Hane Kö Epuni Thele Wangatrehmekune Qa Hnine La Tusi Hmitrötr?
1 Ame la soc hlëmek ka tro troa isi, ke hetrenyi thei angeice la itre jiane ne isi nyine thupë angeic. Ketre ame la atr huliwa inamacane ngöne la angeice a hnëkëne troa eköthe la ketre huliwa ka tru, ke, loi e troa hetrenyi thei angeice la nöjei jiane huliwa matre troa nyipune hnyawane la huliwa i angeic. Ka ceitune lai memine la hlue i Iehova ka saene kowe la huliwa ne cainöje trootro, loi e eje ngöne la ihnatrapaime i angeic la taua, nge ngöne la nöjei ijine troa atreine huliwan’ej. (Efe. 6:17) Nyipici kö lai koi epun? Hawe ngöne la ijine cainöje trootro, hapeu, nue jëne kö së la wesi ula i Akötresie troa ithahnata matre tro la uati hmitrötre i Nyidrë a ketr la wenethëmine la itre ka kepe së? — Itre Edromë 8:1, 6.
2 Tha ka hmaloi kö la huliwa ne cainöje trootro ngöne la itre xaa ijin. Ame ngöne la itre xaa götrane nöj, ke, nyimu ijine la ka ala xalaithe la itre atr hne së hna öhne ngöne la itre hnalapa, ngo itre ka hetre jolen, matre tha ijije kö troa ithahnataan’aqeanyine la Tusi Hmitrötr. Nge maine eje hi laka Tusi Hmitrötre la pane tusi ne huliwa së, hawe, nemene la aqane tro së a huliwaane atrun’eje matre nuejëne la maca ne la ua troa ketr la hnine la itre ka kepe së?
3 E nöjei ijin: Ngöne la nöjei qëhnelö hne së hna troa fenafena, ke, easë a ajane troa xatuane la itre atr jëne la Tusi Hmitrötr. Loi e tro së a hnëkëne matre hane jë kapa la itre tusi hnene la itre ka tha hane nyipiewekën’itr’ej. Maine ka hetre jolene la atr, nge pëkö ijine troa fe koi angeice la Tusi Hmitrötre, maine troa e la casi maine lue xötr, ke, hapeu matre e gufane jë pena la ketre xötre ne la Tusi Hmitrötre qëmekene la troa hamë itus? Celëhi aqane tro lai a acilëne la atr matre troa pane drei së. — Heb. 4:12.
4 Hanawange la ketre ceitune, maine hetrenyi thei epuni lo Réveillez-vous! ne diseba drai 8, 1993, lo ketre taane hna cyinihane ka hape: “Un monde sans maladie,” amamane jë hi lai iatre ngöne la icetröne lai zonal, nge thupene lai, hnyinge ju ka hape: “Mejiune fe kö nyipë kowe la hna amamane celë, laka troa nyipune paluane la itre kucakuca, nge tro la nöjei atr a kapa madrine la egöcatre ka pexej?” Ceitune hi la aqane tro nyidrë a sa, ngo ijije tro epuni a thele jëne troa e mekötine ngöne la Tusi Hmitrötre i epuni maine tro pena hi a qaja la mekune ne la Isaia 33:24, maine Hna Amamane 21:4. Celë hi aqane tro lai a fe jëne la wesi ula i Akötresie troa ithahnata.
5 Ngöne la itre iwai hmaca: Loi e troa hnëkë hnyawa qëmekene tro së a iwai hmaca, pine laka, hna majamine troa amexeje koi së la itre taane ithahnata hne së hna tha hnëkën. Itre ijine lai tro la itus “Comment raisonner à partir des Ecritures” a mama ceitune me ketre jiane huliwa ka ijij. Tro la itre mekune hne së hna qaja me e qa hnine lai itus “Comment raisonner” a xatuane la itre atr troa wange hnyawa ka hape itre hlue i Akötresieti së, ngo tha ange ka amenune kö la wesi ula i Nyidrë. — 2 Kor. 2:17.
6 Ame la ijine easë a bëek, nge maine pëkö sipu mekune nyine troa ithahnataan, ke, fe pi lai itus Comment raisonner hmekune la ketre mekune tune lo “Jésus Christ”, “Derniers jours” maine “Résurrection”, nge nyiqaane jë la porotrike jëne lai ketre taane cili. Loi e troa sipone kowe la itre atr troa e la itre hna cyinihane ngöne la sipu Tusi Hmitrötre i angatre kö. Hawe aqane tro së lai a amamane ka hape ka mene la wesi ula i Akötresie koi angatre fe, nge e tro angatr’a kapa ej, ke, jëne tro angatre lai a kapa fe la uati hmitrötre i Iehova.
7 Ketre hnëqa së lai katru, ene la troa cainöjëne la Maca ka loi me thuemacane la itre atr ka ngazo. Nge tha maca së kö lai, ngo maca qa thei Iehova. Epi tro la wesi ula i Akötresie, ene la taua ne la ua, a xatua nyipunie.