Easë a Cainöjëne La Maca Ka Loi
1 Ketre hnëqa ka lolo, la troa tro fë la “evangelia ne la ite ewekë ka loi!” (Rom. 10:15) Easë a tro fë trongëne la maca ka ithuecatre kowe la itre atr ka pëkö mejiun, nge ka jole la itre mekun. Tro sa ixatua tune kaa, matre tro angatre a hane öhne laka, easë a tro fë “la maca ka loi”? —Is. 52:7.
2 Hnëkëne jë la ketre ithuemacanyi ka lolo: Troa hetre thangane ka loi la itre hne së hna qaja, e hne së hna qaja atrune la itre ewekë ka loi. Qa ngöne lai, ame la easë a hnëkëne la itre aqane nyiqaane ithahnata së me wange hmaca la itusi nyine tro fë, ke, nyipi ewekë tro sa wangatrune la itre götrane nyine mejiune kow, ngöne la ithuemacanyi hne së hna tro fë. Maine tro së a qaja trongëne la mejiune qa hnine la Tusi Hmitrötre cememine la lapaune me madrin, ke, tro fe lai a hane hetre trengecatre së.—Ite edomë 25:11.
3 Ngacama tro sa utipine la itre atr ngöne la angatre a qeje pengöne la aqane akötrëne la mele i angatre hnene la itre ejolene la fen, ngo loi e tro sa qaja atrune koi angatre la pengöne la Baselaia i Akötresie, ene la sipu nyin la itre jole ka tru. Ketre, ngöne la easë a porotrikëne la “drai ne nyi thupene” i Iehova, drai ka troa xulu, easë fe a troa amamane la nyipi aliene la xötrehnaewekë hna hape “maca ka loi kowe la ite ka aköt. ” (Is. 61:1, 2) Loi e troa trotrohnine hnyawa hnene la itre atr, laka jëne manathithi asë la itre hnei Iehova hna troa kuca, nge hetre pune ka loi mina fe koi së asë.
4 Tro Fë Jë La Nyipici Cememine La Nyipi Madrin: Maine menyike la hne nyinawa së, nge hetre mejiune the së, ke, troa hetre ajane thene la itre atr troa drei së. Maine hetrenyi the së la aqane wai ewekë ka loi, ke, tro hë la itre ka drei së a wangatrehmekune laka, easë a “madine ngöne la mejiun.” (Rom. 12:12) Thaa tro kö a jole koi angatre troa kapa hnyawa la maca ka loi. Eje hi laka, nyipi ewekë tro pala hi së a hetrenyi la aqane wai ewekë ka loi, me madrine ngöne la nöjei götrane la huliwa ne cainöj.
5 Thaa easë hmekuje kö itretre tro fë maca ka loi a troa hamë ithuemacany. Ame la maca hne së hna tro fë, ke, eje fe a hamë nyipi mejiune kowe la mele enehila, me kowe fe la mele elany. (1 Tim. 4:8) Haawe, jëne la itre hne së hna qaja kowe la itre atr, troa wangatrehmekune hnei angatre la elolone la aqane waiewekë së, ene pe angatre a hane kapa ju fe la maca ka loi. Maine tro së a wangatrune hnyawa la itre ewekë hne së hna qaja, me thupëne la aqane qaja së itre ej, easë hi lai a upe la itre atr ka hni ka meköti troa kapa la maca ka loi hne së hna cainöjëne trongën!