Troa Xome La Ita Ne Thup Celë e 5 Semitrepa Me Wiike Cili
Nyima 65 Me 52
Hapeu, Tro Jë Kö Nyipunieti a Nyipi Ewekëne La Itre Aqane Hmekë Nyipunie Hnei Iehova?
“Dei la gojeny, tro nyipunie a trongën ej.”—IS. 30:21.
1, 2. Nemene la mekune hnei Satana hna thele troa eatrën, ngo nemene fe la ixatua hna hamëne hnene la Wesi Ula i Akötresie?
M AINE hetre pano e kuhu gojeny, ngo tria kö la aqane köja gojenyi ne ej, tre, ka tro lai pano cili a amenune la atre xötrëne la gojeny, nge tro mina fe ej a xom lai atr koi pune ka ngazo. Pane mekune ju nyipunie laka, ase hë thuemacanyi nyipunie hnene la ketre sinee ka hape, hnene la ketre atr hna thë troa saze la aqane köja gojenyi ne lo lai pano, matre troa eatr la itre atr ka thaa hmeke kö. Hapeu, tro jë kö nyipunieti a nyipiine la ithuemacany hna hamën?
2 Ame Satana, tre, angeice hnyawa hi la ketre ithupëjia ka iakötrë, nge ase hnyawa ha angeice mekune troa amenu së. (Hna ama. 12:9) Angeice hi la qaane lo itre iajojezi hne së hna ce ithanatane hë ngöne lo hna cinyihane hnapan, nge angeic a xom la itre iajojezi cili nyine ajeanyi së qa ngöne la gojenyi ne la mele ka thaa ase palua kö. (Mat. 7:13, 14) Ame pe la eloin, tre, kolo kö a hmekë së hnene la Akötresie së ka hnimi së, matre thaa tro kö sa trongëne la itre gojenyi ka iamenumenu hna “köjane” koi së hnei Satana. Tro sa pane ce ithanatane la köni xaa iajojezi Satana, memine la aqane hmekë së hnene la Wesi Ula i Akötresie matre thaa tro kö a amenu së. Ame la easa troa kapa la ixatua cili, tre, tro sa mekune laka, kösë lo Iehova a ce tro me easë, nge Nyidrëti a qaja koi së ka hape: “Dei la gojeny, tro nyipunie a trongën ’ej.” (Is. 30:21) Tro ha kökötre la aja së troa trongëne la itre trenge ewekë hnei Iehova hna hamën nyine hmekë së, e tro sa mekune lapaane la itre trenge ewekë cili.
The Xötrethenge Kö La Itre “Ate Ini Thoi”
3, 4. (a) Pine nemen matre ceitune hi la itretre ini thoi me itre itim ka qaqacil? (b) Ka xulu qa kaa la itre xaa atre ini thoi, nge nemene la aja i angatr?
3 Pane mekune jë nyipunie laka, ase petre hi nyipunieti tro ngöne la hnapapa, nge nyipunieti ha öhne la ketre itim. Nanyi petre kö nyipunie, ngo nyipunieti a mekune laka, loi e canga traqa pi nyipunieti e cili ngöne itim ke pi tro pala ha nyipunieti a ij. Ngazo pe, traqa ju hi nyipunieti a öhne laka, ka qaqacile la itim. Ceitune hi la itretre ini thoi memine la itre itim ka qaqacil. Ke thaa tro jë kö a madrine la atr ka thele thei angatre la timi ne mel, ene la nyipici. Qa ngöne lai, Iehova a hmekë së jëne la lue aposetolo, ene Paulo me Peteru. (E jë la Ite Huliwa 20:29, 30; 2 Peteru 2:1-3.) Ngo drei la itretre ini thoi? Tro la itre trenge ewekë hnei Akötresie hna hamëne jëne la lue aposetolo, a xatua së troa atre la pengö i angatr memine la aqane huliwa i angatr.
4 Öni Paulo kowe la itretre thup ne la ekalesia ne Efeso, ka hape: “[Troa] xulu thei nyipunieti kö la nöjei ate ka troa qaja la nöjei ewekë ka qaliqali.” Ketre hnei Peteru fe hna cinyihane kowe la itre trejine me nyidrëti ka hape: “Troa hetenyi la nöjei ate ini thoi thei nyipunie.” Haawe, ekaa la hnene la itretre ini thoi hna fetra qa ngön? Ame itre xan, tre, itre ka lö pi qa ngöne la ekalesia. Kolo hna hape, itre ka iamenumenu.a Nemene la aja i angatr? Thaa hane hi angatre lö trije la organizasio lo hnei angatr ekö hna hnim, me ketre sipu inine la itre xaa atr e kuhu trön, matre itretre drei angatre ju hë; ngo Paulo a qaja ka hape, angatre pe a thele “troa hule koi angate la itete deng.” Thaa itre xaa atre kö la itretre dreng hna qaja e celë; ngo itretre drei Keriso hi. Ke ame la hna thele hnene la itretre ini thoi cili, tre, ene la troa apaatrene la lapaune ne la itre atr ka mele nyipici kowe la ekalesia, me hule ananyi angatre pi qa ngöne ej. Kösë lo “ite luko ka pi öni”, nge ka thele tha.—Mat. 7:15; 2 Tim. 2: 18.
5. Nemene la aqane huliwa ne la itretre ini thoi?
5 Nemene la aqane huliwa ne la itre ka iamenumenu? Kola mama ngöne la aqane ujë i angatr ka hape, ka iaö angatr. Angatr a thele troa “aciane juetëne” la itre mekune ka thoi. Ame la itre ini hna hamën hnene la itre ka iamenumenu, tre, itre ej a löthe mitiine la mekuna ne la itre atr. Ame la aqane sili “tenge thoi” hnei angatr, tre, tune lo aqane huliwa ne lo itre xaa pengöne atrekënö ka thele troa lö fë ngöne la ketre nöje la itre pepa laka, kösë lo nyipi pepa hi, ngo itre pepa pe hna sipu kuca hnei angatr. Itre ka iamenumenu a haöthe la fen hnene “la ite thoi angat” me “ujëne . . . la ite hna cinyihane” matre troa sajuëne la itre sipu mekuna i angatr. (2 Pet. 2:1, 3, 13; 3:16) Easa atrehmekune e celë ka hape, thaa angatre kö a thele la nyine loi koi së. Qa ngöne lai, maine tro sa xötrethenge angatr, tre, caasi hi la pun koi së, laka triane pë hë së la gojenyi ka troa xomi së kowe la mele ka thaa ase palua kö.
6. Nemene la eamo hnei Tusi Hmitrötr hna hamë së göne lo itre ka iamenumenu nge ka thaa jole kö koi së troa trotrohnin?
6 Nemene la aqane tro sa ujë kowe la itretre ini thoi? Thaa jole kö tro sa trotrohnine la eamo hna hamëne hnei Tusi Hmitrötr. (E jë la Roma 16:17; 2 Ioane 9-11.) Kola qaja ka hape, “Tro trö angate jë.” Ame ngöne la itre xaa Tusi Hmitrötr, tre, kola qaja ka hape, “the kepe angatre kö,” maine “cil ananyi angatre pi”! Trotrohnine hnyawa hi së lai. Drei la ketre ceitun: önine la droketre i nyipunie ka hape, wange pala kö lo itre atr hna tithe hnene lo ketre mec ka solesol, nge hna mecin, wanga hane jë tithi nyipunie hnene lai meci cili. Trotrohnine hnyawa hi nyipunie la hnei nyidrëti hna qaja, celë hi kepin matre nyipunieti a trongëne la itre hna amekötine hnei nyidrë. Ame la itre ka iamenumenu, tre, kösë lo ka cia meci la mekuna i angatr, nge angatr a ajane tro fe a hane löthe la mekuna ne la itre xaa atr hnene la itre ini angatr ka thoi. (1 Tim. 6:3, 4) Ngo Iehova a tune lo droketre, ke Nyidrëti a upi së troa ananyi angatr. Trotrohnine hi së la hnei Nyidrëti hna qaja; ngo hapeu, ajane hnyawa kö së troa trongëne la itre aqane hmekë së hnei Nyidrë?
7, 8. (a) Nemene la aqane tro sa cil ananyine la itretre ini thoi? (b) Pine nemene laka, ajane catre nyipunie troa thipetriji angatr?
7 Nemene la aqane tro sa cil ananyine la itretre ini thoi? Thaa tro pi kö sa kepe angatr e koilo ngöne itre hnalapa së, maine ibozu pena me angatr. Ketre, thaa tro kö sa e la itre itusi angatr me sin ngöne televizio la itre hnei angatr hna qaja, maine thele ewekë pena ngöne la itre sites internet i angatr, me qeje mekune ngöne lo hna hëne ka hape, itre blogs i angatr. Nemene la ka upi së troa ujë tune lai? Ihnimi hi. Easa hnime la “Akötesieti ka nyipici;” qa ngöne lai, thaa pi tro kö sa kapa la itre ini ka thoi nge ka isazikeu memine la Wesi Ula i Nyidrë ka nyipici. (Sal. 31:5; Ioane 17:17) Easë mina fe a hnime la organizasio i Nyidrë, ka hamëne koi së la itre ini ka lolo nge ka ketr la hni së; ka tune la ëje i Akötresie, ene Iehova memine la aliene ej, memine fe la aja i Nyidrëti kowe la fen, memine la pengö i itre ka mec, memine fe la mejiune laka, hetre mele hmaca. Hapeu, mekune pala kö nyipunie lo ijine nyipunieti a xötrei kapa la itre ini celë me itre xane ju kö? Haawe, hnauëne laka, tro hmaca kö nyipunieti a hnangenyëne la itre atr ka qaja angazone la organizasio ka hamëne koi nyipunie la itre ini ka lolo?—Ioane 6:66-69.
8 Qaja ju hë hnei itretre ini thoi la nöjei ewekë, ngo thaa tro kö sa xötrethenge angatr! Hnauëne laka, tro sa xötrethenge la itre atr ka tune la itre itim ka qaqacil, nge atre hnyawa hi së ka hape, pëkö madrine hne së hna troa kapa qa ngön? Loi e tro pe sa catre mele nyipici koi Iehova me organizasio i Nyidrë; ke thaa mano kö eje ini së la itre trenge nyipici qa hnine la Tusi Hmitrötr, kösë lo itre timi ka loi nge ka hetre thangane ka loi kowe la ngönetrei së.—Is. 55:1-3; Mat. 24:45-47.
The Nyipiine Kö “La Ite Ifejicaate”
9, 10. Nemene la aqane hmekë Timoteo hnei Paulo göne la itre ifejicaatre, nge nemene la itre xaa pengöne ifejicaatre hnei Paulo hna mekun? (Goeëne ju fe la itre mekun e cahu fen)
9 Ame itre xaa ijin, tre, canga öhne hi së ka hape, tria kö la aqane köja gojenyi hnene la ketre pano, ngo ame itre xaa ijin, tre, thaa canga mama kö koi së la ewekë cili. Ka tune hnyawa hi la itre iajojezi Satana lai. Caa iajojezi Satana hnei Paulo hna upi së troa hmekën; kola qaja la “ite ifejicaate.” (E jë la 1 Timoteo 1:3, 4.) Maine thaa ajane kö së troa jea qa ngöne la gojenyi ne mel, tre, nyipi ewekë tro sa atre la pengöne memine la nyine tro sa kuca matre thaa tro kö sa nyipiine la itre ifejicaatre cili.
10 Hnei Paulo hna nyiqaane qeje ifejicaatre ngöne lo pane tusi nyidrëti koi Timoteo, ketre atre thup ne ekalesia hna acile matre troa thupëne la ehmitrötrene ej, me xatuane la itre atrene ej troa mele nyipici. Ame la hnëewekë qene heleni hnei Paulo hna xom nyine troa qaja la ifejicaatre, tre, kola qaja la itre ewekë hna majemine edromën, ngo thaa hna nyipi melëne kö la itre ewekë cili. Ma Paulo jë ekö a xom lai hnaewekë cili, ke nyidrëti jë a troa qaja la itre ini ka thoi hna hamëne hnei hmi, nge hna qaja atrune ngöne la itre ifejicaatre.b Itre ini lai ka pëkö enyipiewekën kowe la mele së nge ka gufa e tro sa ithanatan. Ketre pengöne iajojezi lai hna huliwaane hnene la Taane la iaö, ene Satana, matre triane pë hë la nyipi gojenyi hnei itre ka thaa hmeke kö. Qa ngöne lai, hnei Paulo hna hamëne la eamo ka thaa jole kö troa trotrohnin; kola qaja ka hape, the nyipiine kö së la itre ifejicaatre!
11. Nemene la aqane huliwaane Satana la hmi ka thoi matre troa amenune la itre atr, nge nemene la itre eamo hne së pe hna troa trongëne matre thaa tro kö a hane amenu së?
11 Nemene la itre xaa pengöne ifejicaatre ka troa amenune la atr ka thaa hmeke kö? Ame la itre xan, tre, kolo hi lo itre ini ka thoi hna hamëne hnei hmi, maine pena kolo itre hna majemine edromëne ngöne la isa nöje së, ngo thaa itre hna nyipi melëne kö; itre ewekë lai ka troa ananyi së “qa ngöne la nyipici.” (2 Tim. 4: 3, 4) Nge ame Satana, tre, angeic a nyi “angela ka lai” matre troa amenune la itre atr hnene la hmi ka thoi. (2 Kor. 11:14) Ame lo hmi ka selëne ka hape, atre hamëne la ini qaathei Keriso (ene lo hna hape, Chrétienté), ej a inine kowe la itre atr la tirinite, me hape, hetre ifereno, nge e meci la atr, tre, mele kö la u. Itre ini lai hne së hna öhne ngöne lo itre ifejicaatre. Ketre, kolo fe a hane sin hnene la hmi cili la itre feet ka tune la Noël, me Paak. Kösë lo pëkö engazone troa feetën, ngo ame pe, hna nyi trepene la itre feete cili hnene la itre ifejicaatre me itre huliwa ne la hmi wanaithihlë. Maine tro sa drei Akötresie, lo ka upi së troa ananyine la itre ewekë cili, itre ewekë “ka sis,” tre thaa tro kö a hane amenu së hnene la itre ifejicaatre.—2 Kor. 6:14-17.
12, 13. (a) Nemene la itre trengathoi hna sil hnei Satana, ngo nemene la itre nyipi ini ka jelethoine la itre trengathoi cili?(b) Nemene la nyine tro sa kuca matre thaa tro kö a hane amenu së hnene la itre ini ka thoi Satana?
12 Hetre itre xaa trenga thoi hna sil hnei Satana matre troa amenune la atr ka thaa hane kö hmek. Ame la ketre, tre, kola qaja ka hape: Isa kuci ajan. Itre mekune lai hna qaja lapaane koi së jëne i poos maine televizio, maine jëne itre nyine iamadrinë pena. Ame la ini celë ka isazikeu hnyawa memine la itre trepene meköti Akötresie, tre, ej a huli së troa kei kowe la itre aja ne ngönetrei. Ngo nyipi ewekë troa amekötine la itre jë së, nge Akötresieti hmekuje hi la ka atreine xom la hnëqa celë. (Iere. 10:23) Kola qaja hnene la ketre hna sili ewekë ka hape: Pë kö hnei Akötresieti hna troa kuca thatraqane la fen. Maine tro sa xom la aqane waiewekë celë, me xom la aqane mele ne la itre atr ka thaa mekune kö la drai elany, tre, tro hë sa tui “ite ka hminyaje me ite ka tha wa kö.” (2 Pet. 1:8) Ngo calemi catre hë la drai Iehova, nge loi e ka hnëkë hnyawa së troa melëne la ijine cili. (Mat. 24:44) Ame pena ha la ketre hnaithanata, tre, kola qaja ka hape: Thaa Akötresieti kö a kukehni së isa ala caas. Maine tro sa drenge la trenge ewekë celë hna sili hnei Satana, tre, tro hë sa thixötr me mekune ka hape, thaa pi tro kö Nyidrëti a hane hnimi së. Ngo ka hnime Iehova la itre hlue i Nyidrë isa ala caas, nge ka tru angatre koi Nyidrë.—Mat. 10:29-31.
13 Maine hetre itre aqane waiewekë me itre thiina ngöne la fene i Satana hne së hna nyiqaane mekuhnine ka hape, ma pë kö engazon, tre, loi e tro sa hmeke catr. The thëthëhmine pi kö së ka hape, Satana hi la Taane la nöjei aqane iaö. Nyipi ewekë tro sa trongëne la itre eamo hna amexeje lapaane hnene la Wesi Ula i Akötresie, ke celë hi aqane tro sa neëne la itre “ifejicaate hna inamacanën.”—2 Pet. 1:16.
The “Xöte Thenge Satana” Kö
14. Nemene la ithuemacany hnei Paulo hna hamëne göne lo itre sine föe hmae, nge pine nemene matre loi e tro sa wanga atrune la ithuemacany celë?
14 Pane mekune jë së ka hape, ame ngöne la ketre sane gojeny, tre, öhne ju hi së la ketre pano hna sija ka hape, “Jëne Tro Koi Satana.” Drei la atre pi xötrëne lai gojenyi cili? Ame pe, Paulo a thuemacanyi së ka hape, hetre itre ka troa uku së troa “jea me xöte thenge Satana.” (E jë la 1 Timoteo 5:11-15.) Hnei Paulo ekö hna hmekëne lo “ite sine föe hmae,” ngo thatraqai së mina fe la itre trepene meköti hnei nyidrëti hna hamën. Maine jë thaa mekuna i itre föe kö ekö troa xötrethenge Satana, ngo hna qejeqeje angatr hnene la itre thiina i angatr. Nemene hë la itre thiina cili ka qajaqaja ka hape, angatr a xötrethenge Satana? Tro sa pane ithanatane la itre ithuemacany hnei Paulo hna hamën göne la troa ixöjetrij.
15. Nemene la mekune hnei Satana hna thele troa eatrën, nge nemene la aqane xatua së hnei Paulo matre atreine së troa wanga atrehmekune la itre nyinyithiina i Satana?
15 Satana a thele jëne troa sewe së troa cainöjëne la maca ka loi. (Hna ama. 12:17) Angeic a thele troa traqa kowe lai mekune cili, jëne la itre huliwa ka troa aluzi traeme me jëne la itre thiina ka troa thë la caasi së. Drei la ketre, hna qaja amamane hnei Paulo, ene la troa “hminyaj me tro agö.” Ame ngöne la hneijine kola elë la mo, laka enehila hi, tre, easa aluzine la traeme së me traeme i itre xane hnene la hna iupi fë jëne internet la itre e-mails ka pëkö enyipiewekëne nge ka thoi mina fe e itre xaa ijin. Ame la ketre thiina hna qaja hnei Paulo, tre, ene la troa “ömë ewekë,” ene la troa ixöjetrij. Ame la thangane la hna qeje ketre, tre, tro fe hë së a hane sili ewekë angeic, nge celë hi lai ka troa aciane la iwesitrë. (Ite edomë 26:20) Hne së ju hë hna thë maine thaa hne së kö hna thë, ngo ame pe, maine ka iqeje së, tre, easë hi lai a nyitipu Satana lo Diabolo.c Ame fe la ketre thiina hna qaja pala hi hnei Paulo, tre, ene la troa “lue ime i hudumen,” kola qaja la troa lö hnine menune la ifekë melen. Thaa qâ së kö troa qaja koi itre xan la aqane tro angatr a xomi mekun. Ame asë hi la itre aqane ujë caha, tre, celë hi ka troa aciane la gomegome the së, nge ka tro mina fe a sewe së troa kuca la hnëqa hnei Akötresieti hna ahnithe koi së, ene la troa cainöjëne la maca ne Baselaia. Maine thaa sine hë së la huliwa i Iehova, tre, tro pena ha sa nyiqaane xötrethenge Satana; thatreine kö tro sa pë enexöle së.—Mat. 12:30.
16. Nemene la itre eamo qa hnine la Tusi Hmitrötr nyine tro sa trongën, matre thaa tro kö sa “jea me xöte thenge Satana”?
16 Maine tro sa trongëne la itre eamo hna hamëne hnei Tusi Hmitrötr, tre, celë hi lai ka troa xatua së matre thaa tro kö sa “jea me xöte thenge Satana.” Drei la ketre eamo ka lolo hna hamëne hnei Paulo, ka hape: “Catre jë troa huliwa i joxu pala hi.” (1 Kor. 15:58) Maine tro sa catre sine la itre huliwa ne la Baselaia, tre, celë hi lai ka troa thupë së qa ngöne la itre huliwa ka gufa nge ka aluzi traem. (Mat. 6: 33) Loi e tro sa porotrikëne la itre “tenge ka loi.” (Efe. 4:29) Catre jë së troa kötrene la itre ixöjetrij, nge xomehnöthe ju së la që së matre thaa tro kö sa kötre fe la itre trenge ithanata cili.d Catre jë së metrötrëne me mejiune kowe la itre trejine me easë. Celë hi lai ka troa upi së troa qaja la itre trenge ka loi, me trije la itre ewekë ka thi lapa. “Catejë nyipunie troa . . .isa kuci qân.”(1 Thes.4:11) Nyipici laka, tro sa kukehnine la itre atr, ngo loi e tro fe sa thupëne laka, easa kö a metrötrëne la mele i angatr, me wanga atrunyi angatr. Ketre, the thëthëhmine kö së ka hape, thaa qâ së kö troa musinëne la aqane tro la itre atr a xomi mekun ngöne la itre götrane laka, meköti tro angatr a ketre sipu ië ewekë.—Gal. 6:5.
17. (a) Pine nemene laka, Iehova a fe amamane koi së la itre ewekë thaa nyine tro kö sa xötrethenge? (b) Nemene la hnei nyipunie hna mekune troa kuca ngöne la nyipunie a goeëne la gojenyi hnei Iehova hna upi nyipunie troa trongën?
17 Drei la madrine së la Iehova a qaja amamane hnyawa koi së ka hape, hetre itre ewekë thaa tro pi kö sa xötrethenge! Ngo thaa tro pi kö sa thëthëhmine laka, ame la ka upi Iehova troa hamëne la itre ithuemacany hne së hna ithanatane ngöne la hna cinyihane celë memine lo hnapan, tre, ene la ihnimi atraqatre i Nyidrëti koi së. Nyidrëti a ajane matre thaa tro kö a melëne la itre akötr me itre thangane ka ngazo ka xulu qa ngöne la hna xötrethenge Satana. Maine nyipici laka, ka ilitr la gojenyi hnei Iehova hna upi së troa trongën, ngo ame pe, celë hi gojenyi ka troa xomi së kowe la mele ka thaa ase palua kö. (Mat. 7:14) Epi the tro kö a nanazije la aja së troa trongëne la itre aqane hmekë së hnei Iehova, kola hape: “Drei la gojeny, tro nyipunie a trongën’ ej.”—Is. 30:21.
[Ithueamacany]
a Ame la itre “ka iamenumenu,” tre, itre ka tro trije la nyipi hmi me icilekeu memine ej, ke ithupëjia ha angatre memin.
b Ka tune la tusi Tobia hna cinanyine ekö hmekune lo hneijine i Paulo nge ka qeje haze me kuci iöni me itre ka trene drösinöe, laka hna ujëne la aqane qeje pengöne matre kösë lo itre ewekë hna nyipi melën, ngo thaa eje pe.—Goeëne ju fe lo itus Perspicacité, volume 1, götrane 122.
c Ame la aliene la hnëewekë hna hape, “diabolo” ngöne qene heleni, tre, “atre sili thoi.” Ketre ëje i Satana hi lai hna atë matre troa qaja la pengö i angeic, laka, celë hi la taane la thoi.—Ioane 8:44; Hna ama. 12:9, 10.
d Goeëne ju fe lai mekune hna ekö hagen, hna hape, “Hna Eth Ngöne La Eny”
Nemene La Aqane Tro Nyipunieti a Sa?
Nemene la aqane tro sa isa trongëne ngöne la mele së la itre aqane hmekë së hnene la itre mekene tusi celë?
[Hna eköhagen/Iatr ne la götran 7]
Hna Eth Ngöne La Eny
Kola ini së hnene la ketre ifejicaatre i angetre Iudra la engazone la troa kötre fë ithanata. Nyimu aqane edromëne angatre la ifejicaatre cili, ngo ame pe caasi hi la ini ka tru hna hamën.
Drei la pengöne la ketre thupëtresij. Hnei angeice hna trongëne la traone i angeic me sili ewekëne la qatre ne lai traon. Ngo ame hë e thupen, angeice ha atrehmekune laka, tria ha angeic, ame hnei angeice hna tro pi kowe lo qatre trahmanyi matre troa qeje menu. Angeice fe a qaja koi nyidrëti ka hape, ame asë hi la hnei nyidrëti hna ajan, tre, tro angeic aejëne matre tro nyidrëti a kapa la menu i angeic. Qa ngöne lai, qatre trahmanyi a upi angeice troa xom la ketre tane he me kuie zezen ej, nge tro angeic a eth la itre pene tane he ngöne la eny. Thaa nyipi trotrohnine kö angeice la kepine matre nyidrëti a upi angeice troa kuca la ewekë cili, ngo ame pe, tre, hnei angeice hna trongën. Nge thupene jë hi lai, angeice ha bëeke hmaca kowe la qatre trahmany, me hape:
“Hapeu, kapa ha nyipëti la hnenge hna qeje menu?”
Kola sa hnene la qatre ka hape: “Pane tro hmaca jë eö troa xawane la itre pene tane he.”
Önine jë hi lo thupëtresiji ka hape: Tro hmaca kö ni a xawane tune kaa nge ase hë ufetrije hnei eny!
Önine jë hi la qatre trahmanyi ka hape: Ceitune hi la itre pene tane he cili hna eth ngöne la eny memine la itre trenge ewekë hnei eö hna sil; thatreine hmaca kö tro sa bëek.
Trotrohnine hnyawa hi së la ini. Thatreine kö tro sa köletrije la akötr hne së hna kuca hnene la hna sili ewekëne la ketre atr. Haawe, loi e tro sa thupëne hnyawa matre thaa tro kö sa kötre fë ithanata. Nyipici, maine ka hmaloi e troa xawane hmaca la itre pene tane he, ngo ame koi itre akötr ka xulu qa ngöne la hna kötre fë ithanata, tre, ka cile huti pë hë itre ej.