Troa Xome La Ita Ne Thup Celë e 26 Julai Me Wiike Cili
Hetrenyi La Mele Xetietë Thene La Nöje i Akötresie
“Tro ni a ole koi cilie nyipine la icasikeu atraqat.”—SAL. 35:18.
1-3. (a) Nemene la ka troa hule la itre xaa Keresiano kowe la ketre götrane hna mecin ngöne la ua? (b) Ekaa la götrane hnë tro la Nöje i Akötresieti a zae?
AME ngöne lo ijine mano, hnei Joe me föi angeic hna sie me xuxu ngöne la ketre götrane gaa tiqa hnei nöjei pengöne ie ka nyimu han. Hnei nyidroti hna nango aji kowe la gaa jui matre troa goeëne la emingömingöne la götrane cili. Ame ngöne la nyidroti a traqa ngöne la ketre götrane gaa jui, ene pe önine jë hi la föi Joe, ka hape, “Ma nango nanyi hë nyiso la.” Öni Joe e sa, ka hape, “Pëkö lai. Atre hnyawa hi ni la hnenge hna kuca.” Thaa hmitre kö nge kola hnyinge hnei Joe, ka hape, ‘Ekaa ha lo itre ie?’ Traqa ju hi la xou koi Joe ngöne la angeic a öhne la kepine matre kola ikötreny la itre ie. Hnene laka angeice hë ngöne la gaa jui, ene pe kola tro meköti koi angeic la ketre eötr. Pëkö xaa jëne troa kötr. Ngo ame la kola easenyi koi angeic hnene la eötr, canga jea hmaca ju hi la eötr me tro hmaca.
2 Ijije troa iaöne la ketre Keresiano hnene la itre iajojezi ne la fene i Satana, tune la itre nyine iamadrinë me huliwa i maseta me itre mo; nge thëthëhmine hë laka, hnamecine la götrane hnei angeice hna lapa ngön. Öni Joe, ketre qatre thupe Keresiano, ka hape: “Hnene la hna melëne celë hna amamane koi ni la enyipiewekëne la troa thupëne hnyawa la itre atr hnenge hna ce tro memin. Epi tro nyipunieti a aje ngöne la götrane gaa pë ethan kowe la mele koi nyipunie nge gaa hetre madrine ngön, ene la ekalesia!” Thaa tro pi kö sa aje ngöne la götrane gaa jui, wanga iananyi pi së memine la ekalesia, nge tro ha hetre ethanyine la fen me itre ewekë ne ej ka gufa kowe la mele së ngöne la götrane la ua. Nge maine easë hë a aje ngöne la götrane gaa ngazo cili, haawe, loi e tro sa thele troa canga bëeke hmaca kowe la götrane ‘gaa xeut’ wanga tro pena ha meci la pune koi së ngöne la götrane la ua.
3 Ame la fene enehila, tre, celë hi ketre götrane hna mecine lai kowe la itre Keresiano. (2 Tim. 3:1-5) Atre hnyawa hi Satana laka, xoxopatre pe hi la itre drai i angeic, celë hi matre angeic a thele lo itre atr ka thaa hmeke kö matre nyine tha i angeic. (1 Pet. 5:8; Hna ama. 12:12, 17) Eloine pe hetre götrane hnë tro sa zae. Hnei Iehova hna hnëkëne kowe la nöje i Nyidrë la ketre götrane hnë zae ngöne la götrane la ua, ene la ekalesia i Keresiano.
4, 5. Tune kaa la aqane goeëne la itre atr la mele i angatr elany, nge pine nemen?
4 Hna nyi ifegone hi la aqane thupë së enehila hnene la fene celë ngöne la götrane la ngönetrei me aliene hni. Nyimutre la itre atr ka xouene la ihumuth me isi memine la aqane elë la thupene la mo, me aqane angazone la ihnadro. Pëkö atr e celë fen ka pë mecin nge ka thaa tro kö a qatr. Nge ame kowe la itre xaa atr ka trene huliwa me uma, me mani me ka egöcatr, angatr a isa hnyinge ka hape, uti hë eue la tro angatr a hetrenyi la itre ewekë cili.
5 Ketre, ame ngöne la götrane la aliene hni, tre, nyimutre la itre atr ka akötr. Eje hi, ala nyimu la itre atr ka mekune troa tingetinge me lolo la mele i angatr hnene la hna ikötresai me troa hetre hnepe lapa, ngo ngazo pe angatr a öhne e thupen, laka, gufa la itre aja i angatr. Ame ngöne la götrane la ua, nyimutre la itre atr ka hmi, kola lueluëne la itre ini hnei angatre hna kapa. Kola mama hnyawa lai ngöne la angatr a goeëne la aqane ujë ka ngazo ne la itre hene hmi, me ngöne la itre ini hnei angatre hna hamëne ka ifekethe me Tusi Hmitrötr. Qa ngöne lai, nyimutre la itre atr ka mejiune kowe la sias maine pena kowe la inamacane me ihnimi ne la atr. Haawe, thaa sesëkötre kö së, laka, thaa tingetinge kö la mele ne la itre atr ka lapa xötreithi së maine ka xele pena ma mekune la pengöne la mele i angatr elany.
6, 7. (a) Tro sa amamane tune kaa laka isapengöne kö la aqane waiewekë ne la itre hlue i Akötresie memine la aqane waiewekë ne la itre atr ka thaa nyihlue i Nyidrë? (b) Nemene la hne së hna troa ce wang?
6 Drei la eisapengönene la aqane waiewekë ne la itre atrene la ekalesia ne Keresiano memine la itre ka thaa hane kö sine la ekalesia! Maine nyipici laka ame së Itretre Anyipicine i Iehova, tre, easa hane cile kowe la itre itupathi me itre jol hna melëne hnene la itre atr ka lapa ezi së, ngo isapengöne kö la aqane ujë së me angatr qëmekene la itre jole cili. (E jë la Isaia 65:13, 14; Malaki 3:18.) Pine nemene lai? Pine laka atre hnyawa hi së jëne la Tusi Hmitrötr la pengöne la fene enehila, nge hna hnëkë së hnyawa ha troa cile kowe la itre ejolene la mel. Haawe, thaa hnehengazone menune kö së la itre drai elany. Maine tro sa nyihlue i Iehova, tro hë lai a thupë së qa ngöne la itre aqane mekune ka pëkö enyipicine nge ka thaa qaa kö hnine la Tusi Hmitrötr; nge tro fe ha thupë së qa ngöne la itre kuci ngazo me itre ethanyine itre ej. Celë hi matre kola melëne hnene la itre atrene la ekalesia ne Keresiano la ketre tingeting ka paatre kö thene la itre xaa atr.—Is. 48:17, 18; Fil. 4:6, 7.
7 Hetrenyi la itre xaa ceitune ka troa xatua së troa mekune thele la aqane mele xetietë ne la itre hlue i Iehova; isapengöi angatre kö memine la itre atr ka thaa nyihlue i Nyidrë. Tro la itre tulu cili a uku së troa waipengöne hnyawa la sipu aqane mekune së me itre huliwa së, me upi së troa wang maine easë kö a trongëne hnyawa la itre eamo hnei Akötresieti hna hamën nyine thupë së.—Is. 30:21.
“Maine Ucici Hë La Lue Cang”
8. Nemene la hna kuca pala hi hnene la itre hlue i Iehova qaan ekö?
8 Ame ngöne lo qaane la mele ne la atr, hnene pala hi lo itre hlue i Iehova ka drengethenge hna catre neëne troa easenyine menune pala ha la itre atr ka thaa nyihlue i Nyidrëti kö. Eje hi, hnei Iehova hna qaja amamane, ka hape, tro ha ithupëjia la itre ka xötrethenge Satana memine la itre hlue i Nyidrë. (Gen. 3:15) Pine laka kola catre cilëgöline hnene la nöje i Akötresie la itre trepene meköti Nyidrë, ene pe thaa ceitune kö la aqane ujë i angatr memine la itre atr ka lapa xötreithi angatr. (Ioane 17:15, 16; 1 Ioane 2:15-17) Ngo thaa ka hmaloi kö troa xome pala hi la aqane ujë cili. Eje hi laka, hetrenyi la itre xaa hlue i Iehova ka thele la eloine la troa huujëne la mele i angatr.
9. Qeje pengöne jë la isi hna melëne hnene la atre cinyihane la Salamo 73.
9 Hna luelu hnene la ketre hlue i Iehova me hane ketre sipu hnying, ka hape, maine jë ka loi fe kö la itre mekune hnei angeice hna hane xom; angeice hi lo ka cinyihane la Salamo 73, nge matra i Asafa angeic. Angeic a thele la kepin matre ame e itre xaa ijin, tre, lolo me madrin me hlemu loi la mele ne la itre atr ka ngazo; nge ame pë hë lo itre ka catre nyihlue i Akötresie, tre, angatr a cile kowe la itre itupath me itre jol.—E jë la Salamo 73:1-13.
10. Pine nemene matre ka nyipi ewekë catre koi së lo itre hnyinge hna amejëne hnene la atre cinyihane la salamo?
10 Hapeu, hne së kö hna hane hnyinge tune la atre cinyihane la salamo? Maine eje hi, thaa tro pi kö sa hnehengazo menu pala ha wanga tro pena ha së a ketre jele ngazo së, maine mekune, ka hape, kola nanazije trootro la lapaune së. Hna hane mekune tune lai hnene la itre hlue i Akötresie, ene lo itre xaa atr hnei Nyidrëti hna iëne matre troa cinyihane la Tusi Hmitrötr. (Iobu 21:7-13; Sal. 37:1; Iere. 12:1; Hab. 1:1-4, 13) Eje hi laka, nyipi ewekë troa thele me kapa hnene la nöjei atr asë ka ajane troa nyihlue i Iehova, la mekune ka sa la hnyinge celë, hna hape: Hapeue la troa nyihlue i Akötresie me drengethenge Nyidrë, celë jë kö la ewekë lai nyine troa kuca? Ka nyipi ewekë catre la mekune cili, ke, celë hi hnyinge lai hna amejëne hnei Satana ngöne la hlapa e Edena. Ka sisitria la mekune cili ke eje la ka aciane la jol, ene la emeköti Akötresie troa musi e koho hnengödrai me e celë fen. (Gen. 3:4, 5) Haawe, loi e tro asë hi sa wanga atrune hnyawa la itre mekune hna qaja hnene la atre cinyihane la salamo. Hapeu, tro kö sa piine la aqane mele ne la itre atr ka ngazo, ke, kola mama laka lolo la mele i angatr? Tro kö sa ‘thixötre’ me nuetriji Iehova hnene la hna nyitipune la itre atr cili? Celë hi aja i Satana lai.
11, 12. (a) Hnene la atre cinyihane la salamo hna elë hun tune kaa la itre mekun hnei angeice hna lueluën, nge nemene la ini koi së? (b) Nemene la ka xatua epuni troa traqa kowe la mekune ne la atre cinyihane la salamo?
11 Nemene la ka xatuane la atre cinyihane la salamo troa elë hun la itre mekun hnei angeice hna luelue fë? Maine nyipici laka xönë hi tro angeice a tria, ngo hna saze la aqane waiewekë i angeic ngöne lo angeic a lö “kowe la ēnē i Akötesie,” kola qaja la angeic a icasikeu memine la nöje i Akötresie hnine la ēnē i Nyidrë, nge ngöne mina fe la angeic a sine thele la aja i Nyidrë. Thupene lai, mama hnyawa pi hi kowe la atre cinyihane la salamo, laka, thaa ajane kö angeice troa hane xeni pune la huliwa hna kuca hnene la itre atr ka ngazo. Kola mama ngöne la aqane mele me aqane ië mekune i angatr, laka, hna ami angatr ngöne la “ite ga ucic.” Ketre, angeic a wanga atrehmekune fe laka, tro ha traqa hnyawa la pune koi angatr ngöne la “ite nyine aqoun,” ngo ame la itre atr ka nyihlue i Iehova, tre, tro ha xatua angatr hnei Nyidrë. (E jë la Salamo 73:16-19, 27, 28.) Maine jë hnei epuni fe hë hna hane öhne hnyawa la enyipicine la trenge ewekë celë. Maine jë troa iaöne la ka ala nyim hnene la aqane catre la itre atr troa sajuëne la itre sipu aja i angatr, memine la aqane wanga acone angatr la itre wathebo i Akötresie; ngo ka hetre ethan la aqane ujë cili kowe la mel.—Gal. 6:7-9.
12 Nemene la itre xaa ini hne së hna xom qa ngöne la itre ewekë hna melëne hnene la atre cinyihane la salamo? Hnei angeice hna wangatrehmekun, laka, ka mele xetietë pe kö me inamacan la nöje i Akötresie. Ene pe angeice ha hane nyiqaane waipengöne hnyawa la itre ewekë ngöne la angeic a lö kowe la hnë hmi koi Iehova. Ketre tune mina fe enehila, maine tro pala hi sa sine la itre icasikeu ne la ekalesia, tro hë sa kapa la itre eamo qaathene la itre trejine me easë ka inamacan, me kepe thangane ka loi qa ngöne la ketre göxeni ne la ua ka hmitrötr. Celë hi kepine matre Iehova a upe la itre hlue i Nyidrë troa sine la itre icasikeu ne Keresiano. Ame e cili, tro ha hetre egöcatre i angatr me upi angatr troa ujë cememine la inamacan.—Is. 32:1, 2; Heb. 10:24, 25.
Inamacane Jë Ngöne La Aqane Troa Ië Hne Së Hna Ce Sinee Memin
13-15. (a) Nemene la hna melëne hnei Dina, nge nemene la hna amamane hnene lai? (b) Pine nemene matre tro ha thupë së e hne së pala hi hna ce sinee memine la itre Keresiano?
13 Kola mama ngöne la tulu i Dina lo nekö i Iakobo jajiny, laka, hetre ethan la mel e troa ce sinee memine la itre atr ne fen. Kola qeje angeic ngöne la tusi Genese, ka hape, hnei angeice hna majemine ce tro lapaa memine la itre jajinyi ne Kanana, ngöne la götrane hnei angeic me hnepe lapa i angeic hna mele ngön. Isapengöne kö la itre trepene meköti ne la angetre Kanana memine la itre hlue i Iehova. Kola mama hnyawa ngöne la itre ewekë ka hekö hna öhne hnene la itre atr ka thele ewekë, laka, hnene la itre aqane mele ne la angetre Kanana hna atiqane la nöje i angatr hnene la hmi koi itre idrola, me kuci ngazo, me isi. (Eso. 23:23; Lev. 18:2-25; Deu. 18:9-12) Mekune hi së lo pune ka traqa koi Dina qa ngöne la hnei angeic hna ce sinee memine la itre atr cili.
14 Hetrenyi la ketre trahmanyi ka “hlemu loi . . . ngöne la lapa ne la keme i angeic’ asë,” Sekema la ëjen; hnei angeice hna öhnyi Dina, “ame . . . hna xomi nyëne me nyi wë nyën, me angazo nyën.” (Gen. 34:1, 2, 19) Drei la ketre akötre ka tru! Hapeue la mekuna i epun, hnei Dina kö hna mekune, ka hape, troa hane traqa koi angeic la ewekë celë? Maine jë hnei angeice hi hna thele troa ce sinee memine la itre thöthi ne la nöj, me mekune, ka hape, pëkö engazone la troa ujë tune lai. Ngo kola mama laka hna iaö Dina hnyawa.
15 Nemene la hna ini së hnene la edromë celë? Thaa tro pi kö sa mekun, ka hape, maine tro sa ce sinee memine la itre atr ka thaa hmi kö, tre, pëkö ethane lai kowe la mele së. Kola qaja hnei Tusi Hmitrötr, ka hape, “ithanata ka ngazo la ate angazone la thina ka loi.” (1 Kor. 15:33) Ame ngöne la ketre götran, tro ha thupë së e hne së pala hi hna ce sinee memine la itre atr ka ce hmi me easë, ka ce trongëne me easë la itre trepene meköt, nge ka hnimi Iehova. Tro ha ithuecatre koi së hnene la itre sinee ka lolo cili troa ujë cememine la inamacan.—Ite Edomë. 13:20.
“Ase Hë Sië Nyipunie”
16. Nemene la hnei Paulo hna qaja göne la itre xaa atrene la ekalesia ne Korinito?
16 Nyimutre la itre atr hna xatuane hnene la ekalesia ne Keresiano troa nyihnyawa angatre kö qa ngöne la itre huliwa ka ngazo. Ame lo Paulo aposetolo a cinyihane lo pane tusi nyidrë kowe la ekalesia ne Korinito, tre, hnei nyidrë hna qaja lo itre ewekë hna kuca hnene la itre Keresiano matre troa saze la mele i angatr, me mele thenge la itre trepene meköti qaathei Akötresie. Hetrenyi ekö la itre xan ka kuci ngazo me ka thili kowe la itre idrola, me ka nyi xetë, me ka qene sodoma, me ka atrekënö, me ka hmo hnei kahaitr, me itre xaa ewekë ju kö ka ngazo. Öni Paulo koi angatr, ka hape: “Ngo ase hë sië nyipunie.”—E jë la 1 Korinito 6:9-11.
17. Nemene la aqane saze la mele ne la itre atr hnene la hna trongëne la itre trepene meköti ne la Tusi Hmitrötr?
17 Ame la itre atr ka pë lapaun, tre, pëkö trepene meköti ka eatrongë angatr. Angatre pe hi a isa sipu mel, maine pena kola ajojezi angatr hnene la itre thiina ka ngazo ne la itre atr ka lapa xötreithi angatr, tune hnyawa hi lo itre xaa atr ne Korinito qëmekene tro angatr a nyihlue i Akötresie. (Efe. 4:14) Ngo ijije tro la nyipi atrehmekune qa hnine la Wesi Ula i Akötresie me itre aja i Nyidrë, a saze la mele ne la itre atr ka catre troa trongëne la itre Hna Cinyihan. (Kol. 3:5-10; Heb. 4:12) Hetrenyi la itre atr ka sine hë enehila la ekalesia ne Keresiano, ka troa qaja koi epuni laka, qëmekene tro angatr a atre la itre trepene meköti Iehova me trongëne itre ej, tre, angatre pe hi a mele menu. Nge thaa nyipi lolo kö me madrine la mele i angatr. Kolo ha tingetinge hnei angatr ngöne lo ijine angatr a nyiqaane sine la nöje i Akötresie me catre troa hane mele thenge la itre trepene meköti ne la Tusi Hmitrötr.
18. Nemene la hna melëne hnene la ketre thöth, nge nemene la hna amamane hnene lai?
18 Ngo hetrenyi ngöne la ketre götran, la itre xan ka nuetrije la ‘timi ne mel’ ne la ekalesia ne Keresiano, nge ka ijigöi fë enehila la mekune hnei angatre hna xom. Kola qaja hnene la ketre trejine föe hne së hna troa hën, ka hape, Tania, ka hape, hnei angeice “hna tru ngöne la nyipici,” nge ame la kola 16 lao macatre i angeic, tro trije pi hi angeice la ekalesia matre troa “nyinyape thele la itre ewekë ka iamenu ne la fen.” Ame thene la nöjei ewekë ka ngazo hnei angeice hna melën, tre, ene la troa hnaho gojeny me thi upune. Angeice a qaja enehila, ka hape: “Nyimutre la itre ethan hnenge hna kapa qa ngöne lo lai köni macatre ne eni e tröne la ekalesia. Hetrenyi pala hi la ketre ewekë ka akötrë ni, ene la hnenge hna humuthe la neköng e kuhu hning. . . . Eni a ajane troa qaja kowe la nöjei thöthi asë ka ajane troa nango ‘tupathe’ hi la mele ka eje ngöne la fen, ka hape: ‘The thele kö troa tupath!’ Maine jë troa hnyapa ngöne la qaan, ngo ame pëhë e thupen, tre, haitre catr. Pëkö xaa ewekë hna troa hamë së hnene la fen, caasi hi laka, akötr. Atre hnyawa hi ni, ke, hnenge hna melëne lai. Catre jë pe troa fedre catr kowe la organizasio i Iehova! Celë hi la sipu aqane mele ka hamë madrin.”
19, 20. Nemene la aqane thupë së hnene la ekalesia, nge nemene la nyine tro sa kuca?
19 Pane mekune ju epun la pengö i epun, maine nuetrije ju epuni la hnë zae i epun, ene la ekalesia ne Keresiano. Nyimutre la itre atr ka xele ma mekune hmaca lo mele i angatre ekö, qëmekene troa atre la nyipici. (Ioane 6:68, 69) Maine tro pala hi epuni a caasi memine la itre trejine me epun, ene lo itre Keresiano trahmanyi me föe, haawe, tro hë epuni a mele xetietë nge tro ha thupë epun qa ngöne la nöjei ngazo me hleuhleu ka eje ngöne la fene i Satana. Maine tro epuni a ceme angatr me sine pala hi la itre icasikeu ne la ekalesia, tro hë lai a amekunë epuni la einamacanen la itre trepene meköti Iehova, me xatua epuni troa melëne itre ej. Nyimutre la itre kepin ka upi epuni enehila troa ujë tune lo atre cinyihane la salamo, ene la troa ‘ole koi Iehova e nyipine la icasikeu atraqatr.’—Sal. 35:18.
20 Nyipici laka, jol e itre xaa ijin kowe la nöjei Keresiano asë troa catre troa pë ethan la mele i angatr ngöne la angatr a cile kowe la itre jol. Maine jë angatre hi a ajane tro la ketre atr a amamane hnyawa la gojenyi ka loi nyine troa trongën. Tune kaa la aqane tro epuni memine la itre xaa atrene la ekalesia, a xatuane la itre trejine ka cile kowe la itre jol? Tro ha amamane hnene la hna cinyihane ka troa xulu la aqane tro epuni a catre troa ‘aupune me akeukawane ipitön’ la itre trejine me epun.—1 Thes. 5:11.
Tro Nyipunieti a Sa Tune Kaa?
• Nemene la ini hne së hna xome qa ngöne la hna melëne hnene la atre cinyihane la Salamo 73?
• Nemene la hna ini së hnene la ewekë ka traqa koi Dina?
• Pine nemene matre ijije tro sa mele xetietë hnine la ekalesia ne Keresiano?