Troa Xome La Ita Ne Thup Celë e 26 Eiperem Me Wiike Cili
Catre Jë Së Troa Xome La Aqane Mele Ka Lolo!
“E mele shë, nge e meci shë, te, ite ate i [“Iehova” MN] shë.”—ROM. 14:8.
1. Nemene la ini hnei Iesu hna hamën göne la aqane troa hetrenyi la aqane mele ka sisitria?
IEHOVA a ajane tro sa madrin qa ngöne la ketre aqane mele ka lolo. Nyimu pengöne aqane mele ne la itre atr, ngo casi hi la aqane mele ka sisitria catr. Ame la aqane mele ka sisitria, tre, ene la tro sa mele thenge la Wesi Ula i Akötresie me xomi ini qaathene la Hupuna i Nyidrë, ene Iesu Keriso. Hnei Iesu hna inine la itre hlue i nyidrë troa hmi koi Akötresie cememine la ua me nyipici, me upi angatre troa inine la itre atr. (Mat. 28:19, 20; Ioane 4:24) Maine tro sa mele thenge la itre hna amekötine hnei Iesu, eje hi laka, tro hë sa amadrinë Iehova me kapa la itre manathithi qaathei Nyidrë.
2. Ame ngöne lo hneijine i Iesu, hna kapa tune kaa la maca ne la Baselaia hnene lo itre atr ka nyimutre, nge kola hapeue la troa xome lo aqane hmi ne lo itre pane hlue i Iesu?
2 Ame la kola lapaune koi Akötresie me xome la bapataiso hnene la itre atr ka hni ka ipië, tre, thatreine kö tro sa cil troa qaja koi angatr, ka hape, “Atraqatre la madrine hun troa kepe nyipunie ngöne la aqane mele celë ka lolo!” (Ite hu. 13:48) Ame ngöne lo hneijine i Iesu, traqa koi itre thauzane la itre atr ka xulu qa ngöne la itre nöj ka isa pengön ka kapa la nyipici nge ka hane xome la bapataiso matre troa amamane kowe la nöjei atr, laka, ase hë angatr sa xepu koi Akötresie. (Ite hu. 2:41) Hnei angatr hna xome la “Hmi”, [Aqane Hmi] ne lo itre pane hlue i Iesu. (Ite hu. 9:2; 19:23) Ka ihmeku hnyawa la xötrehnëewekë celë memine la aqane mele ne lo itre hlue i Iesu Keriso me aqane xötrethenge angatre la tulu i nyidrë.—1 Pet. 2:21.
3. Pine nemen matre kola xome la bapataiso hnene la itre hlue i Iehova, nge nemene la etru i angatr ngöne lo itre macatre ka ase hë?
3 Kolo pala hi a kökötre la huliwa ne inine la itre atr ngöne la itre drai tixenuë celë, nge kola haöthe enehila la 235 lao nöj hnene la huliwa cili. Ame ngöne lo treene lao macatre ka ase hë, hna e la 2 700 000 nge sin la etrun la itre atr ka axeciëne troa nyihlue i Iehova me xome la bapataiso matre troa nyihatrene la hnei angatre hna sa xepu koi Nyidrë. Kösë ala 5 000 lao atr ka bapataiso ngöne la nöjei wiik! Ame la mekune hna axeciën, ene la troa xome la bapataiso, tre, hna nyitrepene hnene la ihnimi angatr koi Akötresie, me atrehmekune qa hnine la Itre Hna Cinyihan, me lapaune i angatr kowe la itre ini hnei angatr hna kapa. Ame la bapataiso, tre, ketre ewekë lai ka sisitria catr ngöne la mele së, pine laka ej a aijijë së troa nyiqaane la ketre aqane imelekeu ka lolo me Iehova. Ketre, eje mina fe a amamane la mejiune së laka tro Iehova a xatua së troa nyihlue i Nyidrë cememine la nyipici, tune lo aqane xatuane Nyidrëti lo itre hlue i Nyidrëti ekö ka catre trongëne la itre jë i Nyidrë.—Is. 30:21.
Pine Nemen Matre Nyipi Ewekë Troa Xome La Bapataiso?
4, 5. Qaja jë la itre xaa manathithi me thangane ka loi hna kapa qa ngöne la hna xome la bapataiso.
4 Maine jë hnei epuni hë hna kapa la atrehmekune göi Akötresie, me hane saze la itre xaa ewekë ngöne la mele i epun, nge ame enehila, tre, ketre atre cainöje hë epuni ka thaa bapataiso petre kö. Nyine qaja aloine la aqane kökötre i epun. Ngo hapeu hane kö epuni sa xepu koi Akötresie ngöne la thith, me mekune troa xome la bapataiso? Atre hnyawa hi epuni jëne la hna sipu ini Tusi Hmitrötr, laka, loi e tro epuni a thele troa atrunyi Iehova ngöne la mele i epun, ngo thaa tro hmekuje kö a amadrinë epun, maine tro pena a nyinyape thele la itre mo. (E jë la Salamo 148:11-13; Luka 12:15) Haawe, nemene la itre xaa manathithi me itre thangane ka loi hne së hna kapa qa ngöne la hna xome la bapataiso?
5 Maine tro epuni ka sa xepu, haawe, tro ha sisitria la aliene la mele i epun. Tro hë epuni a madrin pine laka epuni a catre kuca la aja i Akötresie. (Rom. 12:1, 2) Tro la uati hmitrötre i Iehova a akökötrene thei epuni la itre thiina i Nyidrë, tune la tingetinge me lapaun. (Gal. 5:22, 23) Tro mina fe Akötresieti a kapa la itre thithi epuni me amanathithine la trenge catre hnei epuni hna kuca matre troa mele thenge la Wesi Ula i Nyidrë. Ketre, tro ha eje thei epuni la madrin hna kapa qa ngöne la huliwa ne cainöj, nge tro ha acatrene la mejiune i epun kowe la mele ka thaa ase palua kö, hnene la hna xome la aqane mele ka amadrinë Akötresie. Nge maine tro epuni a sa xepu me xome la bapataiso, tro hë lai a amamane laka, eje thei epuni la aja atraqatre troa ketre Atre Anyipicine i Iehova.—Is. 43:10-12.
6. Nemene la hna qaja amamane hnene la bapataiso së?
6 Maine hne së hë hna sa xepu koi Akötresie me xome la bapataiso, loi e tro sa thele troa qaja koi nöjei atr, ka hape, itre atre i Iehova ha së. Hnei Paulo hna cinyihan, ka hape: “Ke pëkö kete e eësha mele koi angeice kö, nge kete pëkö ate meci koi angeice kö; ke e mele shë, eësha mele [“koi Iehova,” MN], nge e meci shë, eësha meci [“koi Iehova,” MN]. Celë hi mate e mele shë, nge e meci shë, te, ite ate i [“Iehova” MN] shë.” (Rom. 14:7, 8) Hnei Akötresieti hna wanga atrunyi së ke hnei Nyidrëti hna aijijë së tro sa isa ië aja. Ame lo ijine easa iëne troa catre xome la aqane mele cili pine laka easa hnimi Akötresie, tre, easë hi lai a amadrinëne la hni Nyidrë. (Itre edomë 27:11) Maine nyipici laka kola nyihatrene la hne së hna sa xepu koi Akötresie hnene la hna xome la bapataiso, ngo eje mina fe a qaja amamane kowe la nöjei atr, ka hape, Iehova la Atre Musinë së. Kolo lai a amamane laka easa cilëgöline la musi cile i Nyidrë e koho hnengödrai me celë fen. (Itre hu. 5:29, 32) Maine tro sa ujë tune lai, tro hë Iehova a ce me së. (E jë la Salamo 118:6.) Ketre, kola aijijë së jëne la bapataiso troa hane kapa enehila me elanyi fe, la itre xaa manathithi ka nyimutre ngöne la götrane la ua.
Ketre Manathith, Ene Lo Lapa Ne La Itre Trejin Ka Ihnim
7-9. (a) Nemene la hnei Iesu hna qaja matre troa akeukawane la hni ne la itre atr ka nue la nöjei ewekë i angatr matre troa xötrethenge nyidrë? (b) Hna eatre tune kaa lo hna thingehnaeane hnei Iesu ngöne Mareko 10:29, 30?
7 Hnei Peteru aposetolo hna qaja koi Iesu, ka hape: “Hana wang, ase hë huni nue tije la nöjei ewekë asë, mate xöte thenge enëtilai; nge tro huni a hete nemen?” (Mat. 19:27) Peteru a ajane troa atre la pengöne la mele i angeic elany memine lo itre xaa angetre drei Iesu. Nyimutre la itre ewekë hnei angatre hna nue matre troa nue apexejene la mele i angatr thatraqane la huliwa ne cainöjëne la Baselaia. (Mat. 4:18-22) Haawe, hnei Iesu hna akeukawane tune kaa la hni angatr?
8 Kola mama ngöne la edromë i Mareko la hnei Iesu hna qaja, ka hape, tro la itretre drei nyidrë a hane nyihatrene la lapa ne la itre trejin ngöne la götrane la ua. Öni nyidrë, ka hape: “Ame la ate nue pe la uma, me ite tejin, me ite xa, me thin, me kem, me ifëkuku, me ite kuku, me ite hlapa, pi ini memine la evangelia, tro ha angeic’ a kapa enehila ngöne la ijine celë ca hadede lao uma, me ite tejin, me ite xa, me ite thin, me ite kuku, me ite hlapa, ce me ite aköt; nge mele ka tha ase palua kö ngöne la ijine ka tro ha traqa.” (Mar. 10:29, 30) Tune lo hnei Iesu hna thingehnaean, hnene lo itre pane Keresiano hna thue “uma” me ujë kowe la itre sine ce hmi me angatr ceitu me itre “tejin, me ite xa, me ite thin”; tui Lidia, me Akula, me Perisila, me Gaio.—Itre hu. 16:14, 15; 18:2-4; 3 Ioane 1, 5-8.
9 Kola eatre hnyawa enehila la trenge ewekë i Iesu. Ame la “ite hlapa” hna nue hnene la itretre drei nyidrë, tre, kola qaja lo itre huliwa hna nue trije pë hë hnene la ka ala nyim, matre troa akökötrene la itre huliwa ne la Baselaia ngöne la itre xaa nöj; kola qaja la itre mesinare me itre ka huliwa hnine Bethela, me itre trejine ka nyihlue ngöne la itre xaa nöj, me itre xane ju kö. Nyimutre la itre trejine trahmanyi me föe, ka nue la itre hnalapa i angatr matre troa ahmaloeëne la mele i angatr; nge kola thue madrine koi së la easa drei angatr e qeje pengöne la aqane thupë angatre hnyawa hnei Iehova, memine la aqane madrine angatr troa kuca la huliwa i Nyidrë. (Itre hu. 20:35) Tro mina la itre hlue i Iehova asë ka bapataiso a hane kapa la itre manathithi qa ngöne la hna “pane thele la baselaia i Akötesie, me thina ka meköti anganyidë” me nyi atrene la lapa ne la itre trejine Keresiano e cailo fen.—Mat. 6:33.
Nyine Iamele “La Ga Sihngödi”
10, 11. Nemene la “ga sihngödi ne la Kasisitia,” nge nemene la ka aijijë së troa lapaune kow?
10 Hetrenyi la ketre manathithi ka tru hna kapa qa ngöne la hna sa xepu me xome la bapataiso, ene la troa lapa ngöne “la ga sihngödi ne la Kasisitia.” (E jë la Salamo 91:1.) Kolo lai a nyihatrene la ketre göhnë ne iamele, ketre aqane mele ka thupëne la aqane imelekeu së me Iehova. “Ga sihngödi” la göhnë cili kowe la itre ka pë wangatrehmekun ngöne la ua, nge ka thaa mejiune kö koi Akötresie. Maine easa mele thenge la hne së hna sa xepu, me mejiune koi Iehova, eje hi lai laka, tro hë sa qaja koi Nyidrë, ka hape: “Cilieti la hniteng, me hnāpong, me Akötesingö; ini a lapaune kow.” (Sal. 91:2) Iehova Akötresieti hë la hnalapa së. (Sal. 91:9) Matre, nemene pe kö la nyine tro sa thel?
11 Maine hna aijijë së troa lapa ngöne “la ga sihngödi” Iehova, haawe, kolo fe lai a hape, hetrenyi hë the së la ketre manathithi ka tru, ene la troa eköthe la ketre aqane imelekeu ka lolo me Nyidrë. Celë hi ewekë lai hna nyiqaane eköthe ngöne la easa sa xepu me xome la bapataiso. Thupene lai, easa acatrene lai aqane imelekeu së me Akötresie hnene la hna easenyi Nyidrë jëne la hna inine la Tusi Hmitrötr me thithi cememine la hni ka pexej, me catre drengethenge. (Iako. 4:8) Pëkö ketre atr ka easenyi catre koi Iehova hui Iesu; thaa hna nanazije pi kö la lapaune i nyidrë kowe la Atre Xup. (Ioane 8:29) Qa ngöne lai, thaa tro pi kö sa luelue laka, aja i Iehova nge atreine hi Nyidrëti troa xatua së troa eatrëne hnyawa la hne së hna sa xepu. (Ate cai. 5:4) Kola mama hnyawa jëne la itre hna amekötine ngöne la götrane la ua hnei Iehova hna xom thatraqane la nöje i Nyidrë, laka, Nyidrëti a hnimi së nge aja i Nyidrë tro sa öhnyi eloine la hna nyihlue i Nyidrë.
Wanga Atrune Jë La Paradraiso Ngöne La Götrane La Ua
12, 13. (a) Nemene la paradraiso ngöne la götrane la ua? (b) Tro sa xatuane tune kaa la itre ka xötrei kapa la nyipici?
12 Kola aijijë së mina fe hnene la hna sa xepu me xome la bapataiso, troa mele hnine la paradraiso ngöne la götrane la ua. Pëkö ketre aqane mele ngöne la götrane la ua ka tune la aqane imelekeu ne la itre Keresiano, laka kola mele tingetinge me Iehova Akötresie, nge lolo la aqane imelekeu i angatr. (Sal. 29:11; Is. 54:13) Pëkö ewekë e celë fen ka ijij tro sa aceitunëne memine la paradraiso së ngöne la götrane la ua. Kola mama hnyawa lai ngöne lo itre ijine kola asabele e cailo fen asë, laka kola traqa itronyi asë la itre trejine trahmanyi me föe qa ngöne lo itre nöje ka nyimutre, me isa qene hlapa me hane ngönetrei, ene pe kola mama thei angatr la tingetinge me cas, me ihnimi trejin.
13 Iananyi catr la itre aqane mele ka angazone la fene enehila, memine la paradraiso hne së hna melëne ngöne la götrane la ua. (E jë la Isaia 65:13, 14.) Haawe, ketre manathithi koi së la easa könëne la itre xaa atr troa hane lö hnine la paradraiso ngöne la götrane la ua, jëne la maca ne Baselaia hne së hna tro fë. Ketre manathithi mina fe troa xatuane la itre atr ka xötrei hane sine la itre icasikeu, me ini angatre troa cainöj. Ketre manathithi fe la kola upi së hnene la itre qatre thup troa xatuane la itre xaa atr ka xötrei kapa la nyipici, tune lo aqane aqane ujë i Akula me Perisila ngöne la nyidroti a “amamane hnyawa [koi Apolo] la pengöne la kala i Akötesie.”—Ite hu. 18:24-26.
Catre Jë Së Troa Xomi Ini Qaathei Iesu
14, 15. Nemene la itre kepin ka upi së troa catre xomi ini qaathei Iesu?
14 Nyimutre la itre kepin ka upi së troa catre xomi ini qaathei Iesu. Qëmekene tro Iesu a traqa e celë fen, tre, itre macatre ka thatrehmekun ne ce huliwa nyidrë memine la Tretretro i nyidrë. (Ite edomë 8:22, 30) Atre hnyawa hi nyidrë, ka hape, ame la aqane mele ka lolo, tre, ene la troa nyihlue i Akötresie me catre cainöjëne la nyipici. (Ioane 18:37) Ka xecie hnyawa koi Iesu, laka, ame pë hë la itre xaa aqane mel, tre, ka pi tru nge pëkö wanga atrehmekun. Atre mina fe nyidrë, ka hape, tro ha tupath angazonyi nyidrë me humuthi nyidrë. (Mat. 20:18, 19; Heb. 4:15) Pine laka Iesu la Tulu së, haawe, hnei nyidrëti hna ini së la aqane troa pë ethan la mele së.
15 Thaa hmitre ju kö thupene lo hna bapataiso Iesu, nge kolo fe ha tupathi nyidrë hnei Satana troa trije la aqane mele ka lolo, ngo thaa ie ju kö. (Mat. 4:1-11) Kolo lai a ini së, ka hape, ngacama kuca ju hë Satana la ketre ewekë, ngo ijije tro pala hi sa mele nyipici. Kola mama hnyawa e celë, laka, tro angeic a alamekëne la itre atr ka troa xome la bapataiso memine fe lo itre ka xötrei xom. (1 Pet. 5:8) Maine jë troa icilekeu me easë hnene la itre atrene la hnepe lapa së, pine laka thatre hnyawa kö angatr la pengöne la Itretre Anyipicine i Iehova, nge aja i angatr troa hmekë së. Ngo ame la itre itupathi cili, tre, itre ej a aijijë së troa eëne la itre thiina ka lolo ne la Keresiano, tune la troa hni ka metrötr me ithanata amenyikeny ngöne la easa troa sa la itre hnying me cainöj. (1 Pet. 3:15) Nge ijije mina fe tro la itre hna melëne celë a hetre thangane ka loi kowe la itre atr ka drei së.—1 Tim. 4:16.
Catre Jë Së Xome Pala Hi La Aqane Mele Ka Lolo!
16, 17. (a) Nemene la köni hna amekötine ka sisitria thatraqane la mel hna amë ngöne Deuteronomi 30:19, 20? (b) Hnei Iesu me Ioane me Paulo hna acatrene tune kaa la itre mekune cili hna cinyihane hnei Mose?
16 Traqa koi 1 500 lao macatre qëmekene tro Iesu a traqa e celë fen, hnei Mose hna ithuecatre kowe la nöje Isaraela troa iëne la aqane mele ka lolo, e ijine petre kö. Öni angeic, ka hape: “Ini a hëne la hnengödrai memine la fene ngöne la drai celë troa anyipicine göi nyipunie, laka ase hë ni amë qëmeke i ’ö la mele me mec, nge manathithi me hnëjin, ngöne hi lai iënejë la mele mate mele eö memine la ite matra i ’ö; mate tro eö a hni Iehova Akötesi ’ö, me denge thenge la aqane ula i nyidë, me fede koi nyidë.” (Deu. 30:19, 20) Ngacama thaa hnei angetre Isaraela kö hna mele nyipici koi Akötresie, ngo thaa saze kö lo lai köni hna amekötine ka sisitria thatraqane la mel, lo hna qaja hnei Mose. Hnei Iesu hmaca hna amexeje itre ej lo ce nyidrë memine la itretre dreng.
17 Ame la hnapan, tre, ‘nyipi ewekë tro sa hni koi Iehova Akötresie.’ Easa amamane la ihnimi së koi Akötresie hnene la hna trongëne la itre jë i Nyidrë ka meköt. (Mat. 22:37) Ame la hnaaluen, tre, ‘nyipi ewekë tro sa drenge thenge la aqane ula i Iehova’ hnene la hna inine la Wesi Ula i Nyidrë me drenge thenge la itre wathebo i Nyidrë. (1 Ioane 5:3) Kolo fe lai a upi së troa sine pala hi la itre icasikeu ne la itre Keresiano, ke, e cili hi lo easa ithanatane la Tusi Hmitrötr. (Heb. 10:23-25) Nge ame la hnaakönin, tre, ‘nyipi ewekë tro sa fedre koi Iehova.’ Ngacama nyimutre la itre jol hne së hna cile kow, ngo loi e tro pala hi sa lapaune koi Akötresie me xötrethenge la Hupuna i Nyidrë.—2 Kor. 4:16-18.
18. (a) Nemene la aqane qeje pengöne la nyipici hnene La Tour de Garde ne lo macatre 1914? (b) Nemene la aqane tro sa goeëne la lai ne la nyipici enehila?
18 Drei la ketre manathithi ka tru troa mele thenge la itre nyipici ka ej e hnine la Tusi Hmitrötr! Ame ngöne lo macatre 1914, hna cinyihane la trenge ewekë celë ngöne La Tour de Garde, kola hape: “Hapeu, thaa ketre nöje kö së hna amanathithin me ka madrin? Hapeu, thaa ka nyipici kö la Akötresi së? Maine hetre ketre ewekë ka sisitria hna atre hnene la ketre atr, tre, loi e tro angeic a xome ej. Maine hetre ketre ewekë kö ka sisitria hnei nyipunieti hna öhn, epi thuemacanyi huni hnei nyipunie. Atre hi huni laka pëkö ketre trengewekë ka sisitria nge ka nyipi lolo, hune la trengewekë hne së hna öhn e hnine la Wesi Ula i Akötresie. . . . Tha ijije kö la itre trengewekë ne la atr troa qeje pengöne lo tingetinge me madrine me itre manathith ka eje e kuhu hni së me ngöne la mele së, nge ka xulu qa ngöne la atrehmekune ka lualai ne la nyipi Akötresie. Kola aejëne la itre aja ne la hni së me mekuna së hnene la edromë ne inamacan me meköt, me men me ihnimi Akötresie. Thaa nyipi ewekë hmaca kö troa ithel. Ngo caasi hi la aja së, ene la troa akökötrene la atrehmekune së göi Akötresie.” (La Tour de Garde ne 15 Diseba 1914, götrane 377-378) Thaa puje kö la hni ne ole së kowe la lai ngöne la götrane la ua me kowe la nyipici. Nyipici laka, hetrenyi hë së enehila la nyipi kepin matre easa madrine troa “trongëne la lai Iehova.”—Is. 2:5; Sal. 43:3; Ite edomë 4:18.
19. Pine nemen matre thaa tro kö a hmitre troa xome la bapataiso hnene la itre atr ka trongëne hë la itre hna amekötine thatraqane lai?
19 Maine epuni a ajane troa “trongëne la lai Iehova,” ngo thaa hnei epuni pala kö hna sa xepu me xome la bapataiso, haawe, canga wange jë, the hmitre kö. Thele jë troa eatrëne asë la itre hna amekötine thatraqane la bapataiso, ke, celë hmekuje hi la jëne troa amamane la hni ne ole së kowe la hnei Akötresieti me Keriso hna kuca koi së. Hamëne jë koi Iehova la ewekë ka sisitria hnei epuni hna hetreny, ene la mele i epun. Amamane jë laka, epuni a thele troa kuca la aja i Akötresie hnene la hna xötrethenge la Hupuna i Nyidrë. (2 Kor. 5:14, 15) Pëkö nyine troa isenyin, celë hi aqane mele ka sisitria lai!
Tro Epuni a Sa Tune Kaa?
• Pine nemen matre nyipi ewekë tro sa xomi ini qaathei Iesu?
• Nemene la hna nyihatrene hnene la bapataiso?
• Nemene la itre manathithi hna kapa qa ngöne la hna sa xepu koi Akötresie me xome la bapataiso?
• Nemene la ka troa xatua së troa xome hnyawa la aqane mele ka lolo?