Nyitipu Iehova Jë “Akötesie Tene Manathith”
1 Ame la aja i Iehova, tre, tro la itre atr a madrin. Eje e hnine la Wesi Ula i Nyidrë la itre manathith ka lolo hnei Nyidrëti hna hnëkëne amë hë thatraqane la itre atr. (Is. 65:21-25) Loi e troa mama kowe la itre xaa atr laka, hetre madrine së qa ngöne la hne së hna ce thawa me angatr “la evangelia ka lolo i Akötesie tene manathith.” (1 Tim. 1:11) Loi e troa mama ngöne la aqane ithanatane së la maca ne Baselaia, la ihnimi së kowe la nyipici memine la aqane wanga atrune së la itre atr hne së hna cainöje kow.—Rom. 1:14-16.
2 Nyipici laka, ame e itre xaa ijin, hnene la itre jol matre thaa madrine kö së. Ame ngöne la itre xaa teritoar, tre, ala xalaithe hi la itre atr ka kapa hnyawa la maca ne Baselaia. Hetrenyi la itre ijin easa cile kowe la itre jole ngöne la mele së. Maine easa ajan troa madrine pala hi, loi e tro sa mekune hnyawa la enyipiewekën me eloine kowe la itre atr ngöne la teritoare së troa dreng me trotrohnine la aliene la maca ka loi ne la Baselaia. (Rom. 10:13, 14, 17) Maine tro sa mekune hnyawa lai, haawe, tro ha xatua së troa catre qaja amamane la itre hnei Iehova hna hnëkëne cememine la ihnim, nyine mele koi së.
3 Qaja Atrune Jë La Itre Ewekë Elany: Nyipi ewekë tro fe sa wanga atrune la itre hne së hna qaja. Maine hne së hna nyiqaane porotrikëne la ketre jol maine ketre nuvele pena hna atre hnene la itre atr, ngo loi e tro sa neëne troa ithanatane hmekuje la itre ewekë ka ngazo cili. Ame la qa së, tre, troa tro fë la “loi.” (Is. 52:7; Rom. 10:15) Ame la maca ka loi celë, tre, hna nyitrepene hnene la itre hnei Akötresieti hna thingehnaeane göne la itre ewekë ka lolo ka troa traqa elany. (2 Pet. 3:13) Lapa mekune ju itre ej me xome la itre xötr ne la Tusi Hmitrötr matre troa “atuthe la itete thë fë hni.” (Is. 61:1, 2) Celë hi aqane tro lai a xatua së isa ala caas troa eje pala hi la madrine memine la aqane wai ewekë ka loi the së.
4 Nyipici laka, troa mama hnyawa kowe la itre atr la madrine së ngöne la easa cainöje trootro. Haawe, ame ngöne la easa ce thawa la maca ka loi memine la itre atr ne la teritoare së, loi e tro pala hi a mama the së la thiina ka eje thei Iehova, ene laka, “Akötesie tene manathith.”