Mekene Fotrin
Tune Kaa La Aqane Eatrongëne Iehova La Organizasio i Nyidrë?
1. Tune kaa la aqan qaja hnei Tusi Hmitrötr la organizasio i Iehova, nge pine nemene matre ka nyipi ewekë catre lai koi së?
HAPEU, hetrenyi kö Akötresieti la ketre organizasio? Eje hi öni Tusi Hmitrötr, hetre organizasio i Akötresie. Kola mama hnin la Wesi Ula i Nyidrë, la ketre götrane ne la organizasio cili e koho hnengödrai. (Ezekiela 1:1, 4-14; Daniela 7:9, 10, 13, 14) Ngacama thaa öhne kö hnei lue meke së lai götrane cili, ngo ame pe atraqatr la thangane eje thene la itre nyipi hlue i Akötresie enehila. (2 Ite Joxu 6:15-17) Hetrenyi mina fe Iehova la ketre götrane la organizasio i Nyidrë ka mama e celë fen. Kola xatua së hnene la Tusi Hmitrötr troa trotrohnin la pengöne ej, memine la aqane eatrongëne ej hnei Iehova.
Kola Wangatrehmekun La Götran Ka Mama
2. Drei lo lai ekalesia hnei Akötresieti hna acil hnyipixen?
2 Ame ngöne la 1 545 lao macatre, tre nöje Isaraela la ekalesia i Akötresie. (Ite Huliwa 7:38) Ngo thaa hnei Angetre Isaraela kö hna trongën la itre wathebo i Nyidrë, nge hnei angatre fe hna thipe trije la Nekö i Nyidrë. Ame hë la pune lai, hnei Iehova hna thipetrije la ekalesia cili me nue trije ej. Hnei Iesu hna qaja kowe la itretre Iudra ka hape: “Hana wang, ase hë nue tije la uma i nyipunie nge pë hë alien.” (Mataio 23:38) Thupene lai, hnei Nyidrëti hna acile me isisinyikeu hmaca pena ha memin la ketre ekalesia ka hnyipixe. Hnei Nyidrëti hna iën la ala 144 000 lao atren, nge angatr a troa caas memine la Hupuna e hnengödrai.—Hna Amamane 14:1-4.
3. Nemene la ewekë ka traqa ngöne lo Penetekos 33 M.K. ka amamane hnyawa laka hnei Akötresieti hna acil pena ha la ketre ekalesia ka hnyipixe?
3 Hna siën hnene la uati hmitrötre i Iehova la itre pane atren la ekalesia ka hnyipixe cili, ngöne lo ijine Penetekos 33 M.K. Hna qaja hnei Tusi Hmitrötr la ewekë cili kola hape: “Nge traqa ha la drai ne penetekos, angat’ asë a ce lapa ngöne la hnë ka caas. Ame hna canga traqapi la ulili qa hnengödrai, kösë enyi ka hnahna cat, me atiqane la uma asë lo hnei angate hna lapa ngön. Ame hna mamapi koi angate la ite thineme ka pici kösë eë, kola isa të hui angat. Ame hna tiqa angat’ asë hnei Uati Hmitöt.” (Ite Huliwa 2:1-4) Kolo hi lai a amamane hnyawa hnene la uati hmitrötre i Akötresieti laka, ketre itre atr hmaca pena ha la hnei Nyidrëti hna iën matre troa kuca la aja i Nyidrë fene la musi Iesu Keriso e koho hnengödrai.
4. Drei enehila la organizasio i Iehova e celë fen?
4 Ame enehila e celë fen, tre, kolo pë hë lo thelene lo lai ala 144 000. Ngo thenge la itre hna perofetan hnei Tusi Hmitrötr, kola caasi memine lai thelen hnene la “ka ala nyimu ataqat” ne la itre “xa mamoe,” itre milio la etrun. Hnei Iesu lo Atre Thupë Mamoe Ka Sisitria hna icaasinekeune lai itre xaa mamoe cili memine lo thelen, haawe, caasi hi la hna axö mamoe nge nyidrëti la Atre Thupën. (Hna Amamane 7:9; Ioane 10:11, 16) Angatr asë hi lai la ka eköth la ekalesia ka caas, ene la organizasio i Iehova ka mama enehila e celë fen.
Organizasio Hna Eköth Hnei Akötresie
5. Drei la ka eatrongën la organizasio i Akötresie, nge tune kaa la aqane eatrongëne ej?
5 Hna cinyihan ngöne la Tusi Hmitrötr ka hape “ekalesia i Akötesie ka shewengönie” ke eje a amamane hnyawa laka Akötresieti la ka eatrongën ej. Akötresie la ka mus kowe la organizasio cili. Iehova a eatrongën la nöje i Nyidrë jëne Iesu, ngacama thaa öhnyi Nyidëti kö së ngo hna acili nyidrë e koho hnengödrai hnei Akötresie matre troa he ne la ekalesia e celë fen, nge ame la itre nyine troa trongën hnene la ekalesia cili, tre itre ej a meköl hnine la sipu Wesi Ula i Nyidrë ene la Tusi Hmitrötr.—1 Timoteo 3:14, 15; Efeso 1:22, 23; 2 Timoteo 3:16, 17.
6. (a) Tune kaa la aqane mama hnyawa ngöne lo hneijine i Iesu laka hna eatrongën la ekalesia qaa hnengödrai? (b) Nemene la ka amamane ka hape Iesu pala hi la he ne la ekalesia?
6 Kola öhne hnyawa ngöne lo Penetekos la aqane eatrongëne Akötresie la organizasio i Nyidrë. (Ite Huliwa 2:14-18, 32, 33) Kola mama hnyawa lai ngöne la aqane amekötin hnene la angela i Iehova e Afirik la huliwa ne cainöjëne la maca ka loi, memine fe lo kola drenge la ine ula i Iesu kola ahnith koi Paulo atre taraso la itre nyine tro angeic a kuca, memine hmaca fe lo Peteru a nyiqaane cainöje kowe la itretre Ethen. (Ite Huliwa 8:26, 27; 9:3-7; 10:9-16, 19-22) Ngo paatre hë enehila la itre ine ula qa hnengödrai, thaa tro hmaca kö së a öhne la itre angela, nge pë hmaca kö iamamanyikeu ne la uati hmitrötr. Ngo hnei Iesu pe hna ahnithe hnyawa ka hape: “Hana wang, ini a ce me nyipunie ngöne la nöjei drai asëjëihë uti hë la pune la fene hnengödrai.” (Mataio 28:20; 1 Korinito 13:8) Ame enehila tre, kola wangatrehmekune hnene la Itretre Anyipici Iehova laka Iesu la ka eatrongë angatr. Maine paatre ju nyidrëti tre, thatreine kö troa tro fë hnei angatr la maca ne Baselaia qëmekene la etrune la icilekeu enehila.
7. (a) Drei la itre atren la “hlue ka nyipici me ka inamacan,” nge pine nemen? (b) Nemene la hnëqa hna hamën kowe la “hlue”?
7 Qëmekene tro Iesu a meci, hnei nydrëti hna qaja kowe la itretre drei nyidrë la pengöne la “hlue ka nyipici me ka inamacan,” nyidrëti la maseta, nge hnei nyidrë hna hamën kowe lai hlue cili la ketre hnëqa ka ketre pengöne kö. Ka cile hë lo lai “hlue” cili ngöne la kola elë hnengödrai eë hnene la Joxu, nge tro pala hi a kökötre catre la huliwa ne ej ngöne lo ijine nyidrëti a bëeke hmaca troa joxu ngöne la Baselaia i nyidrë, ngo thaa mama kö koi atr. Thaa caa atr kö lo lai hlue cili, ngo kolo lai a qaja la ekalesia ne la itre hna iën hnei Keriso. Ngöne laka ase hë itöne eje hnene la madra i nyidrë, haawe Iesu a aceitunëne lai ekalesia cili me “hlue” i nyidrë. Hnei nyidrëti hna upe eje troa inine la itre atr me ithua i angatr pala hi, me “thewe xeni [ne la ua] koi angate ngöne la nyipi ijin.”—Mataio 24:45-47; 28:19; Isaia 43:10; Luka 12:42; 1 Peteru 4:10.
8. (a) Nemene la itre hnëqa ne la hlue enehila? (b) Pine nemen matre nyipi ewekë catr la aqane ujë së kowe la ini hna hamën hnei Akötresie jëne la hlue cili?
8 Thaa hna öhne kö hnei lue meke i atr ngo bëeke hmaca ha la joxu lo macatre 1914, nge mama hnyawa ha laka hna kuca hnyawa hnene la hlue la huliwa hna ahnithe koi angeic, ene pe hamëne xan hmaca ju koi angeic la itre hnëqa ka tru catr ngöne lo 1919. Qaane ju hi lai, hnene lai hlue hna cainöjën la Baselaia e cailo fen, me acaasin la ka ala nyimu atraqatr lo angetre thili koi Iehova matre troa thupë angatr ngöne la ijine akötr atraqatr. (Mataio 24:14, 21, 22; Hna Amamane 7:9, 10) Nyipi ewekë mina fe kowe la ka ala nyimu atraqatre cili la xeni ne la ua, nge kola hane thawa fe koi angatr hnene la hlue. Maine easë a ajan troa amadrinë Iehova, nyipi ewekë tro sa kapa me trongëne la ini hnei Nyidrëti hna hamën jëne la hlue cili.
9, 10. (a) Ame ngöne la hneijine i Iesu, nemene la aqane seng hnene la itre Keresiano la jol göi itre ini me göi troa amekötin la aqane troa cainöjën la maca ka loi? (b) Tune kaa la aqane ce eköth la itre huliwa ne la itre hlue i Iehova enehila?
9 Nemene la nyine troa kuca, maine troa hetre isazikeu ngöne la itre ini nyine troa hamën maine göi aqane troa huliwan la itre xaa hnepe mekun? Kola qaja ngöne la Ite Huliwa mekene 15 la aqane senge la ketre hnepe jol ka traqa kowe lo angetre ethen ka hane xötrei lö troa hane Keresiano. Hna tro fë la jole cili kowe la itre aposetolo memine la itre qatre thup ne Ierusalema, ke angatr lo Collège central. Ngacama ame la itre atren tre itre ka tu së hi, laka ame fe itre xaa ijin tria la aqane wai ewekë, ngo ame pe tre hnei Akötresieti hna ië angatr troa cilën la huliwa i Nyidrë. Loi pe angatr a xomi meköt pala hi qa hnine la itre xötr ne la Tusi Hmitrötr ka ihmeku memine la itre mekun nyine ce ithanatan, me ce wange la enyipicin laka hnene la menen la uati hmitrötr hna fe gojenyin la huliwa ne cainöjëne la maca ka loi koi angetre ethen. E thupene hë lai, angatre hi a axeciëne jë la itre mekun nyine trongën. Hnei Akötresieti hna amanathithin la ewekë hna hnëkëne cili. (Ite Huliwa 15:1-29; 16:4, 5) Celë hi matre kola canga upe jë hi hnene la Collège central, la itre Keresiano ka troa catre tro fë la maca ne Baselaia.
10 Ame ngöne la hneijine së, ame la itre atren la Collège central ne la organizasio ka mama e celë fen, tre, angatre hi lo itre trejine hna iën hnene la uati hmitrötr qa ngöne la nöjei nöje ka isapengön; angatr a huliwa ngöne lo iwahutine la itre Temoë i Iehova. Fene la musi Iesu Keriso, kola sajuën la hmi ka wië hnene la Collège central ngöne la nöjei nöj, nge angatre mina fe a elemekene la itre huliwa ne cainöje ne la Itretre Anyipici Iehova ngöne itre ekalesia laka itre thauzane hë la etrun enehila. Kola ce thawa hnene la itre atren la Collège central la aqane mekune i Paulo, ngöne la nyidrëti a cinyanyi kowe la itre trejine me nyidrë kola hape: “Ke tha eëhuni kö a musinëne la lapaune i nyipunie, ngo eëhuni a xatuane la madine i nyipunie, ke cile huti hë nyipunie hnene la lapaun.”—2 Korinito 1:24.
11. (a) Tune kaa la aqane acil la itre qatre thup memine la itre drikona? (b) Pine nemen matre loi e tro së a ce huliwa hnyawa memine la itre trejine hna acil?
11 Kola Mejiune hnene la Itretre Anyipici Iehova ne la fene asë tro la Collège central a iën la itre trejine ka maca ngöne la ua, matre hamëne koi angatr la hnëqa troa acil la itre qatre thup me itre drikona matre troa thupën la itre ekalesia. Itre ej e hnine la Tusi Hmitrötr la itre nyine troa kuca hnene la itre hna troa acil, me lapa atre laka itre atr lai ka thaa pexeje kö. Ketre hnëqa ka tru catr xajawa i Akötresie la huliwa hna xome hnene la itre qatre thup ka iën memine lo itre ka troa acil la itre trejin ngöne la itre hnëqa cili. (1 Timoteo 3:1-10, 12, 13; Tito 1:5-9) Qa ngöne lai, angatr a sipone jëne la thith la uati hmitrötre i Akötresie matre troa xatua angatr, nge angatre fe a nue la Wesi Ula i Nyidrë troa eatrongë angatr. (Ite Huliwa 6:2-4, 6; 14:23) Epi tro pala hi së a amamane ka hape, easë a wangatrun la “itre atr nyine ahnahna,” ka xatua së asë troa “ce hni ngöne la lapaun.”—Efeso 4:8, MN, 11-16.
12. Tune kaa la aqane xome Iehova la itre föe matre troa kuca la itre hnei Nyidrëti hna amekötin?
12 Kola amekötin hnei Tusi Hmitrötr laka, qanyine la itre trahmanyi troa thupën la ekalesia. Thaa kolo kö lai a wangacon la itre föe, pine laka itre xan thei angatr lo itre ka troa hane atrene la Baselaia, nge nyimutre fe la itre ka xome la ketre götrane ka tru ne la huliwa ne cainöj. (Salamo 68:11) Ketre, hlemu loi la ekalesia qa ngöne laka hnei angatr hna kuca hnyawa la itre hnëqa i angatr e hnine la hnepe lapa. (Tito 2:3-5) Ngo ame göi troa hamë ini e hnine la ekalesia, tre hna nue hmekuj kowe la itre trahmany hna acil thatraqane lai.—1 Timoteo 2:12, 13.
13. (a) Thenge la hna qaja hnene la Tusi Hmitrötr, tune kaa la aqane troa xome hnene la itre qatre thup la hnëqa i angatr? (b) Nemene la hnëqa ka lolo nyine tro asë hi së a xom?
13 Ame ngöne la fen, tre kola wangatrune la ketre atr qa ngöne laka angeic a lapan la ketre göhnë ka tru, ngo ame ngöne la organizasio i Akötresie caasi hi la hna amekötin: “Ame la ka co hi e nyipunie asëjëihë, celë hi ka tru.” (Luka 9:46-48; 22:24-26) Kola ithuecatr hnei Tusi Hmitrötr kowe la ite qatre thup, troa itre tulu ka lolo kowe la hna axö mamoe i Akötresie ene la edrö i Nyidrë, ngo thaa tro kö a musi ceitun me itre joxu. (1 Peteru 5:2, 3) Thaa hna ahnithe hmekuje kö kowe la ala xalaith ngo kowe asë hi la Itretre Anyipici Iehova, itre trahmanyi me itre föe, qa i angatr asë hi la troa nyi trenge ewekën la Ka Pucatin Asë, me ithanata ngöne la atresiwa i Nyidrë cememine la hni ka ipië, me troa cainöjën kowe la nöjei atr ngöne la nöjei götrane la maca ne Baselaia i Nyidrë.
14. Jëne la itre xötr ne la Tusi Hmitrötr hna hamën, ithanatane jë la itre hnying ngöne la pune la paragaraf.
14 Loi e tro sa isa thel ka hape: ‘Hapeu, eni kö a trotrohnin me madrin la aqane eatrongën Iehova la organizasio i Nyidrë e celë fen? Kolo kö a amamane lai hnene la aqane ujëng, me itre trenge ewekëng, me itre huliwang?’ Loi e tro sa thele ewekë ngöne cahu itre mekun hna hamën nyine troa xatua së.
Maine nyipici laka eni a drengethenge Keriso, He ne la ekalesia, nemene la nyine tro ni a kuca thenge la itre xötre ne la Tusi Hmitrötr hna hamën? (Mataio 24:14; 28:19, 20; Ioane 13:34, 35)
Drei la hnenge hna metrötrën ngöne la eni a kapa me olen la itre hna hamën hnene la hlue memine la Collège central ne ej, thatraqane la meleng ngöne la götrane la ua? (Luka 10:16)
Tune kaa la aqane troa ujë hnene la ketre e easë kowe la itre xaa atr e hnine la ekalesia, nge ka nyipi ewekë catr kowe la itre qatre thup? (Roma 12:10)
15. (a) Nemene la hna amaman hnene la aqane ujë së kowe la organizasio i Iehova e celë fen? (b) Nemene la itre ijine tro sa anyipicin laka ka sili trenga thoi lae Diabolo, nge amadrinë Iehova mina fe?
15 Kola eatrongë së enehila hnei Iehova jëne la organizasio i Nyidrë e celë fen, nge Iesu la he ne ej. Qa ngöne lai, tro ha mama la aqane mekune së göne la musi ka pë sane i Akötresie, hnene la aqane ujë së kowe lai ewekë hnei Nyidrëti hna ami trepen. (Heberu 13:17) Kola catre fë hnei Satana ka hape, ame la ka tru koi së, tre itre sipu aja së. Ngo maine easë a thele troa nyihlue i Akötresieti hnyawa me neën troa tro pan la itre sipu aja së, easë hi lai a amamane hnyawa laka ka sili trenga thoi lae Satana. Maine tro sa amamane la ihnimi së me metrötre së kowe la itre ka elemeken la ekalesia, ngo easë pe a thipëne troa ‘atrunyi ate mate hete thangan,’ haawe, easë hi lai a amadrinë Iehova. (Iuda 16; Heberu 13:7) Ame la easë a mele nyipici kowe la organizasio i Iehova, tre, easë hi lai a amamane hnyawa laka Iehova hi la nyipi Akötresi së, nge easë a caasi ngöne la hmi i Nyidrë.—1 Korinito 15:58.
Revizio
• Nemene la organizasio i Iehova enehila e celë fen? Nemene la aliene ej?
• Drei la hna acil troa Hene ne la ekalesia, nge hna jëne nemen matre nyidrëti a eatrongë së hnyawa?
• Nemene la aqane mekune ka lolo nyine tro sa lapa fë ngöne la easë a ce mele memine la itre atren la organizasio i Iehova?
[Iatr ne la götran 133]
Iehova a eatrongë së jëne la organizasio i Nyidrë e celë fen hna elemeken hnei Iesu