Nyipunieti Kö a Eatrën Hnyawan La Huliwa Ne Cainöje i Nyipunie?
1 Ngön la itus Ite Huliwa, kola qaja ka hape itretre drei i Iesu a kuca la huliwa ne cainöje i angatr, ngöne laka angatr a “cainöje” kowe la itre atr. (Ite Huliwa 2:40; 8:25; 28:23) Celë fe lo aja i Paulo aposetolo lai. (Ite Huliwa 20:24) Hapeu, nyipunie angetre tro fë la maca ka loi, thaa celë fe kö la aja i nyipunieti lai? Tune kaa la aqan tro nyipunie a eatrëne lai?
2 Hnëkëne Jë La Aqan Nyiqaan Ithanata i Nyipunie: Nyipi ewekë catr troa hnëkë, maine nyipunie a ajan troa hetre thangan ka loi hna kapa qa ngön la huliwa ne cainöj. Ka nyipici la mekun celë ngöne la kola tro fë zonal, ke, thaa caasi kö la taane mekun hna qeje pengön. Hna amë ngöne la Huliwa Ne Baselaia celë la ketre götran ka hnyipixe, göi troa xatua së ngöne la huliwa ne cainöj, ene la itre xaa aqane nyiqaan ithanata ka hmaloi, matre troa tro fë la itre zonal La Tour de Garde me Réveillez-vous ! Tro la taan mekun ka troa ketr la itre atr ka nyimutre ngön la ijin ka ijij, a mama ngöne la ketre zonal. Tune kaa la aqan tro nyipunie a hnëkën, la itre aqane nyiqaan ithanata ka thaa qea kö?
3 Iëne jë la ketre mekun ka ixatua, ka troa hetre thangan ka loi ngöne la teritoar i nyipunie. Pane e hnyawane jë la hna cinyihan ngön la zonal, nge xome jë la itre xaa mekun ka troa ahlën la aja ne la atr. Thele jë la ketre mekene tus hna fejan ngön la hna cinyihan ka ihmeku memin la hna ithanatan, nge ijij tro nyipunie a e ej kowe la atr. Qaja ju fe la ketre mekun ka thaa qea kö nyine nyipun, matre troa xatuan la atr ka drei së troa hane e la zonal, nge, maine ijij tre, hane ju fe qaja kowe lai atr ka hape ijij tro angeic a hane hamë mani nyine xatuan la huliwa ne la itre Temoë i Iehova e cailo fen. Ame enehila, tre, amacane jë la aqane nyiqaan ithanata i nyipunie.
4 Hnëkë Jë Troa Huliwan La Tusi Hmitrötr: Maine tro nyipunie a hnëkë hnyawa, tre, ijij tro nyipunie a hane amaman la caa mekene tus ngöne la aqane nyiqaan ithanata i nyipunie. Hanawang la ketre ceitun, nyimutre la itretre cainöj ka maca ngöne la itre götran ka nyimutre, angatr a cainöje trootro ngöne la itre hnalapa me xometrongën la Tusi Hmitrötr, angatr a ibozu memine lai atr, me qaja ka hape:
◼ “Eahuni a hnyingën kowe la itre atr maine angatre kö a jele nyipicin la . . .” E jë la Genese 1:1, nge thupene lai, hnyinge jë ka hape: “Hapeu, mekuna i nyipunieti fe hi lai?” Maine kola nang hnene lai atr, tre, qaja ju ka hape: “ketre tunge mina fe. Ngo, hapeue la mekuna i nyipë, maine hnei Akötresie hna xup la nöjei ewekë asë, nyidrëti fe la atrekë zön la iangazo?” Thupene la hna dreng la kola sa hnene lai atr, tre, e jë la Ate Cainöj 7:29. Fe jë la itus Atrehmekune kowe la götran 71, nge e jë la paragaraf 2. Xatuane jë lai atr troa e la itus. Maine thaa jele nyipicine kö la atr la hna qaja ngöne Genese 1:1, tre, upi angeice jë troa e la itus Création.
5 Xupexatuane Jë La Aja Ka Ej Then La Nöjei Atr: Thatreine kö tro nyipunie a eatrën asë la huliwa ne cainöje i nyipunie, maine thaa hnei nyipunieti kö hna xupexatuan la aja ka ej then la itre atr. Maine lolo la porotrike i nyipunie memine la ketre atr, nge thaa kapa kö angeic la itre zonal, maine ketre itus pena, tre, xome jë la ëjen la atr, me aderes i angeic. Tupathe jë troa canga akökötren la aja then la atr, ngöne la kola iwaihmaca. Thele jëne jë troa inin la Tusi Hmitrötr memin la itre atr.
6 Atre hnyawa la itretre dreng laka, hnei Iesu hna upi angatr troa “cainöj.” (Itre Huliwa 10:42) Thatraqa së fe la hna amekötin celë, ke, sipu jëne tro fe së lai a inin la itre atr matre tro angatr a hane itretre drei i Iesu. (Mat. 28:19, 20) Epi tro sa kuca asë la hne së hna atrein, matre troa eatrën hnyawa la huliwa ne cainöje së.—2 Tim. 4:5.