö, a xöte thenge la thina e celë fene thenge la tane ate musinën’ e caha nyipin, ene la ua ate huliwa hnine la ite ka tha idei.” (Efeso 2:1, 2) Ejehi laka, hnei Satana lo Diabolo, “tane ate musinën’e caha nyipin,” hna amenune la fene hnengödrai asë hnene la ua ne ej (mene ne ej), atre huliwa hnine la itre ka thaa idrei. Hnei angeic hna kuca tune lai ekö ngöne lo hneijine Iesu, nge kolo jë petre hi ka hape kökötre catre jë la aqane iajojezi angeic ngöne lo kola ukapiëne triji angeic qaa koho hnengödrai, hmekune lo ijine Isi Ka Tru Hnapan.—Hna Amamane 12:9.
2, 3. Nemene la itre kepine ka upi së troa drengethenge Iehova?
2 Ngo, hnene laka itre Keresiano së, atre hi së laka meköti la tro sa atrunyi Nyidrë hnene la hni së ka idrengethenge, pine laka, Nyidrëti hi la Atre Xupi së, me Atre Thupëne la mele së, me Joxu Ka Pucatin’Asë me ka ihnim, nge Atre Amele së. (Salamo 148:5, 6; Ite Huliwa 4:24; Kolose 1:13; Hna Amamane 4:11) Ame ngöne lo hneijine i Mose, atre hi angetre Isaraela, laka, Iehova la Atre Hamë Mel me Atre Amele angatr. Celë hi matre, öni Mose lo koi angatr ka hape: “Wange kö nyipunie, troa kuca thenge la hnei Iehova Akötesi nyipunie hna ahnithe koi nyipunie.” (Deuteronomi 5:32) Nyipici, Iehova la nyine tro angatr a drengethenge. Ngazo pe, saqe hmaca hi angatre thaa idrei kowe la Akötresi angatr.
3 Pine nemene matre nyipi ewekë tro sa drengethenge la Atre Xupe la hnengödrai memine la fene hnengödrai asë? Hnei Akötresieti hna qaja koi Saulo jëne Samuela ketre perofeta i Nyidrë, ka hape: “Sisitia la denge hune la huj.” (1 Samuela 15:22, 23) Nemene la kepine lai?
Hna Tune Kaa Matre Ame La Drengethenge, Ke, “Ka Sisitia Kö Hune La Huj”
4. Nemene la aliene la kola hape ijiji së hi troa hamëne la ketre ewekë koi Iehova?
4 Pine laka Nyidrëti hi la Atre Xupi së, haawe, Iehova la atrekë ewekëne la itre mo hne së hna hetrenyi ngöne la mele së. Qa ngöne lai, hetrenyi jë pe kö la ketre ewekë ka ijije tro sa hamëne koi Nyidrë? Eje hi, Ijije tro sa hamëne koi Nyidrë la ketre ewekë ka tru alameken catr. Nemene ewekë? Atreine hi tro sa trongëne la eamo celë, hna hape: “Neköng, inamacanepi, mate madinejë la hning; mate hete nyine sa koi angeic’ate qaja angazo ni.” (Ite Edomë 27:11) Ijiji së troa amamane laka easa drengethenge Akötresie. Ngacama isapengöne kö la itre ewekë ka traqa koi së memine la itre aqane mele së, ngo jëne la aqane drengethenge së, ijije hi tro së isa ala caas a sa la trenga thoi hna sile koi së hnei Satana lo Diabolo, laka, thaa tro kö a lapa nyipici la itre atr koi Akötresie e traqa pi koi angeice la itre itupath. Hane hi lai ketre madrine ka tru!
5. Tune kaa la aqane akötrëne la Atre Ixup hnene la thaa idrei ne la itre atr? Xome jë la ketre ceitun.
5 Ka tru koi Akötresieti la itre mekune hne së hna axeciën. Maine tro sa thaa idrei, troa hetre thangane lai koi Nyidrë. Nemene la thangane lai? Kola akötre la hni Nyidrë e troa goeëne la ketre atr e trongëne la gojenyi ka ngazo. (Salamo 78:40, 41) Pane mekune ju së la ketre atr ka wezipo, ka meci ne suka (lo hna hape diabet); thaa trongëne kö angeic la itre hna amekötine hnei droketre matre troa lolo la mele i angeic, ngo angeice a xeni menu. Tune kaa la mekune i droketre ngöne la nyidrëti a öhne lai? Loi e troa xecie hnyawa koi së laka ame la kola thaa idrei hnene la itre atr, ke, kolo lai a akötrë Iehova, pine laka, atre hi Nyidrëti la itre thangane ka troa traqa qa ngöne la hna wange sixane la itre wathebo i Nyidrë ka nyipi ewekë kowe la mel.
6. Nemene la ka troa xatua së troa drengethenge Akötresie?
6 Nemene la ka troa xatua së isa ala caas troa drengethenge? Tui Solomona Joxu, loi e tro së isa ala caas a sipo Akötresie matre tro sa hetrenyi la “hni ka inamacan (me drengethenge).” Hnei Solomona hna sipo Akötresie troa hetrenyi la hni ka inamacan, matre atreine angeic troa “wangate hmekune la loi me ngazo” göne la troa amekötine la itre trejine me angeic e Isaraela. (1 Ite Joxu 3:9) Maine easa ajane troa wangatre hmekune la loi me ngazo hnine la fen hna haöthe hnene la hni ka thaa idrei, haawe, nyipi ewekë tro sa hetrenyi la “hni ka inamacan (me drengethenge).” Hnei Akötresieti hna hamë së la Wesi Ula i Nyidrë, memine la itre itus ka xatua së troa trotrohnin la Tusi Hmitrötr, me itre icasikeu i Keresiano, nge hna acile mina fe la itre qatre thup hnine la itre ekalesia matre troa xatua së troa atreine eëne la “hni ka inamacane (me drengethenge).” Hapeu, hne së kö hna huliwane hnyawane la itre hna hnëkëne thatraqa së ngöne la ihnim?
7. Pine nemene matre Iehova a amamane la esisitriane la drengethenge hune la itre huuj?
7 Hnei Iehova ekö hna amamane kowe la nöje i Nyidrë, laka, ka nyipi ewekë catre kö la troa drengethenge hune la troa hujëne la itre öni. (Ite Edomë 21:3, 27; Hosea 6:6; Mataio 12:7) Pine laka Iehova lo ka amekötine kowe la itre atre i Nyidrë troa kuca la itre huuj, hnauëne la Nyidrëti a qaja ka hape nyipi ewekë kö la troa drengethenge hune la troa huuj? Eje hi laka, ame la atr ka huujëne la ketre öni, tre, loi e tro angeic a mekune hnyawa la itre aliene hni angeic. Hapeu, angeice kö a kuca lai nyine troa amadri Akötresie? Maine pena angeice hi lai a trongëne lo hna lapaa majemine kuca? Maine kola ajane hnene la ketre hlue troa amadrinë Akötresie, loi e tro angeic a thele troa drengethenge la nöjei hna amekötine hnei Akötresie. Ame la ka tru koi Iehova, tre, thaa ene kö la troa huujëne koi Nyidrë la itre öni, ngo loi pe tro sa drengethenge, ke, celë hi ewekë lai ka sisitria catr nge ka ijije koi së troa hamë Nyidrë.
Ketre Tulu Nyine Hmekë Së
8. Pine nemene matre nuetriji Saulo joxu pi hnei Akötresie?
8 Tusi Hmitrötr a qaja ka hape hnei Saulo Joxu hna amamane la enyipiewekëne la troa drengethenge. Hnei Saulo hna nyiqaane nyi joxu tune la ketre musi ka ipië me ka qahmihmi, ‘hnei angeic hna aconyi angeic kö.’ Ngo, hnene pë hë la aqane mekune ka pi mama me ka thoi qa kuhu hni angeic hna nyiqaane musinëne la itre hnei angeic hna axeciën. (1 Samuela 10:21, 22; 15:17) Ame ngöne la ketre ijin, hnei Saulo hna cile troa isi me angetre Filisiti. Hnei Samuela hna hape kowe la joxu troa pane treqene la tro nyidrëti a hamëne la huuj koi Iehova, nge thupene lai, tro pë hë nyidrëti a qaja koi Saulo la itre hna amekötine. Ngo, hnene laka paatre pala kö Samuela, ene pe kolo ha nyiqaane troa isa tro hnene la itre atr. Ame la kola öhne lai hnei Saulo, ene pe angeic a “hujëne [ju] la huje ne deuth.” Ngo thaa madrine kö Iehova la huliwa i angeic. Ame pë hë la kola traqa hnei Samuela, hnei Saulo hna thele kepine la thaa idrei i angeic, me qaja ka hape, hnene la hna traqa hmiitr hnei Samuela, matre thatreine hë angeice ‘acatei hni’, ene pe angeic a hujëne jë la huuje ne dreuth matre troa ‘amenyikene la xajawa i Iehova’. Ame koi Saulo Joxu, sisitria catre kö la troa huujëne la huuj hune la troa drengthenge la hna amekötine koi angeic ene la troa treqene la tro Samuela a huujëne la huuj ne deuth. Öni Samuela jë hi koi angeic, ka hape: “Hmo hë nyipë; tha hnei nyipëti hna trongëne la wathebo i Iehova Akötesi nyipë, lo hnei nyidëti hna ahnithe koi nyipë.” Pine la hna thaa drengethenge Iehova hnei Saulo, haawe, luuzi hë la hna nyi joxu i angeic.—1 Samuela 10:8; 13:5-13.
9. Tune kaa la aqane amamane i Saulo la thaa idrei i angeice koi Akötresie?
9 Hapeu, hnei Saulo kö hna xomi ini qa ngöne la ewekë ka traqa koi angeic? Ohea! Thupene jë hi lai, hnei Iehova hna upi Saulo troa apaatrene la nöje Amaleka; kolo nöje ekö lai ka lepe menu Isaraela. Hna upi Saulo troa humuthe asë, uti fe la nöjei öni ka mem. Hnei angeic hna drengethenge ngöne laka hnei angeic hna “lepi angete Amaleka qan’e Havila uti hë e Sura.” Ame la Samuela a traqa koi angeic, kola elitrauje la madrinene la joxu, pine laka, hnei angeic hna hun; öni angeice jë hi koi Samuela ka hape: “Loi e manathithinyi nyipëti hnei Iehova; ase hë ni kuca la wesi ula i Iehova.” Ngo triane kö hnei Saulo memine la itre atre i angeic lo itre hna amekötine hnei Iehova; thaa hnei angatre ju kö hna hane humuthi Agaga joxu memine “la ite ka loi ne la ite mamoe me boloke me ka pipixenyë, me . . . nekö i mamoe, me . . . ite ka loi asë.” Hnei Saulo hna nyi kepine la thaa idrei i angeic, me hape: “Hnei nöjei ate hna hnime la ite ka loi ne la ite mamoe me boloke nyine huje koi Iehova Akötesi nyipë.”—1 Samuela 15:1-15.
10. Nemene la ini hnei Saulo hna thatreine troa xom?
10 Hanawang la hna qaja hnei Samuela koi Saulo, ka hape: “Hape u, hanyi Iehova la ite huje ne deuth me ite huje tune la troa denge la wesi ula i Iehova? Hana wang, sisitia la denge hune la huj; nge sisitia la xöte thenge hune la pipixenyë ne la ite mamoe trahmany.” (1 Samuela 15:22) Pine laka ase hë Iehova mekune ka hape troa humuthe la itre öni, haawe, thaa ijije kö troa huujëne itre ej koi Nyidrë.
Loi e Tro sa Idrei Ngöne La Nöjei Ewekë Asë
11, 12. (a) Tune kaa la aqane goeëne Iehova la trenge catr hne së hna kuca matre troa atrunyi Nyidrë me amadrinë Nyidrë? (b) Tune kaa la aqane tro la ketre trejine trahmanyi a amenu angeic kö me mekune laka ijiji angeice hi troa kuca la aja i Iehova nge ame ngöne ketre götran, tre, kola thaa idrei?
11 Drei la madrine i Iehova troa goeëne la itre hlue i Nyidrë ka meköt e cile hut ngacama hetre itupath, me cainöjëne la maca ka loi ngacama thaa semesine angatre kö hnene la itre atr, me sine pala hi la itre icasikeu ngacama catrehnine la itre itupathi ngöne la hna huliwa i maseta! Nyidrëti a madrine la aqane drengethenge së ngöne la itre götrane ka nyipi ewekë catr ne la mele së ngöne la götrane la ua! Ame la itre trenge catr hne së hna kuca troa atrunyi Iehova, tre, ka sisitria koi Nyidrë e hne së hna nyitrepene itre ej hnene la ihnimi së koi Nyidrë. Maine jë thaa mama kö kowe la itre atr ka easenyi së la aqane catre huliwa së, ngo ame Akötresieti, ke, Nyidrëti a atrehmekune la hne së hna hamëne koi Nyidrë cememine la hni ka pexej, nge thaa tro kö Nyidrëti a thëthëhmine lai.—Mataio 6:4.
12 Ngo, eje hi lai laka, maine easa ajane troa amadrinë Akötresieti hnyawa, tre, loi e tro sa drengethenge ngöne la nöjei götranene la mele së. Thaa tro pi kö sa amenu së kö me mekune laka ijiji hi tro sa nango ananyine la itre hna amekötine hnei Akötresie, ke easa atrunyi Nyidrë ngöne la itre xaa götran ne la mele së. Thaa ka loi kö troa mekune ka hape, pine laka easa kuca pala hi la itre xaa huliwa ne la hmi së, tre, ijije hi tro sa thiina ka ngazo me kuci huliwa ka sis.—Galatia 6:7, 8.
13. Troa tupathe tune kaa la aqane drengethenge Iehova hne së, ngöne la easë ngöne isa hnalapa së?
13 Celë hi matre, ijiji së troa isa hnying ka hape: ‘Hapeu, hane kö ni drengethenge Iehova ngöne la nöjei hnenge hna kuca o drai, a ngöne fe lo itre götran ne la meleng ka singhödr?’ Öni Iesu ka hape: “Ame la ate nyipici kowe la ewekë ka co cat, ate nyipici fe kowe la ewekë ka tru ; nge angeice la ka tha meköti kö kowe la ewekë ka co cat, kete tha meköti kö kowe la ewekë ka tru.” (Luka 16:10) Hapeu, hne së kö hna hane ‘thiina ka meköti’ fe ngöne la easë e ‘hnine la uma së,’ nge thaa öhnyi së kö hnene la itre xan? (Salamo 101:2) Nyipici laka, ame mina fe la easë e hnine la hnalapa së, kolo fe a hane tupathe la aqane thiina ka nyipici së. Ngöne la itre nöj ka nyimutre, ordinatör la ketre aliene la hnalapa; thaa jole hmaca kö e troa pi goeën la itre iatr ne kuci huliwa ka sis. Ame petre kö lo itre macatre ka ase hë, tre, e kola pi wai film me iatr ka ngazo, tre, troa tro kowe la hna sinema maine hna salemë itusi pena. Hapeu, tro kö sa nyipine la itre trenge ewekë i Iesu ka hape: “Ame la ate goeëne hutine la fö’i ket’ate me meciu nyido, ase hë angeice kuci ngazo me nyido e kuhu hni”? Tro kö sa thele troa acaa goeëne ju hi la itre iatr ka ngazo me ka sis? (Mataio 5:28; Job 31:1, 9, 10; Salamo 119:37; Ite Edomë 6:24, 25; Efeso 5:3-5) Hapeu mina fe göne la itre film ne televizio hna kuca matre troa amamane la itre aqane isi? Hane kö së xötrethenge la aqane wai ewekë ne la Akötresi së, lo atre ‘sixele la ate pi iangazo’? (Salamo 11:5) Nge tune kaa fe la iji menu la kahaitr ngöne la isa hnalapa së? Hnëjin, öni Tusi Hmitrötr la itre ka iji gorok, ngo kolo pe a eamone la itre Keresiano matre thaa tro kö angatr a majemine “iji waina atruny.”—Tito 2:3; Luke 21:34, 35; 1 Timoteo 3:3.
14. Nemene la itre aqane tro sa amamane la drengethenge së koi Akötresie ngöne la troa nyinyape thele mani?
14 Ame la ketre ewekë nyine tro sa hmekën, tre, ene la pengöne göi mani. Hanawang la ketre ceitun, tro kö sa nyinyape thele mani uti hë la kola uku së troa ena la itre wathebo? Hna tupathi së kö matre traqa pi la mekune troa ena la hna amekötine göi aqane troa kuiëne la hotr? Maine pena ke ajane kö së troa trongëne la hna amekötine celë, ene la troa “hamëne kowe la nöjei ate asë la nöjei ewekë i angat; nyixenine kowe la hna nyixenine”?—Roma 13:7.
Drengethenge, Thangane La Ihnim
15. Pine nemen matre easa drengethenge la itre wathebo i Iehova?
15 Kola amanathithi së pine laka easë a drengethenge la itre hna amekötine hnei Akötresie. Hanawang la ketre ceitun, maine tro sa triji sixa, me hnöthe troa kuca la itre thiina ka sis, me metrötrëne la ehmitrötrene la madra, haawe, tro hë së a neëne la itre xaa mec. Ketre, Maine tro sa trongëne hnyawa la nyipici ngöne la itre xaa götranene la mele së, haawe, tro hë së a atreine eköthe hnyawa la mele së göi mani, me ngöne la aqane imelekeu së memine la itre xan, maine pena e hnine la fami së. (Isaia 48:17) Eje hi laka ame la itre thangane cili ka loi, tre, kola aijijë së troa atrehmekune hnyawa laka ame lai itre manathith hne së hna kapa, tre, itre eje hi lai a amamane la eloine la itre wathebo i Akötresie. Ngo, ame la sipu kepine la easë a drengethenge Iehova, tre, hnene laka easa hnimi Nyidrë. Thaa easë kö a nyihlue i Akötresie göi troa aejëne la itre sipu aja së. (Iobu 1:9-11; 2:4, 5) Hnei Akötresieti hna nue matre tro sa isa iëne la hne së hna troa drengethenge. Maine easa iëne troa drengethenge Nyidrë, tre, hnene hi laka easa ajane troa amadrinë Nyidrë, nge easa thele troa thiina ka meköt.—Roma 6:16, 17; 1 Ioane 5:3.
16, 17. (a) Hnei Iesu hna amamane tune kaa la aqane drengethenge Akötresieti hnei nyidrë cememine la hni ka pexej? (b) Tune kaa la aqane tro së xötrethenge la tulu i Iesu?
16 Hnei Iesu hna hamëne la ketre tulu ka pexej, ene la tro la ihnimi a upi nyidrë troa drengethenge Iehova. (Ioane 8:28, 29) Ngöne lo nyidrëti e celë fen, hnei Iesu hna “inine troa idei hnene la nöjei ewekë hnei nyidëti hna xomi hnin.” (Heberu 5:8, 9) Tune kaa? Hnei Iesu “hna aipië nyidëti kö, me denge thenge uti hë la mec, ene la meci ne satauro.” (Filipi 2:7, 8) Ngacama ka drengethenge nyidrëti ekö ekoho hnengödrai, ngo hna pane tupathe la aqane drengethenge i nyidrë, lo nyidrëti a mele e celë fen. Loi pe, troa xecie hnyawa koi së laka, eje thei Iesu lo Atre Huuj la itre thiina ka lolo, matre thaa jole kö koi nyidrë troa xatuane la itre trejine me nyidrë hna iën memine pë hë lo itre xaa atr ka lapaun.—Heberu 4:15; 1 Ioane 2:1, 2.
17 Tune kaa fe së? Ijiji së hi troa xötrethenge la tulu i Iesu, hnene la hna amë panëne la drengethenge matre troa kuca la aja i Akötresie. (1 Peteru 2:21) Ame la kola upi së hnene la ihnimi Akötresie troa kuca la hnei Nyidrëti hna amekötine koi së, ngacama kolo ju hë a uku së troa ena la wathebo maine kola tupathi së pena troa thaa idrei, ngo ame pe, tre, troa hetrenyi pala hi the së la madrin. (Roma 7:18-20) Kolo mina fe lai a hape tro sa drengethenge cememine la hni ka menyik la itre ka elemekene la hmi ka nyipici, ngacama itre atr ka ngazo angatr. (Heberu 13:17) Sisitria catr koi Iehova la aqane drengethenge së la itre wathebo i Nyidrë, ngöne lo easë caas ngöne la itre hnalapa së.
18, 19. Nemene la thangane e tro sa drengethenge Akötresie?
18 Ame enehila, tre, ame la easa xomihnine ahoeane la itre icilekeu göi troa nyipici pala hi koi Akötresie, tre, ketre aqane tro hi së lai a drengethenge Iehova. (Ite Huliwa 5:29) Ketre, tro la aqane drengethenge së la itre hnei Iehova hna amekötine göi troa cainöj me inine la itre atr, a upi së troa xomihni ahoeany uti hë la pune la fene hnengödrai celë. (Mataio 24:13, 14; 28:19, 20) Nyipi ewekë fe la xomihniahoeany matre tro pala hi së a catre ce icasikeu memine la itre trejine me easë, ngacama troa catrehnine pala hi la itre iajojezine la fen ngöne la mele së. Atre hnyawa hi la Akötresi së, Atre ihnim, la etrune la trengecatre hne së hna kuca matre troa drengethenge Nyidrë ngöne la itre götrane cili. Ngo maine easa ajane troa drengethenge Akötresieti hnyawa, tre, loi e tro sa isi memine la itre aja së ka ngazo me kötrene la itre ewekë ka ngazo, me thele troa hnime me ajane la ewekë ka loi.—Roma 12:9.
19 Ame ngöne la easa atrunyi Iehova cememine la ihnim me hnene la hni së ka pexej, haawe, “[ame koi së] Nyidëti la ate nyi june koi angete thele catë nyidë.” (Heberu 11:6) Nyipi ewekë nge ka lolo la troa catre hujëne la itre ewekë së, ngo ame la ka troa amadrinë Iehova hnyawa, tre, ene laka easa drengethenge Nyidrë hnene laka atraqatre la ihnimi së koi Nyidrë.—Ite Edomë 3:1, 2
Tro Nyipunie A Sa Tune Kaa?
• Pine nemene matre ijiji së hi troa qaja ka hape hetre ewekë hne së hna troa hamëne koi Iehova?
• Nemene la itre ngazo hna kuca hnei Saulo?
• Tro nyipunieti a amamane tune kaa ka hape ame la ka sisitria catr, tre, ene la troa drengethenge hune la troa kuca la itre huj?
• Nemene la ka upi nyipunieti troa drengethenge Iehova?