Xatuane Jë La Itre Xan Troa “Drenge Thenge Qa Kuhu Hni”
1. Nemene la hna thele thene la itre hlue i Nyidrë?
1 Nyipi ewekë la idrengethenge ngöne la easë a hmi koi Iehova hnyawa. (Deu. 12:28; 1 Pet. 1:14-16) Easenyi hë matre lepe apaatrene jë hnei Akötresie la “angete tha ‘te Akötesie, me koi angete tha denge thenge la maca ka loi.” (2 Thes. 1:8) Tro sa xatuane tune kaa la itre xan troa “denge thenge qa kuhu hni?”—Rom. 6:17.
2. Pine nemen matre nyipi ewekë troa xatuane la itre xan troa acatren la lapaun?
2 Troa Ixatua Troa Eköthe La Lapaun Me Ihnim: Ame hnine la Tusi Hmitrötr, ka ce tro pala hi la drengethenge memine la lapaun. Hnei Paulo aposetolo hna qaja la “musi Akötesie ka epine palua, mate denge thenge la lapaun.” (Rom. 16:26) Kola hamën ngöne Heberu mekene 11 la tulu ne la itre atr ka lapaun, nyimutre la itre ka ujë thenge la aja i Iehova. (Heb. 11:7, 8, 17) Ame ngöne la ketre götran, tre, ka ce tro pena ha la thaa idrengethenge memine la pë lapaun. (Ioane 3:36; Heb. 3:18, 19) Nyipi ewekë tro sa atreine xome la Wesi Ula i Akötresie, matre xatuan la itre xan troa eköth la lapaun ka acian la idrengethenge.—2 Tim. 2:15; Iako. 2:14, 17.
3. (a) Ka ce engene tune kaa la drengethenge memine la ihnim? (b) Tro sa xatuane tune kaa la itre hnainin troa akökötrene la ihnimi angatr koi Iehova?
3 Ka ce engene fe la drengethenge me ihnimi koi Akötresie. (Deu. 5:10; 11:1, 22; 30:16) Kola hape ngöne 1 Ioane 5:3: “Dei lola aja koi Akötesie, laka eësha denge thenge la ite wathebo i nyidë; nge tha hace kö la ite wathebo i nyidë.” Tro sa xatuane tune kaa la itre hnainin troa akökötrene la ihnimi angatr koi Iehova? Thele jë ngöne la itre ijine etid, troa aciane la ole i angeic kowe la itre thiina i Iehova. Sipu amamane jë la hni ne ole së koi Akötresie. Xatuane jë la hnainin troa waipengöne la aqane imelekeu i angeic me Iehova. Ka sisitria catr la ihnimi koi Iehova, ke, ej a troa upe la itre xan, me easë fe, troa drengethenge Nyidrë qa kuhu hni.—Mat. 22:37.
4. (a) Pine nemen matre ka nyipi ewekë catr la tulu së? (b) Troa tune kaa matre troa akökötren la “hni ka inamacan”?
4 Jëne La Tulu Së: Tulu së la ka troa xatuane hnyawa fe la itre xan troa drengethenge la maca ka loi. Ngo loi e tro pala hi sa catre troa eköthe la “hni ka inamacan.” (1 ite jo. 3:9; Ite edomë 4:23) Kola hapeue lai? Maine tro sa inine pala hi la Tusi Hmitrötr me sine la itre icasikeu, tro ha ithuecatren la itre hni së. (Sal. 1:1, 2; Heb. 10:24, 25) Thele jë troa ce memine la itre atr hna icasinekeune hnine la nyipi hmi. (Ite edomë 13:20) Loi e troa catre ce cainöje fe, cememine la ajane troa xatuane la itre atr ngöne la nöje së. Sipone jë la ixatua i Iehova troa eatrongë së ngöne la aja së troa akökötren la hni ka lolo. (Sal. 86:11) Trije pi la itre ewekë ka adrone la itre hni së, tune la itre nyine madrin ka acian la pi isi maine kuci ngazo. Catre pi pe së troa xome la itre ewekë ka aiasenyi së catr me Akötresie, nge ka acatrene la aqane imelekeu së me Nyidrë.—Iako. 4:7, 8.
5. Troa amanathithine tune kaa la itre atr ka drengethenge?
5 Hnei Iehova hna ahnithe kowe la nöje i Nyidrëti ekö ka hape, maine tro angatr a drenge la nine ula i Nyidrë, tro ha amanathithi angatr. (Deu. 28:1, 2) Tune fe enehila, Iehova a amanathithine hnyawa la “angete denge thenge nyidë.” (Ite hu. 5:32 ) Haawe, jëne la ini së me tulu së, epi tro sa xatuane la itre xan troa hane drengethenge qa kuhu itre hni angatr.