Loi e Troa Atreine Eë Hnyawa La Tusi Hmitrötr
1. Nemene la nyine troa kuca ngöne la easë a hnëkë troa cainöj ngöne itre hnalapa trootro?
1 Ngacama hne së hna hnëkën troa hamën la ketre itus ngöne la hne së hna cainöje trootro, ngo ka lolo catre kö e tro sa iën la ketre xötr ka troa upe la itre atr ka drei së troa hane thele mekun. (Heb. 4:12) Maine tro sa iën la ketre xötr ne la Tusi Hmitrötr hna hamën e hnine la ketre itus hne së hna tro fë kowe la itre atr, haawe, thaa tro kö a jole tro sa tro fë la itus jëne la xötre cili hne së hna xom ngöne la easë a nyiqaane ithanata. Ame ngöne la itre xaa götran, kola öhne hnene la itretre cainöj laka, ka lolo catr e troa xometrongën la Tusi Hmitrötr ngöne la angatr a nyiqaane ithanata memine la itre atr, maine ngöne la angatr a cainöj ngöne itre hnalapa trootro.
2. (a) Tune kaa la aqane troa eköth la porotrik jëne la ketre xötr ne la Tusi Hmitrötr? (b) Nemene la itre mekun qa hnine la Tusi Hmitrötr ka troa ketr la mele ne la itre atr ngöne la teritoare së?
2 Eköthe Jë La Porotrik Jëne La Ketre Xötr: Kola nyiqaane ithanata hnene la itre xaa trejin jëne la ketre hnying hnei angatre hna xom matre troa thele la hna mekun hnene la ketre atr, ngöne la ketre xötr ne la Tusi Hmitrötr hnei angatr hna troa e. Aqane tro hi lai a canga ea mekötine lai atr kowe la Wesi Ula i Akötresie. Hapeu, tro kö a hetre thangane ka loi elanyi ngöne la götrane së, la itre xaa aqane nyiqaane ithanata celë?
◼ “Maine ijije hi tro nyipunieti a kuca aloine la itre ewekë, tro kö nyipunieti a saze itre ej?” E jë la Hna Amamane 21:4.
◼ “Pine nemen matre easë a melën enehila la ketre hneijine ka jole catr?” E jë la 2 Timoteo 3:1-5.
◼ “Tune kaa la mekune i epun, tro kö a lolo la aqane mele ne la nöje së, e hnene la itre atren hna xötrethenge la eamo celë?” E jë la Mataio 7:12.
◼ “Tune kaa la hnei epuni hna mekun, ijije kö troa hane kapa madrin hnene la itre nekö i nyipunieti elany la itre aqane mel hna qejepengön e celë?” E jë la Salamo 37:10, 11.
◼ “Tune kaa la mekune i nyipunie, tro kö a eatr elanyi la itre trenge ewekë celë?” E jë la Isaia 33:24.
◼ “Hapeu, atre fe hi epuni la aqane troa saze musi elanyi hna qaja e celë?” E jë la Daniela 2:44.
◼ “Hane kö nyipunieti thele troa qaja koi Iehova la hnyinge celë?” E jë la Iobu 21:7.
◼ “Ijije kö tro sa iöhnyi hmaca memine la itre atr hne së hna hnim ka meci hë?” E jë la Ioane 5:28, 29.
◼ “Atre fe kö hnene la itre ka mec la hna kuca hnene la itre ka mel?” E jë la Ate Cainöj 9:5.
3. Tune kaa la aqane tro sa xatuan la itre atr troa trotrohnine la itre xötr ne la Tusi Hmitrötr hne së hna e?
3 Qejepengöne Jë, Hamë Ceitune Jë, Nge Xomi Ini Jë Qa Ngön: Maine kola ajan hnene la ketre atr troa porotrik, the canga lö hnine kö me sesë troa ithanata. Thele ijine jë troa qejepengön, me hamë ceitun, me xomi ini qa ngöne la ketre xötr ne la Tusi Hmitrötr hne së hna e, matre troa trotrohnine hnene lai atr. (Neh. 8:8) Ame ngöne la kola trotrohnine hnene la itre atr me kapa hnei angatr la ini qa hnine la Wesi Ula i Akötresie, ame e cili, ijije hi troa saze me lolo la aqane mele i angatr.—1 Thes. 2:13.
4. Nemene la aqane tro sa xome hnyawa la Tusi Hmitrötr ngöne la itre ijine easë a iwai hmaca?
4 Catre pi së troa eë hnyawa la Tusi Hmitrötr ngöne la easë a eköth la aja ne la itre atr. Ijije hi tro sa xome la aqane cainöje celë ngöne la easë a iwai hmaca: (1) Iëne jë la ketre xötr ne la Tusi Hmitrötr ka ijij. (2) Hnyingëne jë la mekuna i angeice ngöne lai xötre cili. E jë. (3) Qejepengöne jë, hamëne jë la ketre ceitun, nge xomi ini jë qa ngön. Thele jë troa hamë itre xaa mekune ka hnyipixe me xatuane lai atr troa atrehmekune la Wesi Ula i Akötresie ngöne la nöjei ijin easë a troa wai angeic. Nge thaa hmitre kö, nge atreine hi troa nyiqaane inine la Tusi Hmitrötr me angeic!