Ita Ne Thup Koi 11 Januare Me Wiike Cili
Wanga Atrune Jë La Huliwa i Nyipunie Hnine La Ekalesia
“Ngo ase hë Akötesie isa amë la ite hnepe ngöne la ngönetei, thenge la aja i nyidë.”—1 KOR. 12:18.
1, 2. (a) Nemene la ka amamane laka, ijije tro la ketre atr a kuca la ketre huliwa hnei angeice hna hnin ngöne la ekalesia? (b) Nemene la itre hnying hna troa ithanatane ngöne la hna cinyihane celë?
AME ngöne lo hneijine i angetre Isaraela ekö, hnei Iehova hna acile la ekalesia matre troa thuane me xatuane la nöje i Nyidrë ngöne la götrane la ua. Drei la ketre ceitun, thupene la hna ngaane la traon e Ai hnene la angetre Isaraela, hnei Iosua hna “e la nöjei tenge ewekë ne la wathebo, ene la ite manathithi me ite hnëjin, tune lo hna cinyihane ngöne la tusi wathebo . . . qëmeke ne la icasikeu angete Isaraela asëjëihë.”—Ios. 8:34, 35.
2 Ame ngöne lo hneijine i Iesu, hnei Paulo aposetolo hna qaja koi Timoteo ketre qatre thupe Keresiano, ka hape, ame la ekalesia ne Keresiano, tre, “ēnē i Akötesie . ., kapane memine la juëne la nyipici.” (1 Tim. 3:15) Ame la “ēnē” i Akötresie enehila, tre, ene la lapa ka caas ne la itre nyipi Keresiano e cailo fen. Hnei Paulo hna aceitunëne la ekalesia memine la ketre ngönetrei, ngöne la mekene 12 ne la pane tusi nyidrë koi angetre Korinito. Nyidrëti mina fe a qaja, ka hape, ngacama isa hnëqane kö la itre hnepe ngönetrei, ngo ka nyipi ewekë asë hi itre ej. Kola cinyihan hnei Paulo, ka hape: “Ase hë Akötesie isa amë la ite hnepe ngöne la ngönetei thenge la aja i nyidë.” Ketre, nyidrëti a amamane hnyawa, ka hape, ame la “ite hnepe ngönetei hne shë hna xanadron, celë hi hne shë hna nyipi atrun.” (1 Kor. 12:18, 23) Haawe, ame la huliwa hna kuca hnine la ēnē i Akötresie hnene la ketre atr ka thiina ka meköt, tre, thaa ka sisitria kö ej maine thaa ka co pena kö hune la huliwa hna kuca hnene la ketre Keresiano ka mele nyipici. Ka isapengöne hi la itre hnëqa cili. Qa ngöne lai, tune kaa la aqane tro sa kuca la huliwa së hnine la ekalesia i Akötresie, me wanga atrune ej? Nemene la itre ewekë ka troa hetre thangane ngöne la huliwa së cili? Nge troa mama tune kaa la ‘tropane la huliwa së kowe la nöjei atr asë’?—1 Tim. 4:15.
Tro Sa Hnine Tune Kaa La Huliwa Së?
3. Nemene la ketre aqane tro sa kuca la huliwa së hnine la ekalesia me amamane laka, easa wanga atrune ej?
3 Ame la ketre aqane tro sa kuca la huliwa së hnine la ekalesia me amamane hnyawa, laka, easa wanga atrune ej, tre, ene la troa catre ce huliwa memine “la hlue ka nyipici me ka inamacan” memine fe la Lapa Ne Xomi Meköt lo ka nyi trenge ewekëne ej. (E jë la Mataio 24:45-47.) Nyipi ewekë tro sa wange hnyawa la aqane drengethenge së la itre hna amekötine hnene lai hlue cili. Drei la ketre ceitun, ame ngöne la itre macatre, hne së pala hi hna kapa la itre ixatua ngöne la götrane la iheetr me isej, me itre nyine iamadrinë me ngöne la aqane huliwane menune la ëternet. Hapeu, easë kö a trongëne hnyawa la itre eamo cili ka lolo, matre tro pala hi a thupëne la mele së ngöne la ua? Nge hapeue la ithuecatr troa eköthe la ketre porogarame ne troa hmi hnene la hnepe lapa? Hane kö së wanga atrune la eamo cili me amë la ketre hej thatraqane lai?(à revoir) Maine thaa ka faipoipo kö së, hapeu easë kö a hane ami traem matre troa ketre sipu inine la Tusi Hmitrötr? Tro hë Iehova a amanathithi së, easë isa ala caas, memine la hnepe lapa së, e hne së hna catre trongëne la itre hna amekötine hnene la lapa ne la hlu.
4. Nemene la nyine tro sa wanga atrune hnyawa, ngöne la easa isa axecië mekun?
4 Kola mekune hnene la itre xan, laka, isa qanyine kö la itre Keresiano angatr isa ala caas, troa isa xomi mekun ngöne la itre götrane celë, tune la itre nyine iamadrinë me aqane heetr me isej. Ngo ame kowe la Keresiano ka sa xepu hë nge ka hnine la huliwa i angeic ngöne la ekalesia, tre, thaa angeice hmekuje kö a axecië mekun thenge la itre sipu aja i angeic. Nyipi ewekë catre kö koi së troa wanga atrune la aqane waiewekë i Iehova ka eje e hnine la Wesi Ula i Nyidrë, ene la Tusi Hmitrötr. Tro la maca ne la Tusi Hmitrötr a ketre ‘lamepa ne la lue ca së, me lai ne la jë së.’ (Sal. 119:105) Ketre, jëne inamacan e tro sa wange hnyawa la itre thangane la itre mekun hne së hna xom, kowe la huliwa ne cainöje së me kowe la itre xaa atr, e hnine ju hë la ekalesia maine e tröne pena.—E jë la 2 Korinito 6:3, 4.
5. Pine nemen matre loi e tro sa thupën matre thaa tro kö a löthi së hnene la aja troa ketre sipu mus?
5 Hna haöthe la fene asë hnene la [(“ua ate huliwa)MN] hnine la ite ka tha idei,” ene pe hna aceitunëne eje me eny hne së hna manon. (Efe. 2:2) Ijije tro la ua cili a uku së troa mekun, ka hape, thaa ka nyipi ewekë kö tro sa kapa la ixatua qaathene la organizasio i Iehova. Eje hi laka, thaa ajane kö së troa ujë tui Dioterefe, ketre atr ka ‘thaa hane kö kepe Ioane aposetolo.’ (3 Ioane 9, 10) Nyipi ewekë tro sa thupën matre thaa tro kö a kökötr e kuhu hni së la aja troa ketre sipu mus. Thaa tro pi kö sa qaja maine kuca la ketre ewekë ka troa jele ngazone la jëne ithuemacanyi ka nyipici hna acile hnei Iehova enehila. (Num. 16:1-3) Ngo loi pe tro sa hnine catrëne la manathithi ka eje the së, ene la troa ce huliwa memine la lapa ne la hlu. Ketre, thaa tro kö së lo a catre troa drengethenge me kapa la hna amekötine qaathene la itre ka elemekene la huliwa së hnine la ekalesia?—E jë la Heberu 13:7, 17.
6. Pine nemen matre loi e tro sa wange hnyawa la sipu aqane mele së?
6 Ame la ketre aqane tro sa amaman, laka, easa hnine la huliwa së hnine la ekalesia, tre, ene la troa wange hnyawa la sipu aqane mele së, me kuca la hne së hna atrein matre troa ‘atrune la qâ së,’ me atrunyi Iehova mina fe. (Rom. 11:13) Kola xome hnene la itre xan la huliwa ne pionie lapaa. Ame pena la itre xan, tre, angatr a huliwa ngöne la drai ka pexej, tune la itre mesinare maine itre qatre thupe ka iwai trootro ngöne la nöj, maine pena la itre ka huliwa hnine itre Bethela e cailo fen. Nyimutre la itre trejin trahmanyi me föe, ka ixatua ngöne la itre xupi Uma Ne Baselaia. Ala nyim ngöne la nöje i Iehova la itre ka catre troa xatuane la itre fami angatr troa nyihlue i Iehova me catre cainöj ngöne la nöjei wiik. (E jë la Kolose 3:23, 24.) Ijije tro sa mejiun, laka, maine tro sa nue gufane la mele së matre troa nyihlue i Akötresie cememine la hni ka pexej, haawe, tro pala hi a hetre huliwa së hnine la ekalesia.
Itre Ewekë Ka Troa Hetre Thangan Ngöne La Aqane Huliwa Së Hnine La Ekalesia
7. Qaja jë la aqane troa hetre thangane la mele së ngöne la itre huliwa hne së hna kuca hnine la ekalesia.
7 Nyipi ewekë catre tro sa wange hnyawa la isa aqane mele së, pine laka, ijije tro lai a hetre thangane ngöne la hne së hna atreine kuca hnine la ekalesia. Drei la ketre ceitun, isapengöne kö la huliwa hna kuca hnene la ketre trejine trahmanyi memine la huliwa hna kuca hnene la ketre trejine föe. Pine laka kola tro la itre macatre, nge easa uti ipië trootro me wezipo, ene pe ijije tro la itre ewekë cili me itre xane kö, a hetre ethan ngöne la huliwa hne së hna kuca koi Iehova. Kola qaja ngöne Ite Edomë 20:29, ka hape: “Ame la emingeminge ne la ite thupëtesiji, te, hmae i angat; nge ame la elolone la ite qate, te, iqia.” Maine jë nyimutre la itre ewekë hna atreine troa kuca hnene la itre thöthi ne la ekalesia ngöne la götrane la ngönetrei, ke, hetre trenge catre i angatr; ngo atraqatre fe la thangane ka loi hna kapa hnene la ekalesia qa ngöne la inamacan me hna melëne hnene la itre qatr. Nyipi ewekë mina fe tro sa lapa mekune laka, ame la easa atreine kuca la ketre ewekë hnine la organizasio i Iehova, tre, hnene la ihnimi gufa i Akötresie.—Ite Hu. 14:26; Rom. 12:6-8.
8. Nemene la thangane la aja së ngöne la huliwa hne së hna troa kuca hnine la ekalesia?
8 Kola amamane hnyawa hnene la ketre ceitun ne la lue treme trejine jajinyi, la ketre ewekë ka troa hetre thangan ngöne la huliwa hne së hna kuca hnine la ekalesia. Lue ka trene pepa nyidro qa ngöne la hna ini ka tru. Caasi hi la aqane mele i nyidro. Hnene pala hi la keme me thine i nyidro hna ithuecatre koi nyidroti asë, troa xome la huliwa ne pionie lapaa thupene la hna kapa la itre pepa ne ini. Thupene la hna kapa la itre pepa cili, ene pe hnene la ketre e nyidro hna xome la huliwa ne pionie, nge ame ju pë hë la ketre, tre, hnei angeice hna huliwa i maseta ngöne la drai ka pexej. Nemene la eisapengöi nyidro? Ene la aja. Hnei nyidroti pë hë ngöne la pun, hna isa iëne troa kuca la aja i nyidro. Hapeu, ka eje kö lai koi së? Nyipi ewekë tro sa mekune hnyawa la hne së hna ajane troa kuca ngöne la huliwa i Akötresie. Ijije kö tro sa akökötrene la aqane sajuëne së la huliwa cili, ngacama tro sa saze la mele së thatraqane lai?—2 Kor. 9:7.
9, 10. Nemene la nyine tro sa kuca, e paatre kö the së la aja troa akökötrene la aqane huliwa së koi Iehova?
9 Nemene la nyine tro sa kuca, e paatre kö the së la aja troa akökötrene la aqane huliwa së koi Iehova, ngo easë pe hi a tuluthe la hna kuca e hnine la ekalesia? Ame ngöne la tusi Paulo koi angetre Filipi, hnei nyidrë hna cinyihan, ka hape: “Akötesie la ate huliwane la ite hni nyipunie mate ajane me kuca la aja i nyidëti ka lolo.” Nyipici laka, ijije tro Iehova a huliwane la hni së matre troa akökötrene la aja ka eje the së.—Fil. 2:13; 4:13.
10 Hapeu, thaa tro kö sa hane sipo Iehova troa hamë së la ajan troa kuca la aja i Nyidrë? Celë hi la hna kuca hnei Davita Joxu. Öni nyidrëti e thith, ka hape: “Iehova fe, amamai ni jë la ite kala i cilie; ini ni jë la ite jë i cilie. E ni jë ngöne la nyipici cilie, me ini ni jë, ke cilieti la Akötesieti ate amele ni. Ini a teqe cilie o drai.” (Sal. 25:4, 5) Loi e tro mina fe sa ujë tune lai, hnene la troa sipo Iehova jëne la thith, troa hamë së la ajan troa kuca la itre ewekë ka amadrinë Nyidrë. Ame ngöne la easa mekune hnyawa la aqane goeëne Iehova Akötresie memine la Hupuna i Nyidrë, la hne së hna kuca matre troa sajuëne la itre aja i nyidro, tre, kola atraqatre la hni ne ole së koi nyidro. (Mat. 26:6-10; Luka 21:1-4) Tro lai hni ne ole së a upi së troa sipo Iehova matre troa hamë së la aja troa kökötre ngöne la götrane la ua. Hnei Isaia perofeta hna amamane la aqane ujë ka lolo nyine tro sa trongën. Ame la angeic a drenge la aqane ula i Iehova a hape: “Tro ni a upi drei, drei la ate tro thatraqai shë?” ame hna sa hnene la perofeta, ka hape: “Inieti la! Upengë nieti jë.”—Is. 6:8.
Tro Sa Akökötrene Tune Kaa La Aqane Huliwa Së Koi Iehova?
11. (a) Nemene la kepin matre tro la itre trejin trahmanyi a ajane la itre hnëqa hnine la organizasio? (b) Tro la ketre trejine trahmany a eatrëne tune kaa la itre hnëqa hna hamë angeic hnine la ekalesia?
11 Traqa koi ala 289 678 la etrun la itre atr ka xome la bapataiso e cailo fen ngöne la macatre ne huliwa 2008; kola mama hnyawa laka, kola aja trejine trahmany matre troa elemekene la huliwa. Tro la ketre trejine trahmany a sajuëne tune kaa la aja cili? Loi e tro angeic a catre troa trongëne la itre hna amekötin hnei Tusi Hmitrötr thatraqane la itre drikona me itre qatre thup. (1 Tim. 3:1-10, 12, 13; Tito 1:5-9) Nemene la ewekë hna amamane hnene la ketre trejine trahmany ka catre troa trongëne la itre hna amekötin hnei Tusi Hmitrötr, ngöne la angeic a catre cainöj me xome la itre hnëqa hna ahnithe koi angeic hnine la ekalesia, me amacane hnyawa la itre mekun hna troa qaja ngöne la itre icasikeu me wanga atrune la itre trejine me angeic? Angeice hi lai a amamane la aqane hnine angeic la huliwa i angeic hnine la ekalesia.
12. Tro la itre thöthi a amamane tune kaa la aja ka catre thei angatr kowe la nyipici?
12 Nemene la ewekë nyine troa kuca hnene la itre thöthi trahmany ka bapataiso hë, matre troa kökötre hnine la ekalesia? Ijije tro angatr a catre troa kökötre ngöne la “inamacane ne la [(ua)MN] me wangate hmekun,” hnene la hna atrehmekune la Tusi Hmitrötr. (Kol. 1:9) Maine tro angatr a inine hnyawa la Wesi Ula i Akötresie me catre hamë mekun ngöne la itre icasikeu ne la ekalesia, tro hë angatr a hetrenyi lai atrehmekune cili. Ijije mina fe tro la itre thöthi a eatrëne lai, hnene la hna thele troa lö ngöne la “qëhnelö ka ishaisha me hete huliwan,” ene lo nyimu pengöne huliwa i Akötresie ngöne la drai ka pexej. (1 Kor. 16:9) Maine tro sa xome la huliwa i Iehova, tre, ketre aqane mele lai ka lolo nge nyimutre la itre manathithi hne së hna troa kapa.—E jë la Ate Cainöj 12:1.
13, 14. Tune kaa la aqane wanga atrune la itre föe, la huliwa i angatr hnine la ekalesia?
13 Ijije mina fe tro la itre trejine föe a amaman, laka, angatr a wanga atrune la hnëqa i angatr ene la troa catre eatrëne la hna qaja ngöne Salamo 68:11. Easa e ka hape: “Tro Iehova a ulatine la wesi ula; ala nyimu la [“ite föe” MN] angete cainöjën’ ej.” Ame la ketre aqane tro la itre trejine föe a hetre hni ne ole kowe la huliwa i angatr hnine la ekalesia, tre, ene la troa catre kuca la huliwa ne inine la nöjei atr. (Mat. 28:19, 20) Qa ngöne lai, maine tro pala hi la itre föe a cainöj me huujëne la mele i angatr matre troa kuca la huliwa cili, tre, angatre hi lai a wanga atrune la hnëqa i angatr hnine la ekalesia.
14 Hnei Paulo hna cinyihane koi Tito, ka hape: “Tune la nöjei qate fö, troa thina ka ijiji Akötesie, . . . itete inine la nöjei ewekë ka loi; mate tro angat’ a inine la ite föe hmae troa mekune amekötin, me isa hnimi föen, me hnime la ite nekö i angat, me mekune amekötin, me pë ethan, me itete huliwa ngöne la hnalapa, me thina ka loi, me denge thenge la ite fö’ i angat, mate tha qaja angazone kö la wesi ula i Akötesie.” (Tito 2:3-5) Ijije tro la itre trejine föe ka macaj a hetre thangane ka loi kowe la ekalesia! Maine tro angatr a metrötrëne la itre trejine trahmany ka elemekene la huliwa, me xomi mekun ka loi ngöne la aqane heetr me isej me ngöne la itre nyine iamadrinë, tre, angatre hi lai a amamai tulu ka lolo kowe la itre xan, me wanga atrune la sipu huliwa i angatr hnine la ekalesia.
15. Nemene la nyine troa kuca hnene la ketre trejine föe ka thaa faipoipo kö, matre troa cile kowe la jole celë, ene la lapa caas?
15 Ame itre xaa ijin, maine jë ketre jol kowe la ketre trejine föe ka thaa faipoipo kö troa hetre sipu huliwa i nyiidro hnine la ekalesia. Hnene la ketre sör ka melëne la ewekë cili, hna qaja ka hape: “Ame itre xaa ijin, kola lapa caas hnene la atr ka thaa faipoipo kö.” Ame la kola hnyingë eahlo la aqane cile eahlo kowe la jole cili, tre, öni eahlo ka hape: “Hna xatua ni troa hetre sipu huliwange hmaca hnine la ekalesia, hnene la hna thithi me ini Tus. Eni pala hi a inine la aqane goeë ni hnei Iehova. Thupene lai, eni a thele troa xatuane la itre xan hnine la ekalesia. Celë hi la ka xatua ni troa hnehengazone la itre aja ne la itre xan hune la itre sipu ajange kö.” Hnei Iehova hna qaja koi Davita, ngöne Salamo 32:8, ka hape: “Tro ni a haji’ ö me alamekë eö.” Eje hi, Iehova pala hi a wanga atrune la itre aja ka eje thene la nöjei hlue i Nyidrë, tune mina fe la itre trejine föe ka thaa faipoipo kö; nge tro Nyidrëti a xatua angatr asë troa hetre sipu huliwa i angatr hnine la ekalesia.
Catre Jë Së Kuca La Huliwa Së!
16, 17. (a) Pine nemen matre maine hne së hna kapa la ihë i Iehova troa nyi atrene la organizasio i Nyidrë, tre, ketre mekune lai ka lolo lai hne së hna xom? (b) Tune kaa la aqane tro pala hi sa kuca la hnëqa së hnine la organizasio i Iehova?
16 Iehova a hnime me easenyi kowe la itre hlue i Nyidrë, angatr isa ala caas, hnene laka hetre imelekeu i angatr me Nyidrë. Hnei Iesu hna qaja, ka hape: “Pëkö ate ateine tro koi ni, e tha hna e angeice kö hnei Tetetro ate upi ni.” (Ioane 6:44) Ame thene la itre miliar lao atr e celë fen, hnei Iehova hna könë së troa hane nyi atrene la ekalesia i Nyidrë enehila. Maine tro sa kapa la ihë cili, tre, mekune ka sisitria lai hne së hna xom. Eje a hamë aliene la mele së. Nge drei la kola madrine me lolo la mele së troa hetre sipu huliwa së hnine la ekalesia!
17 Kola qaja hnene la atre cinyihane la salamo, ka hape: “Iehova fe, hnenge hna ajane la hne ne la ēnē i cilie. Kola cile la lue cange hune la ga thengölia; tro ni a atrunyi Iehova ngöne la ite icasikeu.” (Sal. 26:8, 12) Hetre huliwa hna hamë së isa ala caas hnene la nyipi Akötresie, e hnine la organizasio i Nyidrë. Maine tro pala hi sa trongëne la itre hna amekötine hnei Akötresie, me catre huliwa koi Nyidrë, tre, tro pala hi sa kuca la huliwa së hnine la ekalesia i Akötresie.
Mekune Pala Kö Nyipunie?
• Pine nemen matre loi me meköt e troa qaja ka hape, hetre huliwan asë hi la itre Keresiano hnine la ekalesia?
• Tro sa amamane tune kaa laka, easa hnine la huliwa së hnine la organizasio i Akötresie?
• Nemene la itre ewekë ka troa hetre thangan ngöne la huliwa së hnine la ekalesia?
• Tro la itre thöthi Keresiano me itre thupëtresij a amamane tune kaa, la aqane hnine angatr la huliwa i angatr hnine la ekalesia i Akötresie?