Nyihlue i Iehova Hmekuje Jë
“Maria a . . . denge la wesi ula i [Iesu]. Nge Maretha a ngazo [maine hnehengazone] la ite huliwa ka kösau.” —LUKA 10:39, 40.
1, 2. Pine nemene matre tru la hnei Iesu hna hnimi Maretha, ngo nemene la mekune ka tria thei angeic?
AME la epuni a mekune la pengöi Maretha, xa i Lazaro, nemene la ka canga mama koi epun? Tusi Hmitrötr a amamane ka hape, Maretha la ketre sipu sinee i Iesu, nge kolo fe a qaja ka hape, tru la ihnimi nyidrë koi angeic. Eje hi laka, tha angeice casi kö la föe hnei nyidrëti hna hnim me metrötrën. Maria fe, jini Maretha la ketre sipu sinee i nyidrë. Ketre tru fe la ihnimi nyidrë kowe la thine i nyidrë, Maria. (Ioane 11:5; 19:25-27) Ngo pine nemene matre tru la hnei Iesu hna hnimi Maretha?
2 Tru la ihnimi Iesu koi Maretha, ke, ka lolo thiina nge ka hame catr angeic, nge atre catre huliwa fe. Ngo ame la ka sisitria catr, tre ene la lapaune ka catr thei angeic. Angeic a mejiune kowe la nöjei trenge ewekë i Iesu, nge xecie hnyawa koi angeic ka hape, nyidrëti hnyawa hi lo Mesia. (Ioane 11:21-27) Ngo eje hi laka, tha ka pexeje kö Maretha, ka tria fe angeic. Ame la ketre ijine Iesu a traqa ne wai nyidro, tre kola wesitr hnei Maretha koi Maria, me upi Iesu troa pane ameköti Maria. “Joxu fe, tha mekune kö cilie laka ase hë nue ni hnei jininge troa kuci huliwa hmekuj ? ulatinejë koi nyëne mate troa xatua ni.” (E jë la Luka 10:38-42.) Pine nemene matre ithanata jë Maretha tune lai, nge nemene la hne së hna inin qa ngöne la aqane sa i Iesu?
HNA AJOLË MARETHA HNENE LA ITRE XA EWEKË
3, 4. Nemene la thiina i Maria hna kapa madrine hnei Iesu, nge nemene la hna inin hnei Maretha? (Wange ju la pane iatr.)
3 Tru la ole i Iesu koi Maretha me Maria pine la hnei nyidroti hna könë nyidrë kowe la uma i nyidro, nge aja i nyidrëti fe troa xome la hnepe ijine cili troa ce thawa me nyidro la itre nyipici ka tru. Canga nyimenyime hi Maria lapa ezi nyidrë, “me denge la wesi ula i nyidë.” Tru la aja i angeic troa kapa la nöjei ewekë qaathene la Atre Ini Ka Tru. Nge ame Maretha, tre maine ju, ijiji angeic hi troa hane drei Iesu. Ketre, maine pane amë ju angeice la huliwa i angeic, me hane drei nyidrëti hnyawa, ma tro fe hi nyidrëti lai a qaja atrunyi angeice fe.
4 Ngo, tru kö la itre xa jole i Maretha. Kola hnëkëne la xene ka tru koi Iesu, me kuca la itre xa ewekë ju kö matre troa tro loi la ijine cili. Ame la angeic a öhne laka tha xatua angeice kö hnei Maria, angeic a wesitr me eetr koi Iesu. Atre hnyawa hi nyidrë ka hape, Maretha a thele troa kuca atrune pala ha, matre nyidrëti a qaja menyikën ka hape: “Maretha, Maretha, nyipoti a kuke hnine me hace hnine la nöjei ewekë ka kösau.” Ame koi nyidrë, tre tro hi a kuca la ka ijij göi xen. Thupene lai, nyidrëti a qaja atrunyi Maria, ke hnei angeice hna drei nyidrëti hnyawa. Öni nyidrë: “Ase hë Maria iëne la götrane ka loi lo ka tha tro hmaca kö a xome qa thei angeic.” Eje hi laka, tro Maria elanyi lai a thëthëhmine la hnei angatr hna xen, ngo tha tro pi kö angeice lai a thëthëhmine la itre ini hnei angeic hna kapa qaathei Iesu, matre celë hi Iesu a qaja aloinyi angeic. Traqa koi 60 lao macatre thupene lai, öni Ioane aposetolo: “Iesu a hnimi Maretha, me tejine me nyido.” (Ioane 11:5) Haawe, kola mama hnene la itre trenge ewekë celë laka, hnei Maretha hna kapa hnyawa la aqane ameköti angeic hnei Iesu, celë hi ka upi angeic troa huliwa catre pala hi koi Iehova ngöne la mele i angeic.
5. Pine nemene matre jole catre enehila e tro pala hi a goeëne catrëne la huliwa i Iehova? Nge nemene la mekune hne së hna troa ce ithanatan?
5 Tha sihngödri kö koi së enehila laka, nyimutre catre hmaca kö hnei ewekë hune ekö ka troa ajeanyi së qa ngöne la huliwa i Iehova. Hna hmekëne la itre trejine hnene la Ita Ne Thup ne 15 Semitrepa 1958 qene Papale matre tha tro kö la technologie, ene la itre ewekë ka hnyipixe ne la fen a ajeane la mekuna së qa ngöne la huliwa i Iehova. E nöjei drai, kola mama la ketre ewekë ka hnyipixe; kola mama e hnine la itre zonal ne fen, me radio, me sinema, me televizio, itre ewekë ka hlemu. Önine pala hi lai Ita Ne Thup, kolo pala hi elanyi a easenyi catre kowe la pune la fene celë, nge “tro fe a kökötre catre la etrune la itre ewekë ka troa ajeane la mekuna së.” Nyimutre catre hë la itre ewekë ka troa ajeane la mekuna së enehila, tha hna tune kö ekö. Nemene la nyine tro sa kuca matre tro sa nyitipu Maria me goeëne catrëne pala hi la huliwa i Iehova?
THE HULIWANE ATRUNE KÖ LA ITRE EWEKË NE FEN
6. Nemene la aqane huliwane la itre ewekë ka hnyipixe ka mama ngöne la fen hnene la nöje i Iehova?
6 Hnene la itre hlue i Iehova hna cainöjëne la maca ka loi jëne la itre ewekë ka hnyipixe ka mama ngöne la fen. Qëmekene lo pane isi ka tru uti hë la kola ase, hnei angatre hna amamane lo “Photo-Drame de la création.” Jëne la itre diapositives ka hetre han, nge hna ce elone me ikaho, hnei angatre hna ketr la itre milio lao atr ngöne la itre nöj ka nyimutre. Ame ngöne la pune lai “Photo-Drame,” tre, kola amamane la hneijine ka tingeting, ijine troa mus kowe la fen hnei Iesu Keriso. Ame hë e thupen, hnei angatr hna thuemacanyine la maca ne Baselaia jëne la radio kowe la itre milio lao atr e cailo fen. Ame enehila, easa ketr la itre atr ngöne la nöjei götrane hnei angatre hna mele ngön, memine fe lo itre götrane ka lapa cas jëne ordinatör.
The nue kö la itre ewekë ka pë alien troa ajeanyi së qa ngöne la nyipi huliwa (Wange ju la paragarafe 7)
7. (a) Pine nemene matre ka hetre ethane la troa huliwane atrune la itre ewekë ne fen? (b) Nemene la nyine tro sa hmekën? (Wange ju la ithuemacany.)
7 Hnei Tusi Hmitrötr hna hmekë së matre tha tro kö sa huliwan atrune la itre ewekë ne fen. Kola qaja la troa xome menune pala ha la traeme së kowe la itre ewekë ka mama ngöne la fen. (E jë la 1 Korinito 7:29-31.) Pëkö engazone la itre xan, ngo thupëne kö matre tha tro pe itre ej a aluzine la traeme së. Ka tune la itre ijine mano së, ene la kola e tus, maine goeë televizio, maine troa ihamë ngöne la itre xa götran, maine troa itö, maine troa thele lo itre ewekë ne fen ka hnyipi mama, tune lo mobilis maine itre xa ewekë ju kö ka tune lai. Nyimutre la itre atr ka ithanata ngöne ëternet, maine iupifë maca jëne mail, maine pena goeë nuvel lapa me goëne la itre ka hun ngöne la itre elo.a (Wange ju la ithuemcany.) (Ate Cainöj 3:1, 6) Maine tro sa nue menune pala ha la traeme së kowe la itre huliwa ka tha nyipiewekë, pëhë ijine së kowe la itre ewekë ka tru, ene la troa kuca la huliwa i Iehova.—E jë la Efeso 5:15-17.
8. Pine nemene matre tha tro pi kö sa hnine la itre ewekë ne fen?
8 Satana a thele jëne matre troa huli së kowe la itre ewekë ka troa ajeanyi së qa ngöne la huliwa i Iehova. Hnei angeice hë hna ujë tune lai ngöne lo hneijine ne la itre pane keresiano, ngo catrehnine catre pala kö enehila. (2 Timoteo 4:10) Matre loi e tro pala hi sa waipengö së kö göne la itre ewekë ne fen, me canga amekötine e ijine petre kö. Öni Tusi Hmitrötr, tha tro pi kö sa hnine la itre ewekë ne fen. Tro pe sa catre akökötrene pala hi la ihnimi së koi Iehova. E tro sa ujë tune lai, tha tro kö a jole koi së troa drengethenge Iehova, me lapa qale catre koi Nyidrë.—1 Ioane 2:15-17.
GOEËNE CATRËNE JË LA ITRE HULIWA KA NYIPIEWEKË
9. Nemene la ini hnei Iesu hna hamën kowe la itretre drei nyidrë, nge nemene la tulu hnei nyidrëti hna amaman?
9 Casi hi la ini hnei Iesu hna hamën kowe la itretre drei nyidrë memine lo hna hamën koi Maretha. Hnei nyidrëti hna thuecatre koi angatre troa goeëne catrëne la huliwa i Iehova memine la Baselaia i Nyidrë. (E jë la Mataio 6:22, 33.) Hnei Iesu hna ketre sipu amamane la tulu ka sisitria. Tha ka trene ewekë kö nyidrë, ketre pëkö sipu uma i nyidrë maine hlapa pena.—Luka 9:58; 19:33-35.
10. Nemene la tulu ka lolo hnei Iesu hna amë pe koi së?
10 Tha hnei Iesu kö hna nue la ketre ewekë troa ajeanyi nyidrë qa ngöne la huliwa ne cainöj. Tha qea ju kö thupene la hnei nyidrëti hna nyiqaane la huliwa i nyidrë, hnene la ka ala nyim e Kaperenauma hna iele Iesu troa nango lapalapa hmaca kö ngöne la traone i angatr. Nemene la hnei nyidrëti hna kuca? Hnei nyidrëti pala hi hna goeëne catrëne la huliwa hna athipe koi nyidrë. Öni nyidrë: “Qânge troa cainöjëne la maca ka loi ne la baselaia i Akötesie kowe la ite xa lapa pena ; ke hna upi ni thatraqane lai.” (Luka 4:42-44) Hnei Iesu hna trongëne la itre gojenyi gaa nany matre troa cainöjëne la maca ka loi kowe la itre atr ka ala nyim. Maine nyipici laka, ka pexeje nyidrë, ngo hnei nyidrëti fe hna hane kucakuca, ke, tru catre la huliwa i nyidrë, matre nyipiewekë fe koi nyidrë troa hane mano.—Luka 8:23; Ioane 4:6.
Iesu a ini së ka hape, e tro sa thele troa hetre mo, tro lai a ajeanyi së qa ngöne la huliwa i Akötresie
11. Nemene la hnei Iesu hna kuca la kola sipo nyidrë troa nyinyine la jol ne la ketre atr? Nemene la ini hnei Iesu hna hamëne kowe la itretre drei nyidrë?
11 Ame la ketre ijine Iesu a hamëne la ketre ini ka tru kowe la itretre nyidrë, thupatë nyidrëti ju hi hnene la ketre atr, me hape koi nyidrë: “Ulatinejë kowe la tejine me ini troa ce thawa me ini la edö i nyiho.” Tha hnei Iesu kö hna thele troa nyinyine la jol ka traqa kowe lai atr. Ke tha aja i nyidrëti kö troa ajeanyi nyidrë qa ngöne la huliwa i Iehova. Hnei nyidrëti pe hna xome la ijine cili troa hamëne la ketre ini ka tru celë: E tro angatr a thele troa hetre mo, tro lai a ajeanyi angatre qa ngöne la huliwa i Akötresie.—Luka 12:13-15.
12, 13. (a) Nemene la hna kuca hnei Iesu nge hna haine hnene la itretre Heleni e Ierusalema? (b) Nemene la aqane ujë i Iesu la Filipo a sipo nyidrë troa ithanata me itretre Heleni?
12 Ketre ijine akötre koi Iesu lo itre drai tixenuë i nyidrë e celë fen. (Mataio 26:38; Ioane 12:27) Atre hnyawa hi nyidrë ka hape, tro nyidrëti akötre catre uti hë mec. Ketre atre fe hi nyidrë ka hape, tru catre hmaca kö hnei huliwa i nyidrë qëmekene tro nyidrëti a mec. Ame lo sabath 9 Nisan, hnei Iesu hna lö e Ierusalema hune asina. Nge hna atrunyi nyidrë ceitu me Joxu hnene la ka ala nyim. (Luka 19:38) Nge ame la drai thupen, Iesu a helëne trije la itretre salem, me itretre huliwa qenatrekënö qa hnine la ēnē.—Luka 19:45, 46.
13 Ame la itre xa atre Heleni, itre ka traqa ne troa hane atrune la Paseka, tre, hnei angatre hna öhne la hna kuca hnei Iesu, ame hna hai hnei angatr. Matre hnei angatre hna sipo Filipo troa ithanata me Iesu. Ngo tha hnei Iesu kö hna thele matre tro la itre atr a ce xöle me nyidrë, me isigöli nyidrë qëmekene la itre ithupëjia. Ka mama cile hnyawa kö koi nyidrë la itre huliwa ka nyipiewekë catre hmaca kö. Hnei nyidrëti pala hi hna goeëne catrëne la aja i Iehova göi nyidrë, ene la troa huujëne la mele i nyidrë. Celë hi matre amexeje jë nyidrë kowe la itretre drei nyidrë ka hape, easenyi hë matre meci pi nyidrë, nge tro la itre ka xötrethenge nyidrë a ketre nue fe la mele i angatr. Öni nyidrë: “Ame la ate hnime la mele i angeic, tro ha pate lai ; nge ame la ate methinëne la mele i angeice e celë fen, tro angeic’ a thupën’ eje, uti hë la mele, ka tha ase palua kö.” Ngo hnei Iesu fe hna qaja xeciëne ka hape, ‘tro ha atrune hnei Tretretro’ la itretre drei nyidrë me hamë angatr la mele ka tha ase palua kö. Haawe, celë hi ini ka tru hnei Filipo hna troa hamën kowe la angetre Heleni.—Ioane 12:20-26.
14. Nemene la hnei Iesu hna thupëne catrën ngöne la mele i nyidrë?
14 Maine nyipici laka, huliwa ne cainöj la ka tro pa ngöne la mele i Iesu, ngo tha celë hmekuje kö la hnei nyidrëti hna kuca. Hnei nyidrëti hna hane sine la ketre faipoipo, nge ame e cili hnei nyidrëti hna ujën la tim koi waina ka loi. (Ioane 2:2, 6-10) Hnei nyidrëti fe hna hane ce xen me itre sinee i nyidrë ngöne la itre hnalapa i angatr, me itre xane ju kö ka kapa la maca ka loi. (Luka 5:29; Ioane 12:2) Ame la ka sisitira, tre, hnei Iesu pala hi hna thupën matre hetre ijine i nyidrë troa mano. Nge ketre, troa hetre ijine fe koi nyidrë troa pane lapa cas göi troa mekune me thith.—Mataio 14:23; Mareko 1:35; 6:31, 32.
“NUE TIJE [PI] LA NÖJEI HACE ASË!”
15. Nemene la hnei Paulo hna qaja kowe la itre keresiano, nge nemene la tulu hnei angeice hna hamën?
15 Öni Paulo, ceitune hi la itre keresiano me itre ka iwaja. Maine aja i angatr troa traqa kowe la hna ie, loi e tro angatr a nuetrije la nöjei ewekë ka troa ahacenyi angatr maine troa acilë angatr. (E jë la Heberu 12:1.) Hnei Paulo hna ketre sipu amamai tulu. Maine ju ijiji angeice hi troa trena mo, me troa ketre hene ne hmi ka hlemu i angetre Iudra, ngo hnei angeice hna nue la mele cili göi troa huliwa catre kowe la “nöjei ewekë ka nyipi ewekë catr.” Hnei angeice hna catre cainöje trootro, me feke kowe la itre götrane nöj ka nyimutre, tune e Suria, me Asia, me Makedonia, me Iuda. Hnei angeic hna hnine la thupe i angeic, ene la mele ka pë pun e hnengödrai. Öni angeic: “Kola thëthëhmine la ite ewekë hna hutrö kow, me qëmeke cate kowe la ite ewekë ngöne la qëmekeng, me nyenyape kowe la hatene troa hete thupene.” (Filipi 1:10, MN; 3:8, 13, 14) Tha ka faipoipo kö Paulo, “mate pëkö jolen’ e troa . . . nyi hlue ne la Joxu.”—1 Korinito 7:32-35.
Hnei Paulo hna nue la mele i angeice ekö göi troa huliwa catre kowe la “nöjei ewekë ka nyipi ewekë catr”
16, 17. Nemene la aqane tro asë hi së a nyitipu Paulo? Nemene la hna kuca hnei Mark me Claire?
16 Tui Paulo, hetre itre hlue i Iehova enehila ka tha mekune kö troa faipoipo göi troa huliwa catre hmaca kö koi Iehova. (Mataio 19:11, 12) Eje hi laka, pëkö hnëqa i angatr tune la ka faipoipo. Ngo ame pe, ngacama ka faipoipo ju hë së maine tha ka faipoipo, ngo loi e tro asë hi së a “nue tije la nöjei hace asë” ka troa ajeanyi së qa ngöne la huliwa i Iehova. Maine jë hetre nyine tro sa saze ngöne la mele së matre tha tro kö a aluzine la traeme së, ngo tro pe a catre huliwa hmaca kö koi Iehova.
17 Mark me Claire la lue trefën ka tru ngöne e pays de Galles. Hnei nyidroti hna isa nyiqaane pionie lo nyidroti a fenesi hna ini. Nge hnei nyidroti pala hi hna pionie thupene la faipoipo i nyidro. Ngo aja i nyidro troa akökötrene la huliwa i nyidro. Öni Mark: “Hnei nyiho hna salemëne la hnalapa i nyiho ka köni hnahag, me nue la huliwa i nyiho göi troa ahmaloeëne la mele i nyiho. Celë hi lai ka aijijë nyiho troa hane sine la huliwa ne Xupi Uma e cailo fen.” Ame ngöne la 20 lao macatre ka ase hë, hnei nyidro hna ixatua xupi Uma Ne Baselaia ngöne la itre götrane Afrique. Ame itre xa ijin, ke pëkö manie i nyidro, ngo tha ase pi kö Iehova nuaxöji nyidro. Öni Claire: “Tru catre la madrine la troa nue la mele koi Iehova. Tru catre hë la itre sinee i nyiho ngöne la itre nöj hnei nyiho hna tro ngön, matre tha gufa kö la mele i nyiho. Kösë pëkö pengöne la itre ewekë hnei nyiho hna nu, ke tru catre kö la madrine hna kapa qa ngöne la hna huliwa koi Iehova o drai.” Casi hi la mekuna i angeic memine la itre xa trejin ka huliwa i Akötresie o drai.b—Wange ju la ithuemacany.
18. Nemene la itre hnying nyine troa isa waipengöi epun?
18 Ame koi epun, ijije kö troa tru catre hmaca kö la madrine i epuni ngöne la huliwa i Iehova? Hetre itre ewekë kö ka ajolë epuni troa kuca la itre huliwa ka nyipiewekë catr? Maine eje hi, nemene la nyine tro epuni a kuca? Maine jë, loi e tro epuni a wange hmaca la aqane tro epuni a e me inine la Tusi Hmitrötr. Tro la tane mekune ka troa xulu a qejepengöne lai.
a Wange ju la tane mekune hna hape, “Ame La Ate Wangadrapa Tre Kola Kapa La Nöjei Tenge Ewekë Asë.”
b Wange ju fe la itre tane mekune hna hape, “Itre Ka Sipu Saen,” ngöne la itre Ita Ne Thup nyine inin.