Sabath drai 6 Eiperem
Nyima 4 me 18
Iesu Keriso La Mesinare Ka Sisitria
“Qange thei nyidë; nge hnei nyidëti hna upi ni.”—IOANE 7:29.
1, 2. Nemene la aliene la hnaewekë hna hape, mesinare, nge drei la ka ijije troa xome la ëje hna hape, Mesinare ka tru?
Nemene la mekune ka eje the së ngöne la easa drenge la hnaewekë hna hape, “mesinare”? Itre xan a mekune la itre mesinare ne la itre hmi ka thoi, laka ala nyimu la itre ka sine la politik, me thele mani ngöne la itre nöje hna upi angatre kow’. Ngo, ame koi epun, Itretre Anyipicine i Iehova, tre, epuni a mekune la itre mesinare hna upe hnene la Lapa Ne Xomi Meköt, matre tro angatr a cainöjëne la maca ka loi ngöne la itre nöje ka nyimutre e cailo fen. (Mat. 24:14) Ame la itre mesinare cili, tre, angatr a nue apexejene la traeme i angatr, me trengecatre i angatr matre troa kuca la ketre huliwa ka sisitria, ene la troa xatuane la itre atr troa easenyi koi Iehova Akötresie, me hane imelekeu hnyawa me Nyidrë.—Iako. 4:8.
2 Thaa hna hane fe kö mama la hnaewekë hna hape “mesinare” maine “itre mesinare” ngöne la Tusi Hmitrötr qene faras hna hape, Traduction du Monde Nouveau. Ngo ame pe, ame ngöne la Tusi Hmitrötr cili, tre, hna ami mekune hnene la itre ka cinyihane ej, ka hape, ame la hnaewekë qene heleni hna hape, “itretre tro fë la evangelia”, tre, ijije fe troa ujëne ka hape, “itre mesinare”. Iehova la Atr ka tru ka tro fë la evangelia, ngo thaa ijije kö troa qaja göi Nyidrë ka hape, mesinare ka tru, pine laka pëkö atre upi Nyidrë. Ngo ame la Iesu a qaja la Tretretro i nyidrë, tre, öni Iesu ka hape: “Qange thei nyidë; nge hnei nyidëti hna upi ni.” (Ioane 7:29) Kola mama hnyawa e celë la etrune la ihnimi Iehova kowe la itre atr, ngöne laka, hnei Nyidrëti hna upe la nekö i Nyidrëti ka caas kowe la fen. (Ioane 3:16) Celë hi matre ijije troa qaja göi Iesu ka hape, Mesinare ka sisitria, pine laka ame la ketre kepine matre kola upi nyidrëti a tro celë fen, tre, matre tro Nyidrëti a “anyipicine la nyipici”. (Ioane 18:37) Hnei Iesu hna catre cainöjëne la maca ne la Baselaia, nge ijiji së pala hi troa xomi ini qa ngöne la aqane huliwa i nyidrëti ekö. Hanawange la ketre ceitun, ame ngöne la huliwa ne cainöj, tre, ijije tro sa xötrethenge la tulu i nyidrë ngöne la aqane troa inine la itre atr, itre mesinare ju hë së maine thaa mesinare pena.
3. Nemene la itre hnying hne së hna troa ce wang?
3 Ngöne laka hnei Iesu hna hane cainöjëne fe la Baselaia, kola amejëne ngöne la itre mekune së la itre hnyinge celë hna hape: Nemene la itre jol hnei Iesu hna qëmeke kow e celë fen? Pine nemene matre hetre thangane pi hë la hnei nyidrëti hna hamë ini? Nge nemene la ka xatua Iesu matre troa hetre thangane ka loi la huliwa ne cainöje i nyidrë?
Loi e Troa Hetre Hni Ne Aja Matre Cainöje Ngöne la Itre Götrane Hna Thatre kö
4-6. Nemene la itre ewekë ka isapengöne hnyawa koi Iesu, ngöne la kola upi nyidrëti a tro celë fen?
4 Hnene la itre mesinare ne la hneijine së, me itre xaa keresiano ju kö ka tro kowe la itre götrane gaa aja ka cainöj, hna thele troa majemi kowe la itre aqane mele ka isapengöne kö memine la mel ka eje ngöne la itre sipu nöje i angatr. Ngo, hane kö së pane mekune la eisapengöne ne la aqane mele i Iesu e celë fen me e koho hnengödrai. Nyidrëti ekö a mele memine la Keme i nyidrë, nyipine la itre angela ka nyi hlue i Iehova cememine la hni ka wië. (Iobu 1:6; 2:1) Drei la eisapengöne lai memine la troa ce mel e nyipine la itre atr ka ngazo ngöne la fene celë ka iahmo! (Mareko 7:19-23) Hnei Iesu mina fe hna xomi akötrëne la itre iwesitrë ne la itretre drei nyidrë, ene lo angetre ce tro hnyawa me nyidrë. (Luka 20:46; 22:24) Ngo eje hi lai laka, hnei nyidrëti pala hi hna ujë hnyawa kowe la itre ewekë hnei nyidrëti hna cile kow e celë fen.
5 Thaa hnei Iesu kö hna atre xanëne la ketre qene hlapa; ngo hnei nyidrëti pe hna nyiqaane inine ej ngöne lo medrenge petre kö nyidrë, nyipici, nyidrëti lo atre musinëne la itre angela e koho hnengödrai! Hnei Iesu e celë fene hna huliwane la caa “hna ewekë ite ate”. Ketre ka isapengöne hnyawa memine la ‘ite hna ewekë ite angela’. (1 Kor. 13:1) Ngo ame göne la troa ewekë cememine la hni ka menyik, tre, pëkö atre tui Iesu.—Luka 4:22.
6 Drei mina fe la itre xaa ewekë ka ketre pengöne kö kowe la Hupuna i Akötresie ngöne la nyidrëti a traqa e celë fen. Ngacama thaa hna hnaho Iesu kö ce memine la ngazo ka xulu qaathei Adamu, hna hnaho nyidrëti fe ceitune me atr, tune la itre ka troa “tejine me nyidë”, ene lo itretre drei nyidrë hna iën. (E jë la Heberu 2:17, 18.) Ame ngöne la jidri tixenuë i nyidrëti e celë fen, thaa hnei Iesu kö hna sipone kowe la Tretretro i Nyidrë troa hamëne “la nöjei angela hune la ka luako la o legeona”. Ngo pane mekune ju pe së laka hnei nyidrëti hna hane musinëne la itre angela, ngöne la kola hë nyidrëti ka hape, Mikaela Tixe i Itre Angela! (Mat. 26:53; Iuda 9) Nyipici laka, hnei Iesu mina fe hna kuca la itre iamamanyikeu; ngo, xalaithe hi la itre hnei nyidrëti hna kuca e celë fen, hune e koho hnengödrai.
7. Tune kaa la aqane ujë i Iesu, ngöne la kola qeje pengöne menune hnei angetre Iudra la aliene la wathebo?
7 Qëmekene tro nyidrëti a traqa e celë fen, ngöne la kola ati ëje i nyidrëti ka hape “Logo”, maine jë Iesu hi lo Qene qaja i Akötresie ka eatrongëne la itre nekö i Isaraela ngöne la hnapapa. (Ioane 1:1; Eso. 23:20-23) Ngo eje hi laka, hnei angatre hna “kapa la wathebo hna ahnithe hnene la ite angela, ngo tha hna trongëne pe.” (Ite Huliwa 7:53; Heb. 2:2, 3) Ketre, thaa wanga atrehmekune kö hnene la itre hene ne hmi ne lo hneijine i Iesu la sipu aliene la wathebo. Hanawange la ketre ceitun, ene lo wathebo göi drai sabath. (E jë la Mareko 3:4-6.) Hnene la angetre cinyihane me angetre faresaio “hna [nue pë hë] la ite ewekë ka hace ne la wathebo, ene la meköt, me ihnim, me lapaun.” (Mat. 23:23) Loi pe, thaa hnei Iesu kö hna hmaca troa qaja la nyipici.
8. Pine nemene matre ijiji Iesu troa xatua së?
8 Hetrenyi hnyawa Iesu la hni ka ajan. Hnime catre Iesu la itre atr, nge eje e kuhu hni nyidrë la ajan troa xatua angatr. Thaa hane fe kö paatre thei nyidrëti la aja troa cainöj. Nge pine laka, hnei nyidrëti hna mele nyipici koi Iehova e celë fen, ene pe “hna celohmë nyidë nyine ine la mele ka tha ase palua kö koi angat’ asëjëihë angete dei nyidë.” Qa ngöne lai, “ijijë hë nyidëti troa xatua angate hna tupath, ke hnei nyidëti hna xome la aköte ngöne la itupath.”—Heb. 2:18; 5:8, 9.
Hna Inine Hnyawa Matre Ijij Troa Hamë Ini
9, 10. Nemene pengöne ini la hnei Iesu hna kapa qëmekene troa upi nyidrëti e celë fen?
9 Ame ngöne lo hneijine së, qëmekene troa upe la itre mesinare, hnene la Lapa ne Xomi Meköti hna pane ini angatr. Hapeu, hna hane kö ini Iesu? Nyipici. Ngo qëmekene troa sië nyidrë matre troa Mesia, tre, thaa hnei nyidrëti fe hna hane sin la uma ne ini itretre Iudra, ketre thaa ase pena kö ini nyidrëti hnene la itre hene ne hmi ka hlemu e celë fen. (Ioane 7:15; wange ju fe la Ite Huliwa 22:3.) Ngo, hna tune kaa kö matre maca jë Iesu ngöne la aqane hamë ini nyidrë?
10 Ngacama, hna ini Iesu hnene la keme me thine i nyidrë, ene Iosefa me Maria, ngo ame la ini thatraqane la cainöj, tre, qaathene la Atre Ini Ka Tru. Öni Iesu e qejepengöne lai ka hape: “Ka tha ewekë xane kö ni; Tetetroti pe ate upi ni, hnei nyidëti hna nunuë nie la wathebo, ene la qânge troa qaja me ewekë.” (Ioane 12:49) Easa trotrohnine e celë, laka hnene la Hupuna hna kapa la itre hna amekötine göne la aqane troa hamë ini. Eje hi laka, qëmekene tro nyidrëti a uti qa hnengödrai, nyimutre la itre ijine drenge Iesu la ini qa thei Keme i nyidrë. Nemene jë lai ini ka sisitria hnei nyidrëti hna kapa?
11. Nemene la ini hnei Iesu hna xome qa ngöne la hnei nyidrë hna goeën la aqane ujë ne la Tretrero i nyidrë kowe la itre atr?
11 Ka lolo catr la aqane imelekeu ne la Hupuna memine la Tretretro i nyidrë, a qaane hë ekö lo kola xupi nyidrë. Ame ngöne lo ijine thaa traqa petre kö nyidrëti e celë fen, hnei Iesu hna atrehmekune la aqane ujë i Iehova Akötresie kowe la itre atr, ngöne la hna goeëne la itre hnei Nyidrëti hna kuca koi angatr. Ngöne laka kola mama hnyawa la ihnim i Akötresie kowe la itre atr, thene la aqane ujë ne la Hupuna, ene pe öni nyidrë atre inamacan, ka hape: “Nge hanyinge la ite nekö i at.”—Ite edomë 8:22, 31.
12, 13. (a) Tune kaa la aqane kepe ini hnei Iesu, qa ngöne la hna goeëne la aqane ujë i Iehova kowe la itre nekö i Isaraela? (b) Nge tune kaa la aqane huliwane Iesu la ini hnei nyidrëti hna kapa?
12 Ame la ini hna kapa mina fe hnene la Hupuna jëne la hna goeëne la aqane ujë ne la Tretretro, tre, ene la aqane kuca Nyidrë troa nyinyine la itre jol. Hanawange la ketre ceitun, tune kaa la aqane ujë i Iehova kowe la nöje Isaraela ka thaa idrei? Easa e ngöne Nehemia 9:28 ka hape: “Nge tingetingë hë angate ame hnei angate hna kuca hmaca la ngazo xajawa i enëtilai, ame hnei enëtilai hna nue tiji angate kowe la ite ithupëjia me angat, nge nyudeni a musinë angat; nge angat’ a hmaca me teije koi enëtilai, ame hnei enëtilai hna shamatin’ e hnengödrai, nge hnei enëtilai hna a nyimu a amele angate thenge la ihnimi enëtilai.” Pine laka hnei nyidrëti hna goeën me ce huliwa me Iehova, kösë hetre utipine i Iesu fe kowe la itre atr ngöne la itre götrane hnei nyidrëti hna cainöje ngön.—Ioane 5:19.
13 Hnei Iesu hna huliwane la itre hnei nyidrëti hna inin: eje hi, hnei nyidrëti hna amamane la utipine i nyidrë kowe la itretre drei nyidrë. Ame ngöne lo jidri qëmekene tro nyidrëti a mec, tre, hnene lo itre aposetolo, ene lo itre hnei nyidrëti hna hnime catrën, “hna nue nyidëti pe me köt.” (Mat. 26:56; Ioane 13:1) Ketre, aköni a kelikelë Keriso hnei Peteru! Loi pe, hnei Iesu hna nue jëne kowe la itretre drenge troa bëeke hmaca koi nyidrë. Öni nyidrëti koi Peteru ka hape: “Nge ase hë ni thithi thatraqai ‘ö, mate tha tro kö a pate la lapaune i ‘ö; nge e hmaca ha eö, tro eö a acatene la ite tejine me eö.” (Luka 22:32) Hna xup la Isaraela ngöne la ua hune la “tepene la nöjei aposetolo me nöjei perofeta”, nge ame la trepene la hage i Ierusalema ka hnyipixe, tre, ngöne eje la itre ëjene la nöjei aposetolo ka luako ne la Arenio, ene Iesu Keriso. Uti hë enehila, ame la itre Keresiano hna iën memine lo itre sine tronge i angatr ka nue la mele i angatr koi Akötresie, ene lo itre “xaa mamoe kö,” tre, angatr a tro loi e nyipine la ketre organizasio ka cainöjëne la Baselaia, fene la ime ka mene i Iehova memine la musi ne la Hupuna.—Efe. 2:20; Ioane 10:16; Hna ama. 21:14.
Aqane Hamë Ini Nyidrë
14, 15. Nemene la itre ka isapengön ngöne la aqane hamë ini hnei Iesu memine lo angetre cinyihane me itre faresaio?
14 Tune kaa fe la aqane trongëne Iesu la hnei nyidrëti hna ini ngöne la kola inine pena la itretre drei nyidrë? Ame la easa goeëne la isa aqane hamë ini hnei Iesu memine la itre hene ne hmi, eje hi laka, sisitria catre kö la aqane hamë ini Iesu. Hnene la itre atre cinyihane me itre faresaio hna ’atiane la wesi ula i Akötesie hnene la ite hna ini hnei [angatr]’. Ame pena ha Iesu, tre, thaa qa thei nyidrëti kö la itre hnei nyidrëti hna qaja ngo, hnei nyidrëti pe hna hamëne la ini thenge la hna cinyihan ngöne la wesi ula i Akötresie. (Mat. 15:6; Ioane14:10) Loi e tro fe sa hane ujë tune lai.
15 Nemene la ka isapengöne thei Iesu memine lo itre hene ne hmi? Öni nyidrëti göi angetre cinyihane me itre faresaio ka hape: “Ame la nöjei ewekë asëjëihë hnei angate hna qaja koi nyipunie, kucajë, me thupëneju ; ngo the kuca thenge kö la thina i angat ; ke angate hi a qaja, ngo tha kuca pe.” (Mat. 23:3) Ngo, ame Iesu, tre, hnei nyidrëti pala hi hna trongëne la itre hnei nyidrëti hna inin. Tro la ketre ceitun a anyipicine lai.
16. Pine nemene matre ijije tro sa qaja ka hape, hnei Iesu hna xötrethenge la itre hnei nyidrëti hna qaja ngöne Mataio 6:19-21?
16 Hnei Iesu hna ahnithe kowe la itretre dreng, ka hape, loi e tro angatr a ‘amë . . . la tenga mo e koho hnengödrai’. (E jë la Mataio 6:19-21.) Ngo, hane kö Iesu trongëne la trenge ewekë celë hnei nyidrëti hna qaja koi angatr? Eje hi, pine laka hnei nyidrëti hna qaja la nyipici göi nyidrëti kö, ka hape: “Ame la nöjei alope, te, hete hna xudawa, nge ame la nöjei waco, te, hete hna nyi tengen, ngo tha hetenyi kö la Nekö i ate la nyine tane la he.” (Luka 9:58) Thaa ka jole kö lo aqane mele i Iesu. Hnei nyidrëti hna pane hnehengazone la troa cainöjëne la maca ka loi ne la Baselaia, nge hnei nyidrëti fe hna amaman, jëne la tulu i nyidrë, la aliene la hna hape, troa kötrene la itre jole hne së hna troa xeni pune qa ngöne la hna xawan amë la itre mo e celë fen. Ketre, hnei nyidrëti hna amamane hnyawa la aqane troa ami trenga mo e hnengödrai, “ga pë nekö i fenifeni me xojene troa an, nge ga pë ate kë’nö troa thë me ënö.” Hane kö së xötrethenge la hna ahnithe koi së celë, ene la troa ami trenga mo e koho hnengödrai?
Itre Thiina Ka Upe La Itre Atr Troa Hnimi Iesu
17. Nemene la itre thiina i Iesu ka amamane laka, ketre atre cainöje ka sisitria nyidrë?
17 Nemene la itre thiina ka loi ka amamane laka, ame Iesu, tre, ketre atre cainöje ka sisitria? Ame la ewekë hnapan, tre, ene la aqane xatuane nyidrë la itre atr. Ame ngöne la nöjei thiina ka loi ka eje thei Iehova, tre, hnei Iesu hna amamane la ipië, me ihnim, me utipin. Hanawange la aqane ketr la itre atr hnene la itre thiina Iesu ka lolo, ene pe thaa sixele kö angatre troa tro koi nyidrë.
18. Pine nemene matre ijije tro sa qaja ka hape, ka ipië Iesu?
18 Qa ngöne la hnei nyidrëti hna kapa la hnëqa troa tro celë fen, hnei Iesu “hna aipië nyidëti kö, me xome la pengö i hlu, nge hna longëtine mate ate.” (Fil. 2:7) Kola mama hnyawa e celë la ipië i nyidrë. Ketre, thaa hnei Iesu kö hna thele troa thaipiëne la itre atr. Thaa traqa kö koi nyidrëti la mekune troa pi mama me tro pena hape, ‘Eni la uti qa koho hnengödrai, nge tro epuni a drei ni’. Ame lo angetre thoi ka qaja trongën, ka hape, itre mesia angatr, tre, ka isapengöne hnyawa angatre me Iesu, pine laka ame nyidrëti, tre, thaa nyidrëti kö a uune me sieje fë kowe la itre atr ka hape, nyidrëti la nyipi Mesia. Hnei nyidrëti pe, ngöne la itre xaa ijin, hna sipone kowe la itre atr matre thaa tro kö angatr a qeje nyidrë maine iqajakeune pena la itre hnei nyidrëti hna kuca. (Mat. 12:15-21) Iesu a ajane tro la itre atr a isa axeciën troa xötrethenge nyidrë hnene la hnei angatr hna sipu öhn. Kola madrine hnene la itretre drei Iesu laka, thaa nyidrëti kö a thele tro angatr a tune lo itre angela ka pexej, ene lo itre hnei nyidrëti hna ce mele memine ekö e koho hnengödrai!
19, 20. Hna upi Iesu tune kaa hnene la ihnimi me utipin troa xatuane la itre atr?
19 Hnei Iesu mina fe hna amamane la ihnimi nyidrë, celë hi pane thiina ka sisitria catr thene la Tretretroti e koho hnengödrai. (1 Ioane 4:8) Hnei Iesu hna inine la itre atr ka drei nyidrë, cememine la ihnim. Hanawange la ketre ceitun, ene la aqane hnime nyidrë la ketre thupëtresiji joxu. (E jë la Mareko 10:17-22.) “Hnimi angeic” pi hë hnei Iesu nge aja i nyidrë troa xatua angeic, ngo thaa hnei angeice kö hna nue la itre mo i angeic, celë hi ka sewe angeice troa hane xötrethenge Iesu.
20 Ame la ketre thiina nyine haine thei Iesu, tre, ene la utipin. Tune la itre atr ka ngazo asë, ame lo itre ka drenge hnyawa lo ini qaathei Iesu, tre, itre hna thue ehnefëne hnene la itre jol. Pine laka, atre hnyawa hi nyidrëti la pengöne cili, hnei Iesu pala hi hna ini angatr cememine la utipin me ihnimi ipitö. Hanawange la ketre ceitun: pine laka tru catre la itre huliwa i Iesu memine la itre aposetolo i nyidrë, ene pe pë ju kö traeme i angatre troa hane xen. Ngo nemene la aqane ujë i Iesu ngöne la nyidrëti a öhne la ka ala nyimu e lapa xötreithi nyidrë? Hnei nyidrëti hna “utipi angat, ke ceitui angate memine la ite mamoe ka pa ate thupën; ame hnei nyidëti hna qane troa ini angate la nöjei ewekë ka nyimute.” (Mareko 6:34) Hnene laka, öhne hi Iesu la ehacene la mele ne la itre atr ngöne la itre götrane hnei nyidrëti hna cainöj, ene pe hnei nyidrëti hna nue la itre trenge catre i nyidrë matre troa inine me kuca la itre iamamanyikeu nyine loi koi angatr asë. Celë hi matre, hna ketr la hni ne la itre xan hnene la itre thiina i nyidrë memine la itre trenge ewekë i nyidrë, ene pe, itretre drei nyidrëti hë angatr.
21. Nemene la nyine tro sa wange ngöne la hna cinyihane ka troa xulu?
21 Hetrenyi pala kö la itre xaa ewekë ka ijije tro sa atrepengöne hnyawa ngöne la huliwa ne cainöje i Iesu e celë fen. Celë hi la hna troa amamane hnene la hna cinyihane ka troa xulu. Matre, nemene fe la itre xaa aqane tro sa nyitipu Iesu Keriso, la Mesinare ka sisitria?
Tro Hë Epuni a Sa tune kaa?
• Qëmekene tro nyidrëti a traqa e celë fen, nemene ini la hnei Iesu hna kapa?
• Nemene la ka amamane laka, ame la aqane hamë ini Iesu, tre, ka sisitria catre kö hune la itre faresaio me angetre cinyihan?
• Nemene la itre thiina ka lolo ka ketr la itre atr, ene pe thaa sixele kö angatre troa tro koi Iesu?