Ita Ne Thup göi 04 Januare 2009 e Normandie
Nyima 07 me 26 Qene Drehu
Nemene La Hnei Nyipunieti Hna Troa Hamën Matre Troa Mele Epine Palua?
“Nemene hmaca la ewekë nyine thupene la mele i nyën?”—MAT. 16:26.
1. Pine nemene matre Iesu a canga lepetrije la mekuna i Peteru?
Peteru aposetolo a pane sesëkötre ngazo. Kola “ulatin’ amamane” hnene la maseta nge hnimina i angeic, ene Iesu, ka hape, thaa hmitre kö troa akötrë nyidrë, nge tro fe nyidrëti a mec! Peteru a canga sewe Iesu me qaja, ka hape: “Ekölö hi ni enëtilai, Joxu; tha tro kö a axajanëti lai koi cilie;” maine jë ka loi hi la aliene hni Peteru ngöne la angeic a ujë tune lai. Ngo Iesu a thaujë me hutrö koi Peteru, nge nyidrëti a goeëne la itretre dreng. Mama pi hi koi nyidrëti laka, angatre fe a hane kapa la mekune celë ka qali. Thupene jë hi lai nyidrëti a qaja koi Peteru, ka hape: “Satana, trojë kowe la hutröng, ke tha mekune kö eö la ite ewekë i Akötesie, ngo ite ewekë i ate pe.”—Mar 8:32, 33; Mat. 16:21-23.
2. Nemene la hna thele thene la itre nyipi hlue i Iesu?
2 Ame la hnei Iesu hna troa qaja thupen, tre, celë hi lai ka xatua Peteru troa trotrohnine la kepine matre Iesu a canga lepetrije la hnei angeice hna qaja. Iesu “a hëne la ka ala nyimu ce me angete dei nyidë,” me hape koi angatr: “Maine hete ate ajane troa xöte thenge ni, loi e tro angeic’ a xele angeice kö, me xome la satauro i angeic, me xöte thenge ni fë. Ke ame la ate pi amelene la mele i angeic, te, tro ha pate, ngo ame la ate nue la mele i angeice pi ni memine la evangelia, te, tro ha amelene lai.” (Mareko 8:34, 35) Kola mama hnyawa laka, eje thei Iesu la aja ne troa huujëne la mele i nyidrë; ngo nyidrëti fe a thele thene la itretre drei nyidrë tro angatr a hnëkë troa nue la mele i angatr kowe la huliwa i Akötresie. Nge maine tro angatr a kuca tune lai, haawe, tro hë angatr a kapa la ketre ahnahna ka sisitria.—E jë la Mataio 16:27.
3. (a) Nemene lo hnei Iesu hna hnyingëne kowe la itretre drei nyidrë? (b) Ame la kola drenge lo hnaaluene hnying, nemene jë la hna mekune hmaca hnene la angetre dreng?
3 Ame pala hi ngöne la ijine cili, hnei Iesu hna hnying; luetre la lue hnyinge ka troa upe la itretre dreng troa sine thele lue ej. Öni nyidrëti, ka hape: “Nemene la thangane kowe la ate e tro nyën’ a hetenyi la fene hnengödrai asë, nge ngazo pe la mele i nyën?” nge “Nemene la ewekë tro la ate a hamëne nyine itöne la mele i nyën?” (Mark 8:36, 37) Thaa jole kö koi së itre atr troa sa la pane hnying. E meci hë la atr, pëkö thangane lai koi angeice troa hetrenyi la fene hnengödrai asë. Easa öhne la enyipiewekëne la itre mo ngöne la easa mel, ke, kola huliwane itre ej. Ame pë hë la hnaaluene hnyinge i Iesu, hna hape: “Nemene la ewekë tro la ate a hamëne nyine itöne la mele i nyën?” tre, kola amekunë së lo itre trenge ithanata i Satana ngöne lo hneijine i Iobu; kolo hi lo hna hape: “Ite ewekë asë hna hetenyi hnene la ate tro angeic’ a hamëne hnane la mele i angeic.” (Iobu 2:4) Ame kowe la itre ka thaa nyi hlue i Iehova kö, tre, nyipici hi la hnei Satana hna qaja. Tro angatr a kuca asë la nöjei ewekë, uti fe hë la troa eni wathebo matre tro pala hi angatr a mel. Ngo isapengöne kö lai memine la aqane waiewekë ne la itre Keresiano.
4. Pine nemene matre ka sisitria catre kowe la itre Keresiano la aliene la lue hnyinge i Iesu?
4 Atre hi së laka, thaa Iesu kö lo a traqa e celë fen matre troa hamë së la mele ka pexej, me itre mo, me mele ka cile huti ngöne la fene ce. Nyidrëti a traqa matre troa aijijë së troa mele palua ngöne la fene ka hnyipixe; eje hi lo lai hne së hna wanga atrun, ene la mele ka thaa ase palua kö. (Ioane 3:16) Trotrohnine hi la Keresiano la aliene lo pane hnyinge i Iesu, ka hape, “Nemene la thangane kowe la at e tro nyën’ a hetenyi la fene hnengödrai asë, nge ngazo pe la mele i nyën?” Tro angeic a sa, ka hape, pë fe kö thangan. (1 Ioane 2:15-17) Ame la ka troa xatua së troa sa la hnaaluene hnyinge i Iesu, tre, ene la tro sa pane isa hnyinge, ka hape, ‘Nemene la hnenge hna ajane troa nue me huujëne enehila, nge ka troa aijijë ni troa mele ngöne la fene ka hnyipixe?’ Troa mama la aqane sa së la hnyinge celë ngöne la aqane mele së, nge celë hi lai ka troa amamane la ecatrene la mejiune së.—Wange ju la Ioane 12:25.
5. Tro sa hetrenyi tune kaa la mele ka thaa ase palua kö?
5 Thaa Iesu kö lai a qaja, ka hape, ame la mele ka thaa ase palua kö, tre, nyine itön. Ame la mel, tre, ahnahna lai ceitune mina fe memine la mele ka xoxopatre hne së hna melëne ngöne la fene celë. Thatreine kö së troa xölehuje la mel, nge ketre thaa kolo kö a hamë së la mel nyine thupene la ketre ewekë hne së hna kuca. Caasi hi la nyine tro sa kuca matre troa hetrenyi la mele ka thaa ase palua kö, ene la troa “lapaune koi Iesu Keriso” me koi Iehova, “la ate nyi june koi angete thele catë nyidë.” (Gal. 2:16; Heb. 11:6) Ngo loi e troa mama ngöne la aqane ujë së laka, ka lapaune së, pine laka, ‘meci hë la lapaun e pë huliwa.’ (Iako. 2:26) Qa ngöne lai, maine tro sa sine thele la hnyinge i Iesu, haawe, tro hë sa wanga atrune hnyawa la etrune la hne së hna troa nue ngöne la fene celë; ketre, mekune ju fe së la etrune la hne së hna troa kuca ngöne la huliwa i Iehova, nyine hatrene laka, ka nyipi lapaune së.
“Ame Keriso, Te, Tha Hna Amadi Nyidëti Kö”
6. Nemene lo hnei Iesu hna pane thel?
6 Thaa hnei Iesu kö lo hna piin la itre hna troa hamëne hnene la fene ngöne lo hneijine i nyidrë; ngo hnei nyidrëti pe hna mekune pala hi la itre ewekë ka sisitria me thipetrije la itupath, ene la troa nyinyape thele la itre mo ne fen. Hnei nyidrëti hna huujëne la mele nyidrë me drengethenge Akötresie. Thaa hnei nyidrëti kö hna thele troa amadrinë nyidrëti kö, ngo öni nyidrëti, ka hape: “Ini a kuca pala hi la nöjei ewekë nyine amadi [Akötresie].” (Ioane 8:29) Nemene la ewekë ka sisitria hnei Iesu hna kuca nyine amadrinë Akötresie?
7, 8. (a) Nemene la huuj hnei Iesu hna hamën, nge hna nyi thupene koi nyidrëti tune kaa? (b) Nemene la itre hnyinge hne së hna troa isa xom?
7 Ame ngöne la ketre ijin, hnei Iesu hna qaja kowe la itretre drei nyidrëti, ka hape, ame “la Nekö i ate tha traqa kö troa hete hlue i angeic, ngo tro pe a hlue, me hamëne la mele i angeice nyine thupene mele ne la nöjei ate ka kösau.” (Mat. 20:28) Iesu hi lo a ase ithuemacanyi koi angatr, ka hape, tro hë nyidrëti a nue la mele i nyidrë; nge e cili hi lo kola sewe nyidrëti hnei Peteru. Ngo hnei nyidrëti hna cile catr. Aja i nyidrë troa nue la mele i nyidrëti ka pexeje kowe la itre atr. Qa ngöne la aqane mele nyipici Iesu, haawe, thaa luelue kö nyidrëti laka, tro kö nyidrëti a mele elany. Hna amele nyidrëti hmaca me “adraië nyidëti jë hnene la themie mecengë i Akötesie.” (Ite Hu. 2:32, 33) Haawe, nyidrëti hi la tulu ka sisitria koi së.
8 Hnei Paulo aposetolo hna ithuecatre kowe la itre Keresiano ne Roma, ka hape, thaa tro kö a “amadi [angatre] kö” nge tro fe a mekune laka, ame Iesu Keriso, tre, “tha hna amadi nyidëti kö.” (Rom. 15:1-3) Haawe, tro sa xötrethenge tune kaa la eamo celë, me huujëne la mele së tui Iesu Keriso?
Iehova a Ajane Tro Sa Hamëne La Hne Së Hna Atreine Ka Sisitria
9. Nemene la hnene la Keresiano hna kuca ngöne la angeic a sa xepu koi Akötresie?
9 Ame ekö e Isaraela, hetrenyi la ketre ewekë hna aijijëne hnene la Wathebo i Mose; kola upe gufane lo itre hlue atre Heberu ngöne la hna sevenene macatre ne nyi hlu, maine pena ngöne lo macatre ne iubeli. Ngo hetre ketre mekune ka ijije tro angatr a xom. Maine hnime hë ketre hlue la maseta i angeic, haawe, ijiji angeice hi troa iëne troa lapa pala pë hë e cili me nyihluene lai maseta ngöne la mele i angeice ka pexej. (E jë la Deuteronomi 15:12, 16, 17.) Ceitune hi lai memine la easa iëne troa sa xepu koi Iehova. Easa sipu iëne troa nyi hlue i Akötresie, ngo thaa easë hmaca kö a xötrethenge la itre sipu aja së. Easë hi lai a amamane koi Iehova la ejuine la ihnimi së koi Nyidrë memine la aja së troa nyi hlue i Nyidrë epine palua.
10. Nemene la aliene la kola hape, itre atre i Akötresieti së, nge nemene hë lai thangane kowe la itre mekune me itre aqane ujë së?
10 Maine nyipunieti a inine la Tusi Hmitrötr memine la itretre Anyipicine i Iehova, me cainöjëne la maca ka loi, me hane sine la itre icasikeu i Keresiano, haawe, ka lolo catre la hnei nyipunieti hna kuca. Epi thaa tro kö nyipunieti a cil e hetrenyi thei nyipunie la aja troa sa xepu koi Iehova, me hnyinge tune la atre Aithiope, ka hape: “Ngazo troa bapataiso ni?” (Ite Hu. 8:35, 36) Nge troa ceitune la aqane imelekeu i nyipunie memine lo itre Keresiano hna cinyanyi kow hnei Paulo, kola hape: “Tha ite ewekë i nyipunieti kö nyipunie? Ke ase hë itö nyipunie hnene la thupen.” (1 Kor. 6:19, 20) Itre ka mejiune ju hë së troa mele e koho hnengödrai maine e celë fe, maine ase hë së nue la mele së koi Iehova, haawe, itre atre i Nyidrëti hë së. Drei la enyipiewekëne la troa thipetrije la itre sipu aja së, me hmaca troa “nyi hlue i at”! (1 Kor. 7:23) Drei fe la ketre manathithi ka tru, ene la troa ketre hlue i Iehova, lo hnei Nyidrëti hna troa upe thenge la aja i Nyidrë!
11. Kola upe ielene la itre Keresiano troa hamë nemene pengöne huuj; nge nemene la aliene la itre huuj cili maine tro sa aceitunëne memine lo itre huuj hna kuca ekö fene la Wathebo i Mose?
11 Paulo a hamë eamo kowe la itre ka ce hmi me nyidrë, kola hape: “Hamënepi hnei nyipunie la ite ngönetei nyipunie huje ka mel, me ka hmitöt, lo aja i Akötesie, celë hi qâ i nyipunie ka ijij.” (Rom. 12:1) Kola amexeje hmaca hnene la itre trenge ewekë celë kowe la itretre Iudra ka hmi Keresiano la itre huuj hnei angatr hna kuca ekö thatraqane la hmi, qëmekene tro angatr a hane xötrethenge Iesu. Atre hnyawa hi angatr laka, ame fene lo Wathebo i Mose, tre, itre öni ka pexeje lo itre hna troa huujën. Ame lo itre ka thaa pexeje kö, tre, thaa hna kapa kö hnei Iehova. (Mal. 1:8, 13) Ceitune hi memine la easa hamëne la itre ngönetrei së matre “ite huje ka mel.” Easa hamëne koi Iehova la ka sisitria ngöne la mele së, ngo thaa tro kö a hamëne la itre munëne thupene la hne së hna eatrëne la itre sipu aja së. Ame la easë a sa xepu koi Akötresie, easa hamëne koi Nyidrëti la “mele” së; kolo lai a qaja la trenge catre së me itre ewekë hne së hna hetreny, me itre hne së hna atrein. (Kol. 3:23) Nemene la aqane tro sa trongëne lai ngöne la mele së?
Loi e Tro Sa Huliwane Inamacanëne La Traeme Së
12, 13. Nemene la ketre aqane tro sa hamëne la hne së hna atreine ka sisitria koi Iehova?
12 Ame la ketre aqane troa hamëne koi Iehova la ka sisitria, tre, ene la troa xome inamacanëne la traeme së. (E jë la Efeso 5:15, 16.) Nyipi ewekë tro sa atreine xomihni matre troa huliwane inamacanëne la traeme së. Pine laka tru la itre iajojezine la fen nge itre atr ka ngazo së, haawe, canga tro hi sa xome la traeme së matre troa kuca la itre nyine iamadrinë maine troa kuca la itre sipu aja së. Nyipici, “hete pui ne la nöjei ewekë asë” tune la troa pane mano me madrin, me troa huliwa matre tro sa eatrëne la itre hnëqa së itre Keresiano. (Ate cai. 3:1) Ngo ame la Keresiano ka sa xepu, tre, loi e tro angeic a atreine waiewekë me huliwane inamacanëne pala hi la traeme i angeic.
13 Ame la Paulo a ihamë e Athenai, hetrenyi la ketre ewekë hnei nyidrëti hna öhne; nyidrëti a goeëne laka, “pëkö xa ewekë hna trongëne hnei angete Athenai asë me ite tenyiwa ka lapa e cili, ngo loi pe troa amamane me denge la kete ewekë ka hnyipixe.” (Ite Hu.17:21) Ame enehila, tre, nyimutre fe la itre atr ka aluzine la traeme i angatr; tune la itre nyine iamadrinë enehila, ene la televizio memine la itre nyine elo video, me ëternet. Kolo pala hi a mana trootro me elë la etrune la itre nyine iamadrinë ka aluzine la traeme së. Maine tro sa nue la itre ewekë cili troa musinë së, tro hë së lai a wanga acone la itre aja së ngöne la götrane la ua. Maine jë tro fe hë sa mekune, ka hape, tru pala ha hnei jole së, matre pë hë ijine tro sa pane hane mekune la “nöjei ewekë ka nyipi ewekë catr (MN),” ene lo itre hnëqa së ngöne la huliwa i Iehova.—Fil. 1:9, 10.
14. Nemene la itre hnyinge ka nyipi ewekë hne së hna troa pane wange hnyawa?
14 Qa ngöne lai, loi e tro së itre ka sa xepu hë koi Iehova a isa hnyinge, ka hape, ‘hetrenyi kö ni ngöne la porogarame ne la drai, la ketre ijine hna amë troa e me sine thele la Tusi Hmitrötr, me hane thith?’ (Sal. 77:12; 119:97; 1 Thes. 5:17) ‘Eni kö a ami ijine troa hnëkëne la itre icasikeu i Keresiano? Eni fe kö a hane sa ngöne la itre ijine icasikeu matre hamë ithuecatre kowe la itre xan?’ (Sal. 122:1; Heb. 2:12) Kola amamane hnene la wesi ula i Akötresie, laka, “hoea la hnei [Paulo me itre sine tronge i nyidrë] hna lapa qaja catëne göi [Iehova].” (Ite Hu. 14:3) Ijiji nyipunieti kö troa kuca matre tro fe a hane ‘hoea la traeme hna xome’ troa cainöj, maine jë troa hane xome la huliwa ne pionie?—E jë la Heberu 13:15.
15. Itre qatre thup a huliwane inamacanëne tune kaa la traeme i angatr?
15 Ame la Paulo me itre xaa atr ka mele nyipici a ihamë ngöne la ekalesia i Keresiano ne Anetioka, “hoea la hnei [angate] hna ce lapa thei angete deng,” matre kösë hetre ijine kola pane hamë ithuecatre koi angatr. (Ite Hu.14:28) Ame la itre qatre thupe ka ihnim, tre, angatr a xomi ijine troa hamë ithuecatre kowe la itre xan. Angatre a catre cainöj, me thupëne hnyawa la hna axö mamoe me thele la itre xan ka paatr; angatre fe a xatuane la itre xan ka wezipo, me kuca la itre xaa hnëqa i angatr e hnine la ekalesia. Maine ketre trejine trahmanyi ka bapataiso hë nyipunie, hna aijiji nyipunieti kö hnene la aqane mele i nyipunie troa hnëkë matre troa hane xome la itre hnëqa celë?
16. Nemene la itre xaa aqane tro sa “kuca la loi kowe . . . la nöjei ate ne la lapa i angete lapaun”?
16 Nyimutre catre la itre ka madrine qa ngöne la hnei angatre hna akeukawane la hni ne la itre atr ka melëne la itre ewekë ka ngazo ka traqa xan, maine pena ka xulu qathene la itre atr. Drei la ketre ceitun, kola huliwa hnene la ketre trejine föe ka faipoipo hë nge ka 65 hë lao macatre ne mele e hnine la Bethela; hnei eahlo hna tro ngöne la itre xaa ijine kowe la itre götrane ka nanyi matre troa xatuane la itre atr ka eatr. Pine nemene matre eahlo a xome la itre ijine ne mano i eahlo matre troa ixatua? Öni eahlo, ka hape: “Ngacama pëkö huliwa hnenge hna atreine kuca, ngo ame pe, tre, ketre hnëqa ka sisitria koi ni la troa hane xatuane la itre ka aja ixatua. Tru la ithuecatre hnenge hna kapa ngöne la eni a öhne la ecatrene la lapaunene la itre xaa trejine föe me trahmanyi ka lapa menu pe hi, luuzi hë la itre ewekë i angatr.” Hetrenyi fe la itre atr, itre thauzane la etrun ka ixatua ngöne la troa xupi uma ne Baselaia me hnë Asabele e cailo. Maine tro fe sa hane sine la itre huliwa cili, haawe, easë hi lai a amamane laka, thaa easë kö a meku së me kuca la itre sipu aja së, ngo easë pe a “kuca la loi kowe . . . la nöjei ate ne la lapa i angete lapaun.”—Gal. 6:10.
“INi a Ce Me Nyipunie Ngöne La Nöjei Drai Asëjëihë”
17. Nemene la hnei nyipunie hna troa nue matre troa hetrenyi la mele ka thaa ase palua kö?
17 Easenyi hë troa apaatrene la itre atr ka iananyi me Akötresie. Thatre hnyawa kö së la ijine troa eatre la ewekë cili. Ngo atre hi së laka, “xoxopate pe hi la ijin” nge “kola pate la pengöne la fen.” (E jë la 1 Korinito 7:29-31.) Kola mama catre e celë la enyipiewekëne lo hnyinge i Iesu, hna hape: “Nemene la ewekë tro la ate a hamëne nyine itöne la mele i nyën?” Tro hë së a hamëne la nöjei huuj hnei Iehova hna troa upi së troa kuca matre troa hetrenyi “la nyipi mel.” (1 Tim. 6:19) Nyipici, nyipi ewekë catre tro sa wanga atrune la eamo hna hamëne hnei Iesu, kola ithuecatre koi së troa ‘catre xötethenge nyidrë’ me ‘pane thele la baselaia i Akötesie.’—Mat. 6:31-33; 24:13.
18. Nemene la hne së hna mejiune kow, nge pine nemen?
18 Eje hi lai laka, ame la troa xötrethenge Iesu, tre, thaa ka hmaloi kö, the qaja pala ha la eamo hnei nyidrëti hna hamën; kola meci la itre xan ngöne la fene celë, hnene la hna xötrethenge la eamo cili. Ngo tune la aqane ujë i Iesu, loi e tro sa neëne la itupath, ene la troa hape ‘Ekölö hi ni.’ Easa lapaune kowe la trenge ewekë ka lolo hnei nyidrëti hna hamëne kowe lo itretre dreng hna iën ka mele ngöne la hneijine i nyidrë, kola hape: “Ini a ce me nyipunie ngöne la nöjei drai asëjëihë uti hë la pune la fene hnengödrai.” (Mat. 28:20) Haawe, epi tro sa kuca la ka sisitria ngöne la mele së; kola hape koi së, troa huliwane la itre talane hne së hna hetreny, me xome hnyawa la traeme së me trengecatre së thatraqane la huliwa ka hmitrötr. Maine tro sa ujë tune lai, easë hi lai a amamane la mejiune së laka, tro Iehova a thupë së ngöne la ijine akötre atraqatr maine amele së hmaca ngöne la fene ka hnyipixe. (Heb. 6:10) Haawe, tro ha mama hnyawa laka hne së hna nyipi ewekëne catrëne la mel, ene lo ketre ahnahna ka tru alamekene catr.
Nemene La Hnei Nyipunieti Hna Sa?
• Hnei Iesu hna amamane tune kaa la etrune la aja i nyidrë troa nyi hlue i Akötresie memine la itre atr?
• Pine nemene matre loi e tro sa xele së kö, nge tune kaa la aqane troa ujë tune lai?
• Nemene ekö lo itre pengöne huuj hnei Iehova hna kapa ngöne lo hneijine i angetre Isaraela; nge kola eatrongë së tune kaa enehila hnene lai trepene meköti cili?
• Nemene la itre aqane tro sa huliwane inamacanëne la traeme së?