Loi e Catre Me Maca Së
1 Ame ngöne lo kola wathebo Peteru me Ioane troa cainöj, hnei nyidroti hna sa ka hape: “Ke tha’teine kö nyiho troa tha qaja la nöjei ewekë hnei nyiho hna goeëne me deng.” (Ite Huliwa 4:20) Nemen la ka aijijë nyidroti troa catr cainöj? Hnei nyidroti hna “thith,” ene pe “hna tiqa angat’ asë hnei Uati Hmitrötr, ame hnei angatre hna qaja la wesi ula i Akötresie hnene la cat.” (Ite Huliwa 4:31) Ketre tu së mina fe, atreine hi tro sa catre troa cainöj, e hne së hna xötrethenge lai tulu i nyidro.
2 Ngo tune kaa la aqane tro sa catr troa ithanata, nge ame ngöne la ketre götran, tre, easë a thele troa hmekën la aqane tro së a ithanata? Ame la ketre aqane qejepengön hnene la ketre diksioner, la hmek, tre kola hape, ‘ketre aqane waiewekë ka loi ngöne la nyine troa kuca, maine ngöne la nyine troa qaja matre thaa tro kö a akötrën la atr hne së hna troa ithanata kow.’ Troa xatua së troa hmekën la nyine tro sa qaja, e hne së hna thel troa eköth hune la itre mekun hna pi ithanatan me easë hnene la ketre atr. Maine tro së a inin la aqane troa thele mekun me qejepengön hnyawa la itre mekun kowe la itre atr, eje hi laka, tro ha aijijë së troa hmekën la aqane tro së a ithanata.—Wange ju la g99 22/2 g. 4, 5; yb 88 g. 47.
3 Loi e Troa Atreine Tuluth La Aqane Troa Tro Fë Ithanata: Nyipi ewekë troa atreine tuluth la aqane troa tro fë la maca, ene la troa catre ithanata, nge tro mina fe a hmekën la aqane troa ithanata, ketre, matre troa hetre thangan ka loi pala hi la huliwa ne cainöje së. Hanawang la ketre ceitun, nemen la aqane tro së a sa la hnyinge ne la itre xaa atr, hna hape, ‘Nyipici kö laka, hetre eloine asë hi la nöjei hmi?’ Kola sa mekötin, me hmekën la hnyinge celë hnine la itus Comment raisonner götrane 311. Ketre, maine tro la ketre atr a hnyingën la kepin matre easë pala hi a tro troa wang la itre atr ka thaa ce hmi kö me easë, nge ka isa lapaune kö, haawe, atreine hi tro së a xom la itre mekun nyine sa lai hnying, hna hamën ngöne la götrane 401 ne la itus Comment raisonner, ngo tro pala hi së a mekun laka, maine tro sa catre fë la itre mekun qa hnine la Tusi Hmitrötr, ngo loi e tro fe a hmekën la aqane ithanata. Kola thel hnene la itre xaa atr la kepin matre thaa hane kö la Itretre Anyipici i Iehova lö hnine me kuca la itre xaa ewekë hna hnëkën hnene la hunahmi, matre nyine loi kowe la nöj. Hna amaman hnine la itus ngöne la itre götrane 402 me 403, la itre mekun ka nyimutre, nge ka lolo, ka troa aijijë së troa catre qaja me hmekën pala hi la aqane troa tro fë la itre mekune cili.—1 Pet. 3:15.
4 Tune la hna amaman hnene la aqane mel ne la itre xaa trejin, maine tro së a mejiun koi Iehova ngöne la thith, eje hi lai, laka, tro ha aijijë së troa kapa la ixatua qaathen la uati hmitrötr, ene pe kola upi së troa ithanata me catre hamën la itre mekune së, nge easë mina fe a hmekën la aqane tro sa qaja la itre mekune cili.—Ite Huliwa 5:29.