Aqane Troa Thele Troa Porotrike Hnyawa Memine La Itre Atr

¹ Maine tro sa hetrenyi la ketre aqane troa mekune ka lolo, eje hi lai laka, tro ha atraqatre la madrine së nge troa hetre thangane ka loi la huliwa ne cainöje së. Ame ngöne la easë a cainöjëne la maca ka loi, ngöne itre hnalapa trootro, e cahu gojeny maine ngöne la itre xaa götrane pena, loi e tro sa thele troa hetre thangane ka loi la huliwa së. Loi e tro sa thele troa ithanata memine la ketre atr, me mekune ka hape hetre hni ne mamoe la atr cili, maine tro kö angeic elanyi a kapa la maca ne Baselaia. Ame ngöne la Iesu a upe la itretre drei nyidrë troa cainöj, hnei nyidrëti hna hamën la eamo celë, kola hape: “Nge ame la uma hnei nyipunie hna troa lö kow, pane qaja, ka hape, Tro ha manathithi la lapa celë.” (Luka 10:​5, 6) Thaa hnei angatre kö hna canga ati hatren la itre atr, maine “ate troa manathith” hnine la uma maine thaa troa manathithi pena. Drei la ketre aqane troa thele troa porotrik! Tune kaa la aqane tro sa thele troa ujë tune lai ngöne la easë a cainöj ngöne itre hnalapa trootro?

² Thaa Tro Kö a Luelue Ngöne La Easë a Ithanata: Thaa easë hmekuje kö a tro fë hmi, ngo easë lai a cainöjën la nyipici ka troa eatrongëne la itre atr kowe la mel! Atre hi së la pengöne la mel elany. Atre hi së la itre kepin matre pëkö pune ka loi kowe la fene celë, memine la nyine troa kuca hnene la itre atr ka hni ka meköt matre troa atre la nyin la itre jol. Aqane ithanata lai ka troa xatua së troa ithanata tune la itre aposetolo, ngöne laka hnei angatr hna catre cainöj, matre goi kapa fe la itre hnei angatr hna qaja hnene la itre ithupëjia me angatr. Kola qaja ngöne Ite Huliwa 4:​13, ka hape: “Angat’ a goeëne la cate i Peteru me Ioane, . . . angat’ a wangate hmekunyi nyido laka luete qa thei Iesu.”

³ Maine easë a ajan troa ketr la hni ne la itre atr ka drei së, nyipi ewekë catr tro sa thupëne la aqane tro sa ithanata. Canga tro hi a thipetriji së hnene la itre atr e thaa loi kö la aqane ithanata së, nge eje hi lai laka thaa tro jë kö së a ketr la hni ne la ketre atr maine aciane pena e kuhu hni angeic la ajan troa drei së. Hetrenyi la itre aqane ithanata ka troa hetre thangane ka loi, tune la hna hape: “Eni a mejiune laka tro nyipunieti a hane öhnyi thangane ka loi qa ngöne la hna inine hnyawa la Tusi Hmitrötr.” Maine pena: “Eni a ajan tro nyipunie a hane kapa la itusi celë. Celë hi ketre itus ka nyipi ewekë catre nyine troa xatua nyipunie troa trotrohnine la Tusi Hmitrötr, nge troa hetre thangane ka lolo koi nyipunie memine la hnepe lapa i nyipunie.”

⁴ Loi e Troa Amaman La Ketre Ithuemacanyi Ka Lolo: Ame ngöne la easë a cainöje trootro, hne së pala hi hna qejepengön la itre jol ka eje ngöne la fen. Ngo ka nyipi ewekë catre kö troa canga amamane kowe la itre atr la aqane tro Akötresie a nyi nyin la itre jol, memine la itre manathith hnei Nyidrëti hna troa hamën ka troa nyihnan la itre akötr enehila. Loi e tro sa thele la itre aqane ithanata ka lolo ka troa xatuan la itre atr hne së hna cainöje kow ngöne itre hnalapa trootro; matre tro angatr a öhne laka ame la maca hne së hna tro fë, tre celë hi la maca ka loi.

⁵ Maine lolo la aqane tro fë së la maca ka loi, eje hi lai laka, tro ha kökötre la madrine së ngöne la easë a cainöje ngöne itre hnalapa trootro. Tro hë së a goeën la ketre atr ceitune me ketre ka troa inine elany la Tusi Hmitrötr, ketre atr ka ajane la nyipici. Thaa tro kö së a nanazij ngöne la kola thaa drei së hnene la itre atr, maine ngöne la angatr a sa angazon la easë a ithanata. Nyipici laka, ketre thangane ka loi la troa kapa la nyipi atrehmekun ne la nyipici, ka nuamacanyi së, nge eje the së la ajan troa tro fë la maca ka loi cememine la aqane ithanata ka loi.