Kola Sa La Itre Hnyinge i Nyipunie

◼ Ngöne nemene la easë a qaja ka hape ijije fe hë troa hane cainöj hnene la itre neköne ka co ne lo itre keme me thin Keresiano, qëmekene troa kepe angatr ceitune me itretre cainöj hna thaa bapataisone petre kö?

Kola ajan hnene la itre keme me thin tro la itre nekö i angatr ka co a itre hlue i Iehova elanyi ka macaj me ka catre lapaun. (1 Sam. 2:18, 26; Luka 2:40) Ngacama co petre kö angatr, ngo loi e tro la itre nekönatr hnine la itre hnepe lapa ka Keresiano, a atreine troa cilëgöline la lapaune i angatr hna nyitrepene hnene la Tusi Hmitrötr. Kola kökötre nyimenyime la itre nekönatr ngöne la götrane la ua, ngöne la angatr a canga hane ce tro memine la itre keme me thine i angatr troa hane cainöje trootro. Ngo nyipi ewekë troa eje e kuhu hni angatr la aja cili matre tro angatr a hetre hni ne ajan troa cainöj, me thele troa ketre ka cainöj hna thaa bapataisone petre kö, nge matre tro pala hi angatr a catre xome la huliwa ne cainöjën la Baselaia. Nyipi ewekë catr troa inine hnyawa hnene la itre keme me thin la itre nekö i angatr. (1 Tim. 4:6; 2 Tim. 2:15) Maine jë tro fe la itre xaa trejin ka maca troa ini a hane ixatua ngöne la itre xaa ijin, e hna nue angatr hnene la itre keme me thin.​—Wange ju la itus Notre ministère götrane 100.

Ame ngöne la kola ce tro hnene la itre nekönatr ka loi thiina memine la itre keme me thine i angatr Keresiano troa cainöj ngöne itre hnalapa trootro, nyudrene fe a hane inin troa cainöj. Ngo thaa hna kepe angatre petre kö ceitun me ketre atr ka cainöj hna thaa bapataison, qa ngöne laka thaa mama pala kö ka hape hnei angatre hë hna hane isa sipu eköth la atrein memine la inamacan ngöne la hnëqa cili. Atreine hi troa axeciën hnene la itre keme me thin Keresiano la pengöne la nekönatr göi huliwa ne cainöj, pine laka angatr a ce tro fë la maca ka loi me nyudren. Ame koi itre nekönatr thaa hna kapa petre kö ceitun me ketre atre cainöj hna thaa bapataisone petre kö, tre thaa loi kö tro angatr a kuca caasin la itre vizit, maine ce cainöje pena memine la itre xaa nekönatr. Tro la itre keme me thin a hnëkën la itre nekö i angatr troa cainöj ngöne itre hnalapa trootro, me nue angatr troa xome la itre xaa jëne cainöj, maine tro hi a e la ketre xötr ne la Tusi Hmitrötr, me hamën la ketre tarak maine ketre zonal, maine troa amamane kowe la atr la ketre iatr hnine la ketre itus. Ame hë la nyëne a tru trootro, maine jë atreine hë angeic troa hane eköthe hnyawa la itre mekun nyine troa ithanatan.

Maine lolo la aqane ini angatr troa cainöj, tro hë la itre thöth a trotrohnine hnyawa la enyipiewekëne la hnëqa cili, ene pe angatr a kapa la itre mekune nyine ixatua hna hamën hnene la itre keme me thine i angatr me thupëne hnyawa la aqane ujë i angatr. Thaa loi kö troa nue hnene la itre keme me thin la itre nekö i angatr troa cainöj memine la itre xan ngöne la ijine icasikeu thatraqane la huliwa ne cainöj, e thaa ase petre kö hane kepe nyudren ceitun me ketre atre cainöj hna thaa bapataisone petre kö maine pena troa ce ithanatane hë me ketre trejine matre ce cainöj. Ame koi itre keme me thin ka hnehengazon la itre nekönatr, angatr a atrehmekune hnyawa laka hnëqa i angatr troa thupëne mina fe la aqane cainöje ne la itre nekö i angatr. Eje hi lai laka, maine jë tro mina fe la itre trejine hna mejiune kow a hane hamën la ixatua i angatr troa hane akökötren la atreine ne la itre nekönatr ka hetre hni ne ajan troa nyihlue i Iehova ngöne la hna cainöje trootro.